Ecclesiastes 12

Shan

← Chapter 11 Jump to:

1ၶုၵ်းၸႂ်လႆႈၶႆႈၸႂ်ထူပ်း ၸဝ်ႈဢၼ်ၽၢၼ်ႇသၢင်းႁဵတ်းပဵၼ်မႂ်းၼၼ်ႉ ၼႂ်းမိူဝ်ႈဢၼ်ဢသၢၵ်ႈမႂ်းယင်းလဵၵ်ႉယင်းဢွၼ်ႇ ၸူဝ်ႈဢၼ်မိုဝ်ႉဝၼ်းဢၼ်ႁၢႆႉယုတ်ႈၼၼ်ႉ ဢမ်ႇပႆႇႁွတ်ႈထိုင်လႄႈ ၶူပ်ႇပီႊဢၼ်မႂ်းတၵ်းလၢတ်ႈလႄႈဝႃႈ၊ ၵဝ်ၼႆႉယူႇလႄႈဢမ်ႇပျေႃႇၵူၺ်ႉ၊ ဝႃႈၼင်ႇၼႆၼၼ်ႉ ဢမ်ႇပႆႇၸမ်ၼၼ်ႉ၊-

2ၸူဝ်ႈဢၼ်ၵၢင်ဝၼ်းတင်းဢၼ်လႅင်း၊ လိူၼ်တင်းလၢဝ်တင်းလၢႆဢမ်ႇပႆႇလပ်ႉႁၢႆၵႂႃႇလႄႈ ၶိင်ႇဢၼ်ၽူၼ်တူၵ်းသေယဝ်ႉ ၽႃႈၽူၼ်သမ်ႉၶိုၼ်းဢုမ်ႇၼႃႈၽႃႉၼၼ်ႉ ဢမ်ႇပႆႇႁွတ်ႈထိုင်ၼၼ်ႉတႃႉ။-

3ၼႂ်းၶိင်ႇမိုဝ်ႉဝၼ်းၸိူဝ်းၼၼ်ႉ ၶဝ်ၸိူဝ်းဢၼ်ပႂ်ႉႁိူၼ်းပႂ်ႉယေးယူႇၼၼ်ႉ တၵ်းဢွၼ်ၵၼ်သၼ်ႇသၼ်ႇဝႆဝႆ၊ ၶဝ်ၸိူဝ်းဢၼ်ႁႅင်းယႂ်ႇၼၼ်ႉ တၵ်းဢွၼ်ၵၼ်ႁႅင်းဢူၼ်ႈႁႅင်းယွမ်းၵႂႃႇ၊ ၶဝ်ၸိူဝ်းဢၼ်ၶိုတ်ႈၶဝ်ႈလူၺ်ၶဝ်ႈၼၼ်ႉ တၵ်းဢွၼ်ၵၼ်ထၢတ်ႇယူႇၵိုတ်းယူႇ ၵွပ်ႈပိူဝ်ႈဢၼ်မီးၵေႇၼႃႇၼၼ်ႉလႄႈ၊ တီႈၶဝ်ၸိူဝ်းဢၼ်တူၺ်းၵႃႈတီႈႁူးလၢင်းတဵၼ်ၼၼ်ႉ ဢၼ်လႅင်းတၵ်းလပ်ႉႁၢႆၵႂႃႇ၊-

4မႂ်ၽၵ်းတူၵႃႈတီႈႁိမ်းတၢင်းလၢႆ တၵ်းမီးတၢင်းဢၼ်ႁပ်းဢိုတ်းဝႆႉ ၼႂ်းမိူဝ်ႈဢၼ်သဵင်ၶိုတ်ႈသဵင်လူၺ်ယွမ်းၵႂႃႇလႄႈ သေၵေႃႉသေၵူၼ်းတၵ်းလုၵ်ႉ မိူဝ်ႈဢၼ်မၼ်းငိၼ်းသဵင်ၼူၵ်ႉၼၼ်ႉသေလႄႈ မႄႈယိင်းဢၼ်မေႃႁဵတ်းၵႂၢမ်းတင်းလၢႆ တၵ်းဢွၼ်ၵၼ်ႁဵတ်း သဵင်လဵၵ်ႉသဵင်သေးၵႂႃႇၼၼ်ႉဢေႃႈ။-

5ၼႂ်းၶိင်ႇမိူဝ်ႈၼၼ်ႉ ၶဝ်တၵ်းဢွၼ်ၵၼ်ၵူဝ်ႁႄ လွင်ႈတၢင်းဢၼ်သုင်တင်းလၢႆလႄႈ ထၢင်ႇၶဝ်တၵ်းထူပ်းၽေး ၵႃႈၼႂ်းသဵၼ်ႈတၢင်းဢေႃႈ။ တူၼ်ႈ ပႃႇတမ်ႇ တၵ်းမွၵ်ႇလႄႈ မႅင်းၵႅင်းၼၼ်ႉ တၵ်းပဵၼ်ဢၼ်ၼၵ်းဢၼ်ၼႃယူႇတီႈတူဝ်ၸဝ်ႈၵဝ်ႇဢေႃႈ။ ဢလူဝ်ႇသၼ်ႇတႃႉတၢင်းဢၼ်ၶႂ်ႈလႆႈ တၵ်းသုတ်ႈတၵ်းယွမ်းဢေႃႈ။ လွင်ႈမၼ်းၸမ်ႉ ၵူၼ်းယင်းတိုၵ်ႉမီးတၢင်းဢၼ်ၵႂႃႇၸူးၵႃႈတီႈ တီႈယူႇထႃႇဝရႃႉမၼ်းယူႇလႄႈ ၶဝ်ၸိူဝ်းဢၼ်ႁႆႈဢၼ်ႁွင်ႉၼၼ်ႉ ဢွၼ်ၵၼ်လႄႇလဵပ်ႈၸွမ်းၵႃႈၼႂ်းသဵၼ်ႈတၢင်းယူႇဢေႃႈ။-

6ၸူဝ်ႈဢၼ်မႆငိုၼ်းဢမ်ႇပႆႇၶၢတ်ႇ၊ ၵွၵ်းၶမ်းဢမ်ႇပႆႇတႅၵ်ႇ၊ ပုင်းၼမ်ႉဢမ်ႇပႆႇလူင်ႉပႆႇပွင်ႇ ၵႃႈတီႈၼမ်ႉဢွၵ်ႇႁူး၊ ၸၢၵ်ႈဢမ်ႇပႆႇႁၵ်း ၵႃႈတီႈႁိမ်းဢိူင်ႇၼမ်ႉၼၼ်ႉလႄႈ၊-

7မုၼ်ႈလိၼ်ဢမ်ႇပႆႇၶိုၼ်းၸူး ၵႃႈတီႈလိၼ်တီႈဢၼ်မၼ်းယူႇၵဝ်ႇၵဝ်ႇ၊ ဝီႉၺိၺ်ႇဢမ်ႇပႆႇၶိုၼ်းၸူးၵႃႈတီႈၽြႃးပဵၼ်ၸဝ်ႈဢၼ်ပၼ်ၼၼ်ႉၸိုင် ၶုၵ်းၸႂ်လႆႈၶႆႈၸႂ်ထူပ်းမၼ်းၸဝ်ႈတႃႉ။-

8သြႃႇထမ်ႇမႃႉတေႇသၼႃႇၼႆႉ ႁေႃးလၢတ်ႈလႄႈဝႃႈ၊ ဢၼတ်ႉတႃႉလွၼ်ႉလွၼ်ႉ၊ လွင်ႈတၢင်းၵူႈၸိူဝ်ႉၵူႈပိူင် ပဵၼ်ဢၼတ်ႉတႃႉဢေႃႈ၊ ဝႃႈၼင်ႇၼႆဢေႃႈ။

9သြႃႇထမ်ႇမႃႉတေႇသၼႃႇၼႆႉ ပဵၼ်ၵေႃႉဢၼ်မီးပိင်ႇၺႃႇလႄႈ မၼ်းမီးဢလႄႉ ဢၼ်သင်ႇသွၼ်ပၼ်တၢင်းႁူႉတၢင်းၸၢင်ႈ တီႈပရဵၵ်ႈသၢတ်ႈတင်းလၢႆဢေႃႈ။ မၼ်းၶႆႈၸႂ်ဝူၼ်ႉၸႂ်ၼႃႇလူင်လၢင်သေလႄႈ ႁႃဢဝ်ၵႂၢမ်းသုၵ်ႉတၢမ်ႇၼမ်ၼႃႇလႄႈ ၸီႇယၢင်ႇဝႆႉဢေႃႈ။-

10သြႃႇထမ်ႇမႃႉတေႇသၼႃႇၼႆႉ ႁႃဢဝ်ၵႂၢမ်းဢၼ်လီထွမ်ႇလီၽင်းလႄႈ တႅမ်ႈၵႂၢမ်းသမ်ႇမႃႇဝႆႉသိုဝ်ႈသိုဝ်ႈတေႃႇတေႃႇဢေႃႈ။-

11ၵႂၢမ်းၵေႃႉဢၼ်မီးပိင်ႇၺႃႇၼၼ်ႉ မိူၼ်ၵၼ်တင်းၶွၼ်ႉလႅမ်ၼၼ်ႉလႄႈ ၵႂၢမ်းၶဝ်ၸိူဝ်းဢၼ်ၵဵပ်းဢဝ်ႁွမ်ဢဝ်သိမ်းဝႆႉ ၵႂၢမ်းၸိူဝ်ႉၼင်ႇၼၼ် ဢၼ်ၸဝ်ႈဢၼ်လဵင်ႉထိင်းသူဝ်းလူင် ဢဝ်ဢၢပ်ႈပၼ်ၸိူဝ်းၼၼ်ႉသိမ်းဝႆႉၼၼ်ႉ မိူၼ်ၵၼ်တင်းလဵၵ်းလႅမ် ဢၼ်တွၵ်ႇယႅၼ်ႉသႂ်ႇဝႆႉၼၼ်ႉဢေႃႈ။-

12လႆႈသမ်ႉ လုၵ်ႈၸၢႆးၵဝ်ဢိူၺ်း၊ ၶၢမ်ႇတၢင်းဢၼ်ၵႂၢမ်းၸိူဝ်ႉၼင်ႇၼၼ် သင်ႇသွၼ်သုင်းမႃႉပၼ်ၼၼ်ႉတႃႉ။ ဢွၼ်ၵၼ်ၸီႇယၢင်ႇႁဵတ်းလိၵ်ႈႁဵတ်းလၢႆးၼမ်ၼႃႇလႄႈ ဢမ်ႇသဵင်ႈဢမ်ႇမူတ်းလႆႈ။ တၢင်းဢၼ်ၵျူဝ်းၸႃးလူတူၺ်းသွၼ်ဢဝ်လိၵ်ႈလၢႆးၼၼ်ႉ ပဵၼ်လွင်ႈတၢင်းဢၼ် ယႃႉယူၵ်ႉတူဝ်ၵႃႇယႃႉဢေႃႈ။

13ၵႂၢမ်းဢၼ်ပဵၼ်ႁူဝ်ႁုပ်ႈမၼ်းၸမ်ႉ၊ ၵူဝ်ႁႄၽြႃးပဵၼ်ၸဝ်ႈလႄႈ ပႂ်ႉၵမ်ပႂ်ႉၸွမ်းပိင်းၺၢပ်ႈမၼ်းၸဝ်ႈတင်းလၢႆယူႇတႃႉ။ ဢၼ်ၼႆႉၸမ်ႉ၊ ပဵၼ်ႁူဝ်ႁုပ်ႈလွင်ႈတၢင်းဢၼ် ၸၢပ်ႈသႅင်ႇၵၼ်တင်းၵူၼ်းဢေႃႈ။-

14လွင်ႈမၼ်းၸမ်ႉ ၽြႃးပဵၼ်ၸဝ်ႈ တၵ်းၸႅတ်ႈထၢမ်လႄႈၸီႇယၢင်ႇၸႃႉၸဵမ်တၢင်းဢၼ်သိူင်ႇမႅပ်ႉဝႆႉၵႃႈမီးလႄႈ လွင်ႈတၢင်းၵူႈၸိူဝ်ႉၵူႈပိူင် ဢၼ်လီဢၼ်ဢမ်ႇလီၼၼ်ႉဢေႃႈ။ ၵျၢမ်းတေႇသၼႃႇယဝ်ႉယဝ်ႉဢေႃႈ။

← Chapter 11 Jump to: