Ecclesiastes 4

Shan

← Chapter 3 Jump to: Chapter 5 →

1လႆႈသမ်ႉ ၵဝ်ဝၢႆႇၶိုၼ်းလႄႈႁၼ် တၢင်းဢၼ်ၼိၵ်ႈၸၢၵ်ႈငႅၼ်းသႄး ၵႃႈဢၼ်ႁဵတ်းၵႃႈတီႈတႂ်ႈၵၢင်ဝၼ်းၼႆႉၼၼ်ႉဢေႃႈ။ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉ ႁႆႈႁွင်ႉလႄႈဢမ်ႇမီးၵေႃႉဢၼ်ပၼ်ၵတ်းယဵၼ်ၶျၢမ်းသႃႇလႆႈတီႈၶဝ်။ ၶဝ်ၸိူဝ်းဢၼ်ၼိၵ်ႈၸၢၵ်ႈ ငႅၼ်းသႄးၸိူဝ်းၼၼ်ႉ မီးတၼ်းၶူဝ်းလႄႈ ဢမ်ႇမီးၵေႃႉဢၼ်ပၼ်ၵတ်းယဵၼ်ၶျၢမ်းသႃႇတီႈၶဝ်ၼၼ်ႉလႆႈ။-

2ပိူဝ်ႈၼႆလႄႈ ၵဝ်လၢတ်ႈလႄႈဝႃႈဝႆႉ၊ ၵူၼ်းတၢႆဢၼ်တၢႆပူၼ်ႉၵႂႃႇယဝ်ႉၸိူဝ်းၼၼ်ႉ ယဵင်ႈၶႅၼ်းမီးမင်ႇၵလႃႇ ၼႃႇသေၵူၼ်းလိပ်းဢၼ်ဢသၢၵ်ႈလိပ်းယူႇၸိူဝ်းၼႆႉဢေႃႈ၊ ဝႃႈၼင်ႇၼႆဢေႃႈ။-

3ၵူၺ်းၵႃႈ ၵေႃႉဢၼ်ဢမ်ႇပႆႇတွၼ်ႉပဵၼ်သေပွၵ်ႈ၊ ၵေႃႉဢၼ်ဢမ်ႇပႆႇတွၼ်ႉႁၼ်တူႉၸရိူၵ်ႈ ဢၼ်ႁဵတ်းၵႃႈတီႈတႂ်ႈၵၢင်ဝၼ်းၼႆႉၼၼ်ႉ ယဵင်ႈၶႅၼ်းမီးမင်ႇၵလႃႇၼႃႇသေ သွင်ၸိူဝ်ႉသွင်ပိူင်ၼၼ်ႉဢေႃႈ။

4လႆႈသမ်ႉ ၵဝ်ႁၼ်လွင်ႈတၢင်းဢၼ်ၵျူဝ်းၸႃးဢဝ်ႁႅင်းဢွၵ်ႇႁဵတ်းၵႃႈမီး ဢိၵ်ႇတင်းတၢင်းဢၼ်ယဝ်ႉတူဝ်ႈလီငၢမ်းဝႆႉ ၵူႈၸိူဝ်ႉၵူႈပိူင်ၼၼ်ႉ ဢိၵ်ႇတင်းလွင်ႈဢၼ်ပိူၼ်ႈတၢင်ႇၵေႃႉသီႈၵေႉႁေႈတႃ ၵွပ်ႈပိူဝ်ႈလွင်ႈတၢင်ႇၸိူဝ်ႉတၢင်ႇပိူင်ၼၼ်ႉၼၼ်ႉဢေႃႈ။ လွင်ႈတၢင်းၼၼ်ႉ ပဵၼ်လွင်ႈတၢင်းဢၼတ်ႉတႃႉ၊ လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။-

5ၵေႃႉဢၼ်မိူၵ်ႈၼၼ်ႉ ၸၢင်ႈဢဝ်မိုဝ်းတူဝ်ၸဝ်ႈၵဝ်ႇၼင်ႇၵၼ်ၵၼ်ၵွတ်ႇၵၼ်ဝႆႉသေလႄႈ ၵိၼ်ၼိူဝ်ႉတူဝ်ၸဝ်ႈၵဝ်ႇဢေႃႈ။-

6ဢုၵ်ႉၸႃႇဢၼ်သိၼ်ႇၽႃႁွမ်းလူၺ်ႈၵၼ်တင်းတၢင်းဢၼ်ၼိမ်ၼၼ်ႉ ၵမ်မိုဝ်းၼိုင်ႈၵူၺ်းၼၼ်ႉ ယဵင်ႈၶႅၼ်းလီၼႃႇသေ ဢုၵ်ႉၸႃႇဢၼ်သိၼ်ႇၽႃႁွမ်းလူၺ်ႈၵၼ်တင်းတၢင်းဢၼ်ႁဵတ်းယၢပ်ႇႁဵတ်းၽိုတ်ႇ ဢိၵ်ႇတင်းတၢင်းဢၼ်ၵိၼ်လူမ်းၵိၼ်လႅင်ႉၵူၺ်း သွင်ၵမ်မိုဝ်းၼၼ်ႉဢေႃႈ။

7လႆႈသမ်ႉ ၵဝ်ဝၢႆႇၶိုၼ်းလႄႈႁၼ် လွင်ႈတၢင်းဢၼတ်ႉတႃႉ ၵႃႈတီႈတႂ်ႈၵၢင်ဝၼ်းၼႆႉၸမ်ႉ၊-

8မီးၵေႃႉၼိုင်ႈ ဢၼ်မီးၵေႃႉလဵဝ်ၵူၺ်းမၼ်း၊ ဢၼ်ဢမ်ႇမီးၵေႃႉဢၼ်ၵိုၵ်းဢၼ်ႁွမ်းမၼ်း ဢၼ်ဢမ်ႇမီးပီႈၸၢႆးၼွင်ႉၸၢႆးမၼ်းၼၼ်ႉဢေႃႈ။ တၢင်းဢၼ်မၼ်းၵျူဝ်းၸႃးဢဝ်ႁႅင်းဢွၵ်ႇႁဵတ်းၼၼ်ႉ ဢမ်ႇသဵင်ႈဢမ်ႇမူတ်းလႆႈ။ မၢၵ်ႇတႃမၼ်းႁၼ်ၸေးၸိမ်ႇမၼ်းလႄႈ ဢမ်ႇပေႇၸႂ်လႆႈ။ မၼ်းၸၢင်ႈထၢမ်လႄႈဝႃႈ၊ ၵဝ်ၼႆႉၵျူဝ်းၸႃးဢဝ်ႁႅင်းဢွၵ်ႇႁဵတ်းလႄႈ ၼိၵ်ႈၸၢၵ်ႈငႅၼ်းသႄးတူဝ်ၸဝ်ႈၵဝ်ႇပုၼ်ႈၽူႈလႂ်၊ ဝႃႈၼင်ႇၼႆဢေႃႈ။ လွင်ႈတၢင်းၼႆႉၵေႃႈ ပဵၼ်လွင်ႈတၢင်းဢၼတ်ႉတႃႉ၊ လွင်ႈတၢင်းဢၼ်ႁႂ်ႈယၢပ်ႇၸႂ်ၶၢၼ်ၸႂ်ၼႃႇလူင်လၢင်ဢေႃႈ။

9ၵူၼ်းသွင်ၵေႃႉ ယဵင်ႈၶႅၼ်းလီၼႃႇသေ ၵေႃႉလဵဝ်ဢေႃႈ။ လွင်ႈမၼ်းၸမ်ႉ ဢၵျူဝ်းဢၼ်လီ ၸၢင်ႈမီးၼႂ်းတၢင်းဢၼ်သွင်ၶႃၵျူဝ်းၸႃးဢဝ်ႁႅင်းဢွၵ်ႇႁဵတ်းၼၼ်ႉဢေႃႈ။-

10ပေႃးၵေႃႉၼိုင်ႈလူမ်ႉၸိုင်၊ ၵေႃႉၼိုင်ႈတၵ်းပူၵ်းဢေႃႈ။ ပေႃးၵေႃႉလဵဝ်ၵူၺ်းလူမ်ႉၸမ်ႉ၊ မီးဢႃႉမင်ႇၵလႃႇဢေႃႈ။ ဢမ်ႇမီးၵေႃႉဢၼ်တၵ်းပူၵ်း။-

11ပေႃးၵူၼ်းသွင်ၵေႃႉၼွၼ်းႁူမ်ႈၵၼ်ၸိုင်၊ ၸၢင်ႈဢုၼ်ႇဢေႃႈ။ ၵူၼ်းၵေႃႉလဵဝ်ၵူၺ်းၸမ်ႉ၊ တၵ်းဢုၼ်ႇလႆႈၸိူဝ်ႉၼင်ႇႁိုဝ်။-

12ပေႃးၵူၼ်းၵေႃႉၼိုင်ႈပႄႉၼႅင်ႇၵူၼ်းၵေႃႉၼိုင်ႈၸိုင် ၵူၼ်းသွင်ၵေႃႉႁၢမ်ႈတၢပ်ႈႁႄႉၶႅၼ်ၵေႃႉၼၼ်ႉလႆႈယူႇဢေႃႈ။ ၸိူၵ်ႈဢၼ်ႁွမ်းၵၼ်သၢမ်ၵဵဝ်ၵေႃႈ ဢမ်ႇၸၢင်ႈၶၢတ်ႇငၢႆႈငၢႆႈ။

13လုၵ်ႈဢွၼ်ႇဢၼ်ယၢၵ်ႈဢၼ်ၽၢၼ် ဢၼ်မီးပိင်ႇၺႃႇၼၼ်ႉ ယဵင်ႈၶႅၼ်းမျၢတ်ႈၼႃႇသေ ၶုၼ်ႁေႃၶမ်းဢၼ်ဢသၢၵ်ႈယႂ်ႇလႄႈမိူၵ်ႈ၊ ဢၼ်ဢမ်ႇႁူႉလွင်ႈဢၼ်တၵ်းလႆႈၶၢမ်ႇတၢင်းဢၼ်သင်ႇသွၼ်သုင်းမႃႉပၼ်ထႅင်ႈၼၼ်ႉဢေႃႈ။-

14လုၵ်ႈဢွၼ်ႇၸိူဝ်ႉၼင်ႇၼၼ်ၼၼ်ႉ ၸၢင်ႈဢွၵ်ႇသေၵႃႈၼႂ်းႁိူၼ်း တီႈဢၼ်မၼ်းပၢႆႈတဵတ်ႇပၢႆႈမႅပ်ႉယူႇၼၼ်ႉလႄႈ ႁွတ်ႈထိုင်ၵႃႈၼိူဝ်ႁေႃၶမ်းဢေႃႈ။ ၶုၼ်ႁေႃၶမ်း ၸိူဝ်ႉၼင်ႇၼၼ်ၼၼ်ႉ၊ မိူဝ်ႈဢၼ်မၼ်းၵိူတ်ႇလဵင်ႉမႃးၼၼ်ႉၸိုင် မၼ်းပဵၼ်ၵူၼ်းယၢၵ်ႈၵူၼ်းၽၢၼ် ၵႃႈၼႂ်းသိုင်ႇၸိုင်ႈဝၢၼ်ႈမိူင်းမၼ်းဢေႃႈ။-

15ၵဝ်ႁၼ်လွင်ႈဢၼ်ၵူၼ်းသတ်ႉတဝႃႇ ဢၼ်ၵႂႃႇမႃးယူႇၵႃႈတီႈတႂ်ႈၵၢင်ဝၼ်းၼႆႉ တင်းသဵင်ႈတင်းလူင် ၸၢင်ႈဢွၼ်ၵၼ်ယူႇၽၢႆႇၵေႃႉတူႉတီႉယႃႉ ဢၼ်ၶၢမ်ႇဢဝ်ဢရႃႇတၢင်တူဝ်ၶုၼ်ၼၼ်ႉဢေႃႈ။-

16ၼပ်ႉဢၢၼ်ႇၶဝ်ၸိူဝ်းဢၼ် ၶုၼ်ၼၼ်ႉဢုပ်ႉပိူင်ႇၼၼ်ႉလႄႈ ဢမ်ႇသဵင်ႈလႆႈ။ ၵူၺ်းၵႃႈ ၶဝ်ၸိူဝ်းဢၼ်ပဵၼ်မႃးလိုၼ်းမၼ်းၼၼ်ႉ ယင်းဢမ်ႇၸူမ်းသိူဝ်းယူႇတီႈၼႂ်းမၼ်းလႄႈ တၵ်းယူႇဢေႃႈ။ လွင်ႈတၢင်းၼၼ်ႉၵေႃႈ ပဵၼ်လွင်ႈတၢင်းဢၼတ်ႉတႃႉ၊ လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်း ဢမၢၼ်ႇၶၼ်ပဵၼ်ဢေႃႈ။

← Chapter 3 Jump to: Chapter 5 →