Ecclesiastes 5

Shan

← Chapter 4 Jump to: Chapter 6 →

1ယၢမ်းမိူဝ်ႈဢၼ်မႂ်းၵႂႃႇၵႃႈတီႈႁိူၼ်း ၽြႃးပဵၼ်ၸဝ်ႈၼၼ်ႉၸိုင်၊ ပႂ်ႉတိၼ်မႂ်းယူႇတႃႉ။ တၢင်းဢၼ် သုတ်ႉၸပ်းသုတ်ႉၸူးႁႂ်ႈလႆႈထွမ်ႇတြႃးၼၼ်ႉ ယဵင်ႈၶႅၼ်းလီၼႃႇသေ တၢင်းပုၵ်ႈၸေႃႇဢၼ်ၵူၼ်းမိူၵ်ႈႁဵတ်းၼၼ်ႉဢေႃႈ။ ၶဝ်ၼၼ်ႉ ဢမ်ႇႁူႉလွင်ႈဢၼ်ၶဝ်ႁဵတ်းဢပႅတ်ႈၼၼ်ႉ။-

2ယႃႇပေႁႂ်ႈသူပ်းမႂ်းလိုမ်းႁဵတ်းသတီႉ။ ယႃႇပေႁႂ်ႈႁူဝ်ၸႂ်မႂ်းၶၼ်ၽႂ်း ႁႂ်ႈလႆႈလၢတ်ႈၵႂၢမ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈ။ ၽြႃးပဵၼ်ၸဝ်ႈ မီးၵႃႈတီႈၽုင်ႇၵၢင်ႁၢဝ်ဢေႃႈ။ မႂ်းၸိုင် မီးၵႃႈၼိူဝ်လိၼ်မိူင်းဢေႃႈ။ ပိူဝ်ႈၼႆလႄႈ ယႃႇပေႁႂ်ႈၵႂၢမ်းမႂ်းၼမ်။-

3တၢင်းဢၼ်ၼွၼ်းၽၼ်ႁၼ်ၼၼ်ႉ ၸၢင်ႈပဵၼ်မႃးၵွပ်ႈပိူဝ်ႈဢၼ်ၵၢၼ်တၢင်းႁဵတ်းၼမ်ၼၼ်ႉလႄႈ လႆႈငိၼ်းသဵင်ၵေႃႉဢၼ်မိူၵ်ႈၼၼ်ႉ ၵွပ်ႈပိူဝ်ႈဢၼ်သူပ်းၼမ်ၵႂၢမ်းၼမ်ဢေႃႈ။-

4ပေႃးႁဵတ်းၵတီႉသဵတ်ႈၸႃႇတီႈၽြႃးပဵၼ်ၸဝ်ႈမႅၼ်ႈၸိုင် ယင်းဢမ်ႇၽေႇဝၢတ်ႈသဵတ်ႈၸႃႇလႄႈ ယႃႇပေယူႇ။ မၼ်းၸဝ်ႈဢမ်ႇၵျိူၵ်ႈၶဝ်ၸိူဝ်းဢၼ်မိူၵ်ႈၼၼ်ႉ။ ၽေႇဝၢတ်ႈၸွမ်းၵႃႈၼင်ႇဢၼ် ႁဵတ်းၵတီႉသဵတ်ႈၸႃႇဝႆႉၼၼ်ႉတႃႉ။-

5တၢင်းဢၼ်ယင်းဢမ်ႇႁဵတ်း ၵတီႉသဵတ်ႈၸႃႇလႃးလႃးလႄႈယူႇၼၼ်ႉ ယဵင်ႈၶႅၼ်းလီၼႃႇသေ တၢင်းဢၼ်ႁဵတ်းၵတီႉသဵတ်ႈၸႃႇယဝ်ႉလႄႈ ယင်းဢမ်ႇၽေႇလႄႈယူႇၼၼ်ႉဢေႃႈ။-

6ယႃႇပေပၼ်သူပ်းမႂ်း ႁႂ်ႈတၢမ်ႇဢပႅတ်ႈႁွတ်ႈထိုင်တီႈတူဝ်ၶၼ်ႇထႃႇမႂ်း။ ယႃႇပေႁႂ်ႈမီးလွင်ႈဢၼ်တၵ်းလႆႈလၢတ်ႈၵႃႈတီႈၽၢႆႇၼႃႈတမၢၼ်ႇၸဝ်ႈလႄႈဝႃႈ၊ ၵဝ်ၶႃႈၽိတ်းပိူင်ႈၶႃႈယဝ်ႉ၊ ဝႃႈၼင်ႇၼႆၼၼ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၽြႃးပဵၼ်ၸဝ်ႈ တၵ်းလႆႈၸႂ်မႆႈၶႆႈၸႃႉတီႈသဵင်ၵႂၢမ်းမႂ်းလႄႈ ယႃႉၽဵဝ်ႈလွင်ႈတၢင်းဢၼ်မႂ်းဢဝ်မိုဝ်းႁဵတ်းသၢင်ႈၼၼ်ႉပႅတ်ႈၼင်ႇႁိုဝ်။-

7ၵႃႈၼႂ်းတၢင်းဢၼ်ၼွၼ်းၽၼ်ႁၼ်ၼမ်ၼႃႇ ဢိၵ်ႇတင်းၵႃႈၼႂ်းၵႂၢမ်းဢၼ်ၼမ်ၼႃႇၼၼ်ႉ ၸၢင်ႈပႃးလွင်ႈတၢင်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။ မႂ်းၸမ်ႉ၊ ၵူဝ်ႁႄၽြႃးပဵၼ်ၸဝ်ႈယူႇတႃႉ။

8ပေႃးမႂ်းႁၼ်တၢင်းဢၼ်ၼိၵ်ႈၸၢၵ်ႈငႅၼ်းသႄး ၵူၼ်းယၢၵ်ႈၵူၼ်းၽၢၼ်၊ တၢင်းဢၼ်ဝႄႈပိူင်ႈသဵၼ်ႈတၢင်းတြႃးလႄႈ ဢမ်ႇၸွမ်းၼင်ႇတြႃး ႁဵတ်းပႄႉႁဵတ်းၼႅင်ႇ ၸီႇယၢင်ႇတႅပ်းတတ်းၵႃႈၼႂ်းဢိူင်ႇဝၢၼ်ႈၼွၵ်ႈၼႃးပၢင်ႇၼၼ်ႉၸိုင်၊ ယႃႇပေမီးတၢင်းဢၼ်ဢၢမ်း လွင်ႈတၢင်းၸိူဝ်ႉၼင်ႇၼၼ်ၼၼ်ႉ။ ၵေႃႉဢၼ်ယႂ်ႇသုင်ၼႃႇသေၵေႃႉဢၼ်ယႂ်ႇသုင်ၼၼ်ႉ လူတူၺ်းမၢတ်ႈတွင်းလွင်ႈမၼ်းဝႆႉယူႇဢမ်ႇၵႃး၊ ၵေႃႉဢၼ်ယႂ်ႇသုင်ၼႃႇသေပိူၼ်ႈၼၼ်ႉ မီးယူႇၵႃႈၼိူဝ်ၶဝ်ၼၼ်ႉဢေႃႈ။-

9တၢင်းဢၼ်ပဵၼ်တိုၼ်းပဵၼ်ႁွၼ်း ဢၼ်ပဵၼ်မႃးၵႃႈတီႈလိၼ်မိူင်းၼႆႉၼၼ်ႉ ပဵၼ်ပုၼ်ႈၵူၼ်းတင်းသဵင်ႈတင်းလူင်လႄႈ၊ ၶုၼ်ႁေႃၶမ်းသေၵေႃႈ လႆႈၶၢမ်ႇဢဝ်ၵျေးၸူးႁႆႊ ၵျေးၸူးၼႃးဢေႃႈ။

10ၵေႃႉဢၼ် ၸႂ်ၸပ်းၸႂ်ၸွႆးငိုၼ်းၼၼ်ႉ ဢလူဝ်ႇသၼ်ႇတႃႉ ဢမ်ႇပေႇတီႈငိုၼ်းလႆႈ။ ၵေႃႉဢၼ် ၸႂ်ၸပ်းၸႂ်ၸွႆးၸေးၸိမ်ႇၼၼ်ႉ ပိၵ်ႉသမ်ႉၸေးၸိမ်ႇယႂ်ႇၽႄႈတူဝ်းတွၼ်းမႃးသေၵေႃႈ ဢမ်ႇပေႇၸႂ်လႆႈ။ လွင်ႈတၢင်းၼၼ်ႉ ၵေႃႈပဵၼ်ဢၼတ်ႉတႃႉဢေႃႈ။-

11ယၢမ်းမိူဝ်ႈဢၼ်ဢုၵ်ႉၸႃႇယႂ်ႇၽႄႈတူဝ်းတွၼ်းမႃးၼၼ်ႉၸိုင် ၶဝ်ၸိူဝ်းဢၼ်လႆႈၵိၼ်ၵေႃႈ ယႂ်ႇၽႄႈၼမ်ၵိုၼ်းမႃးလႄႈ ၼွၵ်ႈသေၵျေးၸူးတၢင်းဢၼ် ၸဝ်ႈဢုၵ်ႉၸႃႇဢဝ်မၢၵ်ႇတႃမၼ်းလူတူၺ်းၼၼ်ႉၵူၺ်း မီးၵျေးၸူးၵႃႈသင်လူးၵွၼ်ႇ။-

12ၵေႃႉဢၼ်ႁဵတ်းၵၢၼ်တၢင်းႁဵတ်းၼၼ်ႉ ၵိၼ်ၼမ်ၼမ်သေဢမ်ႇဝႃႈ၊ ၵိၼ်ၵေႇၵေႇသေဢမ်ႇဝႃႈ၊ ၸၢင်ႈၼွၼ်းလပ်းလီဝၢၼ်လီဢေႃႈ။ ၸေးၸိမ်ႇၵေႃႉဢၼ်မၢၵ်ႈမီးၼၼ်ႉၸမ်ႉ၊ ၸၢင်ႈႁႂ်ႈတၢင်းၼွၼ်းၸဝ်ႈမၼ်းလူႉဢေႃႈ။

13ၵဝ်လႆႈႁၼ်တၢင်းဢၼ်ႁၢႆႉယုတ်ႈၼႃႇလူင်လၢင် ၵႃႈတီႈတႂ်ႈၵၢင်ဝၼ်းၼႆႉဢၼ်ဝႃႈ တၢင်းဢၼ်ၸဝ်ႈၸေးၸိမ်ႇသိမ်းပႅင်းၸေးၸိမ်ႇဝႆႉ တေႃႇထိုင်ႁွတ်ႈထၼ်ႈပေႃးဢၵျူဝ်းမၼ်းလူႉၼၼ်ႉယဝ်ႉ။-

14ၸေးၸိမ်ႇၼၼ်ႉၸၢင်ႈႁူင်ႈႁၢႆၵႂႃႇ ၵွပ်ႈပိူဝ်ႈလွင်ႈတၢင်းဢၼ်ဢမ်ႇလီဢမ်ႇငၢမ်းလႄႈ ပေႃးမၼ်းလႆႈလုၵ်ႈၸၢႆးၸိုင် လုၵ်ႈၸၢႆးမၼ်းၼၼ်ႉ လႆႈယူႇတိၼ်လၢႆမိုဝ်းပဝ်ႇဢေႃႈ။-

15ၸိူဝ်ႉၼင်ႇဢၼ်မၼ်း ယင်းဢမ်ႇပႃးၵႃႈသင်လႃးလႃးလႄႈ ဢွၵ်ႇသေၵႃႈၼႂ်းတွင်ႉမႄႈမၼ်းမႃးၼၼ်ႉ၊ မၼ်းတၵ်းလႆႈၶိုၼ်းၵႂႃႇမိူၼ်ၸိူဝ်ႉၼင်ႇဢၼ်မၼ်းမႃးၼၼ်ႉဢေႃႈ။ မၼ်းဢမ်ႇလႆႈဢဝ်မိုဝ်းမၼ်းယိပ်းၵမ်ဢဝ်ဢုၵ်ႉၸႃႇ ဢၼ်မၼ်းၵျူဝ်းၸႃးဢဝ်ႁႅင်းဢွၵ်ႇႁဵတ်းလႄႈလႆႈၼၼ်ႉၵႂႃႇ သေၸိူဝ်ႉသေပိူင်။-

16တၢင်းဢၼ်မၼ်းယင်းဢမ်ႇပႅၵ်ႇဢမ်ႇပိူင်ႈလႃးလႃးလႄႈ လႆႈၶိုၼ်းၵႂႃႇၼၼ်ႉ ပဵၼ်တၢင်းဢၼ်ႁၢႆႉယုတ်ႈၼႃႇလူင်လၢင်ဢေႃႈ။ ၵေႃႉဢၼ်ၵျူဝ်းၸႃးဢဝ်ႁႅင်းဢွၵ်ႇႁဵတ်း ႁႂ်ႈလႆႈလူမ်းလႆႈလႅင်ႉၵူၺ်းၼၼ်ႉ မီးၵျေးၸူးၵႃႈသင်။-

17မၼ်းၸၢင်ႈႁႂ်ႈမိုဝ်ႉဝၼ်းမၼ်း တင်းသဵင်ႈတင်းလူင်ပူၼ်ႉၵႂႃႇယူႇၵႃႈၼႂ်းဢၼ်လပ်းသိင်ႇလႄႈ မၼ်းလႆႈၶၢမ်ႇတၢင်းဢၼ်ယႃႉယူၵ်ႉ၊ တၢင်းဢၼ်ယၢပ်ႇၸႂ်ယုင်ႈၸႂ်၊ တၢင်းဢၼ်ၸႂ်မႆႈၶႆႈၸႃႉၼႃႇလူင်လၢင်ဢေႃႈ။

18တူၺ်းလူး၊ လွင်ႈတၢင်းဢၼ်ၵဝ်ႁၼ် ဢၼ်ပဵၼ်ဢၼ်သေႇၶျႃႇလီငၢမ်းလႄႈ ထုၵ်ႇၶိုင်ၼၼ်ႉၸမ်ႉ၊ ပဵၼ်တၢင်းဢၼ်ၵိၼ်ဢၼ်ၶူပ်း၊ တၢင်းဢၼ်မူၼ်ႈပျေႃႇယူႇၵႃႈၼႂ်းဢၵျူဝ်းၵႃႈဢၼ်ၵျူဝ်းၸႃးဢဝ်ႁႅင်းဢွၵ်ႇႁဵတ်း ၵႃႈတီႈတႂ်ႈၵၢင်ဝၼ်းၼႆႉ ၸူဝ်ႈဢသၢၵ်ႈၵႃႈဢၼ်ၽြႃးပဵၼ်ၸဝ်ႈပၼ်တီႈမၼ်းၼၼ်ႉတဵမ်တဵမ်လႄႈလႆႈၼၼ်ႉဢေႃႈ။ လွင်ႈတၢင်းၼၼ်ႉပဵၼ်ပုၼ်ႈမၼ်းတႃႇမၼ်းဢေႃႈ။-

19ၵႃႈပဵၼ်ၵေႃႉဢၼ်လႆႈၸေးၸိမ်ႇဢုၵ်ႉၸႃႇ ဢၼ်ၽြႃးပဵၼ်ၸဝ်ႈဢဵတ်းလူပၼ်ၼၼ်ႉၵူႈၵေႃႉ မီးဢၶႂၢင်ႉဢၼ်လႆႈၵိၼ်လႄႈ ၶၢမ်ႇဢဝ်ပုၼ်ႈမၼ်းတႃႇမၼ်း ဢိၵ်ႇတင်းဢၶႂၢင်ႉဢၼ်လႆႈမူၼ်ႈပျေႃႇယူႇၼႂ်းတၢင်းဢၼ်မၼ်းၵျူဝ်းၸႃးဢဝ်ႁႅင်းဢွၵ်ႇႁဵတ်းၼၼ်ႉ ၵွပ်ႈပိူဝ်ႈၵျေးၸူးၽြႃးပဵၼ်ၸဝ်ႈၵူၺ်းဢေႃႈ။-

20မၼ်းတၵ်းဢမ်ႇၶုၵ်းၸႂ်လႆႈၶႆႈၸႂ်ထူပ်း မိုဝ်ႉဝၼ်းဢသၢၵ်ႈမၼ်း ဢၼ်ပူၼ်ႉမႃးယဝ်ႉၼၼ်ႉၼႃႇလူင်လၢင်။ လွင်ႈမၼ်းၸမ်ႉ ၽြႃးပဵၼ်ၸဝ်ႈဢဵတ်းလူပၼ်ဢၶႂၢင်ႉ ဢၼ်ႁူဝ်ၸႂ်မၼ်းလႆႈၸူမ်းလႆႈသိူဝ်း ၼၼ်ႉဢေႃႈ။

← Chapter 4 Jump to: Chapter 6 →