Ecclesiastes 8

Shan

← Chapter 7 Jump to: Chapter 9 →

1ၽူႈလႂ်ပဵၼ်ၸိူဝ်ႉၼင်ႇ ၵေႃႉဢၼ်မီးပိင်ႇၺႃႇၼၼ်ႉ။ ၽူႈလႂ်ႁူႉၸႅင်ႈဢၼၢၵ်ႈဢၼ်လိုၵ်ႉဢၼ်လမ်ႇၼၼ်ႉ။ ၵူၼ်းၸမ်ႉ၊ ပိင်ႇၺႃႇမၼ်း ၸၢင်ႈႁႂ်ႈၼႃႈမၼ်းႁိူဝ်ႈႁိူင်းလႄႈ တၢင်းဢၼ်မႃႇၼႃႉၸႂ်သုင်မၼ်းၼၼ်ႉ ယႃႉႁၢင်ႈယႃႉၽၢင်ၼႃႈမၼ်းပႅတ်ႈဢေႃႈ။

2ၵဝ်ပၼ်တၢင်းၵျၢမ်ႇတၢင်းပွင်လႄႈဝႃႈ၊ ထွၵ်ႈလူၺ်ႈသဵတ်ႈၸႃႇ ဢၼ်ႁဵတ်းတီႈၽြႃးပဵၼ်ၸဝ်ႈၼၼ်ႉသေလႄႈ ပႂ်ႉၸွမ်းဢမိင်ႉၶုၼ်ႁေႃၶမ်းယူႇတႃႉ၊ ဝႃႈၼင်ႇၼႆဢေႃႈ။-

3ယႃႇပေလိုမ်းႁဵတ်းသတီႉလႄႈဢွၵ်ႇသေၵႃႈတီႈမၼ်းၸဝ်ႈ။ ယႃႇပေယိပ်းပေၵမ် လွင်ႈတၢင်းဢၼ်ဢမ်ႇလီဢမ်ႇငၢမ်း။ မၼ်းၸဝ်ႈတၵ်းၸီႇယၢင်ႇၸွမ်းၵႃႈၼင်ႇဢၼ် ဢလူဝ်ႇမၼ်းၸဝ်ႈမီးၼၼ်ႉဢေႃႈ။-

4ဢမိင်ႉၶုၼ်ႁေႃၶမ်းၼၼ်ႉ ပႃးတၼ်းၶူဝ်းဢေႃႈ။ ၽူႈလႂ်တၵ်းလဝ်ႊထၢမ်တီႈမၼ်းၸဝ်ႈလႄႈဝႃႈ၊ ၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆၼၼ်ႉလႆႈ။-

5ၵေႃႉဢၼ်ပႂ်ႉၸွမ်းဢမိင်ႉၸဝ်ႈယူႇၼၼ်ႉ တၵ်းၵၢင်းလွတ်ႈတင်းရႃႇၸဝူတ်ႈလႄႈ ႁူဝ်ၸႂ်ၵေႃႉဢၼ်မီးပိင်ႇၺႃႇၼၼ်ႉၵေႃႈ ၸၢင်ႈႁူႉၸၢင်ႈႁၼ် ၶိင်ႇမၼ်းၶႃႇမၼ်း ဢိၵ်ႇတင်းဢၶႂၢင်ႉဢၼ်လႆႈၸီႇယၢင်ႇၼၼ်ႉယူႇဢေႃႈ။-

6ပုၼ်ႈၵႃႈဢၼ်ၵူၼ်းၵျၢမ်ႇပွင်ၼၼ်ႉၸိုင်၊ မီးၶိင်ႇမၼ်းၶႃႇမၼ်းဢိၵ်ႇတင်းဢၶႂၢင်ႉဢၼ်လႆႈၸီႇယၢင်ႇဢေႃႈ။ လွင်ႈမၼ်းၸမ်ႉ တၢင်းဢၼ်ၵူၼ်းလႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉယႂ်ႇၼႃႇလူင်လၢင်တီႈၵူၼ်းဢေႃႈ။-

7ၽူႈလႂ်ဢမ်ႇႁူႉလွင်ႈတၢင်းဢၼ် တၵ်းပဵၼ်မႃးမိူဝ်ႈၵမ်းလိုၼ်းၼၼ်ႉ။ ၽူႈလႂ်တၵ်းလၢတ်ႈလွင်ႈဢၼ် တၵ်းပဵၼ်မႃးၸိူဝ်ႉၼင်ႇႁိုဝ်ၼၼ်ႉလႆႈ။-

8ၵေႃႉဢၼ်ဢုပ်ႉပိူင်ႇၸႂ်ဝီႉၺိၺ်ႇလႄႈ ၶျုၵ်ႈဝႆႉလႆႈၼၼ်ႉ ဢမ်ႇမီးသေၵေႃႉသေၵူၼ်း။ မၼ်းဢမ်ႇမီးတၼ်းၶူဝ်းဢၼ်ဢုပ်ႉဝၼ်းဢၼ်မၼ်းတၢႆၼၼ်ႉ။ ဢမ်ႇမီးဢၶႂၢင်ႉဢၼ်လႆႈဢွၵ်ႇသေၵႃႈၼႂ်းဢမူႉသိုၵ်းၼၼ်ႉ။ တူႉၸရိူၵ်ႈၵေႃႈဢမ်ႇၵႄႇသႄႇၼုၵ်ႈဢဝ်ၵေႃႉဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉလႆႈ။

9ၵဝ်ထူပ်းႁၼ်လွင်ႈတၢင်းၵူႈၸိူဝ်ႉၵူႈပိူင်ၼႆႉလႄႈ ၶႆႈၸႂ်ဝူၼ်ႉၸႂ်လူၺ်ႈၵႃႈဢၼ်ႁဵတ်းၵႃႈတီႈတႂ်ႈၵၢင်ဝၼ်းၼႆႉၸိူဝ်းၼၼ်ႉယဝ်ႉ။မီးၶိင်ႇဢၼ်ၵေႃႉၼိုင်ႈ ဢုပ်ႉပိူင်ႇၵႃႈၼိူဝ်ၵေႃႉၼိုင်ႈ ႁႂ်ႈဢၵျူဝ်းတူဝ်ၸဝ်ႈၵဝ်ႇလူႉၼၼ်ႉယူႇဢေႃႈ။-

10ၼွၵ်ႈသေၼၼ်ႉ ၵဝ်ႁၼ်လွင်ႈဢၼ် ၶဝ်ၸိူဝ်းဢၼ်ႁၢႆႉဢၼ်ယုတ်ႈဢၼ်ဢွၼ်ၵၼ်မႃးလႄႈ လုၵ်ႉသေၵႃႈၼႂ်းထႃႇၼႃႉ တီႈဢၼ်မူတ်းၸၢင်ႇဢွၵ်ႇၵႂႃႇၼၼ်ႉ လႆႈၶၢမ်ႇတၢင်းဢၼ်သၢင်းၵျူဝ်ႇ ဢိၵ်ႇတင်းလွင်ႈဢၼ်ၽူႈလႂ်သေၵေႃႉသေၵူၼ်း ဢမ်ႇၶုၵ်းၸႂ်လႆႈ ၶႆႈၸႂ်ထူပ်းၶဝ်ၼၼ်ႉ ၵႃႈၼႂ်းဝဵင်းဢၼ်ၶဝ်ႁဵတ်းတၢင်းဢၼ်ႁၢႆႉဢၼ်ယုတ်ႈၼၼ်ႉယဝ်ႉ။ လွင်ႈတၢင်းၼၼ်ႉၵေႃႈ ပဵၼ်ဢၼတ်ႉတႃႉဢေႃႈ။-

11ၵွပ်ႈပိူဝ်ႈဢၼ်ယင်းဢမ်ႇၸႅတ်ႈထၢမ်ၸႅတ်ႈတူၺ်း ဢမူႉတၢင်းဢၼ်ႁၢႆႉဢၼ်မိူၵ်ႈ ၶၼ်ၶၼ်ၽႂ်းၽႂ်းသေလႄႈ ပၼ်တၢမ်ႇဢပႅတ်ႈၼၼ်ႉလႄႈ၊ လုၵ်ႈၵူၼ်းတင်းလၢႆဢွၼ်ၵၼ်ဝႆႉသၽေႃးၵႅၼ်ႇၶႅင်ၼႃႇလူင်လၢင် ႁႂ်ႈလႆႈႁဵတ်းဢမူႉတၢင်းဢၼ်ႁၢႆႉဢၼ်မိူၵ်ႈဢေႃႈ။-

12ပိၵ်ႉသမ်ႉၵေႃႉဢၼ်ပူၼ်ႉလိူဝ်ၼၼ်ႉ ႁဵတ်းဢမူႉတၢင်းဢၼ်ႁၢႆႉဢၼ်မိူၵ်ႈတေႃႇထိုင်ႁွတ်ႈပၢၵ်ႇပွၵ်ႈလႄႈ ၸူဝ်ႈဢသၢၵ်ႈမၼ်းယၢဝ်းယိုၼ်းသေၵေႃႈ၊ ၵဝ်ႁူႉလွင်ႈဢၼ်ၶဝ်ၸိူဝ်းဢၼ်ၵူဝ်ႁႄ ၽြႃးပဵၼ်ၸဝ်ႈၼၼ်ႉ တၵ်းလႆႈၶၢမ်ႇဢၵျူဝ်းဢၼ်လီ ၵွပ်ႈပိူဝ်ႈဢၼ်ၵူဝ်ႁႄၵႃႈတီႈၽၢႆႇၼႃႈမၼ်းၸဝ်ႈၼၼ်ႉယူႇ ဢမၢၼ်ႇၶၼ်ပဵၼ်ဢေႃႈ။-

13ၵေႃႉဢၼ်ႁၢႆႉဢၼ်မိူၵ်ႈၼၼ်ႉ ဢမ်ႇလႆႈၶၢမ်ႇဢၵျူဝ်းဢၼ်လီ။ ဢသၢၵ်ႈမၼ်းၵေႃႈဢမ်ႇလႆႈယိုၼ်းလႆႈယၢဝ်းလႄႈ တၵ်းမိူၼ်ၸိူဝ်ႉၼင်ႇ ႁူမ်ႈၵွင်ႉငဝ်းၼၼ်ႉ ၵွပ်ႈပိူဝ်ႈဢၼ်မၼ်းဢမ်ႇၵူဝ်ဢမ်ႇႁႄ ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။

14လွင်ႈတၢင်းဢၼတ်ႉတႃႉ ဢၼ်ၸၢင်ႈပဵၼ်ၵႃႈၼိူဝ်လိၼ်မိူင်းၼႆႉပႃးၼိုင်ႈၸမ်ႉ၊ ၶဝ်ၸိူဝ်းဢၼ်သိုဝ်ႈတေႃႇၵမ်ႈၽွင်ႈလႆႈဢွၼ်ၵၼ်ၶၢမ်ႇ မိူၼ်ၸိူဝ်ႉၼင်ႇဢၼ် ၵေႃႉဢၼ်ႁၢႆႉဢၼ်မိူၵ်ႈၼၼ်ႉ ထိူၵ်ႈၶၢမ်ႇ ၵွပ်ႈပိူဝ်ႈဢမူႉဢၼ်မၼ်းႁဵတ်းၼၼ်ႉဢေႃႈ။ မိူၼ်ၸိူဝ်ႉၼင်ႇၼၼ်၊ ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉၵမ်ႈၽွင်ႈ လႆႈဢွၼ်ၵၼ်ၶၢမ်ႇဢဝ် မိူၼ်ၸိူဝ်ႉၼင်ႇဢၼ် ၵေႃႉဢၼ်သိုဝ်ႈတေႃႇၼၼ်ႉ ထိူၵ်ႈၶၢမ်ႇၵွပ်ႈပိူဝ်ႈဢမူႉဢၼ်မၼ်းႁဵတ်းၼၼ်ႉဢေႃႈ။ ၵဝ်လႆႈဝႃႈ၊ လွင်ႈတၢင်းၼၼ်ႉၵေႃႈ ပဵၼ်ဢၼတ်ႉတႃႉဢေႃႈ၊ ဝႃႈၼင်ႇၼႆဢေႃႈ။-

15မိူဝ်ႈၼၼ်ႉ ၵဝ်ယွင်ႈယေႃးတၢင်းဢၼ်မူၼ်ႈဢၼ်ပျေႃႇဢေႃႈ။ လွင်ႈမၼ်းၸမ်ႉ တၢင်းဢၼ်ယဵင်ႈၶႅၼ်းလီၼႃႇသေ တၢင်းဢၼ်ၵိၼ်ဢၼ်ၶူပ်း၊ တၢင်းဢၼ်မူၼ်ႈဢၼ်ပျေႃႇၼၼ်ႉ ဢမ်ႇမီးတီႈၵူၼ်းႁဝ်းၵႃႈတီႈတႂ်ႈၵၢင်ဝၼ်းၼႆႉ။ ၼႂ်းဢၵျူဝ်းဢၼ်မၼ်းၵျူဝ်းၸႃးဢဝ်ႁႅင်းဢွၵ်ႇႁဵတ်းလႄႈလႆႈ ၼႂ်းၸူဝ်ႈဢသၢၵ်ႈမၼ်း ဢၼ်ၽြႃးပဵၼ်ၸဝ်ႈဢဵတ်းလူပၼ် ၵႃႈတီႈတႂ်ႈၵၢင်ဝၼ်းၸိူဝ်းၼၼ်ႉ၊ မၼ်းလႆႈၶၢမ်ႇဢဝ်ဢၵျူဝ်းၼၼ်ႉၵူၺ်းဢေႃႈ။-

16မိူဝ်ႈဢၼ်ၵဝ်တိုၵ်းယူင်းႁူဝ်ၸႂ်ၵဝ် ႁႂ်ႈလႆႈႁူႉပိင်ႇၺႃႇတြႃး ဢိၵ်ႇတင်းႁႂ်ႈလႆႈႁၼ် လွင်ႈတၢင်းဢၼ်ႁဵတ်းၵႃႈၼိူဝ်လိၼ်မိူင်းၼႆႉ၊ မိူဝ်ႈဢၼ်ၵဝ်ႁၼ်လွင်ႈဢၼ်ၵူၼ်းၵမ်ႈၽွင်ႈယင်းဢမ်ႇၼွၼ်းတင်းဝၼ်းတင်းၶိုၼ်းလႄႈယူႇၼၼ်ႉၸိုင်၊-

17ၵဝ်လူတူၺ်း လွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၵူႈၸိူဝ်ႉၵူႈပိူင်ၼၼ်ႉလႄႈ ႁၼ်လွင်ႈဢၼ်ၵူၼ်းႁဝ်းၸႅတ်ႈတူၺ်း လွင်ႈတၢင်းဢၼ်ႁဵတ်းဝႆႉ ၵႃႈတီႈတႂ်ႈၵၢင်ဝၼ်းလႄႈ ဢမ်ႇသဵင်ႈလႆႈၼၼ်ႉဢေႃႈ။ ပိၵ်ႉသမ်ႉမၼ်းၵျူဝ်းၸႃးလႄႈၸႅတ်ႈတူၺ်းသေၵေႃႈ မၼ်းဢမ်ႇႁူႉတင်းသဵင်ႈတင်းမူတ်းလႆႈ။ လိူဝ်သေၼၼ်ႉဢမ်ႇၵႃး၊ ပိၵ်ႉသမ်ႉၵေႃႉဢၼ်မီးပိင်ႇၺႃႇၼၼ်ႉ ထၢင်ႇတၵ်းႁူႉလႆႈသေၵေႃႈ တၢင်းၵျၢမ်ႇတၢင်းပွင်မၼ်းဢမ်ႇပဵၼ်လႆႈ။

← Chapter 7 Jump to: Chapter 9 →