Genesis 38

Shan

← Chapter 37 Jump to: Chapter 39 →

1မိူဝ်ႈၵႃႇလႃႉယၢမ်းၼၼ်ႉ၊ ယူႉတႃႉ လုၵ်ႉသေၵႃႈတီႈတီႈယူႇပီႈၼွင်ႉမၼ်းၸိူဝ်းၼၼ်ႉၵႂႃႇလႄႈ ဝႄႉၶဝ်ႈၵႃႈတီႈၵူၼ်း ဢတူႉလမ်ႇ ၵေႃႉၼိုင်ႈဢၼ်လႆႈၸိုဝ်ႈ ႁီႉရႃႉ ဢေႃႈ။-

2မၼ်းထူပ်းႁၼ်လုၵ်ႈယိင်းၵူၼ်း ၶႃႇၼၢၼ်ႇ ဢၼ်လႆႈၸိုဝ်ႈ သူႉဢႃႇ ၼၼ်ႉၵႃႈတီႈၼၼ်ႈလႄႈ ဢဝ်မႄႈယိင်းၼၼ်ႉသေယဝ်ႉ၊ ႁူမ်ႈၵၼ်ပွင်းၵၼ် တင်းမၼ်းၼၼ်ႉဢေႃႈ။-

3မၼ်းၼၼ်ႉ ပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ ၵေႃႉပဵၼ်ပေႃႈႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉ ဢေးရႃႉ ဢေႃႈ။-

4မၼ်းၼၼ်ႉ သမ်ႉပႃးပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ မၼ်းႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉ ဢေႃးၼၼ်ႇ ဢေႃႈ။-

5မၼ်းၼၼ်ႉ သမ်ႉပႃးပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးလႄႈ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉ သေးလႃႉ ဢေႃႈ။ မိူဝ်ႈဢၼ်ၵိူတ်ႇလဵင်ႉမၼ်းၼၼ်ႉ မႃးၼၼ်ႉၸိုင် ပေႃႈမၼ်းမီးယူႇၵႃႈတီႈ ဝဵင်း ၶေႇသိပ်ႉ ဢေႃႈ။

6လိုၼ်းၼၼ်ႉ ယူႉတႃႉ ဢဝ်မေး ဢၼ်လႆႈၸိုဝ်ႈ တႃႇမႃႇ ၼၼ်ႉ ပၼ်တီႈ ဢေးရႃႉ လုၵ်ႈၸၢႆးတူၼ်ႈမၼ်းၼၼ်ႉဢေႃႈ။-

7ဢေးရႃႉ လုၵ်ႈၸၢႆးတူၼ်ႈ ယူႉတႃႉ ၼၼ်ႉ ပဵၼ်ၵေႃႉဢၼ်ႁၢႆႉမိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈ ထႃႇဝရႃႉၽြႃးဢဝ်မၼ်းတၢႆသေဢေႃႈ။-

8မိူဝ်ႈၼၼ်ႉ ယူႉတႃႉ လၢတ်ႈတီႈ ဢေႃးၼၼ်ႇ လႄႈဝႃႈ၊ ၶဝ်ႈၸူးၵႃႈတီႈပီႈလူဝ်းမႂ်းလႄႈပဵၼ်ႁိူၼ်းပဵၼ်ယေးလူၺ်ႈၵၼ်တင်းမၼ်းလႄႈ သိုပ်ႇၸိူဝ်ႉသိုပ်ႇၶိူဝ်းပီႈဢၢႆႈမႂ်းတႃႉ၊ ဝႃႈၼင်ႇၼႆဢေႃႈ။-

9ဢေႃးၼၼ်ႇ ႁူႉလွင်ႈဢၼ်ပေႃးလႆႈၸိူဝ်ႉလႆႈၶိူဝ်းၸိုင်၊ ဢမ်ႇလႆႈမၢတ်ႈပဵၼ်ၸိူဝ်ႉပဵၼ်ၶိူဝ်းတူဝ်ၸဝ်ႈၵဝ်ႇၼၼ်ႉလႄႈ၊ မိူဝ်ႈဢၼ်မၼ်းၶဝ်ႈၸူးတီႈပီႈလူဝ်းမၼ်းၼၼ်ႉၸိုင်၊ မၼ်းႁႂ်ႈၼမ်ႉသုၵ်ႉမၼ်း တူၵ်းပႅတ်ႈသေၵႃႈၼိူဝ်လိၼ် ၵွပ်ႈပိူဝ်ႈဢၼ်ၵူဝ်တၵ်းလႆႈ ပၼ်ၸိူဝ်ႉ ပၼ်ၶိူဝ်း တီႈပီႈဢၢႆႈမၼ်းၼၼ်ႉဢေႃႈ။-

10ပိူဝ်ႈဢၼ်ဢမူႉဢၼ်မၼ်းႁဵတ်းၼၼ်ႉ ပဵၼ်ဢၼ်ႁၢႆႉမိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈ၊ မၼ်းၼၼ်ႉၵေႃႈ မၼ်းၸဝ်ႈ ဢဝ်တၢႆပႅတ်ႈသေဢေႃႈ။-

11မိူဝ်ႈၼၼ်ႉ ယူႉတႃႉ လၢတ်ႈတီႈလုၵ်ႈပႂ်ႉမၼ်း တႃႇမႃႇ ၼၼ်ႉလႄႈဝႃႈ၊ ၸူဝ်ႈဢၼ်လုၵ်ႈၸၢႆးၵဝ် သေးလႃႉ ဢမ်ႇပႆႇယႂ်ႇမႃးၼၼ်ႉၸိုင်၊ မႂ်းႁဵတ်းမႄႈမူၵ်းမႄႈမၢႆႈလႄႈ ယူႇၵႃႈတီႈႁိူၼ်းပေႃႈမႂ်းလူးၵွၼ်ႇတႃႉ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ မၼ်းဝႃႈ၊ ၵူဝ်မၼ်းတၵ်းတၢႆမိူၼ်ၸိူဝ်ႉၼင်ႇပီႈဢၢႆႈမၼ်းၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။ ၵမ်းၼၼ်ႉ တႃႇမႃႇ မိူဝ်းၵႂႃႇလႄႈ ယူႇၵႃႈတီႈႁိူၼ်းပေႃႈမၼ်းဢေႃႈ။

12မိူဝ်ႈဢၼ်ၶိင်ႇၵႃႇလႃႉႁိုင်ၼႃႇယဝ်ႉၼၼ်ႉၸိုင်၊ မေး ယူႉတႃႉ ဢၼ်ပဵၼ်လုၵ်ႈယိင်း သူႉဢႃႇ ၼၼ်ႉတၢႆၵႂႃႇဢေႃႈ။ ယူႉတႃႉ ပေႇၸႂ်သေယဝ်ႉ၊ ၸွမ်းလူၺ်ႈၵၼ်တင်းၵေႃႉသေႈမၼ်း ႁီႉရႃႉ ၵူၼ်း ဢတူႉလမ်ႇ ၼၼ်ႉ ၵႂႃႇၸူးၵႃႈတီႈဝဵင်း တိမ်းၼႃႉ ၵႃႈတီႈဢၼ် ၵူၼ်းၵႅတ်းႁႆးၶူၼ်သူဝ်းတင်းလၢႆမီးၼၼ်ႉဢေႃႈ။-

13မိူဝ်ႈဢၼ်ပိူၼ်ႈမွၵ်ႇလၢတ်ႈတီႈ တႃႇမႃႇ လႄႈဝႃႈ၊ ပေႃႈၸဝ်ႈမႂ်းၵႂႃႇၵႃႈတီႈဝဵင်း တိမ်းၼႃႉ ႁႂ်ႈလႆႈၵႅတ်းႁႆးၶူၼ်သူဝ်းဢေႃႈ၊ ဝႃႈၼင်ႇၼႆၼၼ်ႉၸိုင်၊-

14မၼ်းထွတ်ႇၶူဝ်းၼုင်ႈ မႄႈမူၵ်းမႄႈမၢႆႈၼၼ်ႉသေလႄႈ ဢဝ်တင်းၽႃႈဢၼ်ႁူမ်ႇၼႃႈ ႁူမ်ႇၼႃႈသေယဝ်ႉ၊ သုမ်ႇမႆတူဝ်ၸဝ်ႈၵဝ်ႇလႄႈ ၼင်ႇယူႇၵႃႈတီႈၽၵ်းတူဝဵင်း ဢေးၼိမ်း ဢၼ်မီးၵႃႈတီႈႁိမ်းသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်း တိမ်းၼႃႉ ၼၼ်ႉဢေႃႈ။ လွင်ႈမၼ်းၸမ်ႉ ပိူဝ်ႈဢၼ်မၼ်းႁူႉႁၼ်လွင်ႈဢၼ် သေးလႃႉ ယႂ်ႇမႃးယဝ်ႉသေၵေႃႈ၊ ဢမ်ႇလႆႈပဵၼ်ႁိူၼ်းပဵၼ်ယေး လူၺ်ႈၵၼ်တင်းမၼ်းၼၼ်ႉလႄႈ ၸင်ႇႁဵတ်းဢေႃႈ။-

15ယူႉတႃႉ ၼၼ်ႉ မိူဝ်ႈဢၼ်ႁၼ်မၼ်းၼၼ်ႉၸိုင်၊ ထၢင်ႇမၼ်းပဵၼ်မႄႈမွၵ်ႇယႃႈ ၵွပ်ႈပိူဝ်ႈဢၼ်မၼ်းႁူမ်ႇၼႃႈမၼ်းယူႇၼၼ်ႉဢေႃႈ။-

16မၼ်းဝႄႈဢွၵ်ႇတၢင်းၵႂႃႇၸူးတီႈမၼ်းၼၼ်ႉသေယဝ်ႉ၊ ပိူဝ်ႈဢၼ်ဢမ်ႇႁူႉလွင်ႈဢၼ်မၼ်းပဵၼ်လုၵ်ႈပႂ်ႉတူဝ်ၸဝ်ႈၵဝ်ႇၼၼ်ႉလႄႈလၢတ်ႈဝႃႈ၊ ပၼ်ဢၶႂၢင်ႉႁႂ်ႈၵဝ်လႆႈၶဝ်ႈၸူးတီႈမႂ်းသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၼၼ်ႉၵေႃႈထၢမ်လႄႈဝႃႈ၊ မႂ်းၸဝ်ႈတၵ်းပၼ်သူးၵႃႈသင် ႁႂ်ႈလႆႈၶဝ်ႈၸူးၵႃႈတီႈၵဝ်ၶႃႈ၊ ဝႃႈၼင်ႇၼႆသေယဝ်ႉ၊-

17ယူႉတႃႉ ၵေႃႈလၢတ်ႈလႄႈဝႃႈ၊ ၵဝ်တၵ်းဢဝ်ပႄႉဢွၼ်ႇတူဝ်ၼိုင်ႈသေၵႃႈၼႂ်းၽုင်ပႄႉပၼ်မႃးဢေႃႈ၊ ဝႃႈၼင်ႇၼႆဢေႃႈ။ မၼ်းၼၼ်ႉၵေႃႈထၢမ်လႄႈဝႃႈ၊ ၸူဝ်ႈဢၼ်ဢမ်ႇပႆႇပၼ်မႃးၼၼ်ႉၸိုင်၊ တၵ်းဢဝ်သေၸိူဝ်ႉသေပိူင် ပွင်ႇငမ်းဝႆႉႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

18မၼ်းၵေႃႈၶိုၼ်းထၢမ်လႄႈဝႃႈ၊ တၵ်းလႆႈဢဝ်ၵႃႈသင်ပွင်ႇငမ်းဝႆႉ၊ ဝႃႈၼင်ႇၼႆသေယဝ်ႉ၊ မၼ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ တၵ်းလႆႈဢဝ်တၼ်းသိၵ်ႈ၊ သၢႆၸရွႆႇတင်းၶွၼ်ႉတဝ်ႉ ဢၼ်မီးၼႂ်းမိုဝ်းမႂ်းၸဝ်ႈၼၼ်ႉ ပွင်ႇငမ်းဝႆႉဢေႃႈ၊ ဝႃႈၼင်ႇၼႆလႄႈ၊ မၼ်းဢဝ် ဢုၵ်ႉၸႃႇၼၼ်ႉဢၢပ်ႈပၼ်လႄႈ ၶဝ်ႈၸူးၵႃႈတီႈမၼ်းၼၼ်ႉသေယဝ်ႉ၊ မၼ်းၼၼ်ႉၵေႃႈ ၸပ်းပတိၵ်ႉသၼ်ႇထေႇဢေႃႈ။-

19လိုၼ်းၼၼ်ႉ မၼ်းၼၼ်ႉ လုၵ်ႉမိူဝ်းၵႂႃႇလႄႈ ထွတ်ႇၽႃႈဢၼ်ႁူမ်ႇၼႃႈၼၼ်ႉပႅတ်ႈသေယဝ်ႉ၊ သမ်ႉၶိုၼ်းၼုင်ႈၶူဝ်းၼုင်ႈမႄႈမူၵ်းမႄႈမၢႆႈသေဢေႃႈ။-

20ယူႉတႃႉ ၼၼ်ႉဢဝ်ပႄႉဢွၼ်ႇဢၢပ်ႈပၼ်ၵႃႈၼႂ်းမိုဝ်းၵေႃႉသေႈမၼ်းၵူၼ်း ဢတူႉလမ်ႇ ၼၼ်ႉ ၵႂႃႇႁႂ်ႈလႆႈထုတ်ႇဢဝ် ဢုၵ်ႉၸႃႇဢၼ်ပွင်ႇဢၼ်ငမ်းဝႆႉ တီႈမႄႈယိင်းၵေႃႉၼၼ်ႉသေၵေႃႈ ၵူၼ်း ဢတူႉလမ်ႇ ၼၼ်ႉဢမ်ႇထူပ်းဢမ်ႇႁၼ်မၼ်းၼၼ်ႉသေယဝ်ႉ၊-

21ထၢမ်ၵူၼ်းၵႃႈတီႈၼၼ်ႈလႄႈဝႃႈ၊ မႄႈမွၵ်ႇယႃႈ ဢၼ်ၼင်ႈၵႃႈတီႈႁိမ်းသဵၼ်ႈတၢင်းဝဵင်း ဢေးၼိမ်း ၼၼ်ႉ မီးၵႃႈလႂ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၵေႃႈၶိုၼ်းလၢတ်ႈလႄႈဝႃႈ၊ ၵႃႈတီႈၼႆႈဢမ်ႇမီးမႄႈမွၵ်ႇယႃႈၵူၺ်ႉ၊ ဝႃႈၼင်ႇၼႆသေယဝ်ႉ၊-

22မၼ်းၶိုၼ်းမိူဝ်းၵႂႃႇၵႃႈတီႈ ယူႉတႃႉ သေလႄႈလၢတ်ႈဝႃႈ၊ ၵဝ်ၶႃႈႁႃမၼ်းၼၼ်ႉလႄႈ ဢမ်ႇထူပ်းဢမ်ႇႁၼ်။ ၵူၼ်းၵႃႈတီႈၼၼ်ႈၸိူဝ်းၼၼ်ႉၵေႃႈလၢတ်ႈလႄႈဝႃႈ၊ ၵႃႈတီႈၼႆႈဢမ်ႇမီးမႄႈမွၵ်ႇယႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။-

23ယူႉတႃႉ ၵေႃႈလၢတ်ႈလႄႈဝႃႈ၊ ၼင်ႇႁိုဝ်ႁဝ်းတၵ်းဢမ်ႇလႆႈမီး တၢင်းဢၼ်ဢူၵ်းဢၼ်ဢၢႆၸိုင်၊ ဢဝ်ၵေႃႈ ယႃႇမၼ်းတႃႉ။ တူၺ်းလူး၊ ၵဝ်ဢဝ်ပႄႉဢွၼ်ႇၼႆႉပၼ်ၵႂႃႇလႄႈ မႂ်းၵေႃႈႁႃဢမ်ႇထူပ်းဢမ်ႇႁၼ်မၼ်းၼၼ်ႉလူင်ပႄႇ၊ ဝႃႈၼင်ႇၼႆဢေႃႈ။

24ဝၢႆးၼၼ်ႉ မိူဝ်ႈဢၼ်ပူၼ်ႉသၢမ်လိူၼ်ယဝ်ႉၼၼ်ႉၸိုင်၊ ပိူၼ်ႈမွၵ်ႇလၢတ်ႈတီႈ ယူႉတႃႉ လႄႈဝႃႈ၊ လုၵ်ႈပႂ်ႉမႂ်း တႃႇမႃႇ ၼၼ်ႉ လႆႈႁဵတ်းမႄႈမွၵ်ႇယႃႈလႄႈ ပႃးပတိၵ်ႉသၼ်ႇထေႇၵွပ်ႈပိူဝ်ႈဢၼ် မၼ်းႁဵတ်းမေႇထုင်ႇဢၼ်ဢမ်ႇတြႃးၼၼ်ႉယဝ်ႉလူင်ပႄႇ၊ ဝႃႈၼင်ႇၼႆသေယဝ်ႉ၊ ယူႉတႃႉ ၵေႃႈၸီႇယၢင်ႇလႄႈဝႃႈ၊ ဢဝ်မၼ်းဢွၵ်ႇလႄႈတုတ်ႇၽႆးပႅတ်ႈသေတႃႉ၊ ဝႃႈၼင်ႇၼႆဢေႃႈ။-

25မိူဝ်ႈဢၼ်ဢဝ်မၼ်းဢွၵ်ႇၼၼ်ႉၸိုင် မၼ်းၼၼ်ႉဢဝ်ပၼ်ၵႂႃႇ ၵႃႈတီႈပေႃႈၸဝ်ႈမၼ်းလႄႈ သင်ႇလၢတ်ႈဝႃႈ၊ ၵဝ်ၶႃႈပႃးပတိၵ်ႉသၼ်ႇထေႇၵွပ်ႈပိူဝ်ႈၵေႃႉဢၼ်ပိူင်ႇဢုၵ်ႉၸႃႇၸိူဝ်းၼႆႉၶႃႈယဝ်ႉ၊ ဝႃႈၼင်ႇၼႆလႄႈ သမ်ႉဝႃႈ၊ ၶႅၼ်းတေႃႈတူၺ်းလွင်ႈဢၼ် ဢုၵ်ႉၸႃႇၸိူဝ်းၼႆႉ ဢၼ်ဝႃႈတၼ်းသိၵ်ႈ၊ သၢႆၸရွႆႇတင်းၶွၼ်ႉတဝ်ႉၸိူဝ်းၼႆႉ ပဵၼ်ဢုၵ်ႉၸႃႇၽူႈလႂ်ၼၼ်ႉသေၵမ်း၊ ဝႃႈၼင်ႇၼႆဢေႃႈ။-

26ယူႉတႃႉ ႁပ်ႉတုင်းဢဝ်ဢုၵ်ႉၸႃႇၸိူဝ်းၼၼ်ႉလႄႈလၢတ်ႈဝႃႈ၊ မၼ်းပဵၼ်ၵေႃႉဢၼ်သိုဝ်ႈတေႃႇၼႃႇသေၵဝ်ဢေႃႈ။ လွင်ႈမၼ်းၸမ်ႉ ၵဝ်ယင်းဢမ်ႇဢဝ် လုၵ်ႈၸၢႆးၵဝ် သေးလႃႉ ၼၼ်ႉ ပၼ်တီႈမၼ်းလႄႈလႆႈယူႇမႅၼ်ႈမႃးယဝ်ႉ၊ ဝႃႈၼင်ႇၼႆဢေႃႈ။ လိုၼ်းၼၼ်ႉ မၼ်းယင်းဢမ်ႇၶဝ်ႈၸူးတီႈမၼ်းၼၼ်ႉလႄႈယူႇဢေႃႈ။

27ဝၢႆးၼၼ်ႉမိူဝ်ႈဢၼ်မၼ်းၼၼ်ႉႁွတ်ႈထိုင်ၶိင်ႇဢၼ်ၵိူတ်ႇလဵင်ႉလုၵ်ႈၼၼ်ႉၸိုင်၊ ၵႃႈၼႂ်းတွင်ႉမၼ်းၼၼ်ႉ မီးလုၵ်ႈၽႃၽႄဢေႃႈ။-

28ၼႂ်းမိူဝ်ႈဢၼ်ယင်းတိုၵ်ႉၵိူတ်ႇလဵင်ႉလုၵ်ႈယူႇၼၼ်ႉၸိုင်၊ ၵေႃႉၼိုင်ႈဢဝ်မိုဝ်းယိုၼ်ႈဢွၵ်ႇလႄႈမႄႈၵဵပ်းယိပ်းၵမ်မိုဝ်းမၼ်းဢဝ်မႆလႅင်မတ်ႉလႄႈဝႃႈ၊ ၵေႃႉၼႆႉတၵ်းၵိူတ်ႇလဵင်ႉဢွၼ်တၢင်းဢေႃႈ၊ ဝႃႈၼင်ႇၼႆဢေႃႈ။-

29ၵူၺ်းၵႃႈ ၵေႃႉၼၼ်ႉ သမ်ႉၶိုၼ်းႁူတ်းဢဝ်မိုဝ်းမၼ်းလႄႈ ပီႈဢၢႆႈမၼ်းၵိူတ်ႇလဵင်ႉမႃးသေယဝ်ႉ၊ မႄႈၵဵပ်းလၢတ်ႈလႄႈဝႃႈ၊ ႁဵတ်းသင်လႄႈ မႂ်းမူၼ်ႉဢွၵ်ႇတိုဝ်ဢွၵ်ႇၼင်ႇႁိုဝ်။ ႁႂ်ႈလွင်ႈတၢင်းဢၼ် မူၼ်ႉဢွၵ်ႇတိုဝ်ဢွၵ်ႇၼႆႉၸပ်းတီႈမႂ်းတႃႉ၊ ဝႃႈၼင်ႇၼႆလႄႈ ႁွင်ႉႁဵၵ်ႈၸိုဝ်ႈမၼ်း ၽေးရိတ်ႉ ဢေႃႈ။-

30လိုၼ်းၼၼ်ႉ ၼွင်ႉၸၢႆးမၼ်းဢၼ်ဢဝ်မႆလႅင်မတ်ႉၵႃႈတီႈမိုဝ်းဝႆႉၼၼ်ႉ ၵိူတ်ႇလဵင်ႉမႃးလႄႈ ၶဝ်ႁွင်ႉႁဵၵ်ႈၸိုဝ်ႈမၼ်း ၸႃႇရႃႉ ဢေႃႈ။

← Chapter 37 Jump to: Chapter 39 →