Ecclesiastes 3

Shan

← Chapter 2 Jump to: Chapter 4 →

1လွင်ႈတၢင်းၵူႈၸိူဝ်ႉၵူႈပိူင်ၼၼ်ႉ မီးၶိင်ႇမၼ်းမိုဝ်ႉမၼ်းယူႇလႄႈ ၵႃႈဢၼ်ၵျၢမ်ႇပွင်ၵႃႈတီႈတႂ်ႈၽႃႉၵၢင်ႁၢဝ်ၵေႃႈ မီးၶိင်ႇဢၼ်လႆႈႁဵတ်းလႆႈသၢင်ႈ ႁင်းၽႂ်ႁင်းမၼ်းဢေႃႈ။-

2မီးၶိင်ႇဢၼ်ၵိူတ်ႇလဵင်ႉ ဢိၵ်ႇတင်းၶိင်ႇဢၼ်တၢႆ၊ ၶိင်ႇဢၼ်ၽုၵ်ႇသွမ်ႈ ဢိၵ်ႇတင်းၶိင်ႇဢၼ်ထူၺ်ႈဢဝ်ဢၼ်ၽုၵ်ႇသွမ်ႈၼၼ်ႉဢွၵ်ႇ၊-

3ၶိင်ႇဢၼ်ဢဝ်တၢႆ ဢိၵ်ႇတင်းၶိင်ႇဢၼ်ႁႂ်ႈတၢင်းၶႆႈတၢင်းပဵၼ်ႁၢႆ၊ ၶိင်ႇဢၼ်ၵိူၼ်ႇယႃႉပႅတ်ႈ ဢိၵ်ႇတင်းၶိင်ႇဢၼ်တႄႇႁဵတ်း၊-

4ၶိင်ႇဢၼ်ႁႆႈႁွင်ႉ ဢိၵ်ႇတင်းၶိင်ႇဢၼ်ယုမ်ႉၶူဝ်၊ ၶိင်ႇဢၼ်ၶၢင်းၶီၶၢင်းၽၢၼ် ဢိၵ်ႇတင်းၶိင်ႇဢၼ်ၵႃႈဢၼ်ဝႅၼ်၊-

5ၶိင်ႇဢၼ်ဢဝ်မၢၵ်ႇႁိၼ်တင်းလၢႆၽၢဝ်ႇပိုၼ် ဢိၵ်ႇတင်းၶိင်ႇဢၼ်ဢဝ်မၢၵ်ႇႁိၼ်ၸူႉဝႆႉသိမ်းဝႆႉ၊ ၶိင်ႇဢၼ်ၵွတ်ႇၵဵဝ်ႈ ဢိၵ်ႇတင်းၶိင်ႇဢၼ်ယင်းဢမ်ႇၵွတ်ႇၵဵဝ်ႈလႄႈ ၽၢတ်ႇၵၼ်ယၢၼ်ၵၼ်၊-

6ၶိင်ႇဢၼ်ႁႃဢဝ် ဢိၵ်ႇတင်းၶိင်ႇဢၼ်ဢုၵ်ႉၸႃႇႁူင်ႈႁၢႆ၊ ၶိင်ႇဢၼ်သိမ်းပႅင်းဝႆႉ ဢိၵ်ႇတင်းၶိင်ႇဢၼ်ဢဝ်ထိမ်ႈပႅတ်ႈ၊-

7ၶိင်ႇဢၼ်ၸၵ်ႉသိၵ်ႇၶူဝ်းၼုင်ႈ ဢိၵ်ႇတင်းၶိင်ႇဢၼ်ယဵပ်ႉဢၼ်ၽုင်၊ ၶိင်ႇဢၼ်ယူႇတဵတ်ႇတဵတ်ႇယဵၼ်ယဵၼ် ဢိၵ်ႇတင်းၶိင်ႇဢၼ်လၢတ်ႈထွႆႈလၢတ်ႈၵႂၢမ်း၊-

8ၶိင်ႇဢၼ်ႁၵ်ႉပႅင်း ဢိၵ်ႇတင်းၶိင်ႇဢၼ်ငိၼ်းၸင်း၊ ၶိင်ႇဢၼ်တိုၵ်းသိုၵ်းတိုၵ်းသိူဝ် ဢိၵ်ႇတင်းၶိင်ႇဢၼ်သိုၵ်းထၢတ်ႇသိုၵ်းယဵၼ်ဢေႃႈ။-

9ၵေႃႉဢၼ်သၢင်ႈႁဵတ်းၼၼ်ႉ မီးဢၵျူဝ်းၵႃႈသင်ၼႂ်းတၢင်းဢၼ်မၼ်းၸၢင်ႈၵျူဝ်းၸႃးဢဝ်ႁႅင်းဢွၵ်ႇႁဵတ်းၼၼ်ႉ။-

10ၵဝ်တူၺ်းႁၼ် လွင်ႈတၢင်းဢၼ်ယၢပ်ႇၸႂ်ၶၢၼ်ၸႂ် ဢၼ်ၽြႃးပဵၼ်ၸဝ်ႈပၼ်ပုၼ်ႈဢၼ်ၵူၼ်းႁဝ်းတၵ်းၵႂႃႇမႃးၼႂ်းမၼ်းၼၼ်ႉယဝ်ႉ။-

11မၼ်းၸဝ်ႈႁဵတ်းပဵၼ်လွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼၼ်ႉႁၢင်ႈလီႁၢင်ႈငၢမ်း ၼႂ်းမိူဝ်ႈဢၼ်ၶိင်ႇမၼ်းထုၵ်ႇၼၼ်ႉယဝ်ႉ။ မၼ်းၸဝ်ႈ ဢဝ်တၢင်းဢၼ်ၸပ်းၸွႆးလေႃးၵီႇ သႂ်ႇဝႆႉၵႃႈၼႂ်းႁူဝ်ၸႂ်ၵူၼ်းႁဝ်းထၼ်ႈပေႃး ၵူၼ်းႁဝ်းဢမ်ႇႁူႉဢမ်ႇႁၼ်လွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၼၼ်ႉ ဢဝ်ၸဵမ်ငဝ်ႈတေႃႇပၢႆလႆႈဢေႃႈ။-

12ၵဝ်ႁူႉလွင်ႈဢၼ် ၼွၵ်ႈသေလွင်ႈတၢင်းဢၼ်ၸူမ်းသိူဝ်း ဢိၵ်ႇတင်းလွင်ႈတၢင်းဢၼ်လႆႈၵတ်းယဵၼ်ၶျၢမ်းသႃႇ ၼႂ်းမိူဝ်ႈဢၼ် ဢသၢၵ်ႈယင်းတိုၵ်ႉလိပ်းယူႇၼၼ်ႉ ဢမ်ႇမီးဢၵျူဝ်းဢၼ်ယဵင်ႈၶႅၼ်းလီၼႃႇပုၼ်ႈၶဝ်ဢေႃႈ။-

13တၢင်းဢၼ်ၵူၼ်းၵူႈၵေႃႉလႆႈၵိၼ်လႆႈၶူပ်း ဢိၵ်ႇတင်းတၢင်းဢၼ်မူၼ်ႈပျေႃႇၼႂ်းလွင်ႈတၢင်းဢၼ် တူဝ်ၸဝ်ႈၵဝ်ႇၵျူဝ်းၸႃး ဢဝ်ႁႅင်းဢွၵ်ႇႁဵတ်းၼၼ်ႉ ပဵၼ်ၵျေးၸူးတၢင်းဢၼ် ၽြႃးပဵၼ်ၸဝ်ႈပၼ်ၵူၺ်းဢေႃႈ။-

14ၵဝ်ႁူႉလွင်ႈဢၼ် လွင်ႈတၢင်းၵႃႈဢၼ် ၽြႃးပဵၼ်ၸဝ်ႈႁဵတ်းၼၼ်ႉ ပဵၼ်ၼိၵ်ႈၸႃႉထႃႇဝရႃႉၼၼ်ႉဢေႃႈ။ ဢမ်ႇထၢပ်ႈထႅင်ႈလႄႈႁဵတ်းလႆႈ။ ဢမ်ႇၼုၵ်ႈလႄႈဢဝ်ဢွၵ်ႇပႅတ်ႈလႆႈ။ ၽြႃးပဵၼ်ၸဝ်ႈႁဵတ်းၸိူဝ်းၼၼ်ႉဝႆႉ ႁႂ်ႈၵူၼ်းႁဝ်းလႆႈၵူဝ်လႆႈႁႄ ၵႃႈတီႈၽၢႆႇၼႃႈမၼ်းၸဝ်ႈဢေႃႈ။-

15လွင်ႈတၢင်းဢၼ် ပဵၼ်ယူႇမိူဝ်ႈလဵဝ်ၼႆႉ မိူၼ်ၵၼ်တင်းလွင်ႈတၢင်းဢၼ် ယၢမ်ႈပဵၼ်ၵႂႃႇယဝ်ႉၼၼ်ႉဢေႃႈ။ လွင်ႈတၢင်းဢၼ်တၵ်းပဵၼ်မႃးၸိူဝ်းၼၼ်ႉၵေႃႈ မိူၼ်ၵၼ်တင်းလွင်ႈတၢင်းဢၼ်ပဵၼ်ၵႂႃႇယဝ်ႉၼၼ်ႉဢေႃႈ။ လွင်ႈတၢင်းဢၼ်ပူၼ်ႉၵႂႃႇယဝ်ႉၸိူဝ်းၼၼ်ႉၵေႃႈ မၼ်းၸဝ်ႈသမ်ႉၸွမ်းႁႃဢဝ်ဢေႃႈ။

16ၼွၵ်ႈသေၼၼ်ႉ ၵဝ်ႁၼ်လွင်ႈဢၼ်ဢမူႉဢႃႉထမ်ႇမႃႉ မီးၵႃႈၼႂ်းတီႈဢၼ်ၸီႇယၢင်ႇတြႃး ဢိၵ်ႇတင်းလွင်ႈဢၼ်တူႉၸရိူၵ်ႈမီးၵႃႈၼႂ်းတီႈဢၼ်သိုဝ်ႈတေႃႇၼၼ်ႉ ၵႃႈတီႈတႂ်ႈၵၢင်ဝၼ်းယဝ်ႉ။-

17ၵဝ်လၢတ်ႈၼႂ်းၸႂ်လႄႈဝႃႈ၊ ၽြႃးပဵၼ်ၸဝ်ႈ တၵ်းၸႅတ်ႈထၢမ်ၸီႇယၢင်ႇ ဢမူႉၶဝ်ၸိူဝ်းဢၼ်သိုဝ်ႈတေႃႇ ဢိၵ်ႇတင်းဢမူႉၶဝ်ၸိူဝ်းဢၼ်ဢမ်ႇတြႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ မီးၶိင်ႇဢၼ်လႆႈၸႅတ်ႈထၢမ်ၸီႇယၢင်ႇတၢင်းၵျၢမ်ႇတၢင်းပွင်ၵူႈၸိူဝ်ႉၵူႈပိူင် ဢိၵ်ႇတင်းဢမူႉၵူႈၸိူဝ်ႉၵူႈပိူင်ၼၼ်ႉယူႇဢေႃႈ။-

18ၵဝ်လၢတ်ႈၵႃႈၼႂ်းၸႂ်ၵဝ် လူၺ်ႈလွင်ႈၵူၼ်းႁဝ်းလႄႈဝႃႈၸမ်ႉ၊ ၶဝ်တူၵ်းတီႈတူၵ်းလႅၼ်ဝႆႉထႃႈ လွင်ႈၼင်ႇႁိုဝ်ၽြႃးပဵၼ်ၸဝ်ႈတၵ်းၸၢမ်းတူၺ်းၶဝ် ဢိၵ်ႇတင်းလွင်ႈၼင်ႇႁိုဝ် ၶဝ်တၵ်းႁူႉႁၼ်လွင်ႈဢၼ်ၶဝ်ပဵၼ်ၸိူဝ်ႉၼင်ႇတရိၵ်ႈသၢၼ်ႇၼၼ်ႉဢေႃႈ။-

19လွင်ႈတၢင်းဢၼ်ႁွတ်ႈထိုင်တီႈၵူၼ်းႁဝ်းၼၼ်ႉ တီႈတရိၵ်ႈသၢၼ်ႇၵေႃႈႁွတ်ႈထိုင်ဢေႃႈ။ လွင်ႈတၢင်းပိူင်လဵဝ်ၵူၺ်း ႁွတ်ႈထိုင်ၵႃႈၼိူဝ်သွင်ၸိူဝ်ႉသွင်မဵဝ်းလႄႈ ၸိူဝ်ႉၼင်ႇဢၼ်မဵဝ်းၼိုင်ႈတၢႆၼၼ်ႉ မဵဝ်းၼိုင်ႈၵေႃႈၸၢင်ႈတၢႆဢေႃႈ။ ၵူႈၸိူဝ်ႉၵူႈမဵဝ်းၼၼ်ႉ မီးဢသၢၵ်ႈၸိူဝ်ႉလဵဝ်မဵဝ်းလဵဝ်ၵူၺ်းဢေႃႈ။ ပိူဝ်ႈၼႆလႄႈ ၵူၼ်းဢမ်ႇမီးလွင်ႈဢၼ်ယဵင်ႈၶႅၼ်းယႂ်ႇမျၢတ်ႈၼႃႇသေတရိၵ်ႈသၢၼ်ႇ။ ၵႃႈမီးတင်းသဵင်ႈတင်းလူင် ပဵၼ်ဢၼတ်ႉတႃႉဢေႃႈ။-

20ၵႃႈမီးတင်းသဵင်ႈတင်းလူင် ၸၢင်ႈႁွတ်ႈထိုင်ၵႃႈတီႈတီႈလဵဝ်ၵူၺ်းဢေႃႈ။ ၵႃႈမီးတင်းသဵင်ႈတင်းလူင်ပဵၼ်မႃးၵႃႈၼႂ်းမုၼ်ႈလိၼ်လႄႈ ၸၢင်ႈၶိုၼ်းၵႂႃႇၵႃႈၼႂ်းမုၼ်ႈလိၼ်ဢေႃႈ။-

21ၵူၺ်းၵႃႈ ၽူႈလႂ်ႁူႉလွင်ႈဢၼ်ဝီႉၺိၺ်ႇလုၵ်ႈၵူၼ်းတင်းလၢႆ ၸၢင်ႈၶိုၼ်ႈၵႃႈတီႈၼိူဝ် ဢိၵ်ႇတင်းလွင်ႈဢၼ်ဝီႉၺိၺ်ႇတရိၵ်ႈသၢၼ်ႇ ၸၢင်ႈလူင်းၵႃႈတႂ်ႈၸူးၵႃႈတီႈလိၼ်ၼၼ်ႉလႆႈ။-

22ပိူဝ်ႈၼႆလႄႈ ၵဝ်ႁူႉႁၼ်လွင်ႈဢၼ် ၵူၼ်းႁဝ်းၼႆႉဢမ်ႇမီးလွင်ႈတၢင်းဢၼ်လီ လိူဝ်တွၼ်းၼႃႇသေ လွင်ႈတၢင်းဢၼ်မူၼ်ႈပျေႃႇယူႇၵႃႈၼႂ်း လွင်ႈတၢင်းဢၼ်တူဝ်ၸဝ်ႈၵဝ်ႇသၢင်ႈႁဵတ်းၼၼ်ႉဢေႃႈ။ လွင်ႈတၢင်းၼၼ်ႉ ပဵၼ်ပုၼ်ႈမၼ်းတႃႇမၼ်းဢေႃႈ။ ၽူႈလႂ်တၵ်းဢဝ်မၼ်းၶိုၼ်းမႃး ႁႂ်ႈမၼ်းလႆႈႁူႉႁၼ် လွင်ႈဢၼ်တၵ်းပဵၼ်မႃးမိူဝ်ႈၵမ်းလိုၼ်းမၼ်းၼၼ်ႉ။

← Chapter 2 Jump to: Chapter 4 →