Genesis 24 — Shan

1ဢႃႇပြႃႇႁၢမ်ႇ ဢသၢၵ်ႈယႂ်ႇလႄႈၵႄႇထဝ်ႈၼႃႇလူင်လၢင်ယဝ်ႉ။ ထႃႇဝရႃႉၽြႃးပၼ်တၢင်းလီတီႈမၼ်းၼႂ်းလွင်ႈတၢင်းၵူႈၸိူဝ်ႉၵူႈပိူင်ယဝ်ႉ။-

2ဢႃႇပြႃႇႁၢမ်ႇ လၢတ်ႈတီႈၶႃႈမၼ်းဢၼ်ဢသၢၵ်ႈယႂ်ႇၵႃႈၼႂ်းၵူၼ်းႁိူၼ်းၵူၼ်းယေးမၼ်းလႄႈ ႁဵတ်းၽၼ်ႇတႃႇၸူဝ်းယူႇၼၼ်ႉလႄႈဝႃႈ၊ ဢဝ်မိုဝ်းမႂ်းဝႆႉၵႃႈတႂ်ႈၶႃၵဝ်တႃႉ။-

3ၵဝ်တၵ်းႁႂ်ႈမႂ်းတိူင်ႇထႃႇဝရႃႉၽြႃး ၽြႃးပဵၼ်ၸဝ်ႈၵၢင်ႁၢဝ်၊ ၽြႃးပဵၼ်ၸဝ်ႈလိၼ်မိူင်းၼၼ်ႉ လွင်ႈဢၼ်မႂ်းယင်းဢမ်ႇလိူၵ်ႈဢမ်ႇၵဵပ်းဢဝ်မေးပုၼ်ႈႁင်းလုၵ်ႈၸၢႆးၵဝ်ၵႃႈၼႂ်းလုၵ်ႈယိင်းၸိူဝ်ႉၶိူဝ်းၵူၼ်း ၶႃႇၼၢၼ်ႇ တီႈဢၼ်ၵဝ်ယူႇၼႆႉလႄႈ၊-

4တၵ်းလႆႈၵႂႃႇၵႃႈတီႈမိူင်းၵဝ်တင်းပီႈၼွင်ႉၸိူဝ်ႉၶိူဝ်းၵဝ်ပုၼ်ႉသေလႄႈ လိူၵ်ႈၵဵပ်းဢဝ်မေး ပုၼ်ႈႁင်း ဢီႉၸၢၵ်ႈ လုၵ်ႈၸၢႆးၵဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

5ၶႃႈမၼ်းၵေႃႈထၢမ်လႄႈဝႃႈ၊ ပေႃးမႄႈယိင်းဢမ်ႇမီးဢလူဝ်ႇၶႂ်ႈၸွမ်းမႃးၵႃႈတီႈမိူင်းၼႆႉၸိုင်၊ ၸွင်ႇၶႃႈၸဝ်ႈသမ်ႉတၵ်းလႆႈႁွင်ႉဢဝ်လုၵ်ႈၸၢႆးၸဝ်ႈႁဝ်း ၵႂႃႇၵႃႈတီႈမိူင်းဢၼ်ၸဝ်ႈႁဝ်းဢွၵ်ႇမႃးၼၼ်ႉၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

6ဢႃႇပြႃႇႁၢမ်ႇ ၵေႃႈလၢတ်ႈတီႈမၼ်းလႄႈဝႃႈ၊ ႁဵတ်းသတီႉတႃႉ။ ယႃႇပေႁွင်ႉဢဝ်လုၵ်ႈၸၢႆးၵဝ်ၵႂႃႇၵႃႈတီႈမိူင်းၼၼ်ႉ။-

7ထႃႇဝရႃႉၽြႃး ၽြႃးပဵၼ်ၸဝ်ႈၽုင်ႇၵၢင်ႁၢဝ် ဢၼ်ႁွင်ႉဢဝ်ၵဝ်ၵႃႈၼႂ်းႁိူၼ်းပေႃႈၵဝ် တင်းမိူင်းတီႈယူႇပီႈၼွင်ႉၸိူဝ်ႉၶိူဝ်းၵဝ်ပုၼ်ႉလႄႈ ပၼ်ပျႃႇတိၵ်ႈတီႈၵဝ်ၼၼ်ႉ တိူင်ႇလႄႈဝႃႈ၊ ၵဝ်တၵ်းပၼ်မိူင်းၼႆႉတီႈၸိူဝ်ႉၶိူဝ်းမႂ်းဢေႃႈ၊ ဝႃႈၼင်ႇၼႆၼၼ်ႉ တၵ်းပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈ ဢွၼ်ႁူဝ်မႂ်းၵႂႃႇလႄႈမႂ်းတၵ်းလႆႈဢဝ်မေးပုၼ်ႈႁင်းလုၵ်ႈၸၢႆးၵဝ် ၵႃႈတီႈမိူင်းၼၼ်ႉဢေႃႈ။-

8ပေႃးမႄႈယိင်းဢမ်ႇၶႂ်ႈၸွမ်းလူၺ်ႈၵၼ်တင်းမႂ်းၸိုင်၊ ႁႂ်ႈမႂ်းၵၢင်းလွတ်ႈတင်းတၢင်းဢၼ်ၵိၼ်ႇဝႃႈ ဢၼ်ၵဝ်ပၼ်တေႃႈလဵဝ်ၼႆႉၼၼ်ႉတႃႉ။ ၵူၺ်းၵႃႈ ယႃႇပေႁွင်ႉဢဝ်လုၵ်ႈၸၢႆးၵဝ်ၵႂႃႇၵႃႈတီႈမိူင်းၼၼ်ႉ၊ ဝႃႈၼင်ႇၼႆသေယဝ်ႉ၊-

9ၶႃႈမၼ်းၼၼ်ႉ ဢဝ်မိုဝ်းမၼ်းဝႆႉၵႃႈတႂ်ႈၶႃၸဝ်ႈမၼ်း ဢႃႇပြႃႇႁၢမ်ႇ ၼၼ်ႉသေလႄႈ ၵိၼ်ႇဝႃႈလူၺ်ႈလွင်ႈတၢင်းၼၼ်ႉဢေႃႈ။

10ၶႃႈမၼ်းၼၼ်ႉၵေႃႈ လုၵ်ႉလႄႈဢဝ်ၵလႃးဢုၵ်ႉၵႃႈၼႂ်းၽုင်ၵလႃးဢုၵ်ႉ ၸဝ်ႈမၼ်းၼၼ်ႉသိပ်းတူဝ် ဢိၵ်ႇတင်းဢုၵ်ႉၸႃႇၶူဝ်းလဵင်းၵႃႈဢၼ်ပဵၼ်ဢၼ်လီတီႈၸဝ်ႈမၼ်းၵႂႃႇလႄႈ ႁွတ်ႈထိုင်ဝဵင်း ၼႃႇၶေႃႇ မိူင်း မေႇသေႃးပေႃးတႃႇမီႉ ဢေႃႈ။-

11မၼ်းႁႂ်ႈၵလႃးဢုၵ်ႉၸိူဝ်းၼၼ်ႉၶုပ်ႉမူပ်ႇၵႃႈၼွၵ်ႈဝဵင်း ၵႃႈတီႈႁိမ်းၼမ်ႉမေႃႇၶိင်ႇႁူဝ်ၶမ်ႈ ၶိင်ႇဢၼ်ၽူႈယိင်းတင်းလၢႆမႃးတဵၵ်းၼမ်ႉၼၼ်ႉသေယဝ်ႉ၊-

12သူးတွင်းလႄႈဝႃႈ၊ ထႃႇဝရႃႉၽြႃး၊ၽြႃးပဵၼ်ၸဝ်ႈ ဢႃႇပြႃႇႁၢမ်ႇ ၸဝ်ႈၵဝ်ၶႃႈၼၼ်ႉတီႈၶႃႈ၊ ဝၼ်းမိူဝ်ႈၼႆႉၶႅၼ်းတေႃႈႁႂ်ႈတၢင်းၵျၢမ်ႇတၢင်းပွင်ၶႃႈၸဝ်ႈပဵၼ်လႄႈ ႁဵတ်းၵျေးၸူးတီႈ ဢႃႇပြႃႇႁၢမ်ႇ ၸဝ်ႈၵဝ်ၶႃႈၼၼ်ႉသေၵမ်းတီႈၶႃႈ၊-

13ၶႃႈၸဝ်ႈၸုၵ်းယူႇၵႃႈတီႈႁိမ်းၼမ်ႉမေႃႇၼႆႉလႄႈ ၼႂ်းမိူဝ်ႈဢၼ်လုၵ်ႈယိင်းသၢဝ်ၵူၼ်းဝဵင်းၸိူဝ်းၼႆႉ မႃးတဵၵ်းၼမ်ႉၼၼ်ႉ၊-

14လုၵ်ႈယိင်းသၢဝ်ၵေႃႉလႂ်သေဢမ်ႇဝႃႈ ပေႃးၶႃႈၸဝ်ႈဝႃႈ၊ ၶျႃးၼမ်ႉတဝ်ႈမႂ်းပုၼ်ႈဢၼ်ၵဝ်တၵ်းၵိၼ်သေၵမ်း၊ ဝႃႈၼင်ႇၼႆလႄႈ၊ မၼ်းၶိုၼ်းလၢတ်ႈလႄႈဝႃႈ၊ ၵိၼ်သေၵမ်း။ တီႈၵလႃးဢုၵ်ႉၸဝ်ႈၸိူဝ်းၼႆႉၵေႃႈ တၵ်းတိုၵ်းၼမ်ႉပၼ်ဢေႃႈ၊ ဝႃႈၼင်ႇၼႆၼၼ်ႉၸိုင်၊ ႁႂ်ႈလုၵ်ႈယိင်းသၢဝ်ၼၼ်ႉ ပဵၼ်ၵေႃႉဢၼ်ၸဝ်ႈႁဝ်း ၶၢၼ်းဝႆႉပုၼ်ႈႁင်း ဢီႉၸၢၵ်ႈ ၶႃႈၸဝ်ႈႁဝ်းၼၼ်ႉသေၵမ်းတီႈၶႃႈ၊ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈ၊ၶႃႈၸဝ်ႈတၵ်းလႆႈႁူႉလွင်ႈဢၼ်ၸဝ်ႈႁဝ်း ႁဵတ်းၵျေးၸူးတီႈၸဝ်ႈၵဝ်ၶႃႈၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

15ၼႂ်းမိူဝ်ႈဢၼ်မၼ်းယင်းတိုၵ်ႉလဝ်ႊလၢတ်ႈၸိူဝ်ႉၼင်ႇၼၼ်ယူႇလႄႈ ၸူဝ်ႈဢၼ်ဢမ်ႇပႆႇယဝ်ႉၼၼ်ႉၸိုင် မၼ်းမုင်ႈႁၼ် ရေႇပႅၵ်ႉၵႃႉ လုၵ်ႈယိင်း ပေႇသူၺ်ႇလႃႉ ဢၼ်ပဵၼ်လုၵ်ႈၸၢႆး မီႉလၶႃႇ ၊ မေး ၼႃႇၶေႃႇ ၊ ပီႈၸၢႆး ဢႃႇပြႃႇႁၢမ်ႇ ၼၼ်ႉ ႁၢပ်ႇၼမ်ႉတဝ်ႈတၢင်ႇၵႃႈၼိူဝ်ႁူဝ်မႃႇယူႇသေလႄႈ ဢွၵ်ႇမႃးဢေႃႈ။-

16လုၵ်ႈယိင်းသၢဝ်ၼၼ်ႉႁၢင်ႈလီၽၢင်လီၼႃႇလူင်လၢင်လႄႈ ပဵၼ်ၵၼ်ႇၺႃႇဢၼ်ဢမ်ႇပႆႇသိူၵ်ႈသမ်ႇၵၼ်တင်းၵူၼ်းၸၢႆးဢေႃႈ။ မၼ်းၼၼ်ႉလူင်းၸူးၵႃႈတီႈၼမ်ႉမေႃႇလႄႈ ထႅမ်ႁႂ်ႈၼမ်ႉတဵမ်ၼမ်ႉတဝ်ႈသေယဝ်ႉ ၶိုၼ်ႈမႃးဢေႃႈ။-

17ၶႃႈၼၼ်ႉၵေႃႈလႅၼ်ႈၵႂႃႇၸူးႁႂ်ႈလႆႈထူပ်းၵၼ်တင်းမၼ်းၼၼ်ႉသေလႄႈ ယွၼ်းဝႃႈ၊ ႁႂ်ႈလႆႈၵိၼ်ၼမ်ႉၼႂ်းၼမ်ႉတဝ်ႈမႂ်းၼႆႉသေဢိတ်းၼိုင်ႈသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

18မၼ်းၼၼ်ႉၵေႃႈလၢတ်ႈလႄႈဝႃႈ၊ ၵိၼ်သေၵမ်းၸဝ်ႈ၊ ဝႃႈၼင်ႇၼႆသေယဝ်ႉ၊ ၶျႃးၼမ်ႉတဝ်ႈလူင်းသႂ်ႇၵႃႈၼိူဝ်မိုဝ်းမၼ်းၶၼ်ၶၼ်ၽႂ်းၽႂ်းလႄႈ ပၼ်ၵိၼ်ၼမ်ႉဢေႃႈ။-

19မၼ်းပၼ်ၵိၼ်ၼမ်ႉယဝ်ႉ၊ မၼ်းၸင်ႇသမ်ႉလၢတ်ႈလႄႈဝႃႈ၊ ပုၼ်ႈၵလႃးဢုၵ်ႉၸဝ်ႈၸိူဝ်းၼၼ်ႉၵေႃႈ ၵဝ်ၶႃႈတၵ်းတဵၵ်းပၼ်တေႃႇထိုင်ႁွတ်ႈထၼ်ႈပေႃး ၶဝ်လႆႈၵိၼ်ဢိမ်ႇဢိမ်ႇတဵမ်တဵမ်ၶႃႈဢေႃႈ၊ ဝႃႈၼင်ႇၼႆလႄႈ၊-

20မၼ်းဢဝ်ၼမ်ႉဢၼ်မီးၵႃႈၼႂ်းတဝ်ႈၼၼ်ႉထွၵ်ႇသႂ်ႇၼႂ်းႁၢင်းဢၼ်တိုၵ်းၼမ်ႉၶၼ်ၶၼ်ၽႂ်းၽႂ်းသေယဝ်ႉ၊ သမ်ႉၶိုၼ်းလႅၼ်ႈၵႂႃႇၸူးၵႃႈတီႈၼမ်ႉမေႃႇႁႂ်ႈလႆႈတဵၵ်းၼမ်ႉထႅင်ႈလႄႈ တိုၵ်းၼမ်ႉပုၼ်ႈၵလႃးဢုၵ်ႉၸိူဝ်းၼၼ်ႉဢေႃႈ။-

21ၵူၼ်းၸၢႆးၼၼ်ႉဢၢမ်းလွင်ႈမႄႈယိင်းၼၼ်ႉလႄႈ ၶႂ်ႈႁူႉလွင်ႈဢၼ်ထႃႇဝရႃႉၽြႃးပွင်ႁဵတ်းလွင်ႈဢမူႉဢၼ်မၼ်းႁွတ်ႈမႃးၼၼ်ႉႁိုဝ်။ ဢမ်ႇပွင်ႁဵတ်းႁိုဝ်ၼၼ်ႉလႄႈ ယူႇတဵတ်ႇတဵတ်ႇယူႇဢေႃႈ။-

22လိုၼ်းသေၵလႃးဢုၵ်ႉၸိူဝ်းၼၼ်ႉ ၵိၼ်ၼမ်ႉယဝ်ႉၼၼ်ႉ၊ ၵူၼ်းၸၢႆးၼၼ်ႉ ဢဝ်သွႆႈၶမ်းဢၼ်ႁွႆႈၶူႈလင်ဢၼ်ၼမ်ႉၼၵ်းမၼ်းမီးၶိုင်ႈၵျၢပ်ႈ သၶေးလႃႉ ၼိုင်ႈ၊ ဢိၵ်ႇတင်းဝႅၼ်ၶမ်းၵူႈၼိုင်ႈ ဢၼ်ၼမ်ႉၼၵ်းမၼ်းမီးၵျၢပ်ႈ သၶေးလႃႉ သိပ်းၵျၢပ်ႈၸိူဝ်းၼၼ်ႉဢွၵ်ႇသေလႄႈ၊-

23ထၢမ်လႄႈဝႃႈ၊ မႂ်းပဵၼ်လုၵ်ႈယိင်းၽူႈလႂ်၊ မွၵ်ႇလၢတ်ႈတီႈၵဝ်သေၵမ်း။ ၵႃႈတီႈႁိူၼ်းပေႃႈမႂ်းၼၼ်ႉ မီးပုၼ်ႈတႃဢၼ် ႁဝ်းၶႃႈတၵ်း သွၼ်ႈပိုင်ႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

24မၼ်းၵေႃႈလၢတ်ႈလႄႈဝႃႈ၊ ၵဝ်ၶႃႈပဵၼ်လုၵ်ႈယိင်း ပေႇသူၺ်ႇလႃႉ ဢၼ် မီႉလၶႃႇ မေး ၼႃႇၶေႃႇ ၼၼ်ႉၵိူတ်ႇလဵင်ႉမႃးၼၼ်ၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

25မၼ်းသမ်ႉလၢတ်ႈလႄႈဝႃႈ၊ ၵႃႈတီႈႁဝ်းၶႃႈၼၼ်ႉ မီးယိူဝ်ႈႁႅင်ႈလႂ်၊ ပုၼ်ႈဢၼ်လီၵိၼ်လီၶူပ်းလႂ် ဢိၵ်ႇတင်းတီႈဢၼ်တၵ်းသွၼ်ႈပိုင်ႈယူႇလႂ်ယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

26မိူဝ်ႈၼၼ်ႉၵူၼ်းၸၢႆးၼၼ်ႉ ၵူမ်ႈၵွမ်းႁူဝ်လႄႈ ၵူဝ်းၵႂၢႆႇထႃႇဝရႃႉၽြႃးယူႇသေလႄႈ၊-

27ဢွၵ်ႇသူပ်းဝႃႈ၊ ႁႂ်ႈထႃႇဝရႃႉၽြႃး၊ၽြႃးပဵၼ်ၸဝ်ႈၸဝ်ႈၵဝ်ၶႃႈ ဢႃႇပြႃႇႁၢမ်ႇ ဢၼ်ဢမ်ႇသိမ်းဢဝ် ၵရူႉၼႃႇတင်းသဵတ်ႈၸႃႇသေၵႃႈတီႈၸဝ်ႈၵဝ်ၶႃႈၼၼ်ႉ မီးမင်ႇၵလႃႇသေၵမ်းလူၺ်ႈတီႈၶႃႈ၊ ထႃႇဝရႃႉၽြႃးဢဝ်ၵဝ်ၶႃႈၼႂ်းမိူဝ်ႈဢၼ် ၵဝ်ၶႃႈယင်းတိုၵ်ႉၸွမ်းၼႂ်းသဵၼ်ႈတၢင်းၵႂႃႇယူႇၼၼ်ႉသေလႄႈ သူင်ႇႁွတ်ႈၵႃႈတီႈႁိူၼ်းပီႈၼွင်ႉၸဝ်ႈၵဝ်ၶႃႈယဝ်ႉလူင်ပႄႇ၊ ဝႃႈၼင်ႇၼႆဢေႃႈ။-

28လုၵ်ႈယိင်းသၢဝ်ၼၼ်ႉၵေႃႈ၊ လႅၼ်ႈၵႂႃႇလႄႈမွၵ်ႇလၢတ်ႈလွင်ႈတၢင်းၸိူဝ်းၼႆႉၵႃႈတီႈႁိူၼ်းမႄႈမၼ်းဢေႃႈ။

29ရေႇပႅၵ်ႉၵႃႉ ၼၼ်ႉ မီးပီႈၸၢႆးၵေႃႉၼိုင်ႈဢၼ်လႆႈၸိုဝ်ႈ လႃႇပၢၼ်ႇ ဢေႃႈ။ လႃႇပၢၼ်ႇ ၼၼ်ႉၶုၼ်ႇလႅၼ်ႈၵႂႃႇၸူးၼမ်ႉမေႃႇ ၵႃႈတီႈဢၼ်ၵူၼ်းၸၢႆးၼၼ်ႉမီးၼၼ်ႉဢေႃႈ။-

30မိူဝ်ႈဢၼ်မၼ်းလႆႈႁၼ်သွႆႈၶမ်းႁွႆႈၶူႈလင် တင်းဝႅၼ်ဢၼ်မီးၵႃႈတီႈမိုဝ်းၼွင်ႉယိင်းမၼ်းၼၼ်ႉလႄႈ သမ်ႉလႆႈငိၼ်းၵႂၢမ်းဢၼ်ၼွင်ႉယိင်းမၼ်း ရေႇပႅၵ်ႉၵႃႉ လၢတ်ႈလႄႈဝႃႈ၊ ၵူၼ်းၸၢႆးၼၼ်ႉလၢတ်ႈတီႈၵဝ်ၶႃႈၸိူဝ်ႉၼင်ႇၼႆၶႃႈဢေႃႈ၊ ဝႃႈၼင်ႇၼႆၼၼ်ႉၸိုင်၊ မၼ်းၼၼ်ႉ ႁွတ်ႈထိုင်ၵႃႈတီႈၵေႃႉၼၼ်ႉလႄႈ၊ ၵေႃႉၼၼ်ႉၸုၵ်းယူႇၵႃႈႁိမ်းၵလႃးဢုၵ်ႉၸိူဝ်းၼၼ်ႉ ၵႃႈတီႈၼမ်ႉမေႃႇၼၼ်ႉဢေႃႈ။-

31မၼ်းၵေႃႈလၢတ်ႈလႄႈဝႃႈ၊ ၵေႃႉဢၼ်ထႃႇဝရႃႉၽြႃးပၼ်တၢင်းလီၼႆႉဢိူၺ်း၊ ၶဝ်ႈၵႃႈၼႂ်းႁိူၼ်းၵဝ်ၶႃႈသေၵမ်း။ ႁဵတ်းသင်လႄႈၸုၵ်းယူႇၵႃႈတီႈၼွၵ်ႈၼင်ႇႁိုဝ်။ ၵဝ်ၶႃႈမႄးႁႅၼ်းႁိူၼ်းဢိၵ်ႇတင်းတီႈဢၼ် ၵလႃးဢုၵ်ႉတၵ်းယူႇဝႆႉယဝ်ႉၶႃႈယဝ်ႉ၊ ဝႃႈၼင်ႇၼႆလႄႈ၊-

32ဢဝ်ၵူၼ်းၸၢႆးၼၼ်ႉ မိူဝ်းၸူးၵႃႈတီႈႁိူၼ်းလႄႈ ပူတ်းၶိူင်ႈဢၼ်တၢင်ႇၵလႃးဢုၵ်ႉသေယဝ်ႉ၊ ပၼ်ယိူဝ်ႈႁႅင်ႈဢိၵ်ႇတင်း တၢင်းၵိၼ်တီႈၵလႃးဢုၵ်ႉတင်းလၢႆလႄႈ ပၼ်ၼမ်ႉပုၼ်ႈဢၼ်ၵူၼ်းၸၢႆးၼၼ်ႉ ဢိၵ်ႇတင်းၶဝ်ၸိူဝ်းဢၼ်ၸွမ်းမၼ်းၼၼ်ႉ တၵ်းသုၵ်ႈတိၼ်ဢေႃႈ။-

33မိူဝ်ႈဢၼ်ဢဝ်တၢင်းၵိၼ်သႂ်ႇတမ်းပၼ်ၵႃႈတီႈၽၢႆႇၼႃႈၵေႃႉၼၼ်ႉၸိုင်၊ ၵေႃႉၼၼ်ႉလၢတ်ႈလႄႈဝႃႈ၊ ၸူဝ်ႈဢၼ်ၵဝ်ၶႃႈဢမ်ႇပႆႇလၢတ်ႈဢမူႉၵဝ်ၶႃႈၸိုင်၊ ၵဝ်ၶႃႈတၵ်းဢမ်ႇပႆႇၵိၼ်တၢင်းၵိၼ်တၢင်းၶူပ်းၵူၺ်ႉ၊ ဝႃႈၼင်ႇၼႆသေယဝ်ႉ၊ မၼ်းၵေႃႈလၢတ်ႈလႄႈဝႃႈ၊ လၢတ်ႈသေၵမ်း၊ ဝႃႈၼင်ႇၼႆဢေႃႈ။-

34ၵေႃႉၼၼ်ႉၵေႃႈလၢတ်ႈလႄႈဝႃႈ၊ ၵဝ်ၶႃႈၸမ်ႉ၊ ပဵၼ်ၶႃႈ ဢႃႇပြႃႇႁၢမ်ႇ ဢေႃႈ။-

35ပိူဝ်ႈဢၼ်ထႃႇဝရႃႉၽြႃး ပၼ်တၢင်းလီတီႈၸဝ်ႈၵဝ်ၶႃႈၼမ်ၼႃႇလူင်လၢင်လႄႈ မၼ်းႁွတ်ႈထိုင်တၢင်းဢၼ်ယႂ်ႇမျၢတ်ႈယဝ်ႉ။ မၼ်းၸဝ်ႈ ပၼ်ၽုင်သူဝ်း၊ ၽုင်ဝူဝ်း၊ ငိုၼ်းၶမ်း၊ ၶႃႈၵူၼ်းၸၢႆးလႂ်၊ ၶႃႈၵူၼ်းယိင်းလႂ်၊ ၵလႃးဢုၵ်ႉလႂ်၊ ဢိၵ်ႇတင်းတူဝ်လီႈလႂ်ယဝ်ႉ။-

36ၸႃႇရႃႇ မေးၸဝ်ႈၵဝ်ၶႃႈၼၼ်ႉ၊ မိူဝ်ႈဢၼ်ဢသၢၵ်ႈထဝ်ႈၼၼ်ႉၸိုင်၊ ၵိူတ်ႇလဵင်ႉလုၵ်ႈၸၢႆးတီႈၸဝ်ႈၵဝ်ၶႃႈလႄႈ၊ တီႈလုၵ်ႈၸၢႆးၼၼ်ႉၸိုင်၊ မၼ်းဢဝ်ဢုၵ်ႉၸႃႇၵႃႈမီးတင်းသဵင်ႈတင်းလူင် ဢၢပ်ႈပၼ်ယဝ်ႉယဝ်ႉ။-

37ၸဝ်ႈၵဝ်ၶႃႈၼၼ်ႉၵေႃႈ၊ ႁႂ်ႈၵဝ်ၶႃႈတိူင်ႇလႄႈဝႃႈ၊ မႂ်းယင်းဢမ်ႇလိူၵ်ႈဢမ်ႇၵဵပ်းဢဝ်မေးပုၼ်ႈႁင်းလုၵ်ႈၸၢႆးၵဝ်ၵႃႈၼႂ်းလုၵ်ႈယိင်းၸိူဝ်ႉၶိူဝ်းၵူၼ်း ၶႃႇၼၢၼ်ႇ မိူင်းတီႈဢၼ်ၵဝ်ယူႇၼႆလႄႈ၊-

38တၵ်းလႆႈၵႂႃႇၵႃႈတီႈႁိူၼ်းပေႃႈၵဝ်၊ တီႈပီႈၼွင်ႉၸိူဝ်ႉၶိူဝ်းၵဝ်ပုၼ်ႉလႄႈ လိူၵ်ႈၵဵပ်းဢဝ်မေးပုၼ်ႈႁင်းလုၵ်ႈၸၢႆးၵဝ်ဢေႃႈ၊ ဝႃႈၼင်ႇၼႆဢေႃႈ။-

39ၵဝ်ၶႃႈၵေႃႈ ထၢမ်လႄႈဝႃႈ၊ ပေႃးမႄႈယိင်းဢမ်ႇမီးဢလူဝ်ႇၶႂ်ႈၸွမ်းၸိုင် တၵ်းလႆႈႁဵတ်းၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

40မၼ်းၵေႃႈလၢတ်ႈလႄႈဝႃႈ၊ ထႃႇဝရႃႉၽြႃးဢၼ်ၵဝ်ၵႂႃႇမႃးယူႇၵႃႈတီႈၽၢႆႇၼႃႈမၼ်းၸဝ်ႈၼၼ်ႉ တၵ်းပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈ ၵႂႃႇလူၺ်ႈၵၼ်တင်းမႂ်းလႄႈပွင်ႁဵတ်းဢမူႉမႂ်းဢေႃႈ။ မႂ်းတၵ်းလႆႈလိူၵ်ႈၵဵပ်းဢဝ် မေးပုၼ်ႈႁင်းလုၵ်ႈၸၢႆးၵဝ် ၵႃႈၼႂ်းပီႈၼွင်ႉၸိူဝ်ႉၶိူဝ်းၵဝ်၊ ၵႃႈၼႂ်းႁိူၼ်းပေႃႈၵဝ်ၼၼ်ႉဢေႃႈ။-

41မိူဝ်ႈဢၼ်မႂ်းႁွတ်ႈထိုင်ၵႃႈတီႈပီႈၼွင်ႉၸိူဝ်ႉၶိူဝ်းၵဝ်ၼၼ်ႉၸိုင်၊ ႁႂ်ႈမႂ်းၵၢင်းလွတ်ႈတင်းတၢင်းၵိၼ်ႇတၢင်းဝႃႈ ဢၼ်ၵဝ်ပၼ်ၼႆႉတႃႉ။ ပေႃးၶဝ်ဢမ်ႇဢဝ်မႄႈယိင်းဢၢပ်ႈပၼ်တီႈမႂ်းၸိုင်၊ မႂ်းတၵ်းလႆႈၵၢင်းလွတ်ႈတင်းတၢင်းၵိၼ်ႇတၢင်းဝႃႈ ဢၼ်ၵဝ်ပၼ်ၼႆႉဢေႃႈ၊ ဝႃႈၼင်ႇၼႆဢေႃႈ။-

42ဝၼ်းမိူဝ်ႈၼႆႉၵဝ်ၶႃႈမႃးႁွတ်ႈထိုင်ၵႃႈတီႈၼမ်ႉမေႃႇသေယဝ်ႉ သူးတွင်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈၵဝ်ၶႃႈ ဢႃႇပြႃႇႁၢမ်ႇ ၼၼ်ႉတီႈၶႃႈ၊ ပေႃးၸဝ်ႈႁဝ်းပွင်ႁဵတ်းဢမူႉဢၼ်ၶႃႈၸဝ်ႈႁွတ်ႈမႃးၼႆႉတေႃႈလဵဝ်ၼႆႉၸိုင်၊-

43ၶႃႈၸဝ်ႈယင်းတိုၵ်ႉၸုၵ်းယူႇၵႃႈတီႈႁိမ်းၼမ်ႉမေႃႇၼႆႉသေလႄႈ၊ ပေႃးယွၼ်းတီႈၵၼ်ႇၺႃႇလုၵ်ႈယိင်းသၢဝ်သေၵေႃႉၵေႃႉ ဢၼ်မႃးတဵၵ်းၼမ်ႉၼၼ်ႉလႄႈဝႃႈ၊ ပၼ်ၼမ်ႉၼႂ်းၼမ်ႉတဝ်ႈမႂ်းပုၼ်ႈဢၼ်ၵဝ်ၶႃႈတၵ်းၵိၼ်သေဢိတ်းၼိုင်ႈသေၵမ်း၊ ဝႃႈၼင်ႇၼႆလႄႈ၊-

44မၼ်းၶိုၼ်းလၢတ်ႈလႄႈဝႃႈ၊ ၵိၼ်သေၵမ်း။ တီႈၵလႃးဢုၵ်ႉၸဝ်ႈၸိူဝ်းၼႆႉၵေႃႈ တၵ်းတဵၵ်းၼမ်ႉပၼ်ဢေႃႈ၊ ဝႃႈၼင်ႇၼႆၸိုင်၊ ႁႂ်ႈမၼ်းၼၼ်ႉ ပဵၼ်မႄႈယိင်းဢၼ်ၸဝ်ႈႁဝ်းၶၢၼ်းဝႆႉပုၼ်ႈ လုၵ်ႈၸၢႆးၸဝ်ႈၵဝ်ၶႃႈၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

45ၸူဝ်ႈဢၼ်ၵဝ်ၶႃႈလၢတ်ႈၼႂ်းႁူဝ်ၸႂ်ၸိူဝ်ႉၼင်ႇၼၼ်ယူႇလႄႈ ဢမ်ႇပႆႇယဝ်ႉၼၼ်ႉ၊ တူၺ်းလူး၊ ရေႇပႅၵ်ႉၵႃႉ ႁၢပ်ႇၼမ်ႉတဝ်ႈတၢင်ႇၵႃႈၼိူဝ်ႁူဝ်မႃႇဢွၵ်ႇမႃးလႄႈ လူင်းၸူးၵႃႈတီႈၼမ်ႉမေႃႇ တဵၵ်းၼမ်ႉၼၼ်ႉလႄႈ ၵဝ်ၶႃႈယွၼ်းတီႈမၼ်းလႄႈဝႃႈ၊ ႁႂ်ႈၵဝ်လႆႈၵိၼ်ၼမ်ႉ သေၵမ်း၊ ဝႃႈၼင်ႇၼႆသေယဝ်ႉ၊-

46မၼ်းၶျႃးၼမ်ႉတဝ်ႈလူင်းသေၵႃႈၼိူဝ်ႁူဝ်မႃႇမၼ်းၶၼ်ၶၼ်ၽႂ်းၽႂ်းလႄႈလၢတ်ႈဝႃႈ၊ ၵိၼ်သေၵမ်း။ တီႈၵလႃးဢုၵ်ႉၸဝ်ႈၸိူဝ်းၼႆႉၵေႃႈ၊ ၵဝ်ၶႃႈတၵ်းတိုၵ်းၼမ်ႉပၼ်ၶႃႈဢေႃႈ၊ ဝႃႈၼင်ႇၼႆလႄႈ၊ ၵဝ်ၶႃႈလႆႈၵိၼ်ဢေႃႈ။ တီႈၵလႃးဢုၵ်ႉတင်းလၢႆၵေႃႈမၼ်းတိုၵ်းၼမ်ႉပၼ်ဢေႃႈ။-

47ၵဝ်ၶႃႈၵေႃႈထၢမ်တီႈမၼ်းလႄႈဝႃႈ၊ မႂ်းပဵၼ်လုၵ်ႈယိင်းၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလၢတ်ႈလႄႈဝႃႈ၊ ၵဝ်ၶႃႈပဵၼ်လုၵ်ႈယိင်း ပေႇသူၺ်ႇလႃႉ ၊ လုၵ်ႈၸၢႆး ၼႃႇၶေႃႇ ဢၼ် မီႉလၶႃႇ ၼၼ်ႉ ၵိူတ်ႇလဵင်ႉမႃးၶႃႈဢေႃႈ၊ ဝႃႈၼင်ႇၼႆဢေႃႈ။ ၵဝ်ၶႃႈၵေႃႈဢဝ်သွႆႈၶမ်းႁွႆႈၶူႈလင်သႂ်ႇပၼ်ၵႃႈတီႈၼႃႈမၼ်း၊ ဝႅၼ်လႂ်သႂ်ႇပၼ်ၵႃႈတီႈမိုဝ်းမၼ်းသေယဝ်ႉ၊-

48ၵူမ်ႈၵွမ်းႁူဝ်လႄႈ ၵူဝ်းၵႂၢႆႇထႃႇဝရႃႉၽြႃးလႄႈ ပၼ်တၢင်းလီတီႈထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈၵဝ်ၶႃႈ ဢႃႇပြႃႇႁၢမ်ႇ ဢၼ်ဢဝ်သူင်ႇမႃးၼႂ်းသဵၼ်ႈတၢင်းဢၼ်ၸိုဝ်ႈဢၼ်ၸႂ်ႈ ႁႂ်ႈလႆႈဢဝ်လၢၼ်ပီႈဢၢႆႈၸဝ်ႈၵဝ်ၶႃႈ ပုၼ်ႈလုၵ်ႈၸၢႆးၸဝ်ႈၵဝ်ၶႃႈၼၼ်ႉဢေႃႈ။-

49တေႃႈလဵဝ်ၼႆႉ သူၸဝ်ႈတၵ်းႁဵတ်းၵျေးၸူး ဢိၵ်ႇတင်းသဵတ်ႈၸႃႇတီႈၸဝ်ႈၵဝ်ၶႃႈႁိုဝ်။ တၵ်းဢမ်ႇႁဵတ်းႁိုဝ်။ လၢတ်ႈသေၵမ်း။ ၵဝ်ၶႃႈၵေႃႈ ၵႃႈတီႈတၢင်းၽၢႆႇၶႂႃလႄႈသင်၊ ၵႃႈတီႈတၢင်းၽၢႆႇသၢႆႉလႄႈသင်၊ တၵ်းၸွမ်းၵႂႃႇသေတၢင်းတၢင်းဢေႃႈ၊ ဝႃႈၼင်ႇၼႆဢေႃႈ။

50လႃႇပၢၼ်ႇ တင်း ပေႇသူၺ်ႇလႃႉ ၵေႃႈ ၶိုၼ်းလၢတ်ႈလႄႈဝႃႈ၊ လွင်ႈတၢင်းၼႆႉပဵၼ်လွင်ႈတၢင်းဢၼ်ထႃႇဝရႃႉၽြႃးၸီႇယၢင်ႇဢေႃႈ။ ႁဝ်းဢမ်ႇၸၢင်ႈၶိုၼ်းလၢတ်ႈလွင်ႈဢၼ်လီဢမ်ႇလီတီႈမႂ်း။-

51တူၺ်းလူး၊ ရေႇပႅၵ်ႉၵႃႉ မီးယူႇၵႃႈတီႈၽၢႆႇၼႃႈမႂ်းဢေႃႈ။ ဢဝ်ၵႂႃႇတႃႉ။ ႁႂ်ႈမၼ်းပဵၼ်မေးလုၵ်ႈၸၢႆးၸဝ်ႈမႂ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉတႃႉ၊ ဝႃႈၼင်ႇၼႆဢေႃႈ။-

52မိူဝ်ႈဢၼ်ၶႃႈ ဢႃႇပြႃႇႁၢမ်ႇ ငိၼ်းၵႂၢမ်းၼၼ်ႉၸိုင်၊ မၼ်းၵူမ်ႈႁူဝ်ၵွမ်းႁူဝ်လႄႈ ၵူဝ်းၵႂၢႆႇထႃႇဝရႃႉၽြႃးသေယဝ်ႉ၊-

53ဢဝ်ၵွၵ်းငိုၼ်းၵွၵ်းၶမ်း ဢိၵ်ႇတင်းၶူဝ်းၼုင်ႈတၢင်းမႆဢွၵ်ႇလႄႈ ပၼ်တီႈ ရေႇပႅၵ်ႉၵႃႉ ဢေႃႈ။ တီႈပီႈၸၢႆးတင်းမႄႈမၼ်းၵေႃႈ မၼ်းပၼ်လၢၵ်ႈသွင်ႇဢၼ်ထိူၵ်ႈၵႃႈထိူၵ်ႈၶၼ်ဢေႃႈ။-

54မၼ်းဢိၵ်ႇတင်းၶဝ်ၸိူဝ်းဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉ ႁူမ်ႈၵၼ်ၵိၼ်လႄႈႁႂ်ႈပူၼ်ႉၶိုၼ်းၼၼ်ႉသေယဝ်ႉ၊ ၶိင်ႇၵၢင်ၼႂ်လုၵ်ႉလႄႈဝႃႈ၊ ႁႂ်ႈၵဝ်ၶႃႈလႆႈမိူဝ်းၵႂႃႇၵႃႈတီႈၸဝ်ႈၵဝ်ၶႃႈသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

55ပီႈၸၢႆးမၼ်းတင်းမႄႈမၼ်းလၢတ်ႈလႄႈဝႃႈ၊ ႁႂ်ႈမႄႈယိင်းဢွၼ်ႇၼႆႉ ယူႇၵႃႈတီႈႁဝ်းၼႆႉသေသိပ်းဝၼ်းၼိုင်ႈသေၵမ်း။ ၵမ်းလိုၼ်းၸင်ႇႁႂ်ႈ မၼ်းၵႂႃႇသေၵမ်း၊ ဝႃႈၼင်ႇၼႆဢေႃႈ။-

56ၵေႃႉၼၼ်ႉၵေႃႈလၢတ်ႈလႄႈဝႃႈ၊ ယႃႇပေႁႄႉပေၶႅၼ်ၵဝ်ၶႃႈသေၵမ်း။ ထႃႇဝရႃႉၽြႃးပွင်ႁဵတ်းဢမူႉဢၼ်ၵဝ်ၶႃႈႁွတ်ႈမႃးၼႆႉယဝ်ႉယဝ်ႉ။ ပွႆႇၵဝ်ၶႃႈလႄႈ ႁႂ်ႈလႆႈၶိုၼ်းမိူဝ်းၵႂႃႇၵႃႈတီႈၸဝ်ႈၵဝ်ၶႃႈပုၼ်ႉသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

57ၶဝ်ၵေႃႈလၢတ်ႈလႄႈဝႃႈ၊ ၵဝ်တၵ်းႁွင်ႉဢဝ်မႄႈယိင်းဢွၼ်ႇလႄႈ ထၢမ်တူၺ်းဢလူဝ်ႇမၼ်းလူးၵွၼ်ႇဢေႃႈ၊ ဝႃႈၼင်ႇၼႆလႄႈ၊-

58ႁွင်ႉဢဝ် ရေႇပႅၵ်ႉၵႃႉ ထၢမ်လႄႈဝႃႈ၊ မႂ်းတၵ်းၸွမ်းလူၺ်ႈၵၼ်တင်းၵေႃႉၼႆႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလၢတ်ႈလႄႈဝႃႈ၊ ၵဝ်ၶႃႈတၵ်းၸွမ်းၶႃႈဢေႃႈ၊ ဝႃႈၼင်ႇၼႆဢေႃႈ။-

59ၵမ်းၼၼ်ႉ ၶဝ်ပွႆႇ ရေႇပႅၵ်ႉၵႃႉ တင်းၵေႃႉဢၼ်လူဢၼ်ထိင်းမၼ်း ဢိၵ်ႇတင်းၶႃႈ ဢႃႇပြႃႇႁၢမ်ႇ တင်းၵူၼ်းမၼ်းၸိူဝ်းၼၼ်ႉမိူဝ်းၵႂႃႇသေဢေႃႈ။-

60ၶဝ်ပၼ်တၢင်းလီတီႈ ရေႇပႅၵ်ႉၵႃႉ လႄႈဝႃႈ၊ ၼွင်ႉယိင်းႁဝ်းဢိူၺ်း၊ ႁႂ်ႈပဵၼ်မႄႈမိုၼ်ႇမႄႈသႅၼ်သေၵမ်း။ ႁႂ်ႈၸိူဝ်ႉၶိူဝ်းမႂ်း ဢုပ်ႉပိူင်ႇၽၵ်းတူဝဵင်းရၢၼ်ႇသူႇတင်းလၢႆသေၵမ်း၊ ဝႃႈၼင်ႇၼႆဢေႃႈ။-

61ရေႇပႅၵ်ႉၵႃႉ ဢိၵ်ႇတင်းမႄႈယိင်းဢွၼ်ႇမၼ်းၸိူဝ်းၼၼ်ႉ လုၵ်ႉၶီႇၵလႃးဢုၵ်ႉလႄႈ ၸွမ်းလူၺ်ႈၵၼ်တင်းၵူၼ်းၸၢႆးၼၼ်ႉဢေႃႈ။ ၼင်ႇၼၼ်လႄႈ ၶႃႈ ဢႃႇပြႃႇႁၢမ်ႇ ၼၼ်ႉဢဝ် ရေႇပႅၵ်ႉၵႃႉ လႄႈ မိူဝ်းၵႂႃႇဢေႃႈ။

62မိူဝ်ႈၼၼ်ႉ ဢီႉၸၢၵ်ႈ ၸွမ်းသဵၼ်ႈတၢင်း ပေႇလႁေႇရွႆႇ ႁွတ်ႈမႃးဢေႃႈ။ လွင်ႈမၼ်းၸမ်ႉ မၼ်းယူႇၵႃႈၼႂ်းမိူင်းပွတ်းတၢင်းၸၢၼ်းၼၼ်ႉဢေႃႈ။-

63ၶိင်ႇႁူဝ်ၶမ်ႈ ဢီႉၸၢၵ်ႈ ဢွၵ်ႇၵႂႃႇႁႂ်ႈလႆႈၶႆႈၸႂ်ဝူၼ်ႉၸႂ် ၵႃႈတီႈၼႂ်းထိူၼ်ႇလႄႈ မုင်ႈတူၺ်းသေယဝ်ႉ၊ လႆႈႁၼ်ၵလႃးဢုၵ်ႉတင်းလၢႆမႃးယူႇဢေႃႈ။-

64ရေႇပႅၵ်ႉၵႃႉ ၵေႃႈမုင်ႈတူၺ်းလႄႈ မိူဝ်ႈဢၼ်ႁၼ် ဢီႉၸၢၵ်ႈ ၼၼ်ႉၸိုင်၊ လူင်းသေၵႃႈၼိူဝ်ၵလႃးဢုၵ်ႉသေယဝ်ႉ၊-

65ထၢမ်ၶႃႈၼၼ်ႉလႄႈဝႃႈ၊ ၵေႃႉဢၼ်မႃးၵႃႈတီႈထိူၼ်ႇႁႂ်ႈလႆႈႁပ်ႉႁူဝ်တၢင်းႁဝ်းၼၼ်ႉၸမ်ႉ၊ ပဵၼ်ၽူႈလႂ်၊ ဝႃႈၼင်ႇၼႆသေယဝ်ႉ၊ ၶႃႈၼၼ်ႉၵေႃႈလၢတ်ႈလႄႈဝႃႈ၊ ၵေႃႉၼၼ်ႉၸိုင် ပဵၼ်ၸဝ်ႈၵဝ်ၶႃႈယဝ်ႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ မၼ်းဢဝ်ၽႃႈဢၼ်ႁူမ်ႇၼႃႈလႄႈ ႁူမ်ႇၼႃႈမၼ်းသေဢေႃႈ။-

66ၶႃႈၼၼ်ႉၵေႃႈ မွၵ်ႇလၢတ်ႈလွင်ႈတၢင်းၵႃႈဢၼ်မၼ်းလႆႈႁဵတ်းမႃးယဝ်ႉတင်းသဵင်ႈတင်းလူင်ၼၼ်ႉ တီႈ ဢီႉၸၢၵ်ႈ ယဝ်ႉ၊-

67ဢီႉၸၢၵ်ႈ ၸင်ႇ ဢဝ် ရေႇပႅၵ်ႉၵႃႉ ၵႂႃႇသူင်ႇ ၵႃႈတီႈမူဝ်းၵႃႇမႄႈမၼ်း ၸႃႇရႃႇ ၼၼ်ႉလႄႈ ဢဝ်မၼ်းႁဵတ်းမေးဢေႃႈ။ ဢီႉၸၢၵ်ႈ ႁၵ်ႉပႅင်း ရေႇပႅၵ်ႉၵႃႉ လႄႈ ႁွတ်ႈထိုင်တၢင်းဢၼ်သၢၵ်ႈသႃႇၼႂ်းလွင်ႈတၢင်းဢၼ် မႄႈမၼ်းတၢႆၼၼ်ႉဢေႃႈ။