1 Corinthians 13

Shan

← Chapter 12 Jump to: Chapter 14 →

1ပိၵ်ႉသမ်ႉၵဝ်ၸၢင်ႈလၢတ်ႈၵႂၢမ်းၽႃႇသႃႇၵူၼ်း ဢိၵ်ႇတင်းၵႂၢမ်းၽႃႇသႃႇတမၢၼ်ႇၵၢင်ႁၢဝ်သေၵေႃႈ၊ ပေႃးၵဝ်ဢမ်ႇမီးမႅတ်ႈတႃႇၸိုင် ပဵၼ်ၸိူဝ်ႉၼင်ႇပီႇၼႄးဢၼ်မေႃးသဵင်ဢိၵ်ႇတင်းၸိူဝ်ႉၼင်ႇသႅင်ႇ ဢၼ်ၸၢင်ႈပၼ်သဵင်ႁႄႇၵူၺ်းၼၼ်ႉဢေႃႈ။-

2ပိၵ်ႉသမ်ႉၵဝ်လႆႈၺၢၼ်ႇပရေႃးၽႅတ်ႈလႄႈမေႃၸၢင်ႈ တၢင်းဢၼ်လိုၵ်ႉဢၼ်လမ်ႇၵႃႈမီးတင်းသဵင်ႈတင်းလူင် ဢိၵ်ႇတင်းဢတၢတ်ႈပိင်ႇၺႃႇၵူႈၸိူဝ်ႉၵူႈပိူင်သေၵေႃႈ၊ ပိၵ်ႉသမ်ႉၵဝ်ပျေႉၸုမ်ႇတင်းတၢင်းဢၼ်ယုမ်ႇမၢတ်ႈၵူႈၸိူဝ်ႉၵူႈပိူင်ဢၼ်ၶၢႆႉလွႆတင်းလၢႆလႆႈသေၵေႃႈ၊ ပေႃးၵဝ်ဢမ်ႇမီးမႅတ်ႈတႃႇၸိုင် ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။-

3ပိၵ်ႉသမ်ႉၵဝ်ၽႄၸွၼ်းဢုၵ်ႉၸႃႇၵဝ်တင်းသဵင်ႈတင်းလူင်ႁႂ်ႈလႆႈလဵင်ႉပိူၼ်ႈဢမ်ႇၵႃး၊ ဢၢပ်ႈပၼ်တူဝ်ၶၼ်ႇထႃႇၵဝ် ႁႂ်ႈလႆႈတုတ်ႇၽႆးပႅတ်ႈသေၵေႃႈ ပေႃးၵဝ်ဢမ်ႇမီးမႅတ်ႈတႃႇၸိုင်ဢမ်ႇမီးဢၵျူဝ်းတီႈၵဝ်။

4မႅတ်ႈတႃႇၸိုင်ၸႂ်ယႂ်ႇၸႂ်ယၢဝ်းလႄႈ ၸၢင်ႈႁဵတ်းၵျေးၸူးဢေႃႈ။ မႅတ်ႈတႃႇၼၼ်ႉဢမ်ႇမီးတၢင်းဢၼ်ၶေႉၵၼ်ၶဵင်ႇၵၼ်။ ဢမ်ႇမီးတၢင်းဢၼ်ဢုပ်ႇဝၢဝ်း။ ဢမ်ႇမီးတၢင်းဢၼ်မႃႇၼႃႉၸႂ်သုင်။-

5ဢမ်ႇၸၢင်ႈၵမ်ၵျၢင်ႉတၢင်းဢၼ်ဢမ်ႇထုၵ်ႇဢမ်ႇလီ။ ဢမ်ႇၸၢင်ႈႁႃဢၵျူဝ်းတူဝ်ၸဝ်ႈၵဝ်ႇ။ တေႃးသႃႉတၢင်းၸႂ်မႆႈဢမ်ႇၸၢင်ႈဢွၵ်ႇ။ ဢမ်ႇၸၢင်ႈထၢင်ႇမီးဢပႅတ်ႈ။-

6ဢမ်ႇၸၢင်ႈသိူဝ်းပျေႃႇၼႂ်းလွင်ႈတၢင်းဢၼ်ဢမ်ႇတြႃးၼၼ်ႉ။ ၸၢင်ႈသိူဝ်းပျေႃႇၼႂ်းသမ်ႇမႃႇတြႃးဢေႃႈ။-

7ၸၢင်ႈႁူမ်ဝႆႉၵႃႈမီးတင်းသဵင်ႈတင်းလူင်ဢေႃႈ၊ ၸၢင်ႈယုမ်ႇၵႃႈမီးတင်းသဵင်ႈတင်းလူင်ဢေႃႈ။ ၸၢင်ႈမုင်ႈထႃႈမွင်းထႃႈၵႃႈမီးတင်းသဵင်ႈတင်းလူင်ဢေႃႈ။ ၸၢင်ႈယိူၼ်ႉၶၢမ်ႇၵႃႈမီးတင်းသဵင်ႈတင်းလူင်ဢေႃႈ။-

8မႅတ်ႈတႃႇၼၼ်ႉၵၢင်းလွတ်ႈတင်းၸႂ်သၽေႃးဢၼ်ၽွၵ်ႈပျၢၼ်ႇၶိုၼ်းၼၼ်ႉယူႇတႃႇသေႇဢေႃႈ။ ပေႃးမီးၺၢၼ်ႇပရေႃးၽႅတ်ႈၸိုင်၊ ၸၢင်ႈႁၢႆလၢႆဢေႃႈ။ ပေႃးမီးဢၶႂၢင်ႉဢၼ်ၸၢင်ႈလၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ၸိုင်တၵ်းထၢတ်ႇသုတ်းဢေႃႈ။ ပေႃးမီးဢတၢတ်ႈပိင်ႇၺႃႇၸိုင်တၵ်းႁၢႆလၢႆဢေႃႈ။-

9တေႃႈလဵဝ်ၼႆႉၸမ်ႉ၊ ႁဝ်းႁူႉဢမ်ႇၸေးဢမ်ႇၸွတ်ႇဢေႃႈ။ ၸၢင်ႈမီးတင်းၺၢၼ်ႇပရေႃးၽႅတ်ႈႁေႃးလၢတ်ႈဢမ်ႇၸေးဢမ်ႇၸွတ်ႇဢေႃႈ။-

10မိူဝ်ႈဢၼ်ႁွတ်ႈထိုင်တၢင်းဢၼ်ၸေးၸုမ်ႇၼၼ်ႉၸမ်ႉ၊ တၢင်းဢၼ်ဢမ်ႇၸေးၸုမ်ႇၼၼ်ႉတၵ်းႁၢႆလၢႆဢေႃႈ။

11မိူဝ်ႈဢၼ်ၵဝ်ပဵၼ်လုၵ်ႈဢွၼ်ႇၼၼ်ႉၸိုင်၊ ၵဝ်ၸၢင်ႈလၢတ်ႈၵႂၢမ်းၸိူဝ်ႉၼင်ႇလုၵ်ႈဢွၼ်ႇဢေႃႈ။ ၸၢင်ႈထၢင်ႇၸိူဝ်ႉၼင်ႇလုၵ်ႈဢွၼ်ႇဢေႃႈ။ ၸၢင်ႈၵျၢမ်ႇၸၢင်ႈပွင်ၸိူဝ်ႉၼင်ႇလုၵ်ႈဢွၼ်ႇဢေႃႈ။ မိူဝ်ႈဢၼ်ဢသၢၵ်ႈယႂ်ႇၸမ်ႉ၊ ၵဝ်ပႅတ်ႈဝႆႉလွင်ႈတၢင်းဢၼ်ၸၢပ်ႈသႅင်ႇၵၼ်တင်းလုၵ်ႈဢွၼ်ႇၼၼ်ႉဢေႃႈ။-

12တေႃႈလဵဝ်ၼႆႉ ႁဝ်းယႅၵ်ႉၸမ်ႈလႄႈႁၼ်မူဝ်းမူဝ်းယူႇၵူၺ်းဢေႃႈ။ ဝၼ်းလိုၼ်းမိူဝ်းၼႃႈၸမ်ႉ၊ ႁဝ်းတၵ်းလႆႈႁၼ်သိုဝ်ႈၼႃႈထၢင်ႇသႃးဢေႃႈ။ တေႃႈလဵဝ်ၼႆႉတၢင်းဢၼ်ၵဝ်ႁူႉၵဝ်ႁၼ် ပဵၼ်ဢၼ်ဢမ်ႇၸေးဢမ်ႇၸုမ်ႇဢေႃႈ။ ဝၼ်းလိုၼ်းမိူဝ်းၼႃႈၸမ်ႉ၊ ၵဝ်တၵ်းလႆႈႁူႉမိူၼ်ၸိူဝ်ႉၼင်ႇဢၼ်ပိူၼ်ႈတၢင်ႇၵေႃႉႁူႉၵဝ်ၼၼ်ႉဢေႃႈ။

13တေႃႈလဵဝ်ၼႆႉ တၢင်းယုမ်ႇမၢတ်ႈ၊ တၢင်းမုင်ႈထႃႈမွင်းထႃႈ၊ တၢင်းႁၵ်ႉမႅတ်ႈတႃႇ သၢမ်ပႃးၼႆႉတႄႇဝႆႉမီးယူႇဢေႃႈ။ ၼႂ်းသၢမ်ပႃးၼႆႉ တၢင်းႁၵ်ႉမႅတ်ႈတႃႇ ပဵၼ်ဢၼ်မျၢတ်ႈၼႃႇသေပိူၼ်ႈဢေႃႈ။

← Chapter 12 Jump to: Chapter 14 →