Ecclesiastes 1

Shan

Jump to: Chapter 2 →

1ၵႂၢမ်းသြႃႇထမ်ႇမႃႉတေႇသၼႃႇ ဢၼ်ပဵၼ်ၶုၼ်လူင်ၵႃႈၼႂ်းဝဵင်း ယေႇရူႉသလႅမ်ႇ လႄႈ ပဵၼ်လုၵ်ႈၸၢႆး တႃႇဝိတ်ႈ ၼၼ်ႉၸမ်ႉ၊-

2သြႃႇထမ်ႇမႃႉတေႇသၼႃႇဝႃႈ၊ ဢၼတ်ႉတႃႉလွၼ်ႉလွၼ်ႉ။ ဢၼတ်ႉတႃႉလွၼ်ႉလွၼ်ႉ။ လွင်ႈတၢင်းၵူႈၸိူဝ်ႉၵူႈပိူင်ပဵၼ်ဢၼတ်ႉတႃႉ ဢေႃႈ။-

3ၵႃႈတီႈတၢင်းႁဵတ်းတၢင်းသၢင်ႈ ၵႃႈဢၼ်ၵူၼ်းၵျူဝ်းၸႃးဢဝ်ႁႅင်းဢွၵ်ႇႁဵတ်းသၢင်ႈ ၵႃႈတႂ်ႈၵၢင်ဝၼ်းၸိူဝ်းၼၼ်ႉမီးဢၵျူဝ်းၵႃႈသင်။-

4ၵူၼ်းသိုပ်ႇၼိုင်ႈ ပူၼ်ႉၵႂႃႇဢေႃႈ။ သိုပ်ႇၼိုင်ႈ ပေႃႇပဵၼ်မႃးဢေႃႈ။ လိၼ်မိူင်းၸမ်ႉ၊ တႄႇယူႇတႃႇသေႇဢေႃႈ။-

5ၵၢင်ဝၼ်းၵေႃႈဢွၵ်ႇယူႇတူၵ်းယူႇ၊ သမ်ႉၶိုၼ်းၶုၼ်ႇလႅၼ်ႈၸူးၵႃႈတီႈဢၼ် မၼ်းယၢမ်ႈဢွၵ်ႇယူႇၼၼ်ႉဢေႃႈ။-

6လူမ်းၵေႃႈ ၸၢင်ႈၸွမ်းသဵၼ်ႈတၢင်းၸၢၼ်းၵႂႃႇလႄႈ သမ်ႉလႄႇလဵပ်ႈၵႂႃႇ ၵႃႈတီႈသဵၼ်ႈတၢင်းႁွင်ႇယူႇသေလႄႈ ၸၢင်ႈလႄႇလဵပ်ႈသေႇသေႇယူႇ၊ ၶိုၼ်းမႃးၵႃႈတီႈဢၼ်မၼ်းလႄႇလဵပ်ႈၼၼ်ႉယူႇလႄႈ သမ်ႉၶိုၼ်းလႄႇၶိုၼ်းလဵပ်ႈထႅင်ႈဢေႃႈ။-

7ၼမ်ႉႁွင်ႈၼမ်ႉၵႄးတင်းသဵင်ႈတင်းလူင် ဢွၼ်ၵၼ်လူင်းႁွတ်ႈလူင်းထိုင် ၵႃႈၼႂ်းပၢင်ႇလၢႆႇဢေႃႈ။ ၵူၺ်းၵႃႈပၢင်ႇလၢႆႇဢမ်ႇၸၢင်ႈတဵမ်။ ၼမ်ႉႁွင်ႈၼမ်ႉၵႄးၸိူဝ်းၼၼ်ႉ ဢွၼ်ၵၼ်လူင်းႁွတ်ႈလူင်းထိုင်ၵႃႈတီႈ ဢၼ်ၶဝ်လူင်းႁွတ်ႈလူင်းထိုင်ၼၼ်ႉယူႇတိၵ်းတိၵ်းဢေႃႈ။-

8လွင်ႈတၢင်းၵႃႈမီးၼၼ်ႉ သိၼ်ႇၽႃႁွမ်းလူၺ်ႈၵၼ်တင်း တၢင်းဢၼ်ယၢပ်ႇၸႂ်ၶၢၼ်ၸႂ်ထၼ်ႈပေႃးၵူၼ်းဢမ်ႇလၢတ်ႈလႆႈဢေႃႈ။ မၢၵ်ႇတႃႁၼ်လႄႈ ဢမ်ႇၸၢင်ႈဢိမ်ႇၸၢင်ႈတိူၵ်ႈ။ ႁူၵေႃႈငိၼ်းလႄႈ ဢမ်ႇၸၢင်ႈတဵမ်။-

9လွင်ႈတၢင်းဢၼ်ယၢမ်ႈပဵၼ်ၵႂႃႇယဝ်ႉၼၼ်ႉ မိူၼ်ၵၼ်တင်းလွင်ႈတၢင်းဢၼ် တၵ်းပဵၼ်မႃးဢေႃႈ။ လွင်ႈတၢင်းဢၼ်ယၢမ်ႈႁဵတ်းယဝ်ႉၼၼ်ႉ မိူၼ်ၵၼ်တင်းလွင်ႈဢၼ်တၵ်းႁဵတ်းဢေႃႈ။ ဢမ်ႇမီးလွင်ႈတၢင်းဢၼ်မႂ်ႇ ၵႃႈတီႈတႂ်ႈၵၢင်ဝၼ်းလႃးလႃး။-

10လွင်ႈတၢင်းဢၼ်သေၵေႃႉသေၵူၼ်း လႆႈလၢတ်ႈလႄႈဝႃႈ၊ တူၺ်းသေၵမ်း။ ပဵၼ်ဢၼ်မႂ်ႇဢေႃႈ၊ ဝႃႈၼင်ႇၼႆၼၼ်ႉ မီးသေၸိူဝ်ႉသေပိူင်ႁိုဝ်။ လွင်ႈတၢင်းၼၼ်ႉ ယၢမ်ႈပဵၼ်ၵႂႃႇမိူဝ်ႈဢွၼ်တၢင်းႁဝ်း မိူဝ်ႈၵွၼ်ႇဢွၼ်ၼႆႉၼၼ်ႉယဝ်ႉ။-

11ဢမ်ႇမီးတၢင်းဢၼ်ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းဢၼ်ပဵၼ်ၵႂႃႇယဝ်ႉမိူဝ်ႈၵွၼ်ႇဢွၼ်ၼႆႉၼၼ်ႉလႃးလႃး။ လွင်ႈတၢင်းဢၼ်ပဵၼ်မႃးၵမ်းလိုၼ်းၸိူဝ်းၼၼ်ႉၵေႃႈ ၶဝ်ၸိူဝ်းဢၼ်ပဵၼ်မႃးလိုၼ်းလွင်ႈတၢင်းၸိူဝ်းၼၼ်ႉၼၼ်ႉ တၵ်းဢမ်ႇမီးတၢင်းဢၼ် ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းလႃးလႃး။

12ၼႂ်းမိူဝ်ႈဢၼ် ၵဝ်သြႃႇထမ်ႇမႃႉတေႇသၼႃႇၼႆႉ ယင်းတိုၵ်ႉပဵၼ်ၶုၼ်ႁေႃၶမ်း ဢီႉသရေႇလႃႉ ယူႇၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉၸိုင်၊ ၵဝ်ဝႆႉၸႂ်ၵဝ်ႁႂ်ႈလႆႈဢဝ်တင်းၺၢၼ်ႇပိင်ႇၺႃႇ ၸႅတ်ႈထၢမ်ႁႃဢဝ် ၵႃႈဢၼ်ႁဵတ်းၵႃႈတီႈတႂ်ႈၽႃႉၵၢင်ႁၢဝ်ဢေႃႈ။-

13ပဵၼ်လွင်ႈတၢင်းဢၼ် ယၢပ်ႇၸႂ်ၽိုတ်ႇၸႂ် ဢၼ်ၽြႃးပဵၼ်ၸဝ်ႈပၼ်ပုၼ်ႈဢၼ်လုၵ်ႈၵူၼ်းတင်းလၢႆ တၵ်းလႆႈၵျူဝ်းၸႃးႁဵတ်းၼၼ်ႉဢေႃႈ။-

14ၵဝ်ႁၼ်လွင်ႈတၢင်းၵႃႈဢၼ်ႁဵတ်း ၵႃႈတီႈတႂ်ႈၵၢင်ဝၼ်းၼၼ်ႉယဝ်ႉ။ ၵူႈၸိူဝ်ႉၵူႈပိူင်ၼၼ်ႉ ဢွၼ်ၵၼ်ပဵၼ်လွင်ႈတၢင်းဢၼတ်ႉတႃႉ၊ ပဵၼ်လွင်ႈတၢင်းဢၼ် ၵိၼ်လူမ်းၵိၼ်လႅင်ႉၵူၺ်းဢေႃႈ။-

15လွင်ႈတၢင်းဢၼ်ၵူတ်ႉၼၼ်ႉၸိုင် ဢမ်ႇႁႂ်ႈသိုဝ်ႈလႆႈ။ လွင်ႈတၢင်းဢၼ်လုတ်ႈႁၢမ်းၸိုင် ဢမ်ႇၼပ်ႉဢၢၼ်ႇလႆႈ။-

16ၵဝ်လၢတ်ႈၼႂ်းႁူဝ်ၸႂ်ၵဝ်လႄႈဝႃႈၸမ်ႉ၊ ၵဝ်ၼႆႉယဵင်ႈၶႅၼ်းလႆႈပိင်ႇၺႃႇ လိူဝ်တွၼ်းၼႃႇသေ ၶဝ်ၸိူဝ်းဢၼ်ယၢမ်ႈပဵၼ်ယဝ်ႉၵႃႈၼႂ်းဝဵင်း ယေႇရူႉသလႅမ်ႇ မိူဝ်ႈဢွၼ်တၢင်းၵဝ်ၸိူဝ်းၼၼ်ႉဢေႃႈ။ ႁူဝ်ၸႂ်ၵဝ် လႆႈၶႆႈၸႂ်ဝူၼ်ႉၸႂ်လူၺ်ႈပိင်ႇၺႃႇ တင်းဢတၢတ်ႈတၢင်းႁူႉတၢင်းၸၢင်ႈၼႃႇလူင်လၢင်ဢေႃႈ။-

17ၵဝ်ဝႆႉၸႂ်ၵဝ်ႁႂ်ႈလႆႈၸၵ်းၽႄလႄႈ ႁူႉပိင်ႇၺႃႇတြႃးဢိၵ်ႇတင်း တၢင်းဢၼ်မဝ်မၢင် တင်းတၢင်းဢၼ်မိူၵ်ႈၸိူဝ်းၼၼ်ႉဢေႃႈ။ ၵဝ်ႁူႉႁၼ်လွင်ႈဢၼ် လွင်ႈတၢင်းၼၼ်ႉ ပဵၼ်လွင်ႈတၢင်းဢၼ် ၵိၼ်လူမ်းၵိၼ်လႅင်ႉၵူၺ်းၼၼ်ႉဢေႃႈ။-

18လွင်ႈမၼ်းၸမ်ႉ ပေႃးပိင်ႇၺႃႇၼမ်ၸိုင်၊ မီးလွင်ႈဢၼ်လီယၢပ်ႇၸႂ်ၽိုတ်ႇၸႂ်ၼမ်ဢေႃႈ။ ၵေႃႉဢၼ်ဢတၢတ်ႈ တၢင်းႁူႉတၢင်းၸႅင်ႈ ယႂ်ႇၽႄႈတူဝ်းတွၼ်းမႃးၼၼ်ႉ ႁႂ်ႈတၢင်းဢၼ်မႆႈၸႂ်ၶီၸႂ်မၼ်း ယႂ်ႇၽႄႈတူဝ်းတွၼ်းမႃးဢေႃႈ။

Jump to: Chapter 2 →