Genesis 44

Shan

← Chapter 43 Jump to: Chapter 45 →

1မၼ်းသင်ႇလၢတ်ႈတီႈၵူၼ်းဢုပ်ႉၵူၼ်းထိင်းႁိူၼ်းမၼ်းလႄႈဝႃႈ၊ ဢဝ်တၢင်းၵိၼ်ၵႃႈဢၼ်ၶဝ်ပႃးလႆႈၼၼ်ႉသႂ်ႇပၼ်ၵႃႈၼႂ်းထူင်ၶဝ်ၼၼ်ႉ ႁႂ်ႈတဵမ်တႃႉ။ ဢဝ်ငိုၼ်းဢၼ်ၸၢပ်ႈသႅင်ႇၵၼ်တင်းၶဝ်ႁင်းၽႂ်ႁင်းမၼ်းၼၼ်ႉသႂ်ႇဝႆႉၵႃႈၼႂ်းပၢၵ်ႇထူင်ၶဝ်တႃႉ၊-

2ဢဝ်ၵွၵ်းၵဝ်ဢၼ်ဝႃႈ ၵွၵ်းငိုၼ်းၼၼ်ႉသႂ်ႇဝႆႉၵႃႈၼႂ်းပၢၵ်ႇထူင်ၵေႃႉဢၼ်ဢသၢၵ်ႈလဵၵ်ႉသေပိူၼ်ႈၼၼ်ႉ ဢိၵ်ႇလူၺ်ႈၵၼ်တင်းငိုၼ်းၵႃႈၶဝ်ႈၵျုင်ႇမၼ်းၼၼ်ႉတႃႉ၊ ဝႃႈၼင်ႇၼႆလႄႈ၊ ၵေႃႉၼၼ်ႉႁဵတ်းၸွမ်းၵႃႈၼင်ႇဢၼ် ယူဝ်းသႅပ်ႈ ဝႃႈၼၼ်ႉဢေႃႈ။-

3ၶိင်ႇၵၢင်ၼႂ်မိူဝ်ႈဢၼ်မိူင်းလႅင်းမႃးၼၼ်ႉၸိုင်၊ ၶဝ်လႆႈၶၢမ်ႇတၢင်းဢၼ်ပွႆႇမိူဝ်းၵႂႃႇ ဢိၵ်ႇလူၺ်ႈၵၼ်တင်းလီႈၶဝ်တင်းလၢႆဢေႃႈ။-

4မိူဝ်ႈဢၼ်ၶဝ်ႁွတ်ႈထိုင်ၵႃႈၼွၵ်ႈဝဵင်းၼၼ်ႉလႄႈ ၸူဝ်ႈဢၼ်ဢမ်ႇပႆႇၵႆၼၼ်ႉၸိုင်၊ ယူဝ်းသႅပ်ႈ သင်ႇလၢတ်ႈတီႈၵူၼ်းဢုပ်ႉၵူၼ်း ထိင်းႁိူၼ်းမၼ်းလႄႈဝႃႈ၊ လုၵ်ႉလႄႈလိုပ်ႈၸွမ်းၶဝ်ၼၼ်ႉၵႂႃႇတႃႉ။ မိူဝ်ႈဢၼ်ၶိုတ်းၶဝ်ၼၼ်ႉၸိုင်၊ လၢတ်ႈတီႈၶဝ်လႄႈဝႃႈ၊ ႁဵတ်းသင်လႄႈသူတႅၼ်းပၼ်လွင်ႈတၢင်းဢၼ်ဢမ်ႇလီဢမ်ႇငၢမ်းပုၼ်ႈလွင်ႈတၢင်းဢၼ်လီဢၼ်ငၢမ်းၼင်ႇႁိုဝ်။-

5ပဵၼ်ၵွၵ်းဢၼ်ၸဝ်ႈၵဝ်ၵိၼ်ၼၼ်ႉဢမ်ႇၸႂ်ႈႁိုဝ်။ ပဵၼ်ၵွၵ်းဢၼ်မၼ်းၸၢင်ႈႁဵတ်းဢတၢတ်ႈဢၼ်လၢၵ်ႇလၢၵ်ႇလၢႆးလၢႆးၵႃႈၼႂ်းမၼ်း ၼၼ်ႉဢမ်ႇၸႂ်ႈႁိုဝ်။ သူႁဵတ်းဢမ်ႇလီဢမ်ႇငၢမ်း ၼႂ်းလွင်ႈတၢင်းဢၼ် သူႁဵတ်းၸိူဝ်ႉၼင်ႇၼႆၼၼ်ႉယဝ်ႉလူင်ပႄႇ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ၊-

6ၵေႃႉၼၼ်ႉလိုပ်ႈၸွမ်းၶိုတ်းၶဝ်လႄႈလၢတ်ႈ ၵႃႈၼင်ႇၵႂၢမ်းဢၼ်ဝႃႈၼၼ်ႉဢေႃႈ။-

7ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ႁဵတ်းသင်လႄႈၸဝ်ႈႁဝ်းလၢတ်ႈၵႂၢမ်းၸိူဝ်ႉၼင်ႇၼႆၼင်ႇႁိုဝ်ၶႃႈ။ ႁႂ်ႈဢမူႉၸိူဝ်ႉၼင်ႇၼၼ် ၵႆၵၼ်တင်းၶႃႈၸဝ်ႈႁဝ်းၸိူဝ်းၼႆႉသေၵမ်းလူၺ်ႈ။-

8တူၺ်းၶႃႈလူး၊ တေႃႈၵႃႈငိုၼ်းဢၼ်ၶႃႈၸဝ်ႈႁဝ်းၸိူဝ်းၼႆႉ လႆႈထူပ်းႁၼ်ၵႃႈၼႂ်းပၢၵ်ႇထူင်ၸိူဝ်းၼၼ်ႉ၊ ၶႃႈၸဝ်ႈႁဝ်းၸိူဝ်းၼႆႉ ယင်းသမ်ႉၶိုၼ်းဢဝ်ၸဵမ်ၵႃႈတီႈမိူင်း ၶႃႇၼၢၼ်ႇ ပုၼ်ႉ မႃးၵႃႈတီႈၸဝ်ႈႁဝ်းၼႆႉၶႃႈယဝ်ႉ။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ၶႃႈၸဝ်ႈႁဝ်းၸိူဝ်းၼႆႉ လႆႈလၵ်ႉဢဝ်ငိုၼ်းၶမ်းၵႃႈၼႂ်းႁိူၼ်းၸဝ်ႈႁဝ်းၼၼ်ႉၼင်ႇႁိုဝ်ၶႃႈ။-

9ၵႃႈၼႂ်းၶႃႈၸဝ်ႈႁဝ်းၸိူဝ်းၼႆႉ ထူပ်းႁၼ်တီႈၽူႈလႂ်သေဢမ်ႇဝႃႈ၊ ႁႂ်ႈၵေႃႉၼၼ်ႉတၢႆသေၵမ်းလူၺ်ႈ။ ၶႃႈၸဝ်ႈႁဝ်းၸိူဝ်းၼႆႉၵေႃႈ၊ တၵ်းဢွၼ်ၵၼ်ၶၢမ်ႇႁဵတ်းၶႃႈၸဝ်ႈႁဝ်းၶႃႈဢေႃႈ၊ ဝႃႈၼင်ႇၼႆဢေႃႈ။-

10ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ႁႂ်ႈပဵၼ်ၵႃႈၼင်ႇၵႂၢမ်းသူၼႆႉတႃႉ။ ၵူၺ်းၵႃႈ ထူပ်းႁၼ်တီႈၽူႈလႂ်သေဢမ်ႇဝႃႈ၊ ၵေႃႉၼၼ်ႉတၵ်းလႆႈပဵၼ်ၶႃႈၵဝ်ဢေႃႈ။ သူၸမ်ႉ၊ တၵ်းလႆႈၵၢင်းလွတ်ႈတင်းဢပႅတ်ႈဢေႃႈ၊ ဝႃႈၼင်ႇၼႆသေယဝ်ႉ၊-

11ၶဝ်ၼၼ်ႉဢွၼ်ၵၼ်ႁိပ်ႈၼႅတ်ႈၶျႃးထူင်ၶဝ် ႁင်းၽႂ်ႁင်းမၼ်းလူင်းၵႃႈၼိူဝ်လိၼ်သေလႄႈၽုၺ်ႇဢေႃႈ။-

12ၵေႃႉၼၼ်ႉၵေႃႈ သွၵ်ႈႁႃၸႃႉၸဵမ်ၵေႃႉယႂ်ႇတေႃႇထိုင်ႁွတ်ႈၵေႃႉလဵၵ်ႉလႄႈထူပ်းႁၼ်ၵွၵ်းၼၼ်ႉၵႃႈၼႂ်းထူင် ပိၼ်ႇယႃႇမိၼ်ႇ ဢေႃႈ။

13မိူဝ်ႈၼၼ်ႉၶဝ်ဢွၼ်ၵၼ် တိုတ်ႉသိၵ်ႇၶူဝ်းၼုင်ႈၶဝ်ပႅတ်ႈသေယဝ်ႉ၊ ၵူႈၵေႃႉၵူႈၵူၼ်းသမ်ႉၶိုၼ်းဢဝ်ၶူဝ်းၶဝ်တၢင်ႇသႂ်ႇၵႃႈၼိူဝ် လီႈတင်းလၢႆသေလႄႈ ၶိုၼ်းၵႂႃႇၸူးၵႃႈတီႈဝဵင်းဢေႃႈ။-

14ယူႉတႃႉ ဢိၵ်ႇတင်းပီႈၼွင်ႉမၼ်းၸိူဝ်းၼၼ်ႉၶိုၼ်းႁွတ်ႈထိုင်ၵႃႈတီႈႁိူၼ်း ယူဝ်းသႅပ်ႈ သေယဝ်ႉ၊ မၼ်းၵေႃႈယင်းမီးယူႇၵႃႈတီႈၼၼ်ႈလႄႈ ၶဝ်ဢွၼ်ၵၼ်ၶုပ်ႉမူပ်ႇၵႃႈၼိူဝ်လိၼ်ၵႃႈတီႈၽၢႆႇၼႃႈမၼ်းဢေႃႈ။-

15ယူဝ်းသႅပ်ႈ ၵေႃႈလၢတ်ႈတီႈၶဝ်လႄႈဝႃႈ၊ လွင်ႈတၢင်းဢၼ်သူႁဵတ်းယဝ်ႉၼႆႉ၊ ပဵၼ်ၸိူဝ်ႉၼင်ႇႁိုဝ်။ သူဢမ်ႇႁူႉလွင်ႈဢၼ်ၵူၼ်းၸၢႆးၸိူဝ်ႉၼင်ႇၵဝ်ၼႆႉ ၸၢင်ႈႁဵတ်းဢတၢတ်ႈ ဢၼ်လၢၵ်ႇလၢၵ်ႇလၢႆးလၢႆးၼၼ်ႉႁိုဝ်။ ဝႃႈၼင်ႇၼႆဢေႃႈ။-

16ယူႉတႃႉ ၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉတၵ်းၶိုၼ်းလၢတ်ႈတီႈၸဝ်ႈႁဝ်းၸိူဝ်ႉၼင်ႇႁိုဝ်လႆႈတီႈၶႃႈ၊ တၵ်းဝႃႈၸိူဝ်ႉၼင်ႇႁိုဝ်လႆႈတီႈၶႃႈ၊ တၵ်းႁႂ်ႈတူဝ်ၸဝ်ႈၵဝ်ႇ လွတ်ႈတင်းဢမူႉၼႆႉၸိူဝ်ႉၼင်ႇႁိုဝ်လႆႈတီႈၶႃႈ၊ ၽြႃးပဵၼ်ၸဝ်ႈထူပ်းႁၼ်ဢပႅတ်ႈၶႃႈၸဝ်ႈႁဝ်းၸိူဝ်းၼႆႉယဝ်ႉတီႈၶႃႈယဝ်ႉ။ ၶႃႈၸဝ်ႈႁဝ်းတင်းလၢႆဢၼ်ဝႃႈ ၸႃႉၸဵမ်ၶႃႈၸဝ်ႈႁဝ်းၸိူဝ်းၼႆႉလႄႈ ၵေႃႉဢၼ်လႆႈၶၢမ်ႇတၢင်းဢၼ် ထူပ်းႁၼ်ၵွၵ်းၼၼ်ႉၵႃႈၼႂ်းမိုဝ်းမၼ်းၼၼ်ႉပဵၼ်ၶႃႈၸဝ်ႈႁဝ်းတီႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

17မၼ်းၶိုၼ်းလၢတ်ႈလႄႈဝႃႈ၊ ႁႂ်ႈလွင်ႈတၢင်းဢၼ်တၵ်းႁဵတ်းၸိူဝ်ႉၼင်ႇၼႆၼၼ်ႉၵႆၵၼ်တင်းၵဝ်သေၵမ်းလူၺ်ႈ။ ၵေႃႉဢၼ်လႆႈၶၢမ်ႇတၢင်းဢၼ်ထူပ်းႁၼ်ၵွၵ်းၼၼ်ႉ ၵႃႈၼႂ်းမိုဝ်းမၼ်းၼၼ်ႉတၵ်းလႆႈပဵၼ်ၶႃႈၵဝ်ဢေႃႈ။ သူၸမ်ႉ၊ ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈပေႃႈသူပုၼ်ႉ ၼိမ်ၼိမ်လီလီတႃႉ၊ ဝႃႈၼင်ႇၼႆဢေႃႈ။

18မိူဝ်ႈၼၼ်ႉ ယူႉတႃႉ သုတ်ႉၸပ်းသုတ်ႉၸူးတီႈမၼ်းလႄႈ လဝ်ႊလၢတ်ႈဝႃႈ၊ ၸဝ်ႈႁဝ်း။ ႁႂ်ႈၶႃႈၸဝ်ႈလႆႈဢဝ်တင်းၵႂၢမ်းၵမ်းၼိုင်ႈလဝ်ႊလၢတ်ႈထိုင်ႁူၸဝ်ႈႁဝ်းသေၵမ်းတီႈၶႃႈ။ ယႃႇပေၸႂ်မႆႈၶႆႈၸႃႉတီႈၶႃႈၸဝ်ႈႁဝ်းၼႆႉသေၵမ်းတီႈၶႃႈ။ ၸဝ်ႈႁဝ်းပဵၼ်မိူၼ်ၸိူဝ်ႉၼင်ႇၶုၼ်ႁေႃၶမ်း ၽႃႇရေႃး တီႈၶႃႈဢေႃႈ။-

19မိူဝ်ႈၼၼ်ႉၸဝ်ႈႁဝ်းထၢမ်တီႈၶႃႈၸဝ်ႈႁဝ်းၸိူဝ်းၼႆႉလႄႈဝႃႈ၊ သူမီးပေႃႈႁိုဝ်။ မီးၼွင်ႉၸၢႆးႁိုဝ်။ ဝႃႈၼင်ႇၼႆတီႈၶႃႈလႄႈ၊-

20ၶႃႈၸဝ်ႈႁဝ်းၸိူဝ်းၼႆႉၶိုၼ်းလဝ်ႊလၢတ်ႈတီႈၸဝ်ႈႁဝ်းလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ မီးပေႃႈဢၼ်ဢသၢၵ်ႈယႂ်ႇၼႃႇ ဢိၵ်ႇတင်းလုၵ်ႈၸၢႆးၵေႃႉလဵၵ်ႉဢၼ်မၼ်းလႆႈမိူဝ်ႈဢၼ်ဢသၢၵ်ႈမၼ်းယႂ်ႇၼႃႇၼၼ်ႉၵေႃႉၼိုင်ႈတီႈၶႃႈဢေႃႈ။ ပီႈဢၢႆႈမၼ်းတၢႆယဝ်ႉတီႈၶႃႈ၊ ၼႂ်းလုၵ်ႈၸၢႆးဢၼ်မႄႈမၼ်းၵိူတ်ႇလဵင်ႉမႃးၸိူဝ်းၼၼ်ႉ၊ ၵိုတ်းၵျၢၼ်ႇဝႆႉမၼ်းၵေႃႉလဵဝ်ၵူၺ်းလႄႈ ပေႃႈမၼ်းႁၵ်ႉမၼ်းတီႈၶႃႈဢေႃႈ၊-

21မိူဝ်ႈဢၼ်ဝႃႈၼင်ႇၼႆၸိုင်၊ ၸဝ်ႈႁဝ်းၵေႃႈလၢတ်ႈတီႈၶႃႈၸဝ်ႈႁဝ်းၸိူဝ်းၼႆႉလႄႈဝႃႈ၊ ဢွၼ်ၵၼ်ဢဝ်မၼ်းလူင်းမႃးၵႃႈတီႈၵဝ်ႁႂ်ႈတႃၵဝ်လႆႈႁၼ်မၼ်းတႃႉ၊ ဝႃႈၼင်ႇၼႆတီႈၶႃႈဢေႃႈ။-

22ၶႃႈၸဝ်ႈႁဝ်းၸိူဝ်းၼႆႉၵေႃႈလဝ်ႊလၢတ်ႈတီႈၸဝ်ႈႁဝ်းလႄႈဝႃႈ၊ ၵေႃႉဢွၼ်ႇၼၼ်ႉ ဢမ်ႇၽၢတ်ႇယၢၼ်ၵၼ်တင်းပေႃႈမၼ်းလႆႈတီႈၶႃႈ။ ပေႃးမၼ်းၽၢတ်ႇယၢၼ်ၵၼ်တင်းပေႃႈမၼ်းၸိုင်။ ပေႃႈမၼ်းတၵ်းတၢႆတီႈၶႃႈယဝ်ႉ၊ ပိၵ်ႉသမ်ႉဝႃႈၼင်ႇၼႆသေၵေႃႈ၊-

23ၸဝ်ႈႁဝ်းလၢတ်ႈတီႈၶႃႈၸဝ်ႈႁဝ်းၸိူဝ်းၼႆႉလႄႈဝႃႈ၊ ပေႃးၼွင်ႉၸၢႆးသူၵေႃႉလဵၵ်ႉသေပိူၼ်ႈၼၼ်ႉ ဢမ်ႇပႃးလူၺ်ႈၵၼ်တင်းသူ လူင်းမႃးၸိုင်၊ ၵမ်းလိုၼ်းသူတၵ်းဢမ်ႇလႆႈႁၼ်ၼႃႈၵဝ်ၵူၺ်ႉ၊ ဝႃႈၼင်ႇၼႆတီႈၶႃႈဢေႃႈ။-

24ဝၢႆးၼၼ်ႉၶႃႈၸဝ်ႈႁဝ်းၸိူဝ်းၼႆႉ၊ မိူဝ်ႈဢၼ်ၶိုၼ်းမိူဝ်းၵႂႃႇ ၵႃႈတီႈပေႃႈၶႃႈၸဝ်ႈႁဝ်းၸိူဝ်းၼႆႉ ဢၼ်ဝႃႈ ၶႃႈၸဝ်ႈႁဝ်းၼၼ်ႉၸိုင် ဢွၼ်ၵၼ်ဢဝ်ၵႂၢမ်းၸဝ်ႈႁဝ်းၶိုၼ်းလၢတ်ႈတီႈပေႃႈၶႃႈၸဝ်ႈႁဝ်းၸိူဝ်းၼႆႉၼၼ်ႉတီႈၶႃႈဢေႃႈ။-

25ပေႃႈၶႃႈၸဝ်ႈႁဝ်းၸိူဝ်းၼႆႉၼၼ်ႉၵေႃႈလၢတ်ႈလႄႈဝႃႈ၊ သမ်ႉၵႂႃႇလႄႈသိုဝ်ႉဢဝ်ပုၼ်ႈဢၼ်ႁဝ်းတၵ်းၵိၼ်မႃးထႅင်ႈသေဢိတ်းတႃႉ။ မိူဝ်ႈဢၼ်ဝႃႈၼင်ႇၼႆၸိုင်၊-

26ၶႃႈၸဝ်ႈႁဝ်းၸိူဝ်းၼႆႉ ၶိုၼ်းလၢတ်ႈလႄႈဝႃႈ၊ ႁဝ်းၶႃႈဢမ်ႇလူင်းၵႂႃႇလႆႈၶႃႈ။ ပေႃးႁဝ်းၶႃႈလႆႈပႃးၼွင်ႉၸၢႆးၵေႃႉလဵၵ်ႉၵႂႃႇၸိုင် တၵ်းၵႂႃႇၶႃႈဢေႃႈ။ ပေႃးဢမ်ႇလႆႈပႃးၼွင်ႉၸၢႆးၵေႃႉလဵၵ်ႉၵႂႃႇၸိုင်၊ ဢမ်ႇလႆႈႁၼ်ၼႃႈၸဝ်ႈၼၼ်ႉၶႃႈၵူၺ်ႉ၊ ဝႃႈၼင်ႇၼႆတီႈၶႃႈဢေႃႈ။-

27ၶႃႈၸဝ်ႈႁဝ်းဢၼ်ဝႃႈ ပေႃႈၶႃႈၸဝ်ႈႁဝ်းၼႆႉၼၼ်ႉၵေႃႈ၊ ၶိုၼ်းလၢတ်ႈတီႈၶႃႈၸဝ်ႈႁဝ်းၸိူဝ်းၼႆႉလႄႈဝႃႈ၊ ၵႃႈၼင်ႇဢၼ်သူႁူႉယူႇၼၼ်ႉ၊ မေးၵဝ်ၵိူတ်ႇလဵင်ႉလုၵ်ႈၸၢႆးသွင်ၵေႃႉမႃးတီႈၵဝ်ဢေႃႈ။-

28ၵေႃႉၼိုင်ႈၸမ်ႉ၊ ဢွၵ်ႇသေၵႃႈတီႈၵဝ်ၵႂႃႇယဝ်ႉ။ ၵဝ်လႆႈဝႃႈ၊ မၼ်းလႆႈၶၢမ်ႇတၢင်းဢၼ်ၶူပ်းယွၵ်းၶူပ်းယွႆႈပႅတ်ႈယဝ်ႉလူင်ပႄႇ၊ ဝႃႈၼင်ႇၼႆဢေႃႈ။ ၸႃႉၸဵမ်ၶိင်ႇၵႃႇလႃႉၼၼ်ႉလႄႈ ၵဝ်ဢမ်ႇလႆႈႁၼ်မၼ်း။-

29ၵေႃႉၼႆႉၵေႃႈ ပေႃးသူဢဝ်ၽၢတ်ႇသေ ၵႃႈတီႈၵဝ်ၵႂႃႇလႄႈ ၽေးႁွတ်ႈထိုင်တီႈမၼ်းၸိုင်၊ သူတၵ်းဢဝ်တင်း တၢင်းဢၼ်ငိၼ်းၽၢၼ်ထိုင်ၸႂ်ႁႂ်ႈၶူၼ်ႁူဝ်ႁွၵ်ႇၵဝ်ၼႆႉ လူင်းႁွတ်ႈၵႃႈတီႈမိူင်းမရၼႃႉပုၼ်ႉဢေႃႈ၊ ဝႃႈၼင်ႇၼႆဢေႃႈ။-

30ပိူဝ်ႈၼႆလႄႈ မိူဝ်ႈဢၼ်ၶႃႈၸဝ်ႈႁဝ်းၸိူဝ်းၼႆႉႁွတ်ႈထိုင်ၵႃႈတီႈၶႃႈၸဝ်ႈႁဝ်းဢၼ်ဝႃႈ ပေႃႈၶႃႈၸဝ်ႈႁဝ်းၸိူဝ်းၼႆႉၼၼ်ႉ၊ ပေႃးဢမ်ႇပႃး ၵေႃႉဢွၼ်ႇၼႆႉၸိုင်၊ ပိူဝ်ႈဢၼ်ဢသၢၵ်ႈမၼ်းဢိင်ဢသၢၵ်ႈၵေႃႉဢွၼ်ႇၼႆႉယူႇလႄႈ၊-

31မိူဝ်ႈဢၼ်မၼ်းႁၼ် လွင်ႈဢၼ်ဢမ်ႇပႃးၵေႃႉဢွၼ်ႇၼႆႉၼၼ်ႉၸိုင်၊ မၼ်းတၵ်းတၢႆတီႈၶႃႈဢေႃႈ။ ၶႃႈၸဝ်ႈႁဝ်းၸိူဝ်းၼႆႉ တၵ်းဢဝ်တင်း တၢင်းဢၼ်ငိၼ်းၽၢၼ်ထိုင်ၸႂ်ႁႂ်ႈၶူၼ်ႁူဝ်ႁွၵ်ႇပေႃႈၶႃႈၸဝ်ႈႁဝ်းၸိူဝ်းၼႆႉ ဢၼ်ဝႃႈ ၶႃႈၸဝ်ႈႁဝ်းၼၼ်ႉလူင်းႁွတ်ႈထိုင်ၵႃႈတီႈ မိူင်းမရၼႃႉပုၼ်ႉတီႈၶႃႈဢေႃႈ။-

32ၶႃႈၸဝ်ႈႁဝ်းၼႆႉၵေႃႈ ပဵၼ်ၵေႃႉဢၼ်ႁပ်ႉတုင်းဢဝ် ၵေႃႉဢွၼ်ႇၼႆႉၵႃႈတီႈပေႃႈၶႃႈၸဝ်ႈႁဝ်းၼႆႉၼၼ်ႉလႄႈဝႃႈ၊ ပေႃးၵဝ်ၶႃႈ ဢမ်ႇဢဝ်မၼ်းၶိုၼ်းမႃးၵႃႈတီႈပေႃႈႁဝ်းၸိုင်၊ ႁႂ်ႈၵဝ်ၶႃႈလႆႈၶၢမ်ႇဢပႅတ်ႈ တီႈပေႃႈၵဝ်ၶႃႈယူႇတႃႇသေႇဢမ်ႇထၢတ်ႇသေၵမ်းလူၺ်ႈ၊ ဝႃႈၼင်ႇၼႆဝႆႉတီႈၶႃႈဢေႃႈ။-

33ပိူဝ်ႈၼႆလႄႈႁႂ်ႈၶႃႈၸဝ်ႈႁဝ်းၼႆႉ လႆႈပဵၼ်တၢင်တူဝ်ၵေႃႉဢွၼ်ႇၼႆႉလႄႈ ၵိုတ်းသဝ်းယူႇသေလႄႈ ပဵၼ်ၵေႃႉဢၼ်ၶၢမ်ႇႁဵတ်းၶႃႈ တီႈၸဝ်ႈႁဝ်းသေၵမ်းတီႈၶႃႈ။ ၵေႃႉဢွၼ်ႇၼႆႉၸမ်ႉ၊ ႁႂ်ႈလႆႈၵႂႃႇလူၺ်ႈၵၼ်တင်းပီႈဢၢႆႈမၼ်းတင်းလၢႆသေၵမ်းတီႈၶႃႈ။-

34ပေႃးၵေႃႉဢွၼ်ႇၼႆႉ ဢမ်ႇပႃးတီႈၶႃႈၸဝ်ႈႁဝ်းၼႆႉၵႂႃႇၸိုင်၊ ၶႃႈၸဝ်ႈႁဝ်းၼႆႉတၵ်းၶိုၼ်းၶိုၼ်ႈၵႂႃႇၵႃႈတီႈပေႃႈၶႃႈၸဝ်ႈႁဝ်းၼႆႉၼၼ်ႉ ၸိူဝ်ႉၼင်ႇႁိုဝ်လႆႈတီႈၶႃႈ။ ပေႃးႁဵတ်းၸိူဝ်ႉၼင်ႇၼႆၸိုင်၊ ၶႃႈၸဝ်ႈၼႆႉတၵ်းလႆႈႁၼ်ၽေးဢၼ်တၵ်းႁွတ်ႈထိုင်ၵႃႈတီႈပေႃႈၶႃႈၸဝ်ႈႁဝ်းၼႆႉၼၼ်ႉတီႈၶႃႈလူင်ပႄႇ၊ ဝႃႈၼင်ႇၼႆဢေႃႈ။

← Chapter 43 Jump to: Chapter 45 →