Ecclesiastes 7

Shan

← Chapter 6 Jump to: Chapter 8 →

1သရေႇဢၼ်လီၼၼ်ႉ ယဵင်ႈၶႅၼ်းလီၼႃႇသေ ၼမ်ႉမၼ်းၼၢမ်ႇသႃႇဢေႃႈ။ မိုဝ်ႉဝၼ်းဢၼ်လႆႈတၢႆၵေႃႈ ယဵင်ႈၶႅၼ်းလီၼႃႇသေ ဝၼ်းဢၼ်ၵိူတ်ႇလဵင်ႉမႃးၼၼ်ႉဢေႃႈ။-

2တၢင်းဢၼ်ၵႂႃႇ ၵႃႈတီႈႁိူၼ်းမႃႇသႃႇၼၼ်ႉ ယဵင်ႈၶႅၼ်းလီၼႃႇသေတၢင်းဢၼ်ၵႂႃႇၵႃႈတီႈႁိူၼ်းဢၼ်ၶၢမ်ႇပွႆးၼၼ်ႉဢေႃႈ။ လွင်ႈမၼ်းၸမ်ႉ ဢၼ်ၼၼ်ႉပဵၼ်တီႈသုတ်းတီႈၵွႆ ၵူၼ်းတင်းသဵင်ႈတင်းလူင်လႄႈ ၶဝ်ၸိူဝ်းဢၼ်ဢသၢၵ်ႈယင်းလိပ်းယူႇၼၼ်ႉ တၵ်းဢွၼ်ၵၼ်ဢဝ်သႂၢင်းမႅၼ်ႈၵႃႈၼႂ်းႁူဝ်ၸႂ်ဢေႃႈ။-

3တၢင်းဢၼ်မႆႈၸႂ်ၶီၸႂ်ယဵင်ႈၶႅၼ်းလီၼႃႇသေ တၢင်းဢၼ်ယုမ်ႉၶူဝ်ၼၼ်ႉဢေႃႈ။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်ၼႃႈႁဵဝ်ႇၸွပ်ႈၼၼ်ႉလႄႈ ႁူဝ်ၸႂ်ၸၢင်ႈယဵင်ႈၶႅၼ်းတၵ်းလီမႃးဢေႃႈ။-

4ႁူဝ်ၸႂ်ၶဝ်ၸိူဝ်းဢၼ်မီးပိင်ႇၺႃႇၼၼ်ႉ မီးၵႃႈတီႈႁိူၼ်းမႃႇသႃႇလႄႈ ႁူဝ်ၸႂ်ၶဝ်ၸိူဝ်းဢၼ်မိူၵ်ႈၼၼ်ႉၸမ်ႉ၊ မီးၵႃႈတီႈႁိူၼ်းတီႈဢၼ်ႁဵတ်း တၢင်းဢၼ်မူၼ်ႈဢၼ်ပျေႃႇၼၼ်ႉဢေႃႈ။-

5တၢင်းဢၼ် ထွမ်ႇငိၼ်းၵႂၢမ်းၵေႃႉဢၼ်မီးပိင်ႇၺႃႇၼၼ်ႉ သင်ႇသွၼ်သုင်းမႃႉပၼ်ၼၼ်ႉ ယဵင်ႈၶႅၼ်းလီၼႃႇသေ တၢင်းဢၼ်ထွမ်ႇငိၼ်းၵႂၢမ်းဢၼ်ၵူၼ်းမိူၵ်ႈႁဵတ်းၵႂၢမ်းၼၼ်ႉဢေႃႈ။-

6လွင်ႈမၼ်းၸမ်ႉ တၢင်းဢၼ်ယုမ်ႉၶူဝ်ၵေႃႉဢၼ်မိူၵ်ႈၼၼ်ႉ မိူၼ်ၸိူဝ်ႉၼင်ႇ သဵင်ဢၼ်ၽႆးမႆႈတူၼ်ႈၼၢမ်ယူႇၵႃႈတီႈတႂ်ႈမေႃႈၼၼ်ႉဢေႃႈ။ လွင်ႈတၢင်းၼၼ်ႉၵေႃႈ ပဵၼ်ဢၼတ်ႉတႃႉဢေႃႈ။

7တၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉ ၸၢင်ႈႁႂ်ႈၵေႃႉဢၼ်မီးပိင်ႇၺႃႇၼၼ်ႉ ယွင်ႇမႃႈလႄႈ လၢၵ်ႈသွင်ႇတၼ်းသူဝ်းၵေႃႈ ၸၢင်ႈႁႂ်ႈႁူဝ်ၸႂ် လုတ်ႈႁၢမ်းဢေႃႈ။-

8တီႈသုတ်းတီႈၵွႆၼၼ်ႉ ယဵင်ႈၶႅၼ်းလီၼႃႇသေ မိူဝ်ႈၸင်ႇၸႃႉႁဵတ်းဢေႃႈ။ သၽေႃးတၢင်းဢၼ်ၸၢင်ႈယိူၼ်ႉၶၢမ်ႇၼၼ်ႉ ယဵင်ႈၶႅၼ်းလီၼႃႇသေ သၽေႃးဢၼ်မႃႇၼႃႉယႂ်ႇဢေႃႈ။-

9ယႃႇပေၸႂ်ပွတ်းတေႃႇထိုင်ႁွတ်ႈထၼ်ႈပေႃး တၢင်းၸႂ်မႆႈၶႆႈၸႃႉဢွၵ်ႇ။ တၢင်းၸႂ်မႆႈၶႆႈၸႃႉၼၼ်ႉ ၸၢင်ႈတူၵ်းတီႈတူၵ်းလႅၼ်ယူႇၵႃႈတီႈ ႁူဝ်ၸႂ်ၵေႃႉဢၼ်မိူၵ်ႈဢေႃႈ။-

10ယႃႇပေထၢမ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶိင်ႇၵႃႇလႃႉမိူဝ်ႈၵွၼ်ႇဢွၼ်ၼႆႉၼၼ်ႉ ယဵင်ႈၶႅၼ်းလီလိူဝ်တွၼ်းၼႃႇသေ ၶိင်ႇၵႃႇလႃႉမိူဝ်ႈလဵဝ်ၼႆႉၼင်ႇႁိုဝ်၊ ဝႃႈၼင်ႇၼႆၼၼ်ႉ။ လွင်ႈမၼ်းၸမ်ႉ တၢင်းဢၼ်ထၢမ်ၸိူဝ်ႉၼင်ႇၼၼ်ၼၼ်ႉ ပဵၼ်တၢင်းဢၼ်ထၢမ်ၸွမ်းၼင်ႇပိင်ႇၺႃႇဢမ်ႇၸႂ်ႈ။

11ပိင်ႇၺႃႇၸိုင် ၸၢင်ႈလီမိူၼ်ၸိူဝ်ႉၼင်ႇဢမူၺ်ႇဢုၵ်ႉၸႃႇလႄႈ ႁဵတ်းၵျေးၸူးတီႈၶဝ်ၸိူဝ်းဢၼ်ႁၼ်ၵၢင်ဝၼ်းၼၼ်ႉဢေႃႈ။-

12လွင်ႈမၼ်းၸမ်ႉ ပိင်ႇၺႃႇၸၢင်ႈႁႄႉၸၢင်ႈၵင်ႈ မိူၼ်ၸိူဝ်ႉၼင်ႇငိုၼ်း ၸၢင်ႈႁႄႉၸၢင်ႈၵင်ႈၼၼ်ႉဢေႃႈ။ ဢတၢတ်ႈတၢင်းႁူႉတၢင်းၸၢင်ႈ ပဵၼ်ဢၼ်မျၢတ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ပိင်ႇၺႃႇၸၢင်ႈပႂ်ႉဢသၢၵ်ႈၵေႃႉဢၼ်လႆႈမၼ်းၼၼ်ႉယူႇဢေႃႈ။-

13ၶႆႈၸႂ်ဝူၼ်ႉၸႂ်လူၺ်ႈ လွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၼၼ်ႉတႃႉ။ လွင်ႈတၢင်းဢၼ် မၼ်းၸဝ်ႈႁႂ်ႈၵူတ်ႉၼၼ်ႉၸိုင် ၽူႈလႂ်ႁႂ်ႈသိုဝ်ႈလႆႈ။-

14မီးတၢင်းဢၼ်ၸူမ်းသိူဝ်းၼႂ်းမိုဝ်ႉဝၼ်းဢၼ်လႆႈလီလႆႈပဵၼ်ၼၼ်ႉတႃႉ။ ၶႆႈၸႂ်ဝူၼ်ႉၸႂ်ၼႂ်းမိုဝ်ႉဝၼ်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉတႃႉ။ လွင်ႈၼင်ႇႁိုဝ်ၵူၼ်းတၵ်းဢမ်ႇလႆႈႁူႉ လွင်ႈတၢင်းဢၼ်တၵ်းပဵၼ်မႃးမိူဝ်ႈၵမ်းလိုၼ်းမၼ်းၼၼ်ႉၸိုင်၊ ၽြႃးပဵၼ်ၸဝ်ႈ ပၼ်သွင်ၸိူဝ်ႉသွင်ပိူင် ပဵၼ်လႄႉပဵၼ်ၵမ်းဢေႃႈ။

15လွင်ႈတၢင်းၵူႈၸိူဝ်ႉၵူႈပိူင် ဢၼ်ၵဝ်လႆႈထူပ်းႁၼ် ၼႂ်းမိူဝ်ႈဢၼ်ၵဝ်ယူႇလၢႆလၢႆလွၵ်ႇလွၵ်ႇၼၼ်ႉၸမ်ႉ၊ မီးၵေႃႉဢၼ်သိုဝ်ႈတေႃႇ ဢၼ်သုမ်းၸွမ်းၼႂ်းတၢင်းဢၼ်မၼ်းသိုဝ်ႈတေႃႇၼၼ်ႉဢေႃႈ။ ၵေႃႉဢၼ်ႁၢႆႉဢၼ်ယုတ်ႈဢၼ်ဢသၢၵ်ႈယၢဝ်းယိုၼ်းယူႇၼႂ်းတၢင်းဢၼ်မၼ်းႁၢႆႉမိူၵ်ႈၼၼ်ႉၵေႃႈမီးဢေႃႈ။-

16ယႃႇပေသိုဝ်ႈတေႃႇ ပူၼ်ႉလိူဝ်ၼႃႇလူင်လၢင်။ ယႃႇပေမီးပိင်ႇၺႃႇပူၼ်ႉလိူဝ်ၼႃႇလူင်လၢင်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းၶႂ်ႈယႃႉဢၵျူဝ်းမႂ်းၼင်ႇႁိုဝ်။-

17ယႃႇပေႁၢႆႉယုတ်ႈ ပူၼ်ႉလိူဝ်ၼႃႇလူင်လၢင်။ ယႃႇပေမိူၵ်ႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းၶႂ်ႈတၢႆၸူဝ်ႈဢၼ်ၶိင်ႇမၼ်းဢမ်ႇပႆႇထိုင်ၼၼ်ႉၼင်ႇႁိုဝ်။-

18လီၸပ်းၸွႆးဢၼ်ၼႆႉယူႇဢေႃႈ။ ဢၼ်ၼၼ်ႉၵေႃႈယႃႇပေပွႆႇမိုဝ်းၽႃႈမိုဝ်း။ ၵေႃႉဢၼ်ၵူဝ်ႁႄၽြႃးပဵၼ်ၸဝ်ႈၼၼ်ႉ တၵ်းလွတ်ႈဢွၵ်ႇသေ ၵႃႈၼႂ်းလွင်ႈတၢင်းၵူႈၸိူဝ်ႉၵူႈပိူင်ဢေႃႈ။

19ပိင်ႇၺႃႇႁႂ်ႈၵေႃႉဢၼ်မီးပိင်ႇၺႃႇၼၼ်ႉ ယဵင်ႈၶႅၼ်းမီးတၼ်းၶူဝ်းလိူဝ်တွၼ်းၼႃႇသေ ပူဝ်ႇသိုၵ်းသိပ်းၵေႃႉဢၼ်ယူႇၵႃႈၼႂ်းဝဵင်းၼၼ်ႉဢေႃႈ။-

20ၵေႃႉဢၼ် သိုဝ်ႈတေႃႇဢၼ်ယင်းဢမ်ႇပႃးဢပႅတ်ႈလႄႈ ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီဢၼ်ငၢမ်းယူႇၼၼ်ႉ ဢမ်ႇမီးၵႃႈၼိူဝ်လိၼ်မိူင်းသေၵေႃႉသေၵူၼ်း။-

21ယႃႇပေဝႆႉဢမူႉတီႈၵႂၢမ်းၵႃႈဢၼ်ပိူၼ်ႈတၢင်ႇၵေႃႉလၢတ်ႈၼၼ်ႉ။ ပေႃးဢမ်ႇၼၼ်မႂ်းတၵ်းငိၼ်းၵႂၢမ်းဢၼ်ၶႃႈမႂ်းၵိၼ်ႇလႃႇမႂ်းၼၼ်ႉဢေႃႈ။-

22ႁူဝ်ၸႂ်မႂ်းႁူႉလွင်ႈဢၼ်တူဝ်မႂ်းယၢမ်ႈၵိၼ်ႇလႃႇပိူၼ်ႈယူႇ ၶိူဝ်းၶိူဝ်းယႂ်းယႂ်းၼၼ်ႉယူႇဢေႃႈ။

23လွင်ႈတၢင်းၵူႈၸိူဝ်ႉၵူႈပိူင်ၼႆႉၸိုင်၊ ၵဝ်ဢဝ်တင်းပိင်ႇၺႃႇၸၢမ်းတူၺ်းယဝ်ႉ။ ပိၵ်ႉသမ်ႉၵဝ်လၢတ်ႈလႄႈဝႃႈ၊ ၵဝ်တၵ်းပျေႉၸုမ်ႇဝႆႉတင်းပိင်ႇၺႃႇဢေႃႈ၊ ဝႃႈၼင်ႇၼႆသေၵေႃႈ၊ ပိင်ႇၺႃႇၼၼ်ႉၵႆၵၼ်တင်းၵဝ်ဢေႃႈ။ လွင်ႈတၢင်းဢၼ်ၵႆ၊ လွင်ႈတၢင်းဢၼ်လိုၵ်ႉလမ်ႇၼႃႇလူင်လၢင်ၼၼ်ႉၸိုင်၊ ၽူႈလႂ်ႁႃလႄႈထူပ်းလႆႈ။-

24ၵဝ်ဝၢႆႇၶိုၼ်းလႄႈၵျၢမ်ႇပွင်ၼႂ်းႁူဝ်ၸႂ်ၵဝ် ႁႂ်ႈလႆႈႁူႉၸႅင်ႈလႄႈ တွင်ႈထၢမ်ႁႃဢဝ်ပိင်ႇၺႃႇတြႃး တင်းလွင်ႈမၼ်းတၢင်းမၼ်း ဢိၵ်ႇတင်းႁႂ်ႈလႆႈႁူႉၸႅင်ႈ လွင်ႈဢၼ်ဢပႅတ်ႈတၢင်းဢၼ်ၵမ်ၵျၢင်ႉဢၼ်ႁၢႆႉဢၼ်ယုတ်ႈၼၼ်ႉ ပဵၼ်တၢင်းဢၼ်မိူၵ်ႈၼႃႇလူင်လၢင်တင်း၊-

25လွင်ႈဢၼ်ဢပႅတ်ႈတၢင်းဢၼ်ၵမ်ၵျၢင်ႉဢၼ်မိူၵ်ႈၼႃႇၼၼ်ႉ ပဵၼ်တၢင်းဢၼ်ယွင်ႇဢၼ်မႃႈၼၼ်ႉယဝ်ႉ။-

26ၵဝ်ထူပ်းႁၼ် လွင်ႈတၢင်းဢၼ်ၶူမ်ၼႃႇသေတၢင်းတၢႆ ဢၼ်ဝႃႈမႄႈယိင်းဢၼ်ႁူဝ်ၸႂ်မၼ်းၸၢင်ႈၵျၢမ်ႇပွင်မႄးႁဵတ်းတူင်ႇႁႅဝ်ႉ တင်းၶႄလႄႈ မိုဝ်းမၼ်းၸၢင်ႈပဵၼ်ၸိူၵ်ႈဢၼ်မတ်ႉၽုၵ်ႇၼၼ်ႉယဝ်ႉ။ ၵေႃႉဢၼ်ထုၵ်ႇၸႂ်ၵျိူၵ်ႈၸႂ် ၽြႃးပဵၼ်ၸဝ်ႈၼၼ်ႉၵူၺ်း တၵ်းၵၢင်းလွတ်ႈမၼ်းၼၼ်ႉဢေႃႈ။ ၵေႃႉဢၼ်ၸၢင်ႈႁဵတ်းဢပႅတ်ႈၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်မၼ်းတီႉလႆႈဢေႃႈ။-

27ၵဝ်သြႃႇထမ်ႇမႃႉတေႇသၼႃႇဝႃႈၸမ်ႉ၊ တူၺ်းလူး၊ ၵဝ်ထူပ်းႁၼ်လွင်ႈတၢင်းၼႆႉ ၼႂ်းမိူဝ်ႈဢၼ်ၵဝ်ထၢပ်ႈထႅင်ႈဢၼ်ၼိုင်ႈယဝ်ႉဢၼ်ၼိုင်ႈ ႁႂ်ႈလႆႈၸၢမ်းတူၺ်းႁႃဢဝ် တၢင်းဢၼ်ၼပ်ႉဢၼ်ဢၢၼ်ႇၼၼ်ႉ ႁူဝ်ၸႂ်ၵဝ်ယင်းႁႃဢဝ်ယူႇလႄႈ ဢမ်ႇပႆႇထူပ်းၼၼ်ႉၸမ်ႉ၊-

28ၼႂ်းၵူၼ်းၸၢႆးႁဵင်ၼိုင်ႈၼၼ်ႉ၊ ၵဝ်ထူပ်းၵေႃႉၼိုင်ႈယဝ်ႉ။ ၼႂ်းၵူၼ်းယိင်းတင်းႁဵင်ၼၼ်ႉ ၵဝ်ဢမ်ႇထူပ်းသေၵေႃႉသေၵူၼ်း။-

29တူၺ်းလူး၊ လွင်ႈတၢင်းဢၼ်ၵဝ်ထူပ်းဢၼ်ၼိုင်ႈၵူၺ်းၸမ်ႉ၊ ပိၵ်ႉသမ်ႉၽြႃးပဵၼ်ၸဝ်ႈ ႁဵတ်းပဵၼ်ၵူၼ်းႁႂ်ႈသိုဝ်ႈတေႃႇသေၵေႃႈ၊ ၶဝ်ဢွၼ်ၵၼ်ၵျၢမ်ႇပွင်ႁႃဢဝ် တၢင်းၵျၢမ်ႇတၢင်းပွင်ဢၼ်ၼမ်ၼႃႇၼၼ်ႉယဝ်ႉ။

← Chapter 6 Jump to: Chapter 8 →