Genesis 47 — Shan

1မိူဝ်ႈၼၼ်ႉ ယူဝ်းသႅပ်ႈ ၶဝ်ႈၸူးၵႃႈတီႈၶုၼ်ႁေႃၶမ်း ၽႃႇရေႃး လႄႈလဝ်ႊလၢတ်ႈဝႃႈ၊ ပေႃႈၶႃႈၸဝ်ႈဢိၵ်ႇတင်းပီႈဢၢႆႈၶႃႈၸဝ်ႈတင်းလၢႆ ပႃးဢဝ်တင်းၽုင်သူဝ်းၽုင်ဝူဝ်းဢိၵ်ႇတင်းၵႃႈဢၼ်ၶဝ်မီးတင်းသဵင်ႈတင်းလူင် လုၵ်ႉသေၵႃႈတီႈမိူင်း ၶႃႇၼၢၼ်ႇ ပုၼ်ႉ ႁွတ်ႈမႃးလႄႈမီးယူႇၵႃႈတီႈမိူင်း ၵေႃးသိၼ်ႇ တီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

2လိူၵ်ႈၵဵပ်းဢဝ်ၵႃႈၼႂ်းပီႈဢၢႆႈမၼ်းတင်းသဵင်ႈတင်းလူင်ၸိူဝ်းၼၼ်ႉ ႁႃႈၵေႃႉလႄႈသႂၢင်းၶဝ်ႈ ၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃး ဢေႃႈ။-

3ၶုၼ်ႁေႃၶမ်း ၽႃႇရေႃး ၵေႃႈထၢမ်တီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊ သူၸၢင်ႈသၢင်ႈႁဵတ်းၵၢၼ်ငၢၼ်းၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၵေႃႈလဝ်ႊလၢတ်ႈတီႈၶုၼ်ႁေႃၶမ်း ၽႃႇရေႃး လႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ ဢိၵ်ႇတင်းပူႇမွၼ်ႇၶႃႈၸဝ်ႈႁဝ်းၸိူဝ်းၼႆႉၼၼ်ႉ ပဵၼ်ၵူၼ်းဢၼ်လဵင်ႉသူဝ်းထိင်းသူဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

4ၶဝ်သမ်ႉလဝ်ႊလၢတ်ႈတီႈၶုၼ်ႁေႃၶမ်း ၽႃႇရေႃး ထႅင်ႈလႄႈဝႃႈ၊ ပိူဝ်ႈဢၼ်ၵႃႈတီႈမိူင်း ၶႃႇၼၢၼ်ႇ ပုၼ်ႉ ၶဝ်ႈၵႃႈမၢၵ်ႇပႅင်းၼႃႇလူင်လၢင်လႄႈ ဢမ်ႇမီးပုၼ်ႈဢၼ်ၽုင်သူဝ်းၽုင်ဝူဝ်း တၵ်းၵိၼ်ၼၼ်ႉလႄႈ၊ ၶႃႈၸဝ်ႈႁဝ်းၸိူဝ်းၼႆႉ ၸင်ႇဢွၼ်ၵၼ်မႃးႁႂ်ႈလႆႈသွၼ်ႈပိုင်ႈၵႃႈၼႂ်းမိူင်းၸဝ်ႈၼႆႉတီႈၶႃႈယဝ်ႉဢေႃႈ။ ပိူဝ်ႈၼႆလႄႈ ၶႅၼ်းတေႃႈပၼ်ဢၶႂၢင်ႉ ႁႂ်ႈၶႃႈၸဝ်ႈႁဝ်းၸိူဝ်းၼႆႉလႆႈယူႇၵႃႈၼႂ်းမိူင်း ၵေႃးသိၼ်ႇ သေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

5ၶုၼ်ႁေႃၶမ်း ၽႃႇရေႃး ၵေႃႈ၊ လၢတ်ႈတီႈ ယူဝ်းသႅပ်ႈ လႄႈဝႃႈ၊ ပေႃႈမႂ်းဢိၵ်ႇတင်းပီႈဢၢႆႈမႂ်းတင်းလၢႆႁွတ်ႈမႃးၵႃႈတီႈမႂ်းယဝ်ႉ။-

6မိူင်း ဢေႇၵိပ်ႉတူႉ မီးယူႇၵႃႈတီႈၽၢႆႇၼႃႈမႂ်းဢေႃႈ။ ႁႂ်ႈပေႃႈမႂ်းဢိၵ်ႇတင်းပီႈဢၢႆႈမႂ်းၸိူဝ်းၼၼ်ႉ လိူၵ်ႈၵဵပ်းဢဝ်တီႈဢၼ်လိၼ်လီသေပိူၼ်ႈလႄႈ ၶျႃးတီႈယူႇပၼ် ၵႃႈတီႈမိူင်း ၵေႃးသိၼ်ႇ ပုၼ်ႉတႃႉ။ ပေႃးမႂ်းႁူႉလွင်ႈဢၼ် ၵႃႈၼႂ်းၶဝ်ၼၼ်ႉ မီးၵေႃႉဢၼ်ၸၢင်ႈမေႃ လၵ်းလႅမ်ၵမ်ႈၽွင်ႈၸိုင်၊ ၶၢၼ်းၶဝ်ဝႆႉၼႂ်းဢရႃႇၵေႃႉဢၼ်ဢုပ်ႉ ၵႃႈၼိူဝ်ၽုင်တရိၵ်ႈသၢၼ်ႇၵဝ်တႃႉ၊ ဝႃႈၼင်ႇၼႆဢေႃႈ။

7ယူဝ်းသႅပ်ႈ ဢဝ်ပေႃႈမၼ်း ယႃႇၵုပ်ႈ ၼၼ်ႉမႃးသႂၢင်းၶဝ်ႈလႄႈဝႆႉၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃး လႄႈ ယႃႇၵုပ်ႈ ၵေႃႈပၼ်တၢင်းလီတီႈၶုၼ်ႁေႃၶမ်း ၽႃႇရေႃး ဢေႃႈ။-

8ၶုၼ်ႁေႃၶမ်း ၽႃႇရေႃး ထၢမ်တီႈ ယႃႇၵုပ်ႈ လႄႈဝႃႈ၊ မိုဝ်ႉဝၼ်းၶူပ်ႇၼီႈပီႊမိူင်း ဢသၢၵ်ႈမႂ်းလႆႈၼမ်လႂ်ယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

9ယႃႇၵုပ်ႈ လဝ်ႊလၢတ်ႈတီႈၶုၼ်ႁေႃၶမ်း ၽႃႇရေႃး လႄႈဝႃႈ မိုဝ်ႉဝၼ်းဢသၢၵ်ႈဢၼ်ၶႃႈၸဝ်ႈလႆႈပဵၼ်ၶႅၵ်ႇဢႃႇၵၼ်ႇတူႉလႄႈ ပူၼ်ႉမႃးယဝ်ႉၼၼ်ႉ လႆႈပၢၵ်ႇပၢႆသၢမ်သိပ်းပီႊမိူင်းတီႈၶႃႈယဝ်ႉ။ မိုဝ်ႉဝၼ်းၶူပ်ႇၼီႈပီႊမိူင်းဢၼ်ၶႃႈၸဝ်ႈဢသၢၵ်ႈလိပ်းမႃးယဝ်ႉၼၼ်ႉ ၵေႇၼႃႇလႄႈႁၢႆႉမိူၵ်ႈတီႈၶႃႈဢေႃႈ။ ဢမ်ႇၶိုတ်းမိုဝ်ႉဝၼ်းပီႊမိူင်းဢသၢၵ်ႈပူႇမွၼ်ႇၶႃႈၸဝ်ႈဢၼ်ဝႃႈ မိုဝ်ႉဝၼ်းဢၼ်ၶဝ်ပဵၼ်ၶႅၵ်ႇဢႃႇၵၼ်ႇတူႉၼၼ်ႉတီႈၶႃႈ၊ ဝႃႈၼင်ႇၼႆသေယဝ်ႉ၊-

10ယႃႇၵုပ်ႈ ပၼ်တၢင်းလီတီႈၶုၼ်ႁေႃၶမ်း ၽႃႇရေႃး လႄႈ ဢွၵ်ႇသေၵႃႈတီႈၶုၼ်ႁေႃၶမ်း ၽႃႇရေႃး ၼၼ်ႉၵႂႃႇသေဢေႃႈ။

11ယူဝ်းသႅပ်ႈ ဢဝ်ပေႃႈမၼ်း ဢိၵ်ႇတင်းပီႈၼွင်ႉမၼ်းၸိူဝ်းၼၼ်ႉၶျႃးတီႈယူႇလႄႈ ပၼ်ၶဝ်လႆႈပိူင်ႇ ၵႃႈၼႂ်းမိူင်း ဢေႇၵိပ်ႉတူႉ ၵႃႈတီႈဢၼ်လီသေပိူၼ်ႈ ဢၼ်ဝႃႈၵႃႈၼႂ်းလိၼ် ရႃႇမသိတ်ႈ ၸွမ်းၵႃႈၼင်ႇဢၼ်ၶုၼ်ႁေႃၶမ်း ၽႃႇရေႃး မီးဢမိင်ႉၼၼ်ႉဢေႃႈ။-

12ယူဝ်းသႅပ်ႈ ဢဝ်တၢင်းၵိၼ်တၢင်းၶူပ်းလဵင်ႉလူပေႃႈမၼ်း ဢိၵ်ႇတင်းပီႈၼွင်ႉမၼ်းတင်းလၢႆ တင်းၵူၼ်းႁိူၼ်းၵူၼ်းယေးပေႃႈမၼ်းၸိူဝ်းၼၼ်ႉ ၸွမ်းၵႃႈၼင်ႇဢၼ်ၶဝ်မီးလုၵ်ႈဢွၼ်ႇလၢင်းဢွၼ်ႇၼၼ်ႉဢေႃႈ။

13ၵႃႈၼႂ်းမိူင်းၼၼ်ႉ ၵူႈတီႈၵူႈလႅၼ် ဢမ်ႇမီးတၢင်းၵိၼ်တၢင်းၶူပ်းလႃးလႃး။ လွင်ႈမၼ်းၸမ်ႉ ပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းၼႃႇလူင်လၢင်ထၼ်ႈပေႃး မိူင်း ဢေႇၵိပ်ႉတူႉ ဢိၵ်ႇတင်း မိူင်း ၶႃႇၼၢၼ်ႇ ၸိူဝ်းၼၼ်ႉ ႁႅင်းလႆႈဢူၼ်ႈၵႂႃႇ ၵွပ်ႈပိူဝ်ႈတၢင်းဢၼ်ပဵၼ် ၶဝ်ႈၵႃႈမၢၵ်ႇပႅင်း ၼၼ်ႉဢေႃႈ။-

14ယူဝ်းသႅပ်ႈ သိမ်းဢဝ်ငိုၼ်းၵႃႈဢၼ်မီး ၵႃႈၼႂ်းမိူင်း ဢေႇၵိပ်ႉတူႉ ဢိၵ်ႇတင်းမိူင်း ၶႃႇၼၢၼ်ႇ ဢၼ်ပဵၼ်ၵႃႈၶဝ်ႈၵျုင်ႇ ဢၼ်ၶဝ်သိုဝ်ႉဢဝ်ၼၼ်ႉဝႆႉလႄႈ သႂၢင်းၶဝ်ႈၵႃႈၼႂ်းႁေႃၶမ်းၶုၼ် ၽႃႇရေႃး ဢေႃႈ။-

15မိူဝ်ႈဢၼ်ငိုၼ်းၵႃႈတီႈမိူင်း ဢေႇၵိပ်ႉတူႉ ဢိၵ်ႇတင်းမိူင်း ၶႃႇၼၢၼ်ႇ ၼၼ်ႉသဵင်ႈယဝ်ႉၼၼ်ႉၸိုင်၊ ၵူၼ်း ဢေႇၵိပ်ႉတူႉ တင်းသဵင်ႈတင်းလူင် ဢွၼ်ၵၼ်မႃးၵႃႈတီႈ ယူဝ်းသႅပ်ႈ လႄႈလဝ်ႊလၢတ်ႈလႄႈဝႃႈ၊ ၶႅၼ်းတေႃႈပၼ်တၢင်းၵိၼ်သေၵမ်းတီႈၶႃႈ။ ၶႃႈၸဝ်ႈႁဝ်းၸိူဝ်းၼႆႉ၊ ပိူဝ်ႈဢၼ်ငိုၼ်းၶႃႈၸဝ်ႈႁဝ်းၸိူဝ်းၼႆႉ မူတ်းၵႂႃႇသဵင်ႈၵႂႃႇလႄႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၵ်းလႆႈတၢႆၵႃႈတီႈၽၢႆႇၼႃႈၸဝ်ႈႁဝ်း ၼင်ႇႁိုဝ်တီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

16ယူဝ်းသႅပ်ႈ ၵေႃႈလၢတ်ႈလႄႈဝႃႈ၊ ဢွၼ်ၵၼ်ဢဝ်တရိၵ်ႈသၢၼ်ႇသူပၼ်တႃႉ။ ပေႃးငိုၼ်းသဵင်ႈယဝ်ႉၸိုင်၊ ၵဝ်တၵ်းပၼ်တၢင်းၵိၼ်တၢင်းၶူပ်း ပုၼ်ႈၵႃႈၶၼ်တရိၵ်ႈသၢၼ်ႇသူၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ၊-

17ၶဝ်ၼၼ်ႉဢဝ်တရိၵ်ႈသၢၼ်ႇၶဝ်မႃးတီႈ ယူဝ်းသႅပ်ႈ လႄႈ ယူဝ်းသႅပ်ႈ ၵေႃႈ ပၼ်တၢင်းၵိၼ်တၢင်းၶူပ်းပုၼ်ႈၵႃႈၶၼ်မႃႉ၊ ၽုင်သူဝ်း၊ ၽုင်ဝူဝ်း၊ လီႈၶဝ်ၼၼ်ႉလႄႈ ပီႊၼၼ်ႉဢဝ်တၢင်းၵိၼ်တၢင်းၶူပ်း ပုၼ်ႈၵႃႈၶၼ်တရိၵ်ႈသၢၼ်ႇၶဝ်ၵႃႈမီး တင်းသဵင်ႈတင်းလူင်ၼၼ်ႉလဵင်ႉလူၶဝ်ဢေႃႈ။-

18ပီႊၼၼ်ႉသဵင်ႈသေယဝ်ႉ၊ ၼႂ်းပီႊတူႉတီႉယႃႉၼၼ်ႉ၊ ၶဝ်ဢွၼ်ၵၼ်မႃးတီႈမၼ်းလႄႈ လဝ်ႊလၢတ်ႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ ဢမ်ႇထိမ်ႇဢမ်ႇမႅပ်းလွင်ႈဢၼ်ငိုၼ်းၶႃႈၸဝ်ႈႁဝ်းၸိူဝ်းၼႆႉ သဵင်ႈယဝ်ႉမူတ်းယဝ်ႉဢိၵ်ႇတင်း လွင်ႈဢၼ်ၸဝ်ႈႁဝ်း လႆႈၽုင်တရိၵ်ႈသၢၼ်ႇၶႃႈၸဝ်ႈႁဝ်းၸိူဝ်းၼႆႉယဝ်ႉၼၼ်ႉ၊ ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈ။ လိူဝ်သေတူဝ်တင်းၵႂၢၵ်ႈလိၼ်ၶႃႈၸဝ်ႈႁဝ်းၸိူဝ်းၼႆႉ ဢမ်ႇၵိုတ်းဢမ်ႇၵျၢၼ်ႇၵႃႈသင်ဝႆႉ ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈယဝ်ႉ။-

19ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶႃႈၸဝ်ႈႁဝ်းၸိူဝ်းၼႆႉတၵ်းလႆႈတၢႆသိုဝ်ႈၼႃႈတႂ်ႈတႃၸဝ်ႈႁဝ်းလႄႈ ၵႂၢၵ်ႈလိၼ်ၶႃႈၸဝ်ႈႁဝ်းၸိူဝ်းၼႆႉ တၵ်းလႆႈလူႉလႆႈလႅဝ်ၼင်ႇႁိုဝ်တီႈၶႃႈ၊ ၶႅၼ်းတေႃႈ ပၼ်တၢင်းၵိၼ်တၢင်းၶူပ်းလႄႈ သိုဝ်ႉဢဝ်ၶႃႈၸဝ်ႈႁဝ်းၸိူဝ်းၼႆႉ ဢိၵ်ႇတင်းၵႂၢၵ်ႈလိၼ်ၶႃႈၸဝ်ႈႁဝ်းၸိူဝ်းၼႆႉသေၵမ်းတီႈၶႃႈ။ ၶႃႈၸဝ်ႈႁဝ်းၸိူဝ်းၼႆႉ တင်းၵႂၢၵ်ႈလိၼ်ၶႃႈၸဝ်ႈႁဝ်းၸိူဝ်းၼႆႉ တၵ်းၶၢမ်ႇႁဵတ်းၶႃႈတီႈ ၶုၼ်ႁေႃၶမ်း ၽႃႇရေႃး တီႈၶႃႈဢေႃႈ။ လွင်ႈၼင်ႇႁိုဝ်ၶႃႈၸဝ်ႈႁဝ်းၸိူဝ်းၼႆႉ တၵ်းဢမ်ႇလႆႈတၢႆလႄႈ ဢသၢၵ်ႈလိပ်းယူႇ ဢိၵ်ႇတင်းလွင်ႈၼင်ႇႁိုဝ် မိူင်းၸဝ်ႈတၵ်းဢမ်ႇလႆႈပဵၼ်တီႈဢၼ် သဵတ်ႇဢၼ်ယဵၼ်ၸိုင်၊ ၶႅၼ်းတေႃႈပၼ်ၸိူဝ်ႉပၼ်ၽၼ်းသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊-

20ယူဝ်းသႅပ်ႈ သိုဝ်ႉဢဝ်ၵႂၢၵ်ႈလိၼ် ၵႃႈၼႂ်းမိူင်း ဢေႇၵိပ်ႉတူႉ တင်းသဵင်ႈတင်းလူင်ၼၼ်ႉ ပုၼ်ႈၶုၼ်ႁေႃၶမ်း ၽႃႇရေႃး ဢေႃႈ။ ၵူၼ်းမိူင်း ဢေႇၵိပ်ႉတူႉ ဢွၼ်ၵၼ်ၶၢႆၵႂၢၵ်ႈလိၼ် ဢၼ်ၶဝ်ပိူင်ႇႁင်းၽႂ်ႁင်းမၼ်းၵွပ်ႈပိူဝ်ႈဢၼ် တၢင်းဢၼ်ၶဝ်ႈၵႃႈမၢၵ်ႇပႅင်းယႂ်ႇၼႃႇၶိုၵ်ႉၼႃႇတီႈၶဝ်ၼၼ်ႉလႄႈ လိၼ်ၸိူဝ်းၼၼ်ႉလႆႈပဵၼ် ၽၼ်ႇတႃႇၶုၼ်ႁေႃၶမ်း ၽႃႇရေႃး ဢေႃႈ။-

21ၵူၼ်းတင်းလၢႆၸမ်ႉ၊ မၼ်းႁႂ်ႈလုၵ်ႉသေၵႃႈတီႈႁိမ်း လႅၼ်လိၼ်မိူင်း ဢေႇၵိပ်ႉတူႉ ၸႃႉၸဵမ်ၽၢႆႇၼိုင်ႈလႄႈ တေႃႇထိုင်ႁွတ်ႈၽၢႆႇၼိုင်ႈၼၼ်ႉလႄႈ ဢွၼ်ၵၼ်ၶၢႆႉတီႈၵႂႃႇယူႇ ၵႃႈတီႈၼႂ်းဝဵင်းတင်းလၢႆဢေႃႈ။-

22လိၼ်ဢၼ်ယိတ်ႈပရေႃးႁဵၵ်ႈတင်းလၢႆပိူင်ႇၸမ်ႉ၊ မၼ်းဢမ်ႇသိုဝ်ႉဢမ်ႇဢဝ်။ ယိတ်ႈပရေႃးႁဵၵ်ႈၸိူဝ်းၼၼ်ႉ ဢွၼ်ၵၼ်လႆႈပုၼ်ႈလႆႈတႃႇတီႈၶုၼ်ႁေႃၶမ်း ၽႃႇရေႃး လႄႈ ၵိၼ်ပုၼ်ႈၵိၼ်တႃႇ ဢၼ်ၶုၼ်ႁေႃၶမ်း ၽႃႇရေႃး ပၼ်တီႈၶဝ်ၼၼ်ႉဢေႃႈ။ ပိူဝ်ႈၼႆလႄႈ ၶဝ်ဢမ်ႇလႆႈၶၢႆၵႂၢၵ်ႈလိၼ်ၶဝ်ၼၼ်ႉ။-

23ယူဝ်းသႅပ်ႈ ၵေႃႈ လၢတ်ႈတီႈၵူၼ်းဝၢၼ်ႈၵူၼ်းမိူင်းတင်းလၢႆလႄႈဝႃႈ၊ ဝၼ်းမိူဝ်ႈၼႆႉ ၵဝ်သိုဝ်ႉဢဝ်တူဝ်သူ တင်းလိၼ်သူပုၼ်ႈၶုၼ်ႁေႃၶမ်း ၽႃႇရေႃး ယဝ်ႉ။ ဢဝ်ၸိူဝ်ႉဢဝ်ၽၼ်းဢၼ်မီးၵႃႈတီႈၼႆႈလႄႈ ႁဵတ်းႁႆႊႁဵတ်းၼႃးတႃႉ။-

24မိူဝ်ႈဢၼ်လႆႈသိမ်းမၢၵ်ႇသိမ်းႁူင်းၼၼ်ႉၸိုင်၊ တၵ်းလႆႈဢဝ်ႁႃႈပုၼ်ႈပုၼ်ႈၼိုင်ႈသၢၵ်ႈတီႈၶုၼ်ႁေႃၶမ်း ၽႃႇရေႃး ဢေႃႈ။ သီႇပုၼ်ႈၸမ်ႉ၊ တၵ်းလႆႈပဵၼ် တီႈဢၼ်သူပိူင်ႇပုၼ်ႈဢၼ်သူတၵ်းလႆႈႁဵတ်းတၢင်းဢၼ် ဝၢၼ်ႇၸိူဝ်ႉဝၢၼ်ႇၽၼ်း ၵႃႈၼႂ်းႁႆႊၼႂ်းၼႃး၊ တၢင်းဢၼ်သူၵိၼ်သူၶူပ်း ဢိၵ်ႇတင်းတၢင်းဢၼ်သူလဵင်ႉသူလူ ၵူၼ်းႁိူၼ်းၵူၼ်းယေးသူ တင်းလုၵ်ႈဢွၼ်ႇလၢင်းဢွၼ်ႇသူၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။-

25ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်းၵႄႇသႄႇဢသၢၵ်ႈၶႃႈၸဝ်ႈႁဝ်းၸိူဝ်းၼႆႉတီႈၶႃႈယဝ်ႉ။ ၶႅၼ်းတေႃႈႁႂ်ႈၶႃႈၸဝ်ႈႁဝ်းၸိူဝ်းၼႆႉ လႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းသေၵမ်းတီႈၶႃႈ။ ၶႃႈၸဝ်ႈၸိူဝ်းၼႆႉတၵ်းလႆႈဢွၼ်ၵၼ်ပဵၼ်ၶႃႈ ၶုၼ်ႁေႃၶမ်း ၽႃႇရေႃး တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

26ပိူဝ်ႈၼႆလႄႈ လွင်ႈၼင်ႇႁိုဝ်ၶုၼ်ႁေႃၶမ်း ၽႃႇရေႃး တၵ်းလႆႈပိူင်ႇႁႃႈပုၼ်ႈပုၼ်ႈၼိုင်ႈၸိုင်၊ ယူဝ်းသႅပ်ႈ ၸီႇယၢင်ႇဝႆႉ ထမ်ႇမသၢတ်ႈ ဢၼ်တႄႇယူႇၵႃႈၼႂ်းမိူင်း ဢေႇၵိပ်ႉတူႉ ႁၢၼ်ႉတေႃႇဝၼ်းမိူဝ်ႈၼႆႉဢေႃႈ။ ၵူၺ်းၵႃႈ ၵႂၢၵ်ႈလိၼ်ယိတ်ႈပရေႃးႁဵၵ်ႈၸိူဝ်းၼၼ်ႉၵူၺ်း ၶုၼ်ႁေႃၶမ်း ၽႃႇရေႃး ဢမ်ႇလႆႈပိူင်ႇ။

27ၵူၼ်း ဢီႉသရေႇလႃႉ ၸိူဝ်းၼၼ်ႉ ယူႇၵႃႈၼႂ်းမိူင်း ဢေႇၵိပ်ႉတူႉ ၵႃႈတီႈမိူင်း ၵေႃးသိၼ်ႇ ၼၼ်ႉလႄႈ ဢွၼ်ၵၼ်ၸၢင်ႈမၢၵ်ႈၸၢင်ႈမီးဢုၵ်ႉၸႃႇၶူဝ်းလဵင်းသေလႄႈ ၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်းမႃးဢေႃႈ။

28ယႃႇၵုပ်ႈ ဢသၢၵ်ႈလိပ်းယူႇ ၵႃႈတီႈမိူင်း ဢေႇၵိပ်ႉတူႉ ၼၼ်ႉ သိပ်းပၢႆၸဵတ်းပီႊလႄႈ ၶူပ်ႇၼီႈပီႊမိူင်းဢသၢၵ်ႈ ယႃႇၵုပ်ႈ ၼၼ်ႉမီး ပၢၵ်ႇပၢႆသီႇသိပ်းပၢႆၸဵတ်းပီႊဢေႃႈ။-

29ဢီႉသရေႇလႃႉ ၼၼ်ႉ၊ မိူဝ်ႈဢၼ်ၶိင်ႇဢၼ်မၼ်း တၵ်းလႆႈတၢႆၼၼ်ႉၸမ်မႃးၼၼ်ႉၸိုင်၊ ႁွင်ႉဢဝ် ယူဝ်းသႅပ်ႈ လုၵ်ႈၸၢႆးမၼ်းလႄႈ လၢတ်ႈဝႃႈ၊ ပေႃးၵဝ်လႆႈထူပ်းၵျေးၸူး သိုဝ်ႈၼႃႈတႂ်ႈတႃမႂ်းၸိုင်၊ ဢဝ်မိုဝ်းမႂ်းဝႆႉၵႃႈတႂ်ႈၶႃၵဝ်တႃႉ။ မီးတင်းၵရူႉၼႃႇတင်းသဵတ်ႈၸႃႇ ႁဵတ်းတီႈၵဝ်တႃႉ။ ၶႅၼ်းတေႃႈယႃႇပေသၢင်းၵျူဝ်ႇၵဝ် ၵႃႈတီႈမိူင်း ဢေႇၵိပ်ႉတူႉ ၼႆႉ။-

30မိူဝ်ႈဢၼ်ၵဝ်ၼွၼ်းလူၺ်ႈၵၼ်တင်းပူႇမွၼ်ႇၵဝ်ၸိူဝ်းၼၼ်ႉၸိုင် မႂ်းတၵ်းလႆႈဢဝ်ၵဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼႆႉၵႂႃႇလႄႈ သၢင်းၵျူဝ်ႇၵဝ်ၵႃႈၼႂ်းပႃႇႁဵဝ်ႈၶဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။ မၼ်းၵေႃႈလၢတ်ႈလႄႈဝႃႈ ၵဝ်ၶႃႈတၵ်းႁဵတ်းၸွမ်းၵႃႈၼင်ႇဢၼ်ပေႃႈႁဝ်းဝႃႈၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။

31ပေႃႈမၼ်းသမ်ႉၶိုၼ်းလၢတ်ႈလႄႈဝႃႈ၊ ႁဵတ်းတၢင်းဢၼ်ၵိၼ်ႇဢၼ်ဝႃႈတီႈၵဝ်တႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈႁဵတ်းတၢင်းဢၼ်ၵိၼ်ႇဢၼ်ဝႃႈဢေႃႈ။ ဢီႉသရေႇလႃႉ ၵေႃႈ ႁဵတ်းတၢင်းဢၼ်ၵူမ်ႈၵွမ်းႁူဝ်ၵႃႈၼိူဝ်ႁူဝ်တီႈၼွၼ်းမၼ်းဢေႃႈ။