1 Corinthians 11

Shan

← Chapter 10 Jump to: Chapter 12 →

1ၸိူဝ်ႉၼင်ႇဢၼ် ၵဝ်ၵမ်ၵျၢင်ႉမိူၼ်ၸိူဝ်ႉၼင်ႇၸဝ်ႈၶရိၸ်ႈၼၼ်ႉ သူၵေႃႈၵမ်ၵျၢင်ႉမိူၼ်ၸိူဝ်ႉၼင်ႇၵဝ်တႃႉ။

2ပီႈၼွင်ႉၶဝ်ဢိူၺ်း၊ ၵွပ်ႈပိူဝ်ႈဢၼ်သူၶုၵ်းၸႂ်လႆႈၶႆႈၸႂ်ထူပ်းၵဝ် ၵႃႈၼႂ်းၵူႈၸိူဝ်ႉၵူႈပိူင်လႄႈၸွႆးၸပ်းၼႄးဢူႉပတေႇ ဢၼ်ၵဝ်ဢၢပ်ႈပၼ်ဝႆႉၼၼ်ႉလႄႈၵဝ်ယွင်ႈယေႃးသူယူႇဢေႃႈ။

3ႁူဝ်ၵူၼ်းၸၢႆးၸမ်ႉ၊ ပဵၼ်ၸဝ်ႈၶရိၸ်ႈဢေႃႈဝႃႈၼႆလႄႈသင်၊ ႁူဝ်ၵူၼ်းယိင်းၸမ်ႉ၊ ပဵၼ်ၵူၼ်းၸၢႆးဢေႃႈဝႃႈၼႆလႄႈသင်၊ ႁူဝ်ၸဝ်ႈၶရိၸ်ႈၸမ်ႉ၊ ပဵၼ်ၽြႃးပဵၼ်ၸဝ်ႈဢေႃႈဝႃႈၼႆလႄႈသင်၊ ၵဝ်မီးဢလူဝ်ႇၶႂ်ႈႁႂ်ႈသူမၢတ်ႈတွင်းဝႆႉဢေႃႈ။-

4ၵူၼ်းၸၢႆးၵေႃႉလႂ်သေဢမ်ႇဝႃႈ၊ မိူဝ်ႈဢၼ်သူးတွင်းလႄႈသင်၊ မိူဝ်ႈဢၼ်ႁဵတ်းပရေႃးၽႅတ်ႈလႄႈသင်၊ ပေႃးႁူမ်ႇႁူဝ်တူဝ်ၸဝ်ႈၵဝ်ႇဝႆႉၸိုင်၊ ယႃႉသရေႇႁူဝ်တူဝ်ၸဝ်ႈၵဝ်ႇဢေႃႈ။-

5ၵူၼ်းယိင်းၵေႃႉလႂ်သေဢမ်ႇဝႃႈ၊ မိူဝ်ႈဢၼ်သူးတွင်းလႄႈသင်၊ မိူဝ်ႈဢၼ်ႁဵတ်းပရေႃးၽႅတ်ႈလႄႈသင်၊ ပေႃးဢမ်ႇႁူမ်ႇႁူဝ်တူဝ်ၸဝ်ႈၵဝ်ႇဝႆႉၸိုင်၊ ယႃႉသရေႇႁူဝ်တူဝ်ၸဝ်ႈၵဝ်ႇဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ မိူၼ်ၸိူဝ်ႉၼင်ႇဢၼ်မၼ်းၶၢမ်ႇတၢင်းဢၼ်ထႃႁူဝ်မၼ်းဢေႃႈ။-

6ပေႃးၵူၼ်းယိင်းဢမ်ႇႁူမ်ႇႁူဝ်တူဝ်ၸဝ်ႈၵဝ်ႇဝႆႉၸိုင်ႁႂ်ႈမၼ်းတႅပ်းၶူၼ်ႁူဝ်မၼ်းသေ။ ပေႃးတၢင်းဢၼ်တႅပ်းၶူၼ်ႁူဝ်ဢိၵ်ႇတင်းတၢင်းဢၼ်ထႃႁူဝ်ၼၼ်ႉ မီးလွင်ႈဢၼ်လီဢူၵ်းလီဢၢႆၸိုင်၊ ႁႂ်ႈမၼ်းႁူမ်ႇႁူဝ်မၼ်းသေ။-

7ၵူၼ်းၸၢႆးၸိုင်ၵွပ်ႈပိူဝ်ႈဢၼ်ပဵၼ်ပုင်ႇႁၢင်ႈမုၼ်သရေႇၽြႃးပဵၼ်ၸဝ်ႈလႄႈ ဢမ်ႇလႆႈႁူမ်ႇႁူဝ်တူဝ်ၸဝ်ႈၵဝ်ႇ။ ၵူၼ်းယိင်းၸမ်ႉ၊ ပဵၼ်မုၼ်ၽုင်းသရေႇၵူၼ်းၸၢႆးဢေႃႈ။-

8လွင်ႈမၼ်းၸမ်ႉၵူၼ်းၸၢႆးပဵၼ်ၵွပ်ႈပိူဝ်ႈၵူၼ်းယိင်းဢမ်ႇၸႂ်ႈ။ ၵူၼ်းယိင်းပဵၼ်ၵွပ်ႈပိူဝ်ႈၵူၼ်းၸၢႆးဢေႃႈ။-

9မၼ်းၸဝ်ႈၽၢၼ်ႇသၢင်းႁဵတ်းပဵၼ်ၵူၼ်းၸၢႆးပုၼ်ႈၵူၼ်းယိင်းဢမ်ႇၸႂ်ႈ။ ၽၢၼ်ႇသၢင်းႁဵတ်းပဵၼ်ၵူၼ်းယိင်းပုၼ်ႈၵူၼ်းၸၢႆးဢေႃႈ။

10ပိူဝ်ႈၼႆလႄႈၵူၼ်းယိင်းတၵ်းလႆႈမီးလၢၵ်ႈၶၼႃႇ တၢင်းဢၼ်ၵူၼ်းၸၢႆးဢုပ်ႉပိူင်ႇၼၼ်ႉ ၵႃႈၼိူဝ်ႁူဝ်မၼ်း ၵွပ်ႈပိူဝ်ႈတမၢၼ်ႇၵၢင်ႁၢဝ်တင်းလၢႆဢေႃႈ။-

11ၵူၺ်းၵႃႈ ၼႂ်းၸဝ်ႈၽြႃးၸိုင် ၵူၼ်းၸၢႆးယင်းဢမ်ႇပႃးလႄႈၵူၼ်းယိင်းပဵၼ်ဢမ်ႇၸႂ်ႈ။ ၵူၼ်းယိင်းယင်းဢမ်ႇပႃးလႄႈၵူၼ်းၸၢႆးပဵၼ်ဢမ်ႇၸႂ်ႈ။-

12ၸိူဝ်ႉၼင်ႇဢၼ်ၵူၼ်းယိင်းပဵၼ်ၵွပ်ႈပိူဝ်ႈၵူၼ်းၸၢႆးၼၼ်ႉ၊ ၵူၼ်းၸၢႆးၵေႃႈပဵၼ်မႃးၵႃႈတီႈၵူၼ်းယိင်းဢေႃႈ။ ၵႃႈမီးတင်းသဵင်ႈတင်းလူင်ၵေႃႈ ပဵၼ်ၵွပ်ႈပိူဝ်ႈၽြႃးပဵၼ်ၸဝ်ႈဢေႃႈ။

13ပေႃးၵူၼ်းယိင်းယင်းဢမ်ႇႁူမ်ႇႁူဝ်လႄႈ သူးတွင်းၽြႃးပဵၼ်ၸဝ်ႈၸိုင် ထုၵ်ႇႁိုဝ်ဢမ်ႇထုၵ်ႇႁိုဝ်ဝႃႈၼႆ၊ ၶႆႈၸႂ်တူၺ်းလႄႈၸီႇယၢင်ႇႁင်းၽႂ်ႁင်းမၼ်းတႃႉ။-

14ပေႃးၵူၼ်းၸၢႆးမီးၶူၼ်ႁူဝ်ဢၼ်ယၢဝ်းၸိုင် ပဵၼ်လွင်ႈဢၼ်လီဢူၵ်းလီဢၢႆဝႃႈၼႆ၊ ပၵတီႉတြႃးသင်ႇသွၼ်သူယူႇဢမ်ႇၸႂ်ႈႁိုဝ်။-

15ၵူၼ်းယိင်းၸမ်ႉ၊ ပေႃးမီးၶူၼ်ႁူဝ်ဢၼ်ယၢဝ်းၸိုင်၊ ပဵၼ်မုၼ်သရေႇမၼ်းဢေႃႈ။ လွင်ႈမၼ်းၸမ်ႉၶူၼ်ႁူဝ်ၵူၼ်းယိင်းၼၼ်ႉပဵၼ်ပုၼ်ႈဢၼ်မၼ်းတၵ်းႁူမ်ႇတၵ်းမႆဢေႃႈ။

16ၵူၺ်းၵႃႈ ပေႃးသေၵေႃႉသေၵူၼ်း မိူၼ်ၼင်ႇႁၢင်ႈတၵ်းတွပ်ႇတၵ်းထဵင်ၸိုင် ထုင်းၸၢမ်ႇၸိူဝ်ႉၼင်ႇၼၼ်ဢမ်ႇမီးတီႈႁဝ်း။ ဢမ်ႇမီးတီႈၸိူဝ်းၸဝ်ႈၽြႃးပဵၼ်ၸဝ်ႈတင်းလၢႆ။

17ပိူင်ၼိုင်ႈၸမ်ႉ၊ ၵွပ်ႈပိူဝ်ႈဢၼ်သူၸူႉၵၼ်တုမ်ၵၼ် ႁႂ်ႈလႆႈပွင်လႆႈႁဵတ်းဢၵျူဝ်းဢမ်ႇၸႂ်ႈ။ ၸူႉၵၼ်တုမ်ၵၼ်ႁႂ်ႈဢၵျူဝ်းလႆႈလဵၵ်ႉလၢႆႈၵေႇၵႂႃႇလႄႈ ၼႂ်းမိူဝ်ႈဢၼ်ၵဝ်ယင်းတိုၵ်ႉဝႆႉပိင်းၺၢပ်ႈယူႇၼၼ်ႉၸိုင်ၵဝ်ဢမ်ႇလႆႈယွင်ႈယေႃးသူ။-

18လွင်ႈပထမႃႉၸမ်ႉ၊ မိူဝ်ႈဢၼ်သူၸူႉၵၼ်တုမ်ၵၼ်ၼႂ်းၸိူဝ်းၸဝ်ႈၼၼ်ႉၸိုင်ၵဝ်လႆႈငိၼ်းသူမီးတၢင်းဢၼ်ၽၢတ်ႇၵၼ်ၽႄၵၼ်ဢေႃႈ။ ၵႃႈၼင်ႇဢၼ်လႆႈငိၼ်းၼၼ်ႉၸၢင်ႈၶႄးၸႂ်ႈဢေႃႈ။-

19လွင်ႈမၼ်းၸမ်ႉၼင်ႇႁိုဝ်ၶဝ်ၸိူဝ်းဢၼ်လီငၢမ်းၼၼ်ႉ တၵ်းလႆႈထၢင်ႇသႃးၵႃႈၼႂ်းသူၸိုင် တၢင်းဢၼ်ၽႄၵိူင်းၶႂၢႆးၵိူင်း တၵ်းလႆႈမီးတီႈသူဢေႃႈ။

20မိူဝ်ႈဢၼ်သူၸူႉၵၼ်တုမ်ၵၼ်ၼၼ်ႉၸိုင်၊ သူၸူႉၵၼ်တုမ်ၵၼ်ႁႂ်ႈလႆႈၵိၼ်ပွႆးၸဝ်ႈၽြႃးဢမ်ႇၸႂ်ႈ။-

21လွင်ႈမၼ်းၸမ်ႉ ၼႂ်းမိူဝ်ႈဢၼ်သူၵိၼ်ၼၼ်ႉၸိုင် သူဢွၼ်ၵၼ်ဢဝ်တၢင်းၵိၼ်တူဝ်ၸဝ်ႈၵဝ်ႇဢွၼ်တၢင်းႁင်းၽႂ်ႁင်းမၼ်းလႄႈ ၵမ်ႈၽွင်ႈၸမ်ႉ၊ တွင်ႉမႆႈယူႇ။ ၵမ်ႈၽွင်ႈၸမ်ႉ၊ ၵိၼ်ပူၼ်ႉၵိၼ်လိူဝ်ယူႇဢေႃႈ။-

22ပုၼ်ႈဢၼ်သူတၵ်းၵိၼ်ၸိုင်၊ သူဢမ်ႇမီးႁိူၼ်းႁိုဝ်။ ဢမ်ႇၼၼ် သူႁဵတ်းဢမ်ႇပေႃးၼင်ႇႁိုဝ် တီႈၸိူဝ်းၸဝ်ႈၽြႃးပဵၼ်ၸဝ်ႈလႄႈႁႂ်ႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉဢူၵ်းဢၢႆႁိုဝ်။ ၵဝ်တၵ်းလႆႈဝႃႈတီႈသူၸိူဝ်ႉၼင်ႇႁိုဝ်။ ၼႂ်းတီႈႁဵင်းၼႆႉၵဝ်တၵ်းလႆႈယွင်ႈယေႃးသူႁိုဝ်။ ၵဝ်ဢမ်ႇလႆႈယွင်ႈယေႃးၵူၺ်ႉ။

23လွင်ႈမၼ်းၸမ်ႉလွင်ႈဢၼ်ၵဝ်ဢၢပ်ႈပၼ်တီႈသူၼၼ်ႉၸိုင်ၵဝ်လႆႈၶၢမ်ႇဢဝ်ၵႃႈတီႈၸဝ်ႈၽြႃးယဝ်ႉ။ လွင်ႈဢၼ်ၵဝ်လႆႈၶၢမ်ႇဢဝ်ၼၼ်ႉၸမ်ႉ၊ မိူဝ်ႈၶမ်ႈဢၼ် ၸဝ်ႈ ယေႇသူႉ ၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းရၢၼ်ႇသူႇၼၼ်ႉ၊ မၼ်းၸဝ်ႈဢဝ်ၶဝ်ႈမုၼ်းလႄႈ၊-

24ယွင်ႈယေႃးၵျေးၸူးၸဝ်ႈသေယဝ်ႉ၊ ဝိတ်းၶဝ်ႈမုၼ်းလႄႈဝႃႈ၊ ၶဝ်ႈမုၼ်းၼႆႉၸမ်ႉ၊ ပဵၼ်တူဝ်ၵဝ်ဢၼ်လႆႈၶၢမ်ႇတၢင်းဢၼ်ႁၵ်းဝိတ်းပုၼ်ႈသူဢေႃႈ။ ဢွၼ်ၵၼ်ဢဝ်ၵိၼ်တႃႉ၊ ပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းၵဝ်ၸိုင်၊ ဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ၊ ဝႃႈၼင်ႇၼႆဢေႃႈ။-

25မိူၼ်ၼင်ႇၼၼ် ၵိၼ်ၶဝ်ႈၶမ်ႈသေယဝ်ႉ၊ ၵွၵ်းၵေႃႈမၼ်းၸဝ်ႈဢဝ်လႄႈဝႃႈ၊ ၵွၵ်းၼႆႉၸမ်ႉ၊ ပဵၼ်ပတီႉၺိၺ်ႇတြႃးဢၼ်မႂ်ႇဢၼ်တႄႇယူႇၼႂ်းလိူတ်ႈၵဝ်ဢေႃႈ။ ယၢမ်းမိူဝ်ႈဢၼ်သူၵိၼ်ၵွၵ်းၼႆႉၵူႈပွၵ်ႈ၊ ပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းၵဝ်ၸိုင် ဢွၼ်ၵၼ်ၵိၼ်တႃႉ၊ ဝႃႈၼင်ႇၼႆဢေႃႈ။-

26လွင်ႈမၼ်းၸမ်ႉယၢမ်းမိူဝ်ႈဢၼ်သူၵိၼ်ၶဝ်ႈမုၼ်းဢိၵ်ႇတင်းၵွၵ်းၼၼ်ႉၵူႈပွၵ်ႈ၊ သူၼႄပျႃးတၢင်းဢၼ်ၸဝ်ႈၽြႃးၶၢမ်ႇတၢင်းတၢႆၼၼ်ႉတေႃႇထိုင်ႁွတ်ႈၶိင်ႇဝၼ်းဢၼ်မၼ်းၸဝ်ႈတၵ်းမႃးပုၼ်ႉဢေႃႈ။

27ပိူဝ်ႈၼႆလႄႈ ၵေႃႉဢၼ်ယင်းဢမ်ႇထိူၵ်ႈတၢၼ်ႇလႄႈ ၵိၼ်ၶဝ်ႈမုၼ်းဢိၵ်ႇတင်းၵွၵ်းၸဝ်ႈၽြႃးၼၼ်ႉၸမ်ႉ၊ ႁွတ်ႈထိုင်တၢင်းဢၼ်ၽိတ်းပိူင်ႈတူဝ်ဢိၵ်ႇတင်းလိူတ်ႈၸဝ်ႈၽြႃးဢေႃႈ။-

28ၵွပ်ႈႁွႆးၼႆႉလႄႈႁႂ်ႈၵူၼ်းၵူႈၵေႃႉၸႅတ်ႈထၢမ်ၸႅတ်ႈတူၺ်းတူဝ်ၸဝ်ႈၵဝ်ႇယဝ်ႉၸင်ႇၵိၼ်ၶဝ်ႈမုၼ်းၼၼ်ႉသေၵမ်း။ မိူၼ်ၼင်ႇၼႆ ၵွၵ်းၼၼ်ႉၵေႃႈႁႂ်ႈမၼ်းၵိၼ်သေၵမ်း။-

29လွင်ႈမၼ်းၸမ်ႉၵေႃႉဢၼ်ယင်းဢမ်ႇထိူၵ်ႈဢမ်ႇတၢၼ်ႇလႄႈၵိၼ်ၼၼ်ႉၵွပ်ႈပိူဝ်ႈဢၼ်မၼ်းဢမ်ႇႁူႉဢမ်ႇႁၼ်တူဝ်ၸဝ်ႈၽြႃးလႄႈပဵၼ်ၵေႃႉဢၼ်ၵိၼ်ႁႂ်ႈဢပႅတ်ႈႁွတ်ႈထိုင်ၵႃႈၼိူဝ်တူဝ်ၸဝ်ႈၵဝ်ႇဢေႃႈ။

30ၵွပ်ႈပိူဝ်ႈလွင်ႈၼၼ်ႉလႄႈ ၼႂ်းသူၶဝ်ၸိူဝ်းဢၼ်ႁႅင်းလဵၵ်ႉႁႅင်းၵေႇ၊ ၶဝ်ၸိူဝ်းဢၼ်ဢမ်ႇယူႇလီမီးၼမ်ၼႃႇဢေႃႈ။-

31ၶဝ်ၸိူဝ်းဢၼ်ၼွၼ်းလပ်းၵႂႃႇၼၼ်ႉၵေႃႈမီးၼမ်ၼႃႇဢေႃႈ။ ပေႃးႁဝ်းၸႅတ်ႈထၢမ်ၸီႇယၢင်ႇတူဝ်ၸဝ်ႈၵဝ်ႇၸိုင်၊ ႁဝ်းတၵ်းၵၢင်းလွတ်ႈတင်းတၢင်းဢၼ်မၼ်းၸဝ်ႈၸႅတ်ႈထၢမ်ၸီႇယၢင်ႇဢေႃႈ။-

32မိူဝ်ႈဢၼ်ႁဝ်းလႆႈၶၢမ်ႇတၢင်းဢၼ်မၼ်းၸဝ်ႈၸႅတ်ႈထၢမ်ၸီႇယၢင်ႇၼၼ်ႉ၊ ႁဝ်းလႆႈၶၢမ်ႇတၢင်းဢၼ်မၼ်းၸဝ်ႈသင်ႇသွၼ်ပၼ် ႁႂ်ႈလႆႈၵၢင်းလွတ်ႈတင်းတၢင်းဢၼ်ၸီႇယၢင်ႇဢပႅတ်ႈလူၺ်ႈၵၼ်တင်းၵူၼ်းလေႃးၵီႇတင်းလၢႆဢေႃႈ။

33ပိူဝ်ႈၼႆလႄႈပီႈၼွင်ႉၶဝ်ဢိူၺ်း၊ မိူဝ်ႈဢၼ်သူၸူႉၵၼ်တုမ်ၵၼ်ႁႂ်ႈလႆႈၵိၼ်ၼၼ်ႉၸိုင်၊ ၵေႃႉၼိုင်ႈလႄႈၵေႃႉၼိုင်ႈပႂ်ႉထႃႈၵၼ်တႃႉ။-

34ပေႃးသေၵေႃႉသေၵူၼ်းတွင်ႉမႆႈၸိုင်၊ ၼင်ႇႁိုဝ်သူတၵ်းဢမ်ႇလႆႈၶၢမ်ႇဢပႅတ်ႈသေလႄႈၸူႉၵၼ်တုမ်ၵၼ်ၼၼ်ႉ၊ ႁႂ်ႈမၼ်းၼၼ်ႉၵိၼ်ၵႃႈတီႈႁိူၼ်းမၼ်းသေ။ လွင်ႈတၢင်းဢၼ်ၵိုတ်းဢၼ်ၵျၢၼ်ႇၸိုင်မိူဝ်ႈဢၼ်ၵဝ်မႃးၼၼ်ႉ၊ ၵဝ်တၵ်းၸီႇယၢင်ႇဢေႃႈ။

← Chapter 10 Jump to: Chapter 12 →