Hosea 1

Shan

Jump to: Chapter 2 →

1ၼုၵ်ႈၵပၢတ်ႈ ထႃႇဝရႃႉၽြႃးဢၼ်ႁွတ်ႈမႃးတီႈ ႁူဝ်းသေႇ လုၵ်ႈၸၢႆး ပေႇရီႉ ၼႂ်းၸူဝ်ႈပၢၼ် ၶုၼ် ဢူဝ်းၸီႉယႃႉ ၊ ၶုၼ် ယူဝ်းထမ်ႇ ၊ ၶုၼ် ဢႃႇၶတ်ႉ ၊ ၶုၼ် ႁေႇၸၵီႉ ၶုၼ်ႁေႃၶမ်း ယူႉတႃႉ တင်းလၢႆ ဢိၵ်ႇတင်းၼႂ်းၸူဝ်ႈပၢၼ် ယေႇရူဝ်းပုမ်ႇ ၶုၼ်ႁေႃၶမ်း ဢီႉသရေႇလႃႉ ၼၼ်ႉၸမ်ႉ၊

2မိူဝ်ႈဢၼ် ထႃႇဝရႃႉၽြႃး တႄႇၸႃႉဢဝ် ႁူဝ်းသေႇ ႁေႃးလၢတ်ႈၼၼ်ႉ၊ ထႃႇဝရႃႉၽြႃး မီးဢမိင်ႉတီႈ ႁူဝ်းသေႇ လႄႈဝႃႈ၊ မႂ်းၵႂႃႇလႄႈ ဢဝ်မႄႈမွၵ်ႇယႃႈ ဢိၵ်ႇတင်း လုၵ်ႈလၢင်းဢၼ်မႄႈမွၵ်ႇယႃႈၼၼ်ႉ ၵိူတ်ႇလဵင်ႉမႃးၸိူဝ်းၼၼ်ႉတႃႉ။ လွင်ႈမၼ်းၸမ်ႉ မိူင်းၼႆႉၸုၼ်ႉပႅတ်ႈထႃႇဝရႃႉၽြႃးသေလႄႈ ႁဵတ်းမေႇထုင်ႇ ဢၼ်ဢမ်ႇတြႃး ၶိူဝ်းၶိူဝ်းယႂ်းယႂ်း ယဝ်ႉ၊ ဝႃႈၼင်ႇၼႆဢေႃႈ။-

3မၼ်းၵႂႃႇလႄႈ သိမ်းဢဝ် ၵေႃးမႃႇ လုၵ်ႈယိင်း တီႉပလိမ်ႇ သေယဝ်ႉ၊ မၼ်းၼၼ်ႉ ပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉ လုၵ်ႈၸၢႆးမႃးတီႈမၼ်းဢေႃႈ။-

4ထႃႇဝရႃႉၽြႃး မီးဢမိင်ႉတီႈမၼ်းလႄႈဝႃႈ၊ မႂ်းႁွင်ႉႁဵၵ်ႈၸိုဝ်ႈ လုၵ်ႈၸၢႆးၼၼ်ႉ ယေႇၸရေႇလႃႉ တႃႉ။ လွင်ႈမၼ်းၸမ်ႉ ႁိုင်ၵမ်းဢွၼ်ႇၼိုင်ႈသေယဝ်ႉ၊ ၵဝ်တၵ်းပၼ်တၢမ်ႇဢပႅတ်ႈ ဢၼ်ထွၵ်ႇလိူတ်ႈ ယေႇၸရေႇလႃႉ ပႅတ်ႈၼၼ်ႉ တီႈမဵဝ်း ယေႇႁူႉ လႄႈ ႁႂ်ႈသိုင်ႇၸိုင်ႈဝၢၼ်ႈမိူင်း မဵဝ်း ဢီႉသရေႇလႃႉ သုမ်းၸွမ်းပႅတ်ႈဢေႃႈ။-

5ၼႂ်းမိုဝ်ႉဝၼ်းဢၼ် ၵဝ်တၵ်းႁၵ်းႁဵၵ်းၵၢင်ႇ ဢီႉသရေႇလႃႉ ပႅတ်ႈၵႃႈၼႂ်းၶူင်ႈႁူၺ်ႈ ယေႇၸရေႇလႃႉ ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

6မႄႈယိင်းၼၼ်ႉ သမ်ႉပႃး ပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈယိင်းမႃးဢေႃႈ။ မၼ်းၸဝ်ႈမီးဢမိင်ႉတီႈမၼ်းလႄႈဝႃႈ၊ ႁွင်ႉႁဵၵ်ႈၸိုဝ်ႈမၼ်းၼၼ်ႉ လေႃႇရူႉႁႃႇမႃႇ တႃႉ။ လွင်ႈမၼ်းၸမ်ႉ ၵမ်းလိုၼ်းၵဝ်ယင်း ဢမ်ႇဢဵတ်းလူႁၵ်ႉပႅင်းမဵဝ်း ဢီႉသရေႇလႃႉ လႄႈ တၵ်းပႄႇၶဝ်ပႅတ်ႈ ဢမၢၼ်ႇၶၼ်ပဵၼ်ဢေႃႈ။-

7မဵဝ်း ယူႉတႃႉ ၸမ်ႉ၊ ၵဝ်တၵ်းဢဵတ်းလူ ႁၵ်ႉပႅင်းလႄႈ ယင်းဢမ်ႇဢဝ်တင်းၵၢင်ႇ၊ လၢပ်ႇ၊ လၢၵ်ႈၼၢၵ်ႈ တိုၵ်းသိုၵ်း၊ မႃႉ၊ ၵူၼ်းသိုၵ်းၶီႇမႃႉ ၵႄႇသႄႇၶျွတ်ႈဢဝ်ၶဝ်လႄႈ တၵ်းဢဝ်တင်း ထႃႇဝရႃႉၽြႃး ၽြႃးပဵၼ်ၸဝ်ႈၶဝ် ၵႄႇသႄႇၶျွတ်ႈဢဝ်ၶဝ်ဢေႃႈ၊ ဝႃႈၼင်ႇၼႆဢေႃႈ။-

8မႄႈယိင်းၼၼ်ႉ ႁႂ်ႈ လေႃႇရူႉႁႃႇမႃႇ ၼၼ်ႉ ၽၢတ်ႇၼူမ်းသေယဝ်ႉ၊ သမ်ႉပႃးပတိၵ်ႉသၼ်ႇထေႇ ထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးဢေႃႈ။-

9မၼ်းၸဝ်ႈမီးဢမိင်ႉလႄႈဝႃႈ၊ ႁွင်ႉႁဵၵ်ႈၸိုဝ်ႈမၼ်းၼၼ်ႉ လေႃးဢမ်ႇမီႉ တႃႉ။ လွင်ႈမၼ်းၸမ်ႉ သူဢမ်ႇပဵၼ်ၵူၼ်းၵဝ်ယဝ်ႉ။ ၵဝ်ၵေႃႈဢမ်ႇပဵၼ် ၽြႃးပဵၼ်ၸဝ်ႈသူယဝ်ႉ။

10ၵူၺ်းၵႃႈ ၵူၼ်းမဵဝ်း ဢီႉသရေႇလႃႉ တင်းလၢႆ တၵ်းပဵၼ်ဢၼ် ၼမ်ၼႃႇလူင်လၢင် မိူၼ်ၸိူဝ်ႉၼင်ႇ မဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႉတြႃႇ ဢၼ်ဢမ်ႇတူင်တူၺ်းလႆႈ၊ ဢမ်ႇၼပ်ႉဢၢၼ်ႇလႆႈၼၼ်ႉဢေႃႈ။ ၼႂ်းတီႈဢၼ်လၢတ်ႈတီႈၶဝ်လႄႈဝႃႈ၊ သူဢမ်ႇပဵၼ်ၵူၼ်းၵဝ်ယဝ်ႉ၊ ဝႃႈၼင်ႇၼႆၼၼ်ႉ တၵ်းလႆႈလၢတ်ႈတီႈ ၶဝ်လႄႈဝႃႈ၊ သူပဵၼ်လုၵ်ႈၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇ ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

11မိူဝ်ႈၼၼ်ႉ ၵူၼ်းမဵဝ်း ယူႉတႃႉ ဢိၵ်ႇတင်း ၵူၼ်းမဵဝ်း ဢီႉသရေႇလႃႉ တင်းလၢႆ တၵ်းၸူႉၵၼ်တုမ်ၵၼ်သေလႄႈ ဢွၼ်ၵၼ်ယုၵ်ႉယွင်ႈ ၶုၼ်ပႃးလဵဝ်ၵူၺ်းပုၼ်ႈၶဝ်လႄႈ ဢွၵ်ႇသေၵႃႈၼႂ်းမိူင်းၼၼ်ႉ မႃးဢေႃႈ။ မိုဝ်ႉဝၼ်း ယေႇၸရေႇလႃႉ ၼၼ်ႉ တၵ်းလႆႈပဵၼ်မိုဝ်ႉဝၼ်းဢၼ် ယႂ်ႇမျၢတ်ႈၼႃႇဢေႃႈ၊ ဝႃႈၼင်ႇၼႆဢေႃႈ။

Jump to: Chapter 2 →