Genesis 42

Shan

← Chapter 41 Jump to: Chapter 43 →

1ယႃႇၵုပ်ႈ ႁူႉငိၼ်းလွင်ႈဢၼ် ၶဝ်ႈၵျုင်ႇမီးၵႃႈတီႈမိူင်း ဢေႇၵိပ်ႉတူႉ ၼၼ်ႉသေယဝ်ႉ၊ လၢတ်ႈတီႈလုၵ်ႈၸၢႆးမၼ်းတင်းလၢႆလႄႈဝႃႈ၊ ႁဵတ်းသင်လႄႈ သူၵေႃႉၼိုင်ႈလႄႈၵေႃႉၼိုင်ႈတူၺ်းၵၼ်ယူႇၼင်ႇႁိုဝ်။ ဝႃႈၼင်ႇၼႆလႄႈ၊-

2သမ်ႉဝႃႈ၊ ၵဝ်လႆႈငိၼ်းလွင်ႈဢၼ် ၶဝ်ႈၵျုင်ႇမီးၵႃႈတီႈမိူင်း ဢေႇၵိပ်ႉတူႉ ပုၼ်ႉယဝ်ႉ။ လွင်ႈၼင်ႇႁိုဝ် ႁဝ်းတၵ်းဢမ်ႇလႆႈတၢႆလႄႈ ဢသၢၵ်ႈတၵ်းလိပ်းယူႇၸိုင်၊ ဢွၼ်ၵၼ်လူင်းၵႂႃႇၵႃႈတီႈမိူင်းၼၼ်ႉလႄႈ သိုဝ်ႉဢဝ်ၵႃႈတီႈၼၼ်ႈမႃးပုၼ်ႈႁဝ်းတႃႉ၊ ဝႃႈၼင်ႇၼႆလႄႈ၊-

3ပီႈဢၢႆႈ ယူဝ်းသႅပ်ႈ ၼၼ်ႉသိပ်းၵေႃႉ ဢွၼ်ၵၼ်လူင်းၵႂႃႇ ႁႂ်ႈလႆႈသိုဝ်ႉဢဝ်ၶဝ်ႈၵျုင်ႇၵႃႈတီႈမိူင်း ဢေႇၵိပ်ႉတူႉ ဢေႃႈ။-

4ပိၼ်ႇယႃႇမိၼ်ႇ ၼွင်ႉၸၢႆး ယူဝ်းသႅပ်ႈ ၼၼ်ႉၸမ်ႉ၊ ယႃႇၵုပ်ႈ ဢမ်ႇပွႆႇၸႂ်ႉၵႂႃႇလူၺ်ႈၵၼ်တင်းပီႈဢၢႆႈမၼ်းၸိူဝ်းၼၼ်ႉ။ လွင်ႈမၼ်းၸမ်ႉ မၼ်းဝႃႈ၊ ၵူဝ်ၽေးတၵ်းႁွတ်ႈထိုင်ၵႃႈၼိူဝ်မၼ်းဢေႃႈ၊ ဝႃႈၼင်ႇၼႆဢေႃႈ။

5မိူဝ်ႈၼၼ်ႉ ပိူဝ်ႈဢၼ်ၵႃႈတီႈမိူင်း ၶႃႇၼၢၼ်ႇ ၼၼ်ႉ ၶဝ်ႈၵႃႈမၢၵ်ႇပႅင်းလႄႈ၊ ၼႂ်းၶဝ်ၸိူဝ်းဢၼ်မႃးႁွတ်ႈမႃးထိုင်ၼၼ်ႉ၊ လုၵ်ႈၸၢႆး ဢီႉသရေႇလႃႉ ၸိူဝ်းၼၼ်ႉၵေႃႈ မႃးႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်းဢေႃႈ။

6ယူဝ်းသႅပ်ႈ ပဵၼ်ၵေႃႉဢၼ်ဢုပ်ႉယူႇၵႃႈၼိူဝ်မိူင်းၼၼ်ႉလႄႈ ၸီႇယၢင်ႇလွင်ႈတၢင်းဢၼ်ၶၢႆတေႃႇၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင်ဢေႃႈ။ ပီႈဢၢႆႈ ယူဝ်းသႅပ်ႈ ၸိူဝ်းၼၼ်ႉ ဢွၼ်ၵၼ်မႃးလႄႈၶုပ်ႉမူပ်ႇၵူမ်ႈၵွမ်းႁူဝ်ၵႃႈၼိူဝ်လိၼ် ၵႃႈတီႈၽၢႆႇၼႃႈမၼ်းဢေႃႈ။-

7ယူဝ်းသႅပ်ႈ ၼၼ်ႉႁၼ်ပီႈဢၢႆႈမၼ်းၸိူဝ်းၼၼ်ႉလႄႈႁူႉၸၵ်းၶဝ်ယူႇဢေႃႈ။ ၵူၺ်းၵႃႈ မၼ်းႁဵတ်းၸိူဝ်ႉၼင်ႇႁၢင်ႈ ဢမ်ႇႁူႉၸၵ်းၶဝ်လႄႈႁဵတ်းတင်းသဵင်ဢၼ်ၵျၢမ်းထၢမ်းၼႃႇလူင်လၢင်တေႃႇၶဝ်ယူႇသေလႄႈ လၢတ်ႈဝႃႈ၊ သူလုၵ်ႉသေၵႃႈတီႈလႂ်မႃး၊ ဝႃႈၼင်ႇၼႆဢေႃႈ။ ၶဝ်ၵေႃႈလဝ်ႊလၢတ်ႈလႄႈဝႃႈ၊ လုၵ်ႉသေၵႃႈတီႈမိူင်း ၶႃႇၼၢၼ်ႇ မႃး ႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

8ပိၵ်ႉသမ်ႉ ယူဝ်းသႅပ်ႈ ႁူႉၸၵ်း ပီႈဢၢႆႈမၼ်းၸိူဝ်းၼၼ်ႉသေၵေႃႈ၊ ၶဝ်ၼၼ်ႉဢမ်ႇႁူႉၸၵ်းမၼ်း။-

9ယူဝ်းသႅပ်ႈ ၶုၵ်းၸႂ်လႆႈၶႆႈၸႂ်ထူပ်း တၢင်းဢၼ်ၽၼ်ႁၼ်ဢၼ်မၼ်းၽၼ်ႁၼ် လွင်ႈၶဝ်ၸိူဝ်းၼၼ်ႉလႄႈဝႃႈ၊ သူပဵၼ်ၵူၼ်းၽၢႆႇၼႂ်းဢေႃႈ။ သူမႃးႁႂ်ႈလႆႈလူတူၺ်းတီႈဢၼ်ဢမ်ႇလူင်ႉဢမ်ႇလွတ်ႈၵႃႈတီႈမိူင်းၸဝ်ႈၼႆႉယဝ်ႉ၊ ဝႃႈၼင်ႇၼႆသေယဝ်ႉ။-

10ၶဝ်ၵေႃႈလဝ်ႊလၢတ်ႈလႄႈဝႃႈ၊ ဢမ်ႇၸႂ်ႈတီႈၶႃႈၸဝ်ႈႁဝ်း။ ၶႃႈၸဝ်ႈႁဝ်းၸိူဝ်းၼႆႉ မႃးႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်းတီႈၶႃႈဢေႃႈ။-

11ၶႃႈၸဝ်ႈႁဝ်းၸိူဝ်းၼႆႉ ပဵၼ်လုၵ်ႈၸၢႆးၵူၼ်းၵေႃႉလဵဝ်ၵူၺ်းတီႈၶႃႈဢေႃႈ။ ပဵၼ်ၵေႃႉဢၼ်သိုဝ်ႈတေႃႇတီႈၶႃႈဢေႃႈ။ ၶႃႈၸဝ်ႈႁဝ်းၸိူဝ်းၼႆႉ ဢမ်ႇၸႂ်ႈၵူၼ်းၽၢႆႇၼႂ်းတီႈၶႃႈ၊ ဝႃႈၼင်ႇၼႆဢေႃႈ။-

12မၼ်းၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ ဢမ်ႇၸႂ်ႈၵူၺ်ႉ၊ သူမႃးႁႂ်ႈလႆႈလူတူၺ်း တီႈဢၼ်ဢမ်ႇလူင်ႉဢမ်ႇလွတ်ႈ ၵႃႈတီႈမိူင်းၸဝ်ႈၼႆႉယဝ်ႉ၊ ဝႃႈၼင်ႇၼႆဢေႃႈ။-

13ၶဝ်ၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ ပဵၼ်ပီႈၼွင်ႉၵၼ်သိပ်းသွင်ၵေႃႉ တီႈၶႃႈဢေႃႈ။ ပဵၼ်လုၵ်ႈၸၢႆးၵူၼ်း ၵေႃႉလဵဝ်ၵူၺ်း ဢၼ်မီးယူႇၵႃႈတီႈမိူင်း ၶႃႇၼၢၼ်ႇ ပုၼ်ႉတီႈၶႃႈဢေႃႈ။ ၵေႃႉဢၼ်လဵၵ်ႉသေပိူၼ်ႈၸမ်ႉ၊ ၵိုတ်းသဝ်းယူႇၵႃႈတီႈပေႃႈၶႃႈၸဝ်ႈႁဝ်းၸိူဝ်းၼႆႉၼၼ်ႉတီႈၶႃႈဢေႃႈ။ ၵေႃႉၼိုင်ႈၸမ်ႉ၊ ဢမ်ႇမီးတီႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊-

14ယူဝ်းသႅပ်ႈ ၵေႃႈလၢတ်ႈတီႈၶဝ်လႄႈဝႃႈ၊ ၼႂ်းလွင်ႈဢၼ်ၵဝ်ဝႃႈ၊ သူပဵၼ်ၵူၼ်းၽၢႆႇၼႂ်း၊ ဝႃႈၼင်ႇၼႆၼၼ်ႉ၊-

15သူတၵ်းလႆႈၶၢမ်ႇတၢင်းဢၼ်ၸၢမ်းတူၺ်းၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ပေႃးၼွင်ႉၸၢႆးသူၵေႃႉလဵၵ်ႉသေပိူၼ်ႈၼၼ်ႉ ဢမ်ႇမႃးၵႃႈတီႈၼႆႈၸိုင်၊ ၵႃႈၼင်ႇဢၼ်ၶုၼ်ႁေႃၶမ်း ၽႃႇရေႃး ဢသၢၵ်ႈလိပ်းယူႇၼၼ်ႉ၊ သူဢမ်ႇလႆႈဢွၵ်ႇသေၵႃႈတီႈၼႆႈၵႂႃႇၵူၺ်ႉ။-

16လွင်ႈၼင်ႇႁိုဝ်တၵ်းလႆႈၸၢမ်းတူၺ်းလႄႈႁူႉလွင်ႈဢၼ်ၵႂၢမ်းသူၸႂ်ႈႁိုဝ် ဢမ်ႇၸႂ်ႈႁိုဝ်ၼၼ်ႉၸိုင်၊ ၵႃႈၼႂ်းသူၼႆႉ ပွႆႇၸႂ်ႉၵေႃႉၼိုင်ႈၵႂႃႇလႄႈႁႂ်ႈမၼ်းဢဝ်ၼွင်ႉၸၢႆးသူၼၼ်ႉမႃးတႃႉ။ သူၸမ်ႉ၊ တၵ်းလႆႈၶၢမ်ႇတၢင်းဢၼ်ဢဝ်ၶင်ဝႆႉၵႃႈၼႂ်းထွင်ႇဢေႃႈ။ ပေႃးဢမ်ႇၼၼ် ၵႃႈၼင်ႇဢၼ်ၶုၼ်ႁေႃၶမ်း ၽႃႇရေႃး ဢသၢၵ်ႈလိပ်းယူႇၼၼ်ႉ သူၼႆႉပဵၼ်ၵူၼ်းၽၢႆႇၼႂ်း ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆသေယဝ်ႉ၊-

17ၶျုၵ်ႈၶဝ်ၼၼ်ႉဝႆႉ သၢမ်ဝၼ်းဢေႃႈ။

18ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ ယူဝ်းသႅပ်ႈ လၢတ်ႈတီႈၶဝ်လႄႈဝႃႈ၊ ၵဝ်ၼႆႉပဵၼ်ၵေႃႉဢၼ်ၵူဝ်ၽြႃးပဵၼ်ၸဝ်ႈဢေႃႈ။ ပိူဝ်ႈၼႆလႄႈ လွင်ႈဢၼ်သူတၵ်းလႆႈႁဵတ်းႁႂ်ႈဢသၢၵ်ႈသူလႆႈ ၵတ်းယဵၼ်ၶျၢမ်းသႃႇၸမ်ႉ၊-

19ပေႃးသူပဵၼ်ၵူၼ်းဢၼ်သိုဝ်ႈတေႃႇ ဢမၢၼ်ႇၶၼ်ပဵၼ်ၸိုင်၊ ၼႂ်းသူပီႈၼွင်ႉၸိူဝ်းၼႆႉ၊ ႁႂ်ႈသေၵေႃႉသေၵူၼ်း ၶၢမ်ႇတၢင်းဢၼ်ၶျုၵ်ႈဝႆႉ ၵႃႈၼႂ်းႁိူၼ်းထွင်ႇသေယဝ်ႉ၊ သူၸမ်ႉ၊ မိူဝ်းၵႂႃႇတႃႉ။ ပိူဝ်ႈဢၼ်ၵူၼ်းႁိူၼ်းၵူၼ်းယေးသူ ဢိုပ်းတၢင်းၵိၼ်တၢင်းၶူပ်းလႄႈ၊ ဢဝ်ၶဝ်ႈၵျုင်ႇၵႂႃႇတႃႉ။-

20ပႃးဢဝ်ၼွင်ႉၸၢႆးသူၵေႃႉဢၼ်လဵၵ်ႉသေပိူၼ်ႈၼၼ်ႉမႃးတီႈၵဝ်တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၵႂၢမ်းသူတၵ်းပဵၼ်ဢၼ်ၸိုဝ်ႈဢၼ်ၸႂ်ႈဢေႃႈ။ ဢသၢၵ်ႈသူၵေႃႈ တၵ်းၵတ်းယဵၼ်ၶျၢမ်းသႃႇဢေႃႈ၊ ဝႃႈၼင်ႇၼႆလႄႈ၊ ၶဝ်ၵေႃႈဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ဝႃႈၼၼ်ႉဢေႃႈ။

21မိူဝ်ႈၼၼ်ႉၶဝ်ၼင်ႇၵၼ်ၵၼ်လၢတ်ႈၵၼ်လႄႈဝႃႈၸမ်ႉ၊ ႁဝ်းၼႆႉပဵၼ်ၵေႃႉဢၼ်ဢပႅတ်ႈယႂ်ႇၼႃႇၵႃႈတီႈဢမူႉၼွင်ႉၸၢႆးႁဝ်း ၼၼ်ႉဢေႃႈ။ မိူဝ်ႈဢၼ်မၼ်းတွင်းပၢၼ်ႇႁဝ်းၼၼ်ႉၸိုင်၊ ပိၵ်ႉသမ်ႉႁဝ်းႁၼ်တၢင်းဢၼ်ႁူဝ်ၸႂ်မၼ်းယၢပ်ႇၸႂ်ယုင်ႈၸႂ်ၼၼ်ႉယူႇသေၵေႃႈ၊ ႁဝ်းယင်းဢမ်ႇထွမ်ႇလႄႈယူႇဢေႃႈ။ ပိူဝ်ႈၼႆလႄႈ ဢမူႉၼႆႉ ႁွတ်ႈထိုင်ၵႃႈၼိူဝ်ႁဝ်းတေႃႈလဵဝ်ၼႆႉယဝ်ႉ၊ ဝႃႈၼင်ႇၼႆဢေႃႈ။-

22ရူႉပိၼ်ႇ ၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ ၵဝ်လၢတ်ႈတီႈသူလႄႈဝႃႈ၊ ယႃႇပေၽိတ်းပိူင်ႈၵေႃႉဢွၼ်ႇၼၼ်ႉ၊ ဝႃႈၼင်ႇၼႆယူႇ ဢမ်ႇၸႂ်ႈႁိုဝ်။ ပိူဝ်ႈဢၼ်သူဢမ်ႇထွမ်ႇလႄႈယူႇၼၼ်ႉလႄႈ၊ လႆႈၶၢမ်ႇတၢင်းဢၼ်ၸႅတ်ႈထၢမ်ၵွပ်ႈပိူဝ်ႈ လိူတ်ႈမၼ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

23ၶဝ်ဢမ်ႇႁူႉလွင်ႈဢၼ် ယူဝ်းသႅပ်ႈ ႁူႉၵႂၢမ်းဢၼ်ၶဝ်လၢတ်ႈဝႃႈၸိူဝ်ႉၼင်ႇၼၼ်ၼၼ်ႉ။ လွင်ႈမၼ်းၸမ်ႉ ပဵၼ်ၵွပ်ႈပိူဝ်ႈဢၼ်ၵူၼ်းပျၢၼ်ႇၵႂၢမ်းမီးဝူင်ႈၵၢင်ၶဝ်ဢေႃႈ။-

24မိူဝ်ႈၼၼ်ႉမၼ်းၽၢတ်ႇၶဝ်ၼၼ်ႉၵႂႃႇသေလႄႈ ၼမ်ႉတႃတူၵ်းယူႇဢေႃႈ။ ၵမ်းၼၼ်ႉ မၼ်းသမ်ႉမႃးလႄႈ လၢတ်ႈတေႃႇၶဝ်သေယဝ်ႉ၊ ၼုၵ်ႈဢဝ် သီႉမုၼ်ႇ ၵႃႈၼႂ်းၶဝ်လႄႈ မတ်ႉၽုၵ်ႇမၼ်းသိုဝ်ႈၼႃႈတႂ်ႈတႃၶဝ်ဢေႃႈ။

25လိုၼ်းၼၼ်ႉ ယူဝ်းသႅပ်ႈ ၸီႇယၢင်ႇႁႂ်ႈထူင်ၶဝ် လႆႈတဵမ်ဝႆႉတင်းၶဝ်ႈၵျုင်ႇလႄႈ၊ ငိုၼ်းၶဝ်ၵေႃႈလႆႈၶိုၼ်းသႂ်ႇဝႆႉ ၵႃႈၼႂ်းထူင်ၶဝ် ႁင်းၽႂ်ႁင်းမၼ်း ဢိၵ်ႇတင်းႁႂ်ႈလႆႈပၼ် ၸရိပ်ႈတၢင်းၵိၼ်ပုၼ်ႈၵၢင်တၢင်းတီႈၶဝ်ၼၼ်ႉလႄႈ ၶဝ်ဢွၼ်ၵၼ်ႁဵတ်းၸိူဝ်ႉၼင်ႇၼၼ် တီႈၶဝ်ၼၼ်ႉဢေႃႈ။

26ၶဝ်ၼၼ်ႉၵေႃႈ ဢွၼ်ၵၼ်ဢဝ်ၶဝ်ႈၵျုင်ႇတၢင်ႇသႂ်ႇၵႃႈၼိူဝ်လီႈၶဝ်တင်းလၢႆသေလႄႈ ဢွၵ်ႇၵႂႃႇဢေႃႈ။-

27မိူဝ်ႈဢၼ်ႁွတ်ႈထိုင်ၵႃႈတီႈပၢင်လိုဝ်ႈၼၼ်ႉၸိုင်၊ ၵေႃႉၼိုင်ႈၽုၺ်ႇထူင်မၼ်းႁႂ်ႈလႆႈဢဝ်တၢင်းၵိၼ်ဢွႆႇတီႈလီႈမၼ်းလႄႈ ထူပ်းႁၼ်ငိုၼ်းမၼ်းဢေႃႈ။ ငိုၼ်းမၼ်းၼၼ်ႉ မီးယူႇၵႃႈတီႈပၢၵ်ႇထူင်ဢေႃႈ။-

28မၼ်းမွၵ်ႇလၢတ်ႈတီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊ ဢဝ်ငိုၼ်းၵဝ်ၶႃႈၼၼ်ႉၶိုၼ်းသႂ်ႇဝႆႉယဝ်ႉ။ တူၺ်းလူး၊ မီးယူႇၵႃႈၼႂ်းထူင်ၵဝ်ၶႃႈၼႆႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉၸႂ်ဢူၼ်ႈၵႂႃႇသေယဝ်ႉ၊ ၵူဝ်ႁႄသၼ်ႇဝႆယူႇသေလႄႈ ၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်လႄႈဝႃႈ၊ ဢမူႉဢၼ်ၽြႃးပဵၼ်ၸဝ်ႈႁဵတ်းတီႈႁဝ်းၼႆႉၸမ်ႉ၊ ပဵၼ်ဢမူႉၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။

29ၶဝ်ၼၼ်ႉၶိုၼ်းမိူဝ်းၵႂႃႇၸူးပေႃႈၶဝ် ယႃႇၵုပ်ႈ ၵႃႈတီႈမိူင်း ၶႃႇၼၢၼ်ႇ ၼၼ်ႉလႄႈ ဢွၼ်ၵၼ်မွၵ်ႇလၢတ်ႈၵႃႈဢၼ်ပဵၼ်မႃး ၵႃႈတီႈၶဝ်တင်းသဵင်ႈတင်းလူင်ၼၼ်ႉလႄႈဝႃႈၸမ်ႉ၊-

30ၵေႃႉဢၼ်ပဵၼ်ၸဝ်ႈဢၼ်ဢုပ်ႉၵႃႈၼိူဝ်မိူင်းၼၼ်ႉ လၢတ်ႈၵႂၢမ်းဢၼ်ၵျၢမ်းၼႃႇတီႈႁဝ်းၶႃႈလႄႈ မၢတ်ႈႁဝ်းၶႃႈပဵၼ်ၸိူဝ်ႉၼင်ႇ ၵူၼ်းႁဵတ်းၽၢႆႇၼႂ်း ၵႃႈတီႈမိူင်းၼၼ်ႉၶႃႈဢေႃႈ။-

31ႁဝ်းၶႃႈၵေႃႈလဝ်ႊလၢတ်ႈတီႈမၼ်းလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ ပဵၼ်ၵေႃႉဢၼ်သိုဝ်ႈတေႃႇတီႈၶႃႈဢေႃႈ။ ဢမ်ႇၸႂ်ႈၽၢႆႇၼႂ်း တီႈၶႃႈ၊-

32ၶႃႈၸဝ်ႈႁဝ်းၸိူဝ်းၼႆႉပဵၼ်ပီႈၼွင်ႉၵၼ်သိပ်းသွင်ၵေႃႉတီႈၶႃႈဢေႃႈ။ ပဵၼ်လုၵ်ႈၸၢႆးပေႃႈၵေႃႉလဵဝ်ၵူၺ်းတီႈၶႃႈဢေႃႈ။ ၵေႃႉၼိုင်ႈၸမ်ႉ၊ ဢမ်ႇမီးတီႈၶႃႈယဝ်ႉ။ ၵေႃႉလဵၵ်ႉသေပိူၼ်ႈၸမ်ႉ၊ တေႃႈလဵဝ်ၼႆႉမီးယူႇလူၺ်ႈၵၼ်တင်းပေႃႈၶႃႈၸဝ်ႈႁဝ်းၸိူဝ်းၼႆႉ ၵႃႈတီႈမိူင်း ၶႃႇၼၢၼ်ႇ ပုၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

33ၵေႃႉဢၼ်ပဵၼ်ၸဝ်ႈဢၼ်ဢုပ်ႉၵႃႈၼိူဝ်မိူင်းၼၼ်ႉ လၢတ်ႈတီႈႁဝ်းၶႃႈလႄႈဝႃႈ၊ ၵဝ်တၵ်းႁူႉလွင်ႈဢၼ်သူပဵၼ်ၵူၼ်းဢၼ်သိုဝ်ႈတေႃႇ ဢမၢၼ်ႇၶၼ်ပဵၼ်ၼၼ်ႉလႆႈၸိူဝ်ႉၼင်ႇႁိုဝ်ၸမ်ႉ၊ ၵႃႈၼႂ်းသူပီႈၼွင်ႉၸိူဝ်းၼႆႉ ဢဝ်သေၵေႃႉသေၵူၼ်း ဝႆႉၵိုတ်းၵႃႈတီႈၵဝ်ၼႆႉတႃႉ။ ပိူဝ်ႈဢၼ်ၵူၼ်းႁိူၼ်းၵူၼ်းယေးသူဢိုပ်းတၢင်းၵိၼ်တၢင်းၶူပ်းလႄႈ သူဢဝ်တၢင်းၵိၼ်တၢင်းၶူပ်းမိူဝ်းၵႂႃႇတႃႉ။-

34ပႃးဢဝ်ၼွင်ႉၸၢႆးသူၵေႃႉဢၼ်လဵၵ်ႉသေပိူၼ်ႈၼၼ်ႉမႃးၵႃႈတီႈၵဝ်ၼႆႉတႃႉ။ ပေႃးသူႁဵတ်းၸိူဝ်ႉၼင်ႇၼၼ်ၸိုင်၊ ၵဝ်တၵ်း လႆႈႁူႉလွင်ႈဢၼ် သူဢမ်ႇၸႂ်ႈၵူၼ်းၽၢႆႇၼႂ်းလႄႈ ပဵၼ်ၵူၼ်းဢၼ်သိုဝ်ႈတေႃႇၼၼ်ႉဢေႃႈ။ ၼင်ႇၼၼ်လႄႈ ၵဝ်တၵ်းဢဝ် ပီႈၼွင်ႉသူ ၶိုၼ်းဢၢပ်ႈပၼ်တီႈသူလႄႈ သူတၵ်းလႆႈၵႃႉလႆႈၶၢႆ ၵႃႈတီႈမိူင်းၸဝ်ႈၼႆႉဢေႃႈ၊ ဝႃႈၼင်ႇၼႆၶႃႈယဝ်ႉ၊ ဝႃႈၼင်ႇၼႆဢေႃႈ။-

35ၵမ်းၼၼ်ႉ မိူဝ်ႈဢၼ်ဢဝ်ၶဝ်ႈၵျုင်ႇၵႃႈၼႂ်းထူင်ၶဝ်ၸိူဝ်းၼၼ်ႉဢွၵ်ႇၼၼ်ႉၸိုင်၊ ပူၵ်ႉငိုၼ်းၶဝ်ၼၼ်ႉမီးယူႇ ၵႃႈၼႂ်းထူင်ၶဝ် ႁင်းၽႂ်ႁင်းမၼ်းၼၼ်ႉဢေႃႈ။ ၶဝ်ဢိၵ်ႇတင်းပေႃႈၶဝ်ၼၼ်ႉ ႁၼ်ပူၵ်ႉငိုၼ်းၶဝ်ၼၼ်ႉသေယဝ်ႉ၊ ဢွၼ်ၵၼ်ၵူဝ်ႁႄလႄႈ သၼ်ႇဝႆယူႇဢေႃႈ။-

36ပေႃႈၶဝ် ယႃႇၵုပ်ႈ ၵေႃႈလၢတ်ႈတီႈၶဝ်လႄႈဝႃႈ၊ သူႁိမ်ဢဝ်လုၵ်ႈၸၢႆးၵဝ်တင်းလၢႆယဝ်ႉ။ ယူဝ်းသႅပ်ႈ ဢမ်ႇမီးယဝ်ႉ။ သီႉမုၼ်ႇ ၵေႃႈ ဢမ်ႇမီးယဝ်ႉ။ ပိၼ်ႇယႃႇမိၼ်ႇ ၵေႃႈသူတၵ်းဢဝ်ၵႂႃႇလူင်ပႄႇ။ လွင်ႈတၢင်းၸိူဝ်းၼႆႉ တင်းသဵင်ႈတင်းလူင် ပဵၼ်ဢၼ်ၶတ်းၵၼ်တင်းၵဝ်လူင်ပႄႇ၊ ဝႃႈၼင်ႇၼႆဢေႃႈ။-

37ရူႉပိၼ်ႇ ၵေႃႈလၢတ်ႈတီႈပေႃႈမၼ်းလႄႈဝႃႈ၊ ပေႃးၵဝ်ၶႃႈဢမ်ႇပႃးဢဝ် ပိၼ်ႇယႃႇမိၼ်ႇ ၶိုၼ်းမႃးၵႃႈတီႈပေႃႈႁဝ်းၼႆႉၸိုင်၊ ဢဝ်လုၵ်ႈၸၢႆးၵဝ်ၶႃႈသွင်ၵေႃႉၼၼ်ႉတၢႆပႅတ်ႈသေၵမ်း။ ၶႅၼ်းတေႃႈဢဝ်မၼ်းဢၢပ်ႈပၼ်ၵႃႈၼႂ်းမိုဝ်းၵဝ်ၶႃႈသေၵမ်း။ ၵဝ်ၶႃႈတၵ်းဢဝ်မၼ်းၶိုၼ်းမႃးၵႃႈတီႈပေႃႈႁဝ်းၶႃႈ ၶႃႈဢေႃႈ၊ ဝႃႈၼင်ႇၼႆဢေႃႈ။-

38ပေႃႈၶဝ်ၵေႃႈလၢတ်ႈလႄႈဝႃႈ၊ လုၵ်ႈၸၢႆးၵဝ်ဢမ်ႇလႆႈလူင်းၵႂႃႇလူၺ်ႈၵၼ်တင်းသူ။ ပီႈဢၢႆႈမၼ်းတၢႆယဝ်ႉ။ ယင်းၵိုတ်းၵျၢၼ်ႇဝႆႉမၼ်း ၵေႃႉလဵဝ်ၵူၺ်းဢေႃႈ။ ပေႃးၽေးႁွတ်ႈထိုင်တီႈမၼ်းၼႂ်းသဵၼ်ႈတၢင်းဢၼ်သူတၵ်းၵႂႃႇၼၼ်ႉၸိုင်၊ သူတၵ်းဢဝ်တင်းတၢင်းဢၼ်ငိၼ်းၽၢၼ်ထိုင်ၸႂ်ႁႂ်ႈၶူၼ်ႁူဝ်ႁွၵ်ႇၵဝ်ၼႆႉ လူင်းႁွတ်ႈၵႃႈတီႈမိူင်းမရၼႃႉပုၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 41 Jump to: Chapter 43 →