Ecclesiastes 2

Shan

← Chapter 1 Jump to: Chapter 3 →

1လႆႈသမ်ႉ ၵဝ်လၢတ်ႈၵႃႈၼႂ်းႁူဝ်ၸႂ်ၵဝ်လႄႈဝႃႈၸမ်ႉ၊ မႃးတႃႉ။ ၵဝ်တၵ်းဢဝ်တၢင်းဢၼ်သႂၢင်ႇဢၼ်သိူဝ်းၸၢမ်းတူၺ်းမႂ်းဢေႃႈ။ ပိူဝ်ႈၼႆလႄႈ မူၼ်ႈပျေႃႇယူႇၼႂ်းၵႃႇမၵုင်ႇတႃႉ၊ ဝႃႈၼင်ႇၼႆလႄႈ၊ လွင်ႈတၢင်းၼၼ်ႉၵေႃႈ ပဵၼ်ဢၼတ်ႉတႃႉဢေႃႈ။-

2ၵဝ်လႆႈလၢတ်ႈတီႈ တၢင်းဢၼ်ၶူဝ်ဢၼ်ႁိုဝ်ႉၼၼ်ႉလႄႈဝႃႈ၊ မႂ်းယွင်ႇဢေႃႈ၊ ဝႃႈၼင်ႇၼႆလႄႈ လၢတ်ႈတီႈတၢင်းဢၼ်သႂၢင်ႇဢၼ်သိူဝ်းၼၼ်ႉလႄႈဝႃႈ၊ မႂ်းႁဵတ်းပွင်ႇလွင်ႈၵႃႈသင်၊ ဝႃႈၼင်ႇၼႆဢေႃႈ။-

3ႁူဝ်ၸႂ်ၵဝ်မီးတၢင်းဢၼ်ၵျူဝ်းၸႃးႁဵတ်းလူၺ်ႈပိင်ႇၺႃႇတြႃးယူႇသေလႄႈ ၵဝ်လႆႈၵျၢမ်ႇပွင်ၼႂ်းႁူဝ်ၸႂ်ၵဝ် ႁႂ်ႈလႆႈဢဝ်တင်း ၼမ်ႉၸပိတ်ႈၸူဝ်းဢဝ်ၸႂ်ၵဝ်လႄႈ ယိပ်းၵမ်ဢဝ်တၢင်းဢၼ်မိူၵ်ႈၼၼ်ႉထၼ်ႈပေႃး ၵဝ်လႆႈႁူႉလွင်ႈတၢင်းဢၼ်လီဢၼ်လုၵ်ႈၵူၼ်းတင်းလၢႆ ထုၵ်ႇလီႁဵတ်းယူႇၸူဝ်ႈဢသၢၵ်ႈ ၵႃႈတီႈတႂ်ႈၽႃႉၵၢင်ႁၢဝ်ၼၼ်ႉဢေႃႈ။-

4ၵဝ်ၸီႇယၢင်ႇပွင်ႁဵတ်းလွင်ႈတၢင်းဢၼ်ယႂ်ႇၼႃႇတင်းလၢႆလႄႈ ႁဵတ်းႁိူၼ်းလႂ် ၽုၵ်ႇသွမ်ႈသူၼ်ဢူးယဵၼ်ႇၸပိတ်ႈလႂ်၊-

5လုမ်းလႃးသူၼ်ဢူးယဵၼ်ႇၵူႈၸိူဝ်ႉၵူႈမဵဝ်းလႂ် ၽုၵ်ႇသွမ်ႈတူၼ်ႈဢၼ်မၢၵ်ႇမၢၵ်ႇၵူႈၸိူဝ်ႉၵူႈပိူင်လႂ်၊-

6ႁဵတ်းၼမ်ႉၼွင်တင်းလၢႆ ပုၼ်ႈဢၼ်တၵ်းႁူတ်းပႃႇမႆႉ ဢၼ်ပျေႉၸုမ်ႇဝႆႉတင်းမဵဝ်းတူၼ်ႈမႆႉၼၼ်ႉလႂ်၊-

7သိုဝ်ႉဢဝ်ၶႃႈၵူၼ်းၸၢႆး၊ ၶႃႈၵူၼ်းယိင်းလႄႈ လႆႈလုၵ်ႈၶႃႈဢၼ်ၵိူတ်ႇလဵင်ႉမႃးၵႃႈၼႂ်းႁိူၼ်းၵဝ်လႂ်၊ လႆႈမၢၵ်ႈမီးၽုင်သူဝ်းၽုင်ဝူဝ်း လိူဝ်တွၼ်းၼႃႇသေၶဝ်ၸိူဝ်းဢၼ်ယၢမ်ႈပဵၼ်ၵႂႃႇယဝ်ႉ ၵႃႈၼႂ်းဝဵင်း ယေႇရူႉသလႅမ်ႇ မိူဝ်ႈဢွၼ်တၢင်းၵဝ်ၼၼ်ႉ ၼႃႇလူင်လၢင်လႂ်၊-

8ၵဵပ်းႁွမ်သိမ်းဢဝ်ငိုၼ်းၶမ်းၽၼ်ႇတႃႇ ဢၼ်ၸၢပ်ႈသႅင်ႇၵၼ်တင်းၶုၼ်ႁေႃၶမ်း၊ ၶွၼ်ႇဢၼ်ၽႃႇၵဵပ်းဢဝ် ၵႃႈတီႈၵူႈဢိူင်ႇၵူႈၵျၢၵ်ႈလႂ်၊ သိမ်းဢဝ်ၵူၼ်းယိင်းၵူၼ်းၸၢႆးၸဝ်ႈဢငဵင်ႉတင်းလၢႆ ဢိၵ်ႇတင်းမႄႈယိင်းၸိူင်ႉၼၢင်းဢၼ်ၵူၼ်းႁဝ်းမူၼ်ႈပျေႃႇလႂ် ၸိူဝ်းၼၼ်ႉဝႆႉဢေႃႈ။-

9ၼင်ႇၼၼ်လႄႈၵဝ်ႁွတ်ႈထိုင် တၢင်းဢၼ်ယႂ်ႇသုင်လႄႈ ၽႄႈၵႂၢင်ႈတူဝ်းတွၼ်းမႃးလႄႈ လိူဝ်တွၼ်းၼႃႇသေၶဝ်ၸိူဝ်းဢၼ် ယၢမ်ႈပဵၼ်ၵႂႃႇယဝ်ႉ ၵႃႈၼႂ်းဝဵင်း ယေႇရူႉသလႅမ်ႇ မိူဝ်ႈဢွၼ်တၢင်းၵဝ်ၸိူဝ်းၼၼ်ႉဢေႃႈ။-

10ၵဝ်ဢမ်ႇတွပ်ႇပႅတ်ႈထဵင်ပႅတ်ႈ လွင်ႈတၢင်းဢၼ်မၢၵ်ႇတႃၵဝ်ၸပ်းၸွႆးၶႂ်ႈလႆႈၼၼ်ႉ သေၸိူဝ်ႉသေပိူင်။ ၵဝ်ဢမ်ႇပႄႇပႅတ်ႈ တီႈဢၼ်ႁူဝ်ၸႂ်ၵဝ် ၸူမ်းသိူဝ်းၼၼ်ႉသေၸိူဝ်ႉသေပိူင်။ ႁူဝ်ၸႂ်ၵဝ်ၸူမ်းသိူဝ်းယူႇၵႃႈၼႂ်းတၢင်းဢၼ် ၵဝ်ၵျူဝ်းၸႃးၼၼ်ႉယူႇသေလႄႈ ၵဝ်လႆႈၶၢမ်ႇဢဝ်ဢၵျူဝ်း လွင်ႈတၢင်းၵႃႈဢၼ်ၵဝ်ၵျူဝ်းၸႃးၼၼ်ႉဢေႃႈ။-

11မိူဝ်ႈၼၼ်ႉၵဝ်လူတူၺ်း ၵႃႈဢၼ်ၵဝ်ၸီႇယၢင်ႇဢဝ်မိုဝ်းပွင်ႁဵတ်း၊ ၵႃႈဢၼ်ၵဝ်လႆႈၵျူဝ်းၸႃး ဢဝ်ႁႅင်းဢွၵ်ႇႁဵတ်းၸိူဝ်းၼၼ်ႉလႄႈ တူၺ်းလူး၊ ၵူႈၸိူဝ်ႉၵူႈပိူင်ၼၼ်ႉ ဢွၼ်ၵၼ်ပဵၼ်လွင်ႈတၢင်းဢၼတ်ႉတႃႉ၊ လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။ ဢမ်ႇမီးဢၵျူဝ်းဢၼ်လီ ၵႃႈတီႈတႂ်ႈၵၢင်ဝၼ်းလႃးလႃး။

12လႆႈသမ်ႉ ၵဝ်ဝၢႆႇၶိုၼ်းလႄႈ ၶႆႈၸႂ်ဝူၼ်ႉၸႂ်လူၺ်ႈ ပိင်ႇၺႃႇတြႃး ဢိၵ်ႇတင်းတၢင်းဢၼ်မဝ်မၢင် တင်းတၢင်းဢၼ်မိူၵ်ႈၸိူဝ်းၼၼ်ႉဢေႃႈ။ ၵေႃႉဢၼ်ပဵၼ်လိုၼ်းၶုၼ်ႁေႃၶမ်းၼၼ်ႉ တၵ်းႁဵတ်းၸိူဝ်ႉၼင်ႇႁိုဝ်လႆႈ။ တၵ်းႁဵတ်းလႆႈၵႃႈၼင်ႇဢၼ်ယၢမ်ႈႁဵတ်းယဝ်ႉၼၼ်ႉၵူၺ်းဢေႃႈ။-

13မိူဝ်ႈၼၼ်ႉ ၵဝ်ႁူႉႁၼ်လွင်ႈဢၼ် ပိင်ႇၺႃႇမျၢတ်ႈလီလိူဝ်တွၼ်းၼႃႇသေတၢင်းဢၼ်မိူၵ်ႈၼၼ်ႉ မိူၼ်ၸိူဝ်ႉၼင်ႇဢၼ် ဢၼ်လႅင်းမျၢတ်ႈလီလိူဝ်တွၼ်းၼႃႇသေဢၼ်လပ်းသိင်ႇၼၼ်ႉဢေႃႈ။-

14မၢၵ်ႇတႃၵေႃႉဢၼ်မီးပိင်ႇၺႃႇၼၼ်ႉ မီးၵႃႈတီႈၵွၵ်းႁူဝ်မၼ်းလႄႈ ၵေႃႉဢၼ်မိူၵ်ႈၸမ်ႉ၊ ၸၢင်ႈၵႂႃႇမႃးယူႇၵႃႈၼႂ်းဢၼ်လပ်းသိင်ႇဢေႃႈ။ ၼႂ်းဝႃႈၼၼ်သေၵေႃႈ ၵဝ်ႁူႉႁၼ်လွင်ႈဢၼ် ဢမူႉၸိူဝ်ႉလဵဝ်ပိူင်လဵဝ်ၵူၺ်း ႁွတ်ႈထိုင်ၵႃႈၼိူဝ်ၶဝ်တင်းသဵင်ႈတင်းလူင်ၼၼ်ႉဢေႃႈ။-

15ၵဝ်လႆႈလၢတ်ႈၼႂ်းႁူဝ်ၸႂ်ၵဝ်လႄႈဝႃႈ၊ ၸိူဝ်ႉၼင်ႇဢၼ်ႁွတ်ႈထိုင်တီႈၵေႃႉဢၼ်မိူၵ်ႈၼၼ်ႉ တၵ်းႁွတ်ႈထိုင်တီႈၵဝ်ဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၵဝ်ယဵင်ႈၶႅၼ်းမီးပိင်ႇၺႃႇၼႃႇသေမၼ်းၼင်ႇႁိုဝ်။ လွင်ႈတၢင်းၼႆႉၵေႃႈပဵၼ်ဢၼတ်ႉတႃႉဢေႃႈ၊ ဝႃႈၼင်ႇၼႆဢေႃႈ။-

16ၵွပ်ႈပိူဝ်ႈဢၼ် တၵ်းလူင်လိုမ်းလွင်ႈတၢင်းၵႃႈဢၼ်ပဵၼ်မိူဝ်ႈလဵဝ်ၸိူဝ်းၼႆႉပႅတ်ႈ မိူဝ်ႈၶိင်ႇၵႃႇလႃႉၵမ်းလိုၼ်းၼၼ်ႉလႄႈ တၵ်းဢမ်ႇမီးတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်း ၵေႃႉဢၼ်မီးပိင်ႇၺႃႇ မိူၼ်ၸိူဝ်ႉၼင်ႇဢၼ်ဢမ်ႇမီးတၢင်းဢၼ် ၶုၵ်းၸႂ်လႆႈၶႆႈၸႂ်ထူပ်းၵေႃႉဢၼ်မိူၵ်ႈၼၼ်ႉလႄႈ ၵေႃႉဢၼ်မီးပိင်ႇၺႃႇၸၢင်ႈတၢႆမိူၼ်ၸိူဝ်ႉၼင်ႇ ၵေႃႉဢၼ်မိူၵ်ႈတၢႆၼၼ်ႉလူင်ပႄႇ။-

17ပိူဝ်ႈၼႆလႄႈ ၵဝ်မိူဝ်ႇၸၢၼ်ႈတၢင်းဢၼ်ဢသၢၵ်ႈလိပ်းဢေႃႈ။ လွင်ႈတၢင်းဢၼ်လႆႈႁဵတ်းၵႃႈတီႈတႂ်ႈၵၢင်ဝၼ်းၼႆႉ ပဵၼ်ဢၼ်ယၢပ်ႇၽိုတ်ႇၼႃႇလူင်လၢင်တီႈၵဝ်လႄႈ၊ ၵူႈၸိူဝ်ႉၵူႈပိူင်ၼၼ်ႉ ပဵၼ်လွင်ႈတၢင်းဢၼတ်ႉတႃႉ၊ လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။-

18ၼွၵ်ႈသေၼႆႉ လွင်ႈဢၼ်ၵဝ်လႆႈမိူဝ်ႇၸၢၼ်ႈ လွင်ႈတၢင်းဢၼ်ၵဝ်ၵျူဝ်းၸႃး ဢဝ်ႁႅင်းဢွၵ်ႇႁဵတ်းၵႃႈတီႈတႂ်ႈၵၢင်ဝၼ်း ၵူႈၸိူဝ်ႉၵူႈပိူင်ၼၼ်ႉၸမ်ႉ၊ ၵဝ်တၵ်းလႆႈဢဝ်လွင်ႈတၢင်းၼၼ်ႉ ဝႆႉၵိုတ်းဝႆႉၵျၢၼ်ႇပုၼ်ႈၵေႃႉဢၼ်တၵ်းပဵၼ်မႃးလိုၼ်းၵဝ်ၼၼ်ႉဢေႃႈ။-

19လွင်ႈဢၼ်ၵေႃႉၼၼ်ႉတၵ်းမီးပိင်ႇၺႃႇႁိုဝ်။ တၵ်းမိူၵ်ႈႁိုဝ်ၼၼ်ႉၸိုင် ၽူႈလႂ်တၵ်းႁူႉလႆႈ။ ၵေႃႉၼၼ်ႉတၵ်းလႆႈဢုပ်ႉပိူင်ႇၵႃႈဢၼ်ၵဝ်ၵျူဝ်းၸႃးဢဝ်ႁႅင်းဢွၵ်ႇႁဵတ်းၼၼ်ႉလႂ်၊ ၵႃႈဢၼ်ၵဝ်ၽုၺ်ႇဢွၵ်ႇၼႄပျႃးပိင်ႇၺႃႇၵဝ် ၵႃႈတီႈတႂ်ႈၵၢင်ဝၼ်းလႂ် ၸိူဝ်းၼၼ်ႉဢေႃႈ။ လွင်ႈတၢင်းၼၼ်ႉၵေႃႈ ပဵၼ်ဢၼတ်ႉတႃႉဢေႃႈ။-

20ပိူဝ်ႈၼႆလႄႈၵဝ်ဝၢႆႇၶိုၼ်း ႁႂ်ႈလႆႈၵျၢမ်ႇပွင် ႁႂ်ႈႁူဝ်ၸႂ်ၵဝ်ယင်းဢမ်ႇမီးတၢင်းဢၼ်မုင်ႈထႃႈမွင်းထႃႈလႄႈၸႂ်လူႉလူၺ်ႈလွင်ႈ ၵႃႈဢၼ်ၵဝ်ၵျူဝ်းၸႃး ဢဝ်ႁႅင်းဢွၵ်ႇႁဵတ်းၼၼ်ႉဢေႃႈ။-

21လွင်ႈမၼ်းၸမ်ႉ ပိၵ်ႉသမ်ႉပဵၼ်ၵေႃႉဢၼ်မီးပိင်ႇၺႃႇယူႇ၊ ပျေႉၸုမ်ႇဝႆႉတင်းဢတၢတ်ႈတၢင်းႁူႉတၢင်းၸၢင်ႈယူႇ၊ ပွင်ႁဵတ်းပွင်သၢင်ႈ လီလီငၢမ်းငၢမ်းယူႇသေလႄႈ ၵျူဝ်းၸႃးဢဝ်ႁႅင်းဢွၵ်ႇႁဵတ်းသေၵေႃႈ၊ တၵ်းလႆႈဢဝ်လွင်ႈတၢင်းၸိူဝ်းၼၼ်ႉ ဝႆႉၵိုတ်းဝႆႉၵျၢၼ်ႇပုၼ်ႈဢၼ် ၵေႃႉဢၼ်ဢမ်ႇၵျူဝ်းၸႃးဢဝ်ႁႅင်းဢွၵ်ႇႁဵတ်းၼၼ်ႉ တၵ်းၶဝ်ႈၸၢမ်ႇၸႃးဢေႃႈ။ လွင်ႈတၢင်းၼၼ်ႉၵေႃႈ ပဵၼ်လွင်ႈတၢင်းဢၼတ်ႉတႃႉ၊ လွင်ႈတၢင်းဢၼ်ႁၢႆႉယုတ်ႈၼႃႇလူင်လၢင်ဢေႃႈ။-

22ၼႂ်းလွင်ႈတၢင်းဢၼ်ၵျူဝ်းၸႃးဢဝ်ႁႅင်းဢွၵ်ႇႁဵတ်း ၼႂ်းလွင်ႈတၢင်းဢၼ်ၸႂ်ၸပ်းၸႂ်ၸွႆးၼႃႇလူင်လၢင် ၵႃႈတီႈတႂ်ႈၵၢင်ဝၼ်းၵူႈၸိူဝ်ႉၵူႈပိူင်ၼၼ်ႉ၊ ၵူၼ်းႁဝ်းၼႆႉမီးဢၵျူဝ်းၵႃႈသင်။-

23မိုဝ်ႉဝၼ်းမၼ်းတင်းသဵင်ႈတင်းလူင် ပဵၼ်တၢင်းဢၼ်မႆႈၸႂ်ၶီၸႂ်၊ တၢင်းႁဵတ်းတၢင်းသၢင်ႈမၼ်းၵေႃႈ ပဵၼ်တၢင်းဢၼ်ယၢပ်ႇၸႂ်ၽိုတ်ႇၸႂ်ဢေႃႈ။ လိူဝ်သေၼၼ်ႉ၊ ၶိင်ႇၵၢင်ၶိုၼ်းၵေႃႈႁူဝ်ၸႂ်မၼ်း ဢမ်ႇလႆႈတႄႇလႆႈၼိမ်။ လွင်ႈတၢင်းၼၼ်ႉၵေႃႈ ပဵၼ်ဢၼတ်ႉတႃႉဢေႃႈ။-

24ဢၶႂၢင်ႉဢၼ်လီပုၼ်ႈၵူၼ်းႁဝ်းလႄႈ လိူဝ်တွၼ်းၼႃႇသေတၢင်းဢၼ်ၵိၼ်ဢၼ်ၶူပ်း၊ တၢင်းဢၼ်ႁူဝ်ၸႂ်မူၼ်ႈပျေႃႇယူႇ ၵႃႈၼႂ်းတၢင်းဢၼ်ၵျူဝ်းၸႃးဢဝ်ႁႅင်းဢွၵ်ႇႁဵတ်းၼၼ်ႉ ဢမ်ႇမီးသေၸိူဝ်ႉသေပိူင်။ ဢၶႂၢင်ႉၼၼ်ႉၵေႃႈ ၵဝ်ႁူႉႁၼ်လွင်ႈဢၼ်ပဵၼ်မႃးတီႈမိုဝ်း ၽြႃးပဵၼ်ၸဝ်ႈဢေႃႈ။-

25ပေႃးဢၶႂၢင်ႉမၼ်းၸဝ်ႈဢမ်ႇမီးၸိုင် ၽူႈလႂ်တၵ်းၵိၼ်လႆႈ။ ၽူႈလႂ်တၵ်းၸၢမ်ႇၸႃးလႆႈ။-

26တီႈၵေႃႉဢၼ်ထုၵ်ႇၸႂ်ၵျိူၵ်ႈၸႂ်မၼ်းၸဝ်ႈၼၼ်ႉ၊ မၼ်းၸဝ်ႈပၼ်ပိင်ႇၺႃႇ၊ ဢတၢတ်ႈတၢင်းႁူႉတၢင်းၸႅင်ႈ ဢိၵ်ႇတင်းဢၶႂၢင်ႉတၢင်းဢၼ်ၸူမ်းသိူဝ်းဢေႃႈ။ တီႈၵေႃႉဢၼ်မီးဢပႅတ်ႈၼၼ်ႉၸမ်ႉ၊ မၼ်းၸဝ်ႈပၼ်ဢၶႂၢင်ႉဢၼ်လႆႈႁဵတ်း တၢင်းႁဵတ်းဢၼ်ယၢပ်ႇၸႂ်ၽိုတ်ႇၸႂ်ၼႃႇလူင်လၢင် ႁႂ်ႈလႆႈၵဵပ်းႁွမ်ၸူႉသိမ်းဝႆႉ ပုၼ်ႈဢၼ်တၵ်းပဵၼ်တီႈၵေႃႉဢၼ် ထုၵ်ႇၸႂ်ၵျိူၵ်ႈၸႂ် ၽြႃးပဵၼ်ၸဝ်ႈၼၼ်ႉဢေႃႈ။ လွင်ႈတၢင်းၼၼ်ႉၵေႃႈ ပဵၼ်လွင်ႈတၢင်းဢၼတ်ႉတႃႉ၊ လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။

← Chapter 1 Jump to: Chapter 3 →