Hosea 3

Shan

← Chapter 2 Jump to: Chapter 4 →

1ထႃႇဝရႃႉၽြႃး သမ်ႉမီးဢမိင်ႉ တီႈၵဝ်လႄႈဝႃႈ၊ မႂ်းၵႂႃႇလႄႈ ႁၵ်ႉပႅင်းမႄႈယိင်း ဢၼ်လႆႈၶၢမ်ႇတၢင်းဢၼ် ၵေႃႉသေႈမၼ်း ႁၵ်ႉပႅင်းယူႇလႄႈ ပဵၼ်မႄႈမွၵ်ႇယႃႈၼၼ်ႉ မိူၼ်ၸိူဝ်ႉၼင်ႇ ဢၼ်ထႃႇဝရႃႉၽြႃး ႁၵ်ႉပႅင်းၵူၼ်းမဵဝ်း ဢီႉသရေႇလႃႉ တင်းလၢႆ ယူႇသေၵေႃႈ ၶဝ်ဢွၼ်ၵၼ် မုင်ႈတူၺ်းႁႅၼ်တူၺ်း ၽြႃးတၢင်ႇသူႇ တၢင်ႇပႃးလႄႈ မီးဢလူဝ်ႇၶႂ်ႈလႆႈ ၽႅၼ်ႇပႅၼ်ႈမၢၵ်ႇၸပိတ်ႈ ၼၼ်ႉ ထႅင်ႈလူးၵွၼ်ႇတႃႉ၊ ဝႃႈၼင်ႇၼႆလႄႈ၊-

2ၵဝ်ဢဝ်ငိုၼ်း ၶၼ်ႁႃႈၵျၢပ်ႈ၊ ၶဝ်ႈသၢၼ်မူႉယေႃး ဢေႃးမႄး ၼိုင်ႈပၢႆၶိုင်ႈ ထုတ်ႇဢဝ်မၼ်းဝႆႉပုၼ်ႈၵဝ်သေလႄႈ-

3လၢတ်ႈတီႈမၼ်းလႄႈဝႃႈ၊ မႂ်းတၵ်းလႆႈပႂ်ႉ ပုၼ်ႈၵဝ် မိုဝ်ႉဝၼ်းၼမ်ၼႃႇလူင်လၢင်လႄႈ ယူႇဢေႃႈ။ မႂ်းဢမ်ႇလႆႈႁဵတ်း မႄႈမွၵ်ႇယႃႈ။ မႂ်းဢမ်ႇလႆႈယူႇ ႁူမ်ႈလူၺ်ႈၵၼ်တင်းၽူႈၸၢႆး တၢင်ႇၵေႃႉတၢင်ႇၵူၼ်း။ ပေႃးႁဵတ်း ၸိူဝ်ႉၼင်ႇၼၼ်ၸိုင် ၵဝ်တၵ်းပႂ်ႉပုၼ်ႈမႂ်းလႄႈ ယူႇဢေႃႈ။-

4လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ယင်းဢမ်ႇမီး ၶုၼ်ႁေႃၶမ်း၊ ဢမ်ႇမီးၵႂၢၼ်၊ ဢမ်ႇမီးတၢင်းဢၼ် ပုၵ်ႈၸေႃႇယိတ်ႈ၊ ဢမ်ႇမီးသဝ်တီႈၵူဝ်းၵႂၢႆႇ၊ ဢမ်ႇမီးသိူဝ်ႈသုပ်း၊ ဢမ်ႇမီးရုၵ်ႈထူႉ တေႇရပ်ႉ လႄႈ တၵ်းလႆႈယူႇမိုဝ်ႉဝၼ်းၼမ်ၼႃႇ လူင်လၢင်ဢေႃႈ။-

5လိုၼ်းၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ တၵ်းဢွၼ်ၵၼ်ၶိုၼ်းမႃးလႄႈ ႁႃဢဝ်ထႃႇဝရႃႉၽြႃး ၽြႃးပဵၼ်ၸဝ်ႈၶဝ် ဢိၵ်ႇတင်း ၶုၼ်ႁေႃၶမ်းၶဝ် တႃႇဝိတ်ႈ ၼၼ်ႉလႄႈ သၼ်ႇသၼ်ႇသၢႆသၢႆ ယူႇသေလႄႈ သုတ်ႉၸပ်းသုတ်ႉၸူး ၵႃႈတီႈထႃႇဝရႃႉၽြႃး ဢိၵ်ႇတင်းတီႈၵျေးၸူး မၼ်းၸဝ်ႈ ၼႂ်းမိုဝ်ႉဝၼ်းလိုၼ်း ၼၼ်ႉဢေႃႈ။

← Chapter 2 Jump to: Chapter 4 →