Genesis 41 — Shan

1လိုၼ်းၼၼ်ႉ မိူဝ်ႈဢၼ်ပူၼ်ႉသွင်ပီႊယဝ်ႉၸိုင်၊ ၶုၼ်ႁေႃၶမ်း ၽႃႇရေႃး ၼၼ်ႉၼွၼ်းၽၼ်ႁၼ်ၸမ်ႉ၊ တူဝ်မၼ်းၸဝ်ႈၸုၵ်းယူႇၵႃႈတီႈႁိမ်းၼမ်ႉႁွင်ႈဢေႃႈ။-

2ဝူဝ်းဢၼ်ႁၢင်ႈလီလႄႈပီးလီမၼ်းလီၸဵတ်းတူဝ်ဢွၵ်ႇသေၵႃႈၼႂ်းၼမ်ႉႁွင်ႈမႃးလႄႈ ၵိၼ်ယိူဝ်ႈယူႇဢေႃႈ။-

3လိုၼ်းသေဝူဝ်းၸိူဝ်းၼၼ်ႉ၊ ဝူဝ်းဢၼ်ဢမ်ႇႁၢင်ႈလီလႄႈယွမ်ႁဵဝ်ႇၸဵတ်းတူဝ်သမ်ႉဢွၵ်ႇသေၵႃႈၼႂ်းၼမ်ႉႁွင်ႈမႃးလႄႈ ၸုၵ်းယူႇၵႃႈတီႈႁိမ်း ဝူဝ်းၸိူဝ်းဢၼ်ဢွၼ်တၢင်းၼၼ်ႉ ၵႃႈၼိူဝ်ၽင်ႇၼမ်ႉႁွင်ႈၼၼ်ႉဢေႃႈ။

4ဝူဝ်းဢၼ်ဢမ်ႇႁၢင်ႈလီလႄႈယွမ်ႁဵဝ်ႇၸိူဝ်းၼၼ်ႉ ၶူပ်းၵိၼ်ဝူဝ်းဢၼ်ႁၢင်ႈလီလႄႈ ပီးလီမၼ်းလီၸဵတ်းတူဝ်ၸိူဝ်းၼၼ်ႉပႅတ်ႈလႄႈ ၶုၼ်ႁေႃၶမ်း ၽႃႇရေႃး ၵေႃႈတိုၼ်ႇမႃးသေဢေႃႈ။

5ၵမ်းၼၼ်ႉ သမ်ႉၶိုၼ်းၼွၼ်းလပ်းလႄႈသမ်ႉၶိုၼ်းၽၼ်ႁၼ်ထႅင်ႈၸမ်ႉ၊ ႁူင်းၶဝ်ႈဢၼ်မဵတ်ႉမၢၵ်ႈလႄႈလီၼႃႇၸဵတ်းႁူင်းဢွၵ်ႇပဵၼ်မႃးၵႃႈတီႈတူၼ်ႈလဵဝ်ၵူၺ်းဢေႃႈ။-

6လိုၼ်းၼၼ်ႉ ႁူင်းၶဝ်ႈဢၼ်မဵတ်ႉလိပ်ႈလႄႈလူႉၵွပ်ႈပိူဝ်ႈလူမ်းတၢင်းဝၼ်းဢွၵ်ႇၼၼ်ႉၸဵတ်းႁူင်းဢွၵ်ႇမႃးဢေႃႈ။-

7ႁူင်းၶဝ်ႈဢၼ်မဵတ်ႉလိပ်ႈၸိူဝ်းၼၼ်ႉၵိၼ်ႁူင်းၶဝ်ႈဢၼ်မဵတ်ႉမၢၵ်ႈလႄႈလီၼႃႇၸိူဝ်းၼၼ်ႉပႅတ်ႈဢေႃႈ။ ၼင်ႇၼၼ်လႄႈ ၶုၼ်ႁေႃၶမ်း ၽႃႇရေႃး ၵေႃႈတိုၼ်ႇမႃးလႄႈႁူႉလွင်ႈဢၼ်ပဵၼ်တၢင်းဢၼ်ၼွၼ်းၽၼ်ႁၼ်ဢေႃႈ။

8မိူဝ်ႈဢၼ်ထိုင်ၶိင်ႇၵၢင်ၼႂ်ၸိုင်၊ မၼ်းၸဝ်ႈယၢပ်ႇၸႂ်ယုင်ႈၸႂ်လႄႈ ႁွင်ႉဢဝ်ၵူၼ်းမေႃပေႇတၢင်ႇလႂ်တင်းၵူၼ်းမေႃဢတၢတ်ႈပိင်ႇၺႃႇလႂ်ၵႃႈမီးၵႃႈၼႂ်းမိူင်း ဢေႇၵိပ်ႉတူႉ ၼၼ်ႉသေလႄႈ မွၵ်ႇလၢတ်ႈလွင်ႈမၼ်းတၢင်းမၼ်းတီႈၶဝ်ဢေႃႈ။ ပိၵ်ႉသမ်ႉၶုၼ်ႁေႃၶမ်း ၽႃႇရေႃး မွၵ်ႇလၢတ်ႈလွင်ႈတၢင်းဢၼ်မၼ်းၸဝ်ႈၼွၼ်းၽၼ်ႁၼ်ၼၼ်ႉတီႈၶဝ်သေၵေႃႈ ၵေႃႉဢၼ်ၽုၺ်ႇဢွၵ်ႇၼႄပျႃးဢၼၢၵ်ႈ ဢထိၵ်ႈပႄႇမၼ်း ၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃး လႆႈၼၼ်ႉ ဢမ်ႇမီးသေၵေႃႉသေၵူၼ်း။

9မိူဝ်ႈၼၼ်ႉဝုၼ်ႇသၢၵ်ႈၵွၵ်းၵိၼ်ၸဝ်ႈ လဝ်ႊလၢတ်ႈတီႈၶုၼ်ႁေႃၶမ်း ၽႃႇရေႃး လႄႈဝႃႈ၊ ဝၼ်းမိူဝ်ႈၼႆႉၶႃႈၸဝ်ႈၶုၵ်းၸႂ်လႆႈ ၶႆႈၸႂ်ထူပ်း ဢပႅတ်ႈၶႃႈၸဝ်ႈတီႈၶႃႈဢေႃႈ။-

10ၶုၼ်ႁေႃၶမ်း ၽႃႇရေႃး ၸႂ်မႆႈၶႆႈၸႃႉတီႈၶႃႈမၼ်းၸဝ်ႈဢၼ်ဝႃႈ ၶႃႈၸဝ်ႈဢိၵ်ႇတင်းဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈလႄႈ ဢဝ်ၶျုၵ်ႈဝႆႉၵႃႈၼႂ်းႁိူၼ်း ၵူဝ်ႇရမ်ႇတေႃႇမူးၼၼ်ႉသေယဝ်ႉ၊-

11ၶႃႈၸဝ်ႈႁဝ်းသွင်ၵေႃႉၼႂ်းၶိုၼ်းလဵဝ်ၵူၺ်း ၼွၼ်းၽၼ်ႁၼ်တၢင်းဢၼ်ၽၼ်ႁၼ် ဢၼ်ပျေႉၸုမ်ႇတၢင်းဢၼၢၵ်ႈဢထိၵ်ႈပႄႇ ႁင်းၽႂ်ႁင်းမၼ်းတီႈၶႃႈဢေႃႈ။-

12တီႈၶႃႈၸဝ်ႈႁဝ်းၸိူဝ်းၼၼ်ႉမီးၵူၼ်း ႁေႇပြႄး ဢွၼ်ႇ ဢၼ်ပဵၼ်ၶႃႈၵူဝ်ႇရမ်ႇတေႃႇမူးၼၼ်ႉၵေႃႉၼိုင်ႈတီႈၶႃႈဢေႃႈ။ ၶႃႈၸဝ်ႈႁဝ်းဢွၼ်ၵၼ်မွၵ်ႇလၢတ်ႈတီႈၵေႃႉၼၼ်ႉလႄႈ မၼ်းၼၼ်ႉၵေႃႈၽုၺ်ႇဢွၵ်ႇၼႄပျႃး ဢၼၢၵ်ႈဢထိၵ်ႈပႄႇတၢင်းဢၼ်ၽၼ်ႁၼ်ၼၼ်ႉတီႈၶႃႈဢေႃႈ။ မၼ်းၽုၺ်ႇဢွၵ်ႇၼႄပျႃးၸွမ်းၵႃႈၼင်ႇဢၼ်ၽၼ်ႁၼ်ႁင်းၽႂ်ႁင်းမၼ်းၼၼ်ႉတီႈၶႃႈဢေႃႈ။-

13ၵႃႈၼင်ႇဢၼ်မၼ်းၽုၺ်ႇဢွၵ်ႇၼႄပျႃးတီႈၶႃႈၸဝ်ႈႁဝ်းၶဝ်ၼႆႉၼၼ်ႉၵေႃႈ မႅၼ်ႈတီႈၶႃႈဢေႃႈ။ ၶႃႈၸဝ်ႈၶိုၼ်းလႆႈဢရႃႇ မိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉလႄႈ ၵေႃႉၼိုင်ႈၼၼ်ႉၸမ်ႉ၊ လႆႈၶၢမ်ႇတၢင်းဢၼ်ႁွႆႈဝႆႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။

14မိူဝ်ႈၼၼ်ႉ ၶုၼ်ႁေႃၶမ်း ၽႃႇရေႃး ပွႆႇၸႂ်ႉၵူၼ်းၵႂႃႇလႄႈႁွင်ႉဢဝ် ယူဝ်းသႅပ်ႈ ဢေႃႈ။ ၶဝ်ဢဝ်မၼ်းဢွၵ်ႇသေ ၵႃႈၼႂ်းထွင်ႇ ၶၼ်ၶၼ်ၽႂ်းၽႂ်းလႄႈ မၼ်းၵေႃႈထႃၼူတ်ႇလၢႆႈၶူဝ်းလၢႆႈလဵင်းသေယဝ်ႉ၊ လႆႈၶဝ်ႈၸူးၵႃႈတီႈ ၶုၼ်ႁေႃၶမ်း ၽႃႇရေႃး ဢေႃႈ။-

15ၶုၼ်ႁေႃၶမ်း ၽႃႇရေႃး လၢတ်ႈတီႈ ယူဝ်းသႅပ်ႈ လႄႈဝႃႈ၊ ၵဝ်လႆႈၼွၼ်းၽၼ်ႁၼ်ယဝ်ႉ။ ၽူႈလႂ်ဢမ်ႇၽုၺ်ႇဢွၵ်ႇၼႄပျႃးဢၼၢၵ်ႈဢထိၵ်ႈပႄႇမၼ်းလႆႈ။ ၵဝ်လႆႈငိၼ်းလွင်ႈဢၼ် မႂ်းၸၢင်ႈထွမ်ႇၸၢင်ႈငိၼ်းတၢင်းဢၼ်ၼွၼ်းၽၼ်ႁၼ် ႁႂ်ႈလႆႈၽုၺ်ႇဢွၵ်ႇၼႄပျႃး ဢၼၢၵ်ႈဢထိၵ်ႈပႄႇမၼ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

16ယူဝ်းသႅပ်ႈ ၶိုၼ်းလဝ်ႊလၢတ်ႈတီႈ ၶုၼ်ႁေႃၶမ်း ၽႃႇရေႃး လႄႈဝႃႈ၊ တီႈတူဝ်ၶႃႈၸဝ်ႈၼႆႉၸိုင် ဢမ်ႇပဵၼ်ၸိူဝ်ႉၼင်ႇၼၼ်တီႈၶႃႈ၊ ႁႂ်ႈၽြႃးပဵၼ်ၸဝ်ႈၶိုၼ်းၵႄႈလိတ်ႈၵႂၢမ်းမင်ႇၵလႃႇပၼ်တီႈၶုၼ်ႁေႃၶမ်း ၽႃႇရေႃး သေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။-

17ၶုၼ်ႁေႃၶမ်း ၽႃႇရေႃး ၵေႃႈ၊ လၢတ်ႈတီႈ ယူဝ်းသႅပ်ႈ လႄႈဝႃႈ၊ ၼႂ်းလွင်ႈဢၼ်ၵဝ်ၼွၼ်းၽၼ်ႁၼ်ၼၼ်ႉၸမ်ႉ၊ ၵဝ်ၸုၵ်းယူႇ ၵႃႈၼိူဝ်ၽင်ႇၼမ်ႉႁွင်ႈဢေႃႈ။-

18ဝူဝ်းဢၼ်ႁၢင်ႈလီလႄႈပီးလီမၼ်းလီၸဵတ်းတူဝ်ဢွၵ်ႇသေၵႃႈၼႂ်းၼမ်ႉႁွင်ႈမႃးလႄႈ ၵိၼ်ယိူဝ်ႈယူႇဢေႃႈ။-

19ဝၢႆးသေဝူဝ်းၸိူဝ်းၼၼ်ႉယဝ်ႉ၊ ဝူဝ်းဢၼ်ဢမ်ႇမီးၼိူဝ်ႉမီးၼင်ဢမ်ႇႁၢင်ႈလီလႄႈယွမ်ႁဵဝ်ႇၼႃႇ ၸဵတ်းတူဝ်ဢွၵ်ႇမႃးဢေႃႈ။ ဝူဝ်းဢၼ် ႁၢင်ႈၸႃႉထၢၼ်ႇၼၼ်ႉၸိုင်၊ ၵႃႈၼႂ်းမိူင်း ဢေႇၵိပ်ႉတူႉ ၼႆႉ ၵူႈတီႈၵူႈလႅၼ်ၵဝ်ဢမ်ႇပႆႇယၢမ်ႈတွၼ်ႉလႆႈႁၼ်သေပွၵ်ႈ။-

20ဝူဝ်းဢၼ်ႁၢင်ႈၸႃႉလႄႈ ယွမ်ႁဵဝ်ႇၸိူဝ်းၼၼ်ႉ ၶူပ်းၵိၼ်ဝူဝ်းဢၼ်ပီးလီမၼ်းလီၸဵတ်းတူဝ်ၼၼ်ႉဢေႃႈ။-

21လိုၼ်းသေၶဝ်ႈၵႂႃႇၵႃႈၼႂ်းတွင်ႉၶဝ်ယဝ်ႉၼၼ်ႉၸိုင်၊ ၽူႈလႂ်ဢမ်ႇလႆႈႁူႉလွင်ႈဢၼ်ၶဝ်ႈၵႂႃႇၵႃႈၼႂ်းတွင်ႉၶဝ်ၼၼ်ႉ။ ယင်းႁၢင်ႈၸႃႉ ယူႇမိူၼ်ၸိူဝ်ႉၼင်ႇ ၵမ်းဢွၼ်တၢင်းၼၼ်ႉဢေႃႈ။ ၵဝ်ၵေႃႈတိုၼ်ႇမႃးသေဢေႃႈ။-

22ၵမ်းၼၼ်ႉ ၵဝ်သမ်ႉႁၼ်ၼႂ်းတၢင်းဢၼ်ၼွၼ်းၽၼ်ႁၼ်ထႅင်ႈၸမ်ႉ၊ ႁူင်းၶဝ်ႈဢၼ်မဵတ်ႉမၢၵ်ႈလႄႈလီၼႃႇၸဵတ်းႁူင်းဢွၵ်ႇပဵၼ်မႃးၵႃႈတီႈတူၼ်ႈလဵဝ်ၵူၺ်းဢေႃႈ။-

23လိုၼ်းၼၼ်ႉ ႁူင်းၶဝ်ႈဢၼ်ႁဵဝ်ႇႁႅင်ႈမဵတ်ႉလိပ်ႈလႄႈလူႉၵွပ်ႈပိူဝ်ႈလူမ်းတၢင်းဝၼ်းဢွၵ်ႇၼၼ်ႉၸဵတ်းႁူင်းဢွၵ်ႇမႃးဢေႃႈ။-

24ႁူင်းၶဝ်ႈဢၼ်မဵတ်ႉလိပ်ႈၸိူဝ်းၼၼ်ႉ ၵိၼ်ႁူင်းၶဝ်ႈဢၼ်လီၼႃႇၸဵတ်းႁူင်းၸိူဝ်းၼၼ်ႉပႅတ်ႈဢေႃႈ။ ၵဝ်မွၵ်ႇလၢတ်ႈ လွင်ႈမၼ်းတီႈၵူၼ်းမေႃပေႇတၢင်ႇတင်းလၢႆလႄႈ ၽူႈလႂ်ဢမ်ႇၽုၺ်ႇဢွၵ်ႇၼႄပျႃးဢၼၢၵ်ႈဢထိၵ်ႈပႄႇမၼ်းလႆႈ၊ ဝႃႈၼင်ႇၼႆဢေႃႈ။

25ယူဝ်းသႅပ်ႈ ၵေႃႈလဝ်ႊလၢတ်ႈတီႈၶုၼ်ႁေႃၶမ်း ၽႃႇရေႃး လႄႈဝႃႈ၊ တၢင်းဢၼ်ၶုၼ်ႁေႃၶမ်း ၽႃႇရေႃး ၼွၼ်းၽၼ်ႁၼ်ၼႆႉၸမ်ႉ၊ ပဵၼ်ပႃးလဵဝ်ၵူၺ်းတီႈၶႃႈဢေႃႈ။ ၽြႃးပဵၼ်ၸဝ်ႈၼႄပျႃးလွင်ႈတၢင်းဢၼ်မၼ်းၸဝ်ႈ တၵ်းႁဵတ်းၼၼ်ႉတီႈ ၶုၼ်ႁေႃၶမ်း ၽႃႇရေႃး တီႈၶႃႈဢေႃႈ။-

26ဝူဝ်းဢၼ်ႁၢင်ႈလီၼႃႇၸဵတ်းတူဝ်ၸိူဝ်းၼၼ်ႉ ပဵၼ်ၸဵတ်းပီႊတီႈၶႃႈဢေႃႈ။ ႁူင်းၶဝ်ႈဢၼ်ႁၢင်ႈလီၼႃႇၸဵတ်းႁူင်းၸိူဝ်းၼၼ်ႉၵေႃႈ ပဵၼ်ၸႅတ်ႈပီႊတီႈၶႃႈဢေႃႈ။ တၢင်းဢၼ်ၼွၼ်းၽၼ်ႁၼ်ၸမ်ႉ၊ ပဵၼ်ပႃးလဵဝ်ၵူၺ်းတီႈၶႃႈဢေႃႈ။-

27ဝူဝ်းဢၼ်ယွမ်ႁဵဝ်ႇလႄႈႁၢင်ႈၸႃႉၸဵတ်းတူဝ်ဢၼ်ဢွၵ်ႇမႃးလိုၼ်းၶဝ်ၸိူဝ်းၼၼ်ႉၼၼ်ႉ ပဵၼ်ၸဵတ်းပီႊတီႈၶႃႈဢေႃႈ။ ႁူင်းၶဝ်ႈလိပ်ႈဢၼ်လူႉၵွပ်ႈပိူဝ်ႈလူမ်းတၢင်းဝၼ်းဢွၵ်ႇၸဵတ်းႁူင်းၼၼ်ႉၵေႃႈ ပဵၼ်ၸဵတ်းပီႊ ဢၼ်ၶဝ်ႈတၵ်းၵႃႈမၢၵ်ႇတၵ်းပႅင်း တီႈၶႃႈဢေႃႈ။-

28လွင်ႈတၢင်းဢၼ်ၶႃႈၸဝ်ႈလႆႈလဝ်ႊလၢတ်ႈတီႈၶုၼ်ႁေႃၶမ်း ၽႃႇရေႃး လႄႈဝႃႈၼႆႉၸမ်ႉ၊ ၽြႃးပဵၼ်ၸဝ်ႈၼႄပျႃးလွင်ႈတၢင်းဢၼ်မၼ်းၸဝ်ႈတၵ်းႁဵတ်းၼၼ်ႉတီႈၶုၼ်ႁေႃၶမ်း ၽႃႇရေႃး တီႈၶႃႈဢေႃႈ။-

29ၵႃႈၼႂ်းမိူင်း ဢေႇၵိပ်ႉတူႉ ၵူႈတီႈၵူႈလႅၼ်ၼႆႉ၊ တၵ်းမီးၸဵတ်းပီႊဢၼ်ၶဝ်ႈၼမ်ႉတၢင်းၵိၼ်လိူင်ႇၼႃႇတီႈၶႃႈဢေႃႈ။-

30လိုၼ်းၼၼ်ႉ ၸဵတ်းပီႊဢၼ်ၶဝ်ႈၵႃႈမၢၵ်ႇပႅင်းၼၼ်ႉ တၵ်းပေႃႇမႃးလႄႈ ၵႃႈၼႂ်းမိူင်း ဢေႇၵိပ်ႉတူႉ ၼႆႉ တၵ်းဢွၼ်ၵၼ်လိုမ်းပႅတ်ႈတၢင်းဢၼ်ၶဝ်ႈၼမ်ႉတၢင်းၵိၼ်လိူင်ႇၼႃႇ တင်းသဵင်ႈတင်းလူင်ၼၼ်ႉသေယဝ်ႉ၊ တင်းဝၢၼ်ႈတင်းမိူင်း တၵ်းလူႉတၵ်းလႅဝ်ၵွပ်ႈပိူဝ်ႈတၢင်းဢၼ် ၶဝ်ႈၵႃႈမၢၵ်ႇပႅင်းၼၼ်ႉတီႈၶႃႈဢေႃႈ။-

31ၵွပ်ႈပိူဝ်ႈတၢင်းဢၼ်ၶဝ်ႈၵႃႈမၢၵ်ႇပႅင်းၼၼ်ႉႁႅင်းယႂ်ႇၼႃႇလႄႈ၊ လၢၵ်ႈၶၼႃႇတၢင်းဢၼ်ၶဝ်ႈၼမ်ႉတၢင်းၵိၼ်လိူင်ႇၼႃႇ မိူဝ်ႈဢွၼ်တၢင်းၼၼ်ႉ တၵ်းဢမ်ႇလႆႈထၢင်ႇလႆႈသႃး။-

32လွင်ႈဢၼ်တၢင်းဢၼ်ၼွၼ်းၽၼ်ႁၼ်ထၢပ်ႈထႅင်ႈလႄႈပဵၼ်သွင်ပွၵ်ႈတီႈ ၶုၼ်ႁေႃၶမ်း ၽႃႇရေႃး ၼၼ်ႉၸမ်ႉ၊ ၽြႃးပဵၼ်ၸဝ်ႈႁႂ်ႈလွင်ႈတၢင်းၼႆႉမၼ်ႈၶိူင်ႇလႄႈ ၽြႃးပဵၼ်ၸဝ်ႈတၵ်းၸဵဝ်းႁဵတ်းတီႈၶႃႈဢေႃႈ။-

33ပိူဝ်ႈၼႆလႄႈ ၸဝ်ႈႁဝ်းၶုၼ်ႁေႃၶမ်း ၽႃႇရေႃး တီႈၶႃႈ၊ ၶႅၼ်းတေႃႈလိူၵ်ႈၵဵပ်းဢဝ်ၵေႃႉဢၼ်မီးသတီႉလႄႈ ပျေႉၸုမ်ႇတင်းၺၢၼ်ႇ ပိင်ႇၺႃႇၼၼ်ႉသေလႄႈ ႁႂ်ႈဢုပ်ႉယူႇၵႃႈၼိူဝ်မိူင်း ဢေႇၵိပ်ႉတူႉ ၼႆႉသေၵမ်းတီႈၶႃႈ၊-

34ၸဝ်ႈႁဝ်းၶုၼ်ႁေႃၶမ်း ၽႃႇရေႃး တီႈၶႃႈ၊ ၶႅၼ်းတေႃႈႁဵတ်းၸိူဝ်ႉၼင်ႇၼၼ်လႄႈ ႁႂ်ႈၵေႃႉၼၼ်ႉ ၶၢၼ်းၶဝ်ၸိူဝ်းဢၼ်ႁဵတ်းၵႄႇႁဵတ်းႁူဝ်တင်းလၢႆဝႆႉလႄႈ ႁႂ်ႈၶဝ်ၼၼ်ႉၵဵပ်းဢဝ် ႁႃႈပုၼ်ႈပုၼ်ႈၼိုင်ႈၵႃႈတီႈမိူင်း ဢေႇၵိပ်ႉတူႉ ၼႆႉၼႂ်းၸဵတ်းပီႊ ဢၼ်ၶဝ်ႈၼမ်ႉတၢင်းၵိၼ်လိူင်ႇၼႃႇၼၼ်ႉဝႆႉသေၵမ်းတီႈၶႃႈ၊-

35ၶႅၼ်းတေႃႈႁႂ်ႈၶဝ်ၼၼ်ႉ ၸူႉသိမ်းဢဝ်တၢင်းၵိၼ်တၢင်းၶူပ်းတင်းသဵင်ႈတင်းလူင်ၼႂ်းပီႊဢၼ်လီဢၼ်ငၢမ်း ဢၼ်တၵ်းပဵၼ်မႃးၸိူဝ်းၼၼ်ႉလႄႈ ဢဝ်ၶဝ်ႈၵျုင်ႇမႃးဝႆႉ ၵႃႈၼႂ်းမိုဝ်းၸဝ်ႈႁဝ်းၶုၼ်ႁေႃၶမ်း ၽႃႇရေႃး ၵႃႈၼႂ်းဝဵင်းတင်းလၢႆသေလႄႈ ႁႂ်ႈဢွၼ်ၵၼ်ပႂ်ႉလူပႂ်ႉထိင်းယူႇသေၵမ်းတီႈၶႃႈ၊-

36မိူဝ်ႈဢၼ်ၸဵတ်းပီႊ ဢၼ်ၶဝ်ႈတၵ်းၵႃႈမၢၵ်ႇတၵ်းပႅင်းၼၼ်ႉႁွတ်ႈမႃး ၵႃႈတီႈမိူင်း ဢေႇၵိပ်ႉတူႉ ၼႆႉၼၼ်ႉၸိုင်၊ တၢင်းၵိၼ်တၢင်းၶူပ်းၼၼ်ႉ တၵ်းပဵၼ်တၢင်းဢၼ်သိမ်းပႅင်းမီးဝႆႉ ပုၼ်ႈသိုင်ႇၸိုင်ႈဝၢၼ်ႈမိူင်းၸဝ်ႈလႄႈ၊ သိုင်ႇၸိုင်ႈဝၢၼ်ႈမိူင်းၸဝ်ႈ ၸၢင်ႈတၵ်း ဢမ်ႇလႆႈလူႉလႆႈလႅဝ် ၵွပ်ႈပိူဝ်ႈတၢင်းဢၼ် ၶဝ်ႈၵႃႈမၢၵ်ႇပႅင်းၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။

37လွင်ႈတၢင်းၼၼ်ႉ ထုၵ်ႇၸႂ်ၵျိူၵ်ႈၸႂ်ၸႃႉၸဵမ်ၶုၼ်ႁေႃၶမ်း ၽႃႇရေႃး လႄႈ ၶႃႈမၼ်းၵူၼ်းမၼ်းတင်းသဵင်ႈတင်းလူင်လႄႈ၊-

38ၶုၼ်ႁေႃၶမ်း ၽႃႇရေႃး ၵေႃႈလၢတ်ႈတီႈၶႃႈမၼ်း ၵူၼ်းမၼ်းၸိူဝ်းၼၼ်ႉလႄႈဝႃႈ၊ ၵေႃႉၸိူဝ်ႉၼင်ႇၼႆဢၼ် ဝီႉၺိၺ်ႇၽြႃးပဵၼ်ၸဝ်ႈ ၵိင်းဝၢပ်ႈယူႇၼႂ်းမၼ်းၼႆႉၸိုင်၊ ႁႃလႄႈ တၵ်းထူပ်းလႆႈလူးၵွၼ်ႇႁိုဝ်။ ဝႃႈၼင်ႇၼႆဢေႃႈ။-

39ၵမ်းၼၼ်ႉ ၶုၼ်ႁေႃၶမ်း ၽႃႇရေႃး ၵေႃႈ လၢတ်ႈတီႈ ယူဝ်းသႅပ်ႈ လႄႈဝႃႈ၊ ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈ ၼႄပျႃးလွင်ႈတၢင်းတင်းသဵင်ႈတင်းလူင်ၼႆႉတီႈမႂ်းလႄႈ၊ ၵေႃႉဢၼ်မီးသတီႉပျေႉၸုမ်ႇတင်းၺၢၼ်ႇပိင်ႇၺႃႇမိူၼ်ၸိူဝ်ႉၼင်ႇမႂ်းၼႆႉဢမ်ႇမီးယဝ်ႉ။-

40မႂ်းတၵ်းလႆႈဢုပ်ႉၵႃႈၼိူဝ်ႁေႃၶမ်းၵဝ်ၼႆႉဢေႃႈ။ ၵူၼ်းဝၢၼ်ႈၵူၼ်းမိူင်းၵဝ်တင်းသဵင်ႈတင်းလူင် တၵ်းႁဵတ်းၸွမ်းသူပ်းမႂ်းၵႂၢမ်းမႂ်းဢေႃႈ။ ၵဝ်တၵ်းယႂ်ႇမျၢတ်ႈသေမႂ်းၵႃႈၼႂ်းတီႈရႃႇၸႃႉပလၢင်ႇၼၼ်ႉၵူၺ်းဢေႃႈ၊ ဝႃႈၼင်ႇၼႆဢေႃႈ။-

41ၵမ်းၼၼ်ႉ ၶုၼ်ႁေႃၶမ်းသမ်ႉလၢတ်ႈတီႈ ယူဝ်းသႅပ်ႈ ထႅင်ႈလႄႈဝႃႈ၊ တူၺ်းလူး၊ ၵဝ်ၶၢၼ်းမႂ်းဝႆႉ ၵႃႈၼိူဝ်မိူင်း ဢေႇၵိပ်ႉတူႉ တင်းသဵင်ႈတင်းလူင်ယဝ်ႉ၊ ဝႃႈၼင်ႇၼႆလႄႈ၊-

42ၶုၼ်ႁေႃၶမ်း ၽႃႇရေႃး ၼၼ်ႉ ထွတ်ႇဢဝ်မွင်းၵူၺ်းၵႃႈတီႈမိုဝ်းမၼ်းၸဝ်ႈသေလႄႈ တိုဝ်းပၼ်ၵႃႈတီႈမိုဝ်း ယူဝ်းသႅပ်ႈ ဢေႃႈ။ ဢဝ်ၶူဝ်းပိၵ်ႈၶျေႃးၼုင်ႈပၼ်မၼ်းလႄႈ ႁွႆႈၸရွႆႇၶမ်းၵႃႈတီႈၶေႃးမၼ်းသေယဝ်ႉ၊-

43ႁႂ်ႈမၼ်းၶီႇရထႃးတူႉတီႉယႃႉဢၼ်မီးတီႈမၼ်းၸဝ်ႈၼၼ်ႉဢေႃႈ။ ၶဝ်ဢွၼ်ၵၼ်ႁွင်ႉပၢဝ်ႇႁွင်ႉသေႃႇၵႃႈတီႈၽၢႆႇၼႃႈမၼ်းလႄႈဝႃႈ၊ ဢွၼ်ၵၼ်ၶုပ်ႉမူပ်ႇတႃႉ၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ မၼ်းၸဝ်ႈၶၢၼ်းမၼ်းဝႆႉ ၵႃႈၼိူဝ်မိူင်း ဢေႇၵိပ်ႉတူႉ တင်းသဵင်ႈတင်းလူင်ဢေႃႈ။-

44ၶုၼ်ႁေႃၶမ်း ၽႃႇရေႃး လၢတ်ႈတီႈ ယူဝ်းသႅပ်ႈ လႄႈဝႃႈ၊ ၵဝ်ပဵၼ်ၶုၼ်ႁေႃၶမ်း ၽႃႇရေႃး ဢေႃႈ။ ပိူဝ်ႈၼႆလႄႈ ပေႃးဢၶႂၢင်ႉမႂ်းဢမ်ႇမီးၸိုင်၊ ၵႃႈၼႂ်းမိူင်း ဢေႇၵိပ်ႉတူႉ ၵႃႈမီးတင်းသဵင်ႈတင်းလူင်ၼႆႉ၊ ၽူႈလႂ်သေဢမ်ႇဝႃႈ ဢမ်ႇလႆႈယုၵ်ႉတိၼ်ယုၵ်ႉမိုဝ်းမၼ်းၵူၺ်ႉ၊ ဝႃႈၼင်ႇၼႆဢေႃႈ။-

45ၶုၼ်ႁေႃၶမ်း ၽႃႇရေႃး တၢင်ႇၸိုဝ်ႈပၼ်သဵင်တီႈ ယူဝ်းသႅပ်ႈ လႄႈဝႃႈ၊ ၸႃႇၽၼႃႇသၽႃႇၼႃႉ ၊ ဝႃႈၼင်ႇၼႆလႄႈ ဢဝ် ဢႃႇသၼတ်ႉ ၊ လုၵ်ႈယိင်း ပေႃးတီႉၽေးရႃႉ ယိတ်ႈပရေႃးႁဵၵ်ႈဝဵင်း ဢေႃးၼႃႉ ပၼ်မၼ်းႁဵတ်းမေးဢေႃႈ။ ယူဝ်းသႅပ်ႈ ၸင်ႇဢွၵ်ႇသေလႄႈ ဢုပ်ႉထိင်း ၵႃႈၼိူဝ်မိူင်း ဢေႇၵိပ်ႉတူႉ ဢေႃႈ။-

46မိူဝ်ႈဢၼ် ယူဝ်းသႅပ်ႈ လႆႈၶဝ်ႈၸုၵ်း ၵႃႈတီႈၽၢႆႇၼႃႈ ၽႃႇရေႃး ၶုၼ်ႁေႃၶမ်း ဢေႇၵိပ်ႉတူႉ ၼၼ်ႉ၊ ဢသၢၵ်ႈမၼ်းလႆႈသၢမ်သိပ်းပီႊဢေႃႈ။ ယူဝ်းသႅပ်ႈ ၸင်ႇဢွၵ်ႇသေၵႃႈတီႈၶုၼ်ႁေႃၶမ်း ၽႃႇရေႃး လႄႇလဵပ်ႈၵႃႈၼႂ်းမိူင်း ဢေႇၵိပ်ႉတူႉ ၵူႈတီႈၵူႈလႅၼ်ဢေႃႈ။

47ၼႂ်းၸဵတ်းပီႊဢၼ်ၶဝ်ႈၼမ်ႉတၢင်းၵိၼ်လိူင်ႇၼၼ်ႉ၊ မၢၵ်ႇလိၼ်ႁူင်းလိၼ်ဢွၵ်ႇမႃးထၼ်ႈပေႃးတဵမ်ၵွပ်ႇပဵၼ်ၵမ်ဝႆႉဢေႃႈ။-

48မၼ်းဢဝ်တၢင်းၵိၼ်တၢင်းၶူပ်း ၵႃႈဢၼ်မီးၵႃႈၼႂ်းမိူင်း ဢေႇၵိပ်ႉတူႉ ၼႂ်းၸဵတ်းပီႊၼၼ်ႉၸူႉၵၼ်ၶွၼ်ႈၵၼ်လႄႈ သိမ်းဝႆႉၵႃႈၼႂ်းဝဵင်းတင်းလၢႆဢေႃႈ။ တၢင်းၵိၼ်တၢင်းၶူပ်း ဢၼ်လႆႈၵႃႈၼႂ်းတူင်ႈၼႃး ၵႃႈတီႈႁိမ်းဝဵင်းၵူႈဝဵင်းၵေႃႈ၊ မၼ်းဢဝ်သိမ်းဝႆႉၵႃႈၼႂ်းဝဵင်းလႂ်ဝဵင်းၼၼ်ႉဢေႃႈ။-

49ၶဝ်ႈၵျုင်ႇၸမ်ႉ၊ ယူဝ်းသႅပ်ႈ သိမ်းဝႆႉၼမ်ၼႃႇ မိူၼ်ၸိူဝ်ႉၼင်ႇ မဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႉတြႃႇၼၼ်ႉလႄႈ၊ ပိူဝ်ႈဢၼ်ၼမ်ၼႃႇလူင်လၢင်တေႃႇထိုင်ႁွတ်ႈထၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉလႄႈ၊ ယင်းဢမ်ႇၼပ်ႉဢမ်ႇဢၢၼ်ႇလႄႈယူႇဢေႃႈ။

50ၸူဝ်ႈဢၼ်ပီႊဢၼ်ၶဝ်ႈၵႃႈမၢၵ်ႇပႅင်းၼၼ်ႉ ဢမ်ႇပႆႇႁွတ်ႈမႃးၼၼ်ႉၸိုင်၊ ယူဝ်းသႅပ်ႈ လႆႈမီးလုၵ်ႈၸၢႆးသွင်ၵေႃႉဢၼ် ဢႃႇသၼတ်ႉ လုၵ်ႈယိင်း ပေႃးတီႉၽေးရႃႉ ယိတ်ႈပရေႃးႁဵၵ်ႈဝဵင်း ဢေႃးၼႃႉ ၼၼ်ႉ ၵိူတ်ႇလဵင်ႉမႃးတီႈမၼ်းၼၼ်ႉဢေႃႈ။-

51လုၵ်ႈတူၼ်ႈၸမ်ႉ၊ ယူဝ်းသႅပ်ႈ ႁွင်ႉႁဵၵ်ႈၸိုဝ်ႈ မၼႃႇသေႇ ဢေႃႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈႁဵတ်းႁႂ်ႈၵဝ်လူင်လိုမ်း တၢင်းဢၼ်ယၢပ်ႇဢၼ်ၽိုတ်ႇ ဢၼ်ၵဝ်လႆႈၶၢမ်ႇၼၼ်ႉ ဢိၵ်ႇတင်းၵူၼ်းႁိူၼ်းၵူၼ်းယေးပေႃႈၵဝ်တင်းသဵင်ႈတင်းလူင်ၸိူဝ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

52လုၵ်ႈၸၢႆးဢၼ်လႆႈၵမ်းလိုၼ်းၸမ်ႉ၊ မၼ်းႁွင်ႉႁဵၵ်ႈၸိုဝ်ႈ ဢေႇၽရိမ်ႇ ဢေႃႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈ ႁဵတ်းႁႂ်ႈၵဝ်ယႂ်ႇၽႄႈ ၼမ်ၵိုၼ်းမႃး ၵႃႈၼႂ်းမိူင်းဢၼ်ၵဝ်လႆႈၶၢမ်ႇတၢင်းဢၼ်ယၢၵ်ႈဢၼ်ၽၢၼ်ၼႆႉယဝ်ႉ၊ ဝႃႈၼင်ႇၼႆဢေႃႈ။

53ဝၢႆးၼၼ်ႉၸဵတ်းပီႊဢၼ်ၶဝ်ႈၼမ်ႉတၢင်းၵိၼ်လိူင်ႇၼႃႇ ဢၼ်ပဵၼ်ၵႃႈတီႈမိူင်း ဢေႇၵိပ်ႉတူႉ ၼၼ်ႉ ပူၼ်ႉၵႂႃႇသေဢေႃႈ။-

54ပီႊဢၼ်ၶဝ်ႈၵႃႈမၢၵ်ႇပႅင်းၼၼ်ႉၸႃႉႁွတ်ႈမႃးမႅၼ်ႈၸွမ်းၵႃႈၼင်ႇဢၼ် ယူဝ်းသႅပ်ႈ လၢတ်ႈဝႆႉၼၼ်ႉဢေႃႈ။ မိူဝ်ႈၼၼ်ႉ ပိၵ်ႉသမ်ႉ ၵႃႈၼႂ်းမိူင်း တင်းသဵင်ႈတင်းလူင်မီးတၢင်းဢၼ်ၶဝ်ႈၵႃႈမၢၵ်ႇပႅင်းၼၼ်ႉသေၵေႃႈ ၵႃႈတီႈမိူင်း ဢေႇၵိပ်ႉတူႉ ၼၼ်ႉ ၶဝ်ႈမုၼ်းယင်းမီးယူႇဢေႃႈ။-

55ဝၢႆးၼၼ်ႉ မိူဝ်ႈဢၼ်သိုင်ႇၸိုင်ႈဝၢၼ်ႈမိူင်း ဢေႇၵိပ်ႉတူႉ တင်းသဵင်ႈတင်းလူင် ဢိုပ်းယၢၵ်ႈတၢင်းၵိၼ်တၢင်းၶူပ်းၼႃႇလူင်လၢင်ၼၼ်ႉၸိုင်၊ ၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်ႁွင်ႉသႅၼ်ႇတီႈၶုၼ်ႁေႃၶမ်း ၽႃႇရေႃး ႁႂ်ႈလႆႈၶဝ်ႈမုၼ်းဢေႃႈ။ ၶုၼ်ႁေႃၶမ်း ၽႃႇရေႃး ၵေႃႈလၢတ်ႈတီႈၵူၼ်း ဢေႇၵိပ်ႉတူႉ တင်းသဵင်ႈတင်းလူင်ၼၼ်ႉလႄႈဝႃႈ၊ ၵႂႃႇၸူးၵႃႈတီႈ ယူဝ်းသႅပ်ႈ တႃႉ။ ဢွၼ်ၵၼ်ႁဵတ်းၸွမ်း ၵႃႈၼင်ႇဢၼ်မၼ်းၸီႇယၢင်ႇၼၼ်ႉတႃႉ၊ ဝႃႈၼင်ႇၼႆဢေႃႈ။-

56မိူဝ်ႈဢၼ်ၶဝ်ႈၵႃႈမၢၵ်ႇပႅင်းၵႃႈၼိူဝ်ၽႅၼ်ႇလိၼ် တင်းသဵင်ႈတင်းလူင်ၼၼ်ႉၸိုင်၊ ယူဝ်းသႅပ်ႈ ၽုၺ်ႇယေးၶဝ်ႈ ၵႃႈမီးတင်းသဵင်ႈတင်းလူင်လႄႈ ၶၢႆတေႃႇၵူၼ်း ဢေႇၵိပ်ႉတူႉ တင်းလၢႆဢေႃႈ။ မိူဝ်ႈၼၼ်ႉ ၵႃႈၼႂ်းမိူင်း ဢေႇၵိပ်ႉတူႉ ၼၼ်ႉ ၶဝ်ႈယင်းတိုၵ်ႉၵႃႈ မၢၵ်ႇယင်း တိုၵ်ႉပႅင်းၼႃႇလူင်လၢင်ယူႇဢေႃႈ။-

57ၵႃႈတီႈၼိူဝ်လိၼ်မိူင်းတင်းသဵင်ႈတင်းလူင်ၵေႃႈ ပိူဝ်ႈဢၼ်ၶဝ်ႈၵႃႈမၢၵ်ႇပႅင်းၼႃႇလူင်လၢင်ၼၼ်ႉလႄႈ၊ ၵူၼ်းၵူႈဝၢၼ်ႈၵူႈမိူင်းဢွၼ်ၵၼ်မႃးႁွတ်ႈမႃးၽႅဝ်ၸူး ၵႃႈတီႈ ယူဝ်းသႅပ်ႈ ၵႃႈၼႂ်းမိူင်း ဢေႇၵိပ်ႉတူႉ ႁႂ်ႈလႆႈသိုဝ်ႉဢဝ် တၢင်းၵိၼ်တၢင်းၶူပ်းဢေႃႈ။