Genesis 49

Shan

← Chapter 48 Jump to: Chapter 50 →

1မိူဝ်ႈၼၼ်ႉ ယႃႇၵုပ်ႈ ႁွင်ႉဢဝ်လုၵ်ႈၸၢႆးမၼ်းတင်းလၢႆလႄႈလၢတ်ႈဝႃႈ၊ သူဢွၼ်ၵၼ်ၸူႉၵၼ်တုမ်ၵၼ်တႃႉ။ ၵဝ်တၵ်းမွၵ်ႇလၢတ်ႈလွင်ႈတၢင်းဢၼ် တၵ်းပဵၼ်မႃးတီႈသူ ၵႃႈတီႈၶိင်ႇၵႃႇလႃႉၵမ်းလိုၼ်းၼၼ်ႉဢေႃႈ။-

2လုၵ်ႈၸၢႆး ယႃႇၵုပ်ႈ ၶဝ်ဢိူၺ်း၊ ဢွၼ်ၵၼ်ၸူႉၵၼ်တုမ်ၵၼ်လႄႈ ထွမ်ႇငိၼ်းတႃႉ။ ထွမ်ႇဢဝ်ၵႂၢမ်းပေႃႈသူ ဢီႉသရေႇလႃႉ ၼႆႉတႃႉ။-

3ရူႉပိၼ်ႇ ဢိူၺ်း၊ မႂ်းၼႆႉပဵၼ်လုၵ်ႈတူၼ်ႈၵဝ်၊ ႁႅင်းၵဝ်၊ ၵေႃႇၸႃႉဢဵၼ်ႁႅင်းၵဝ်၊ ပၢႆၸိၵ်းၸွမ်မုၼ်ၽုင်းၵဝ်၊ ပၢႆၸိၵ်းၸွမ်တၼ်းၶူဝ်းၵဝ်ဢေႃႈ။-

4ၼႂ်းဝႃႈၼၼ်သေၵေႃႈ မႂ်းမီးသၽေႃး ဢၼ်ၸၢင်ႈလိူတ်ႇ ၸိူဝ်ႉၼင်ႇၼမ်ႉလႄႈ ဢမ်ႇလႆႈႁွတ်ႈထိုင်တၢင်းဢၼ်မျၢတ်ႈလီသေပိူၼ်ႈ။လွင်ႈမၼ်းၸမ်ႉ မႂ်းၶိုၼ်ႈၵႃႈၼိူဝ်တီႈၼွၼ်းပေႃႈမႂ်းလႄႈ ႁဵတ်းႁႂ်ႈၵူဝ်ႈႁႂ်ႈၵိူၵ်ႇဢေႃႈ။ မၼ်းၼႆႉ ၶိုၼ်ႈၵႃႈၼိူဝ်ၵူႇတီႈၼွၼ်းၵဝ်ၼၼ်ႉယဝ်ႉလူင်ပႄႇ။

5သီႉမုၼ်ႇ တင်း လေႇဝီႉ ပဵၼ်ပီႈၼွင်ႉၵၼ်ဢေႃႈ။ ၶိူင်ႈပိူင်ဢၼ်ၸၢင်ႈႁဵတ်း ဢႃႉထမ်ႇမႃႉၸိူဝ်းၼၼ်ႉ ပဵၼ်လၢပ်ႇလႅဝ်းၶႃဢေႃႈ။-

6ဝီႉၺိၺ်ႇၵဝ်ဢိူၺ်း၊ ယႃႇပေၶဝ်ႈၵႃႈၼႂ်းတၢင်းဢၼ်ၶဝ်ၵျၢမ်ႇပွင်ထိမ်ႇမႅပ်းၼၼ်ႉ။ မုၼ်ၽုင်းၵဝ်ဢိူၺ်း၊ ယႃႇပေႁဵတ်းမုၵ်ႉႁဵတ်းၸိူဝ်း ၼႂ်းတီႈဢၼ်ၶဝ်ၸူႉတုမ်ၼၼ်ႉ၊ လွင်ႈမၼ်းၸမ်ႉ ၶဝ်ၼၼ်ႉၸႂ်လမ်သႆႈၵမ်ႇလႄႈ ဢဝ်ဢသၢၵ်ႈၵူၼ်းတၢႆယဝ်ႉ။ ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇလႄႈ ၽၼ်းဢဵၼ်တွင်ႇၼွင်ႈဝူဝ်းယဝ်ႉ။-

7ႁႂ်ႈတၢင်းဢၼ်ၶဝ်ၸႂ်မႆႈၶႆႈၸႃႉၼၼ်ႉၶၢမ်ႇတၢင်းၵိၼ်ႇတၢင်းဝႃႈ ၵွပ်ႈပိူဝ်ႈဢၼ်ႁႅင်းၼႃႇ၊ ႁႂ်ႈတေႃးသႃႉၶဝ်ၼၼ်ႉ ၶၢမ်ႇတၢင်းၵိၼ်ႇတၢင်းဝႃႈ ၵွပ်ႈပိူဝ်ႈဢၼ်လိူင်းၵျၢမ်းၼႃႇၼၼ်ႉသေၵမ်းလူၺ်ႈ။ ၵဝ်တၵ်းႁႂ်ႈၶဝ်မၢၵ်ႇမိူဝ်ၵႂႃႇၵႃႈၼႂ်းမဵဝ်း ယႃႇၵုပ်ႈ ဢေႃႈ။ ၵဝ်တၵ်းႁႂ်ႈၶဝ်ပိဝ်သဵၼ်ၵႂႃႇၵႃႈၼႂ်းၸိူဝ်ႉၶိူဝ်း ဢီႉသရေႇလႃႉ ဢေႃႈ။-

8ယူႉတႃႉ ဢိူၺ်း၊ ပီႈၼွင်ႉမႂ်းတင်းလၢႆ တၵ်းဢွၼ်ၵၼ်ယွင်ႈယေႃးမႂ်းဢေႃႈ။ မိုဝ်းမႂ်းတၵ်းလႆႈမီးၵႃႈၼိူဝ်ၶေႃးရၢၼ်ႇသူႇမႂ်းဢေႃႈ။ လုၵ်ႈၸၢႆးပေႃႈမႂ်းတင်းလၢႆ တၵ်းဢွၼ်ၵၼ်ၵူမ်ႈႁူဝ်ၵွမ်းႁူဝ်ၵႃႈတီႈၽၢႆႇၼႃႈမႂ်းဢေႃႈ။-

9ယူႉတႃႉ ပဵၼ်သၢင်ႇသီႈတူဝ်ဢၼ်ယင်းႁၢတ်ႈပၢၼ်ၵၢင်ဢေႃႈ။ လုၵ်ႈၸၢႆးၵဝ်ဢိူၺ်း၊ မႂ်းၸၢင်ႈလုၵ်ႉသေၵႃႈတီႈ ဢၼ်တီႉဢဝ်လႄႈ ၶူပ်းၵိၼ်ၼၼ်ႉ ၶိုၼ်ႈမႃးၵႃႈၼိူဝ်ဢေႃႈ။ မၼ်းၼႆႉမူပ်ႇလႄႈယူႇဢေႃႈ။ ၸိူဝ်ႉၼင်ႇသၢင်ႇသီႈလႄႈသင်၊ ၸိူဝ်ႉၼင်ႇသၢင်ႇသီႈတူဝ်မႄႈလႄႈသင်၊ ၸၢင်ႈၶုပ်ႉမူပ်ႇလိူၼ်းဢႅဝ်ယူႇဢေႃႈ။ ၽူႈလႂ်တၵ်းႁတ်းယႃႉႁႂ်ႈမၼ်းလုၵ်ႉ။-

10တေႃႇထိုင်ႁွတ်ႈ ၸူဝ်ႈဢၼ် သီႉလေႃႇ ဢမ်ႇပႆႇႁွတ်ႈမႃးၼၼ်ႉၸိုင်၊ ၵၼ်းႁွၵ်ႇရႃႇၸႃႉ ဢမ်ႇလႆႈၶၢႆႉသေၵႃႈတီႈ ယူႉတႃႉ ၊ ၶွၼ်ႉဢႃႇၼႃႇဢမ်ႇလႆႈၶၢႆႉသေၵႃႈၼႂ်းၵႄႈဝူင်ႈၵၢင်တိၼ်မၼ်း။ ၵူၼ်းမဵဝ်းတင်းလၢႆ တၵ်းဢွၼ်ၵၼ်ႁပ်ႉဢဝ် ထွမ်ႇဢဝ်ၵႃႈတီႈ သီႉလေႃႇ ၼၼ်ႉဢေႃႈ။-

11မၼ်းတၵ်းဢဝ်လီႈမၼ်း မတ်ႉလဵင်ႉၵႃႈတီႈၶိူဝ်းမၢၵ်ႇၸပိတ်ႈ၊ တၵ်းဢဝ်လီႈဢွၼ်ႇမတ်ႉလဵင်ႉၵႃႈတီႈၶိူဝ်းမၢၵ်ႇၸပိတ်ႈဢၼ်မျၢတ်ႈလီသေပိူၼ်ႈယူႇသေလႄႈတၵ်းဢဝ် ၶူဝ်းၼုင်ႈမၼ်းလွႆးသႂ်ႇၵႃႈၼႂ်းၼမ်ႉၸပိတ်ႈ၊ တၵ်းဢဝ်ၽႃႈၼုင်ႈမၼ်းလွႆးသႂ်ႇၵႃႈၼႂ်းလိူတ်ႈမၢၵ်ႇၸပိတ်ႈဢေႃႈ။-

12မၢၵ်ႇတႃမၼ်းတၵ်းလႅင်ၸၢင်းႁၢင်း လူၺ်ႈၼမ်ႉၸပိတ်ႈဢေႃႈ။ ၶဵဝ်ႈမၼ်းၵေႃႈ တၵ်းၽိူၵ်ႇၶၢဝ်လူၺ်ႈၼမ်ႉၼူမ်းဢေႃႈ။

13ၸေႇပူႉလုၼ်ႇ တၵ်းယူႇၵႃႈတီႈႁိမ်းၽင်ႇၼမ်ႉပၢင်ႇလၢႆႇလႄႈ မီးၵႃႈတီႈၽင်ႇၼမ်ႉတႃႈႁိူဝ်းသၢင်းၽေႃးဢေႃႈ။ လႅၼ်လိၼ်မၼ်းၵေႃႈ တၵ်းၵႂၢင်ႈတေႃႇထိုင်ႁွတ်ႈ ဝဵင်း ၸီႉတုၼ်ႇ ပုၼ်ႉဢေႃႈ။

14ဢီႉသၶႃႇ ၶုပ်ႉမူပ်ႇၵႃႈၼႂ်းၵၢင်သိုင်ႇၵၢင်ၶွၵ်ႈယူႇသေလႄႈ ပဵၼ်လီႈဢၼ်ႁႅင်းယႂ်ႇၼႃႇဢေႃႈ။-

15မၼ်းထူပ်းႁၼ်တီႈဢၼ်ၵတ်းၸႂ်ယဵၼ်ၶေႃး ပဵၼ်ဢၼ်လီငၢမ်းလႄႈ လိၼ်ပဵၼ်ဢၼ်သႃႇယႃႇၼၼ်ႉသေယဝ်ႉ၊ ဢဝ်ႁူဝ်မႃႇ ၵူမ်ႈတုင်း ႁႂ်ႈဢဝ်ၵၢၼ်းတၢင်ႇသႂ်ႇသေလႄႈ ပဵၼ်ၶႃႈဢၼ်ပၼ်ၶွၼ်ႇဢေႃႈ။

16တၢၼ်ႇ ၼႆႉ၊ တၵ်းၸီႇယၢင်ႇၵူၼ်းမၼ်းတင်းလၢႆမိူၼ်ၸိူဝ်ႉၼင်ႇၸိူဝ်ႉၶိူဝ်း ဢီႉသရေႇလႃႉ သေၸိူဝ်ႉသေမဵဝ်းၼၼ်ႉဢေႃႈ။-

17တၢၼ်ႇ ၸမ်ႉ၊ တၵ်းပဵၼ်ငူးဢၼ်မီးယူႇၵႃႈတႃႈၵႃႈတၢင်းဢေႃႈ။ တၵ်းပဵၼ်ငူးႁၢႆႉ ဢၼ်ၸၢင်ႈယူႇၵႃႈတီႈၵႄႈတၢင်းလႄႈ တွတ်ႇတိၼ်မႃႉ ႁႂ်ႈၵေႃႉဢၼ်ၶီႇမႃႉ လူမ်ႉပိၼ်ႈတူၵ်းၵႂႃႇတၢင်းလင်ဢေႃႈ။-

18ဢူဝ်းထႃႇဝရႃႉၽြႃးတီႈၶႃႈ၊ ၶႃႈၸဝ်ႈမုင်ႈထႃႈမွင်းထႃႈၵျေးၸူး တၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉလႄႈ ယူႇတီႈၶႃႈယဝ်ႉ။

19ၵၢတ်ႉ ၸမ်ႉ၊ မုၵ်ႉၸိူဝ်းၵူၼ်းသိုၵ်းတၵ်းမႃးလေႃႇၽၢင်ႈမၼ်းလႄႈ မၼ်းၵေႃႈတၵ်းလေႃႇၽၢင်ႈ ဢဝ်သူၼ်ႈၶဝ်ဢေႃႈ။

20ဢႃႇသႃႇ ၸမ်ႉ၊ တၢင်းၵိၼ်တၢင်းၶူပ်းမၼ်း တၵ်းပဵၼ်ၶႆပဵၼ်မၼ်းလႄႈ မၼ်းတၵ်းဢဝ်တၢင်းၵိၼ်တၢင်းၶူပ်း ဢၼ်ၶုၼ်ႁေႃၶမ်းၵိၼ်ၼၼ်ႉဢွၵ်ႇပၼ်ဢေႃႈ။

21ၼပ်ႉထလီႉ ပဵၼ်ၸိူဝ်ႉၼင်ႇ ယိူင်းတူဝ်မႄႈဢွၼ်ႇဢၼ်ပွႆႇဝႆႉၼၼ်ႉယဝ်ႉ။ မၼ်းၸၢင်ႈလၢတ်ႈပၼ် ၵႂၢမ်းလီၵႂၢမ်းဝၢၼ်ဢေႃႈ။

22ယူဝ်းသႅပ်ႈ ပဵၼ်တူၼ်ႈ ဢၼ်ၸၢင်ႈမၢၵ်ႇမၢၵ်ႇမၼ်းဢေႃႈ။ ပဵၼ်တူၼ်ႈဢၼ်ၸၢင်ႈမၢၵ်ႇမၢၵ်ႇမၼ်း ၵႃႈတီႈႁိမ်းၼမ်ႉမေႃႇဢေႃႈ။ ၵိင်ႇမၼ်းၶႃႊမၼ်းတင်းလၢႆ ၶၢမ်ႈပူၼ်ႉၵႃႈၼိူဝ်လမ်းဢုတ်ႇဢေႃႈ။-

23ၸဝ်ႈၵၢင်ႇၸဝ်ႈၵူင် ႁႂ်ႈမၼ်းၸဵပ်းၸႂ်ၶူမ်ၸႂ်လႄႈ ဢွၼ်ၵၼ်ပိုတ်းယိုဝ်းသႂ်ႇမၼ်း ၼိၵ်ႈၸၢၵ်ႈငႅၼ်းသႄးမၼ်းဢေႃႈ။-

24ၼႂ်းဝႃႈၼၼ်သေၵေႃႈ ၵၢင်ႇမၼ်းၵူင်မၼ်းၼၼ်ႉ ႁႅင်းဢမ်ႇဢူၼ်ႈ၊ ၶႅၼ်မၼ်းမိုဝ်းမၼ်းၵေႃႈ ၶၼ်ၽႂ်းယူႇဢေႃႈ။ ၶႅၼ်းတေႃႈ ၵႃႈတီႈမိုဝ်းၽြႃးဢၼ်တၼ်းၶူဝ်းယႂ်ႇၼႃႇ ၵႃႈၼႂ်းမဵဝ်း ယႃႇၵုပ်ႈ ၊ ၵႃႈတီႈမၢၵ်ႇႁိၼ်မၢၵ်ႇၽႃမဵဝ်း ဢီႉသရေႇလႃႉ ဢၼ်ဝႃႈ ၸဝ်ႈလဵင်ႉထိင်းသူဝ်း၊-

25ၵႃႈတီႈၽြႃးပဵၼ်ၸဝ်ႈပေႃႈမႂ်း ဢၼ်ၸွႆႈထႅမ်မႂ်း၊ ၵႃႈတီႈၸဝ်ႈဢၼၼ်ႇတႃႉတၼ်းၶူဝ်း ဢၼ်ပၼ်တၢင်းလီတီႈမႂ်းၼၼ်ႉ၊ ႁႂ်ႈမင်ႇၵလႃႇ ဢၼ်မီးၵႃႈၼိူဝ်ၽႃႉၵၢင်ႁၢဝ်၊ မင်ႇၵလႃႇဢၼ်မီးၵႃႈတႂ်ႈ တီႈဢၼ်လိုၵ်ႉဢၼ်လမ်ႇ၊ မင်ႇၵလႃႇဢၼ်ၸၢပ်ႈသႅင်ႇၵၼ်တင်းတဝ်ႈၼူမ်း ဢိၵ်ႇတင်းတွင်ႉတင်းပုမ်ၸိူဝ်းၼၼ်ႉ ႁွတ်ႈထိုင်ၵႃႈၼိူဝ်မႂ်းသေၵမ်းလူၺ်ႈ။-

26တၢင်းလီမင်ႇၵလႃႇဢၼ်ပေႃႈမႂ်းပၼ်ၼႆႉ မျၢတ်ႈလီလိူဝ်တွၼ်းၼႃႇသေ တၢင်းလီမင်ႇၵလႃႇ ဢၼ်ပူႇမွၼ်ႇၵဝ်ပၼ်ၸိူဝ်းၼၼ်ႉတေႃႇထိုင်ႁွတ်ႈ ၵႃႈတီႈႁိမ်းလွႆထႃႇဝရႃႉပုၼ်ႉဢေႃႈ။ ႁႂ်ႈတၢင်းလီမင်ႇၵလႃႇၸိူဝ်းၼၼ်ႉ ႁွတ်ႈထိုင်ၵႃႈၼိူဝ်ႁူဝ် ယူဝ်းသႅပ်ႈ ၊ ၵႃႈၼိူဝ်သီႈမွမ်ႈၸွမ်ႁူဝ်ၵေႃႉဢၼ်ပဵၼ် ၵူၼ်းယႂ်ႇၵူၼ်းလူင် ၵႃႈၼႂ်းပီႈၼွင်ႉမၼ်းတင်းလၢႆၼၼ်ႉသေၵမ်းလူၺ်ႈ။

27ပိၼ်ႇယႃႇမိၼ်ႇ ၸမ်ႉ၊ ပဵၼ်မႃထိူၼ်ႇဢၼ်ၸၢင်ႈႁိမ်ႁူင်ႇၶူပ်းၵိၼ်ဢေႃႈ။ ၶိင်ႇၵၢင်ၼႂ် မၼ်းၸၢင်ႈၶူပ်းၸၢင်ႈၵိၼ်ဢၼ်မၼ်း တီႉလႆႈၼၼ်ႉလႄႈ၊ ၶိင်ႇၵၢင်ၶမ်ႈမၼ်းၸၢင်ႈမႅင်ႇၸၢင်ႈၽႄ ဢၼ်မၼ်းႁိမ်ႁူင်ႇလႆႈၼၼ်ႉဢေႃႈ၊ ဝႃႈၼင်ႇၼႆဢေႃႈ။

28ၶဝ်ၸိူဝ်းၼႆႉပဵၼ် ဢီႉသရေႇလႃႉ သိပ်းသွင်မဵဝ်းဢေႃႈ။ ၵႂၢမ်းၸိူဝ်းၼႆႉၵေႃႈပဵၼ်ၵႂၢမ်းဢၼ်ပေႃႈၶဝ် မွၵ်ႇလၢတ်ႈလႄႈပၼ် တၢင်းလီတီႈၶဝ်ဢေႃႈ။ ၵႃႈၼင်ႇမင်ႇၵလႃႇဢၼ်ၶဝ်လႆႈၶၢမ်ႇဢဝ် ႁင်းၽႂ်ႁင်းမၼ်းၼၼ်ႉ မၼ်းပၼ်တၢင်းလီတီႈၶဝ်ဢေႃႈ။

29ၵမ်းၼၼ်ႉ မၼ်းသမ်ႉသင်ႇလၢတ်ႈတီႈၶဝ်လႄႈဝႃႈ၊ ၵဝ်တၵ်းလႆႈၵႂႃႇၵႃႈတီႈဢၼ်ပူႇမွၼ်ႇၵဝ်တင်းလၢႆၸူႉတုမ်ၼၼ်ႉဢေႃႈ။ ဢဝ်ၵဝ်လႄႈ သၢင်းၵျူဝ်ႇလူၺ်ႈၵၼ်တင်းပေႃႈၵဝ်တင်းလၢႆ ၵႃႈၼႂ်းႁူးလဝ် ဢၼ်မီးၵႃႈတီႈတူင်ႈၼႃး ဢေႇၽရုၼ်ႇ ၵူၼ်း ႁိတ်ႉတီႉ ၊-

30ႁူးလဝ်ဢၼ်မီးၵႃႈၼႂ်းတူင်ႈၼႃး မၵ်ႉပေႇလႃႉ ၽၢႆႇဝၼ်းဢွၵ်ႇ မမ်ႇရေႇ ၼႂ်းမိူင်း ၶႃႇၼၢၼ်ႇ ဢၼ် ဢႃႇပြႃႇႁၢမ်ႇ သိုဝ်ႉဢဝ်လူၺ်ႈၵၼ်တင်းတူင်ႈၼႃးၵႃႈတီႈ ဢေႇၽရုၼ်ႇ ၊ ၵူၼ်း ႁိတ်ႉတီႉ ပုၼ်ႈဢၼ်တၵ်းပဵၼ် ပႃႇႁဵဝ်ႈဢၼ်မၼ်းတၵ်းပိူင်ႇၼၼ်ႉသေၵမ်း။-

31ၵႃႈတီႈၼၼ်ႈ၊ ၶဝ်သၢင်းၵျူဝ်ႇ ဢႃႇပြႃႇႁၢမ်ႇ တင်းမေးမၼ်း ၸႃႇရႃႇ ယဝ်ႉ။ ၵႃႈတီႈၼၼ်ႈ၊ ဢီႉၸၢၵ်ႈ တင်း ရေႇပႅၵ်ႉၵႃႉ ၵေႃႈ ၶဝ်သၢင်းၵျူဝ်ႇယဝ်ႉ။ ၵႃႈတီႈၼၼ်ႈ၊ လေႇဢႃႇ ၵေႃႈၵဝ်သၢင်းၵျူဝ်ႇယဝ်ႉ။-

32တူင်ႈၼႃးဢိၵ်ႇတင်းႁူးလဝ်ဢၼ်မီးၼႂ်းတူင်ႈၼႃးၼၼ်ႉၸိုင်၊ ၶဝ်လႆႈသိုဝ်ႉဢဝ်ၵႃႈတီႈၵူၼ်း ႁေႇသႃႉ တင်းလၢႆၼၼ်ႉယဝ်ႉ၊ ဝႃႈၼင်ႇၼႆဢေႃႈ။

33ယႃႇၵုပ်ႈ သင်ႇလၢတ်ႈဝႆႉ တင်းသဵင်ႈတင်းမူတ်းတီႈလုၵ်ႈမၼ်းလၢင်းမၼ်းၸိူဝ်ႉၼင်ႇၼၼ်သေယဝ်ႉ၊ ယုၵ်ႉဢဝ်တိၼ်မၼ်းၵႃႈၼိူဝ်ၵူႇတီႈၼွၼ်းသေလႄႈ ၶျုၵ်ႈၸႂ်တၢႆလႄႈႁွတ်ႈထိုင် ၵႃႈတီႈဢၼ်ၵူၼ်းမဵဝ်းမၼ်းၸူႉတုမ်ၼၼ်ႉဢေႃႈ။

← Chapter 48 Jump to: Chapter 50 →