Hosea 5

Shan

← Chapter 4 Jump to: Chapter 6 →

1ယိတ်ႈပရေႃးႁဵၵ်ႈၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ ၵူၼ်းမဵဝ်း ဢီႉသရေႇလႃႉ ၶဝ်ဢိူၺ်း၊ ဢွၼ်ၵၼ်ထွမ်ႇဢဝ်တႃႉ။ ၵူၼ်းၼႂ်းႁေႃၶမ်းၶဝ်ဢိူၺ်း၊ ဢွၼ်ၵၼ်ႁေႈႁူသူၸူးတႃႉ၊ သူတၵ်းလႆႈၶၢမ်ႇ တၢင်းဢၼ်ၸႅတ်ႈထၢမ် ၸီႇယၢင်ႇဢေႃႈ။ လွင်ႈမၼ်းၸမ်ႉ သူပဵၼ်တူင်ႇႁႅဝ်ႉၵႃႈၼိူဝ်လွႆ မီႉၸပႃႇ ၊ တူင်ႇၶိုမ်းဢၼ်ၵၢင်ဝႆႉ ၵႃႈၼိူဝ်လွႆ တႃႇပေႃႇ ယဝ်ႉ။-

2ၶဝ်ၸိူဝ်းဢၼ် ၽွၵ်ႈပျၢၼ်ႇၶိုၼ်းၼၼ်ႉ ဢဝ်တူဝ်ယိတ်ႈတၢႆ ၼမ်ၼႃႇလူင်လၢင်ဢေႃႈ။ ပိူဝ်ႈၼႆလႄႈ ၵဝ်တၵ်းပၼ်တၢမ်ႇဢပႅတ်ႈ တီႈၶဝ်တင်းသဵင်ႈတင်းလူင် ဢေႃႈ။-

3ၵဝ်ႁူႉ ဢေႇၽရိမ်ႇ ယူႇဢေႃႈ။ ဢီႉသရေႇလႃႉ ၵေႃႈ ဢမ်ႇမီးတၢင်းဢၼ် တဵတ်ႇမႅပ်ႉသေၵႃႈတီႈ ၽၢႆႇၼႃႈၵဝ်လႆႈ။ တေႃႈလဵဝ်ၼႆႉ ဢေႇၽရိမ်ႇ ဢိူၺ်း၊ မႂ်းႁဵတ်းမေႇထုင်ႇဢၼ်ဢမ်ႇတြႃးလႄႈ ႁႂ်ႈ ဢီႉသရေႇလႃႉ ၼၼ်ႉ မီးတၢင်းဢၼ်ၵူဝ်ႈၵိူၵ်ႇဢေႃႈ။

4ၶဝ်ဢမ်ႇမႄးၸီႇယၢင်ႇ လွင်ႈတၢင်းဢၼ်ၶဝ် ႁဵတ်းဝႆႉၸိူဝ်းၼၼ်ႉ ႁႂ်ႈၶဝ်လႆႈၶိုၼ်းမႃးၵႃႈတီႈ ၽြႃးပဵၼ်ၸဝ်ႈၶဝ်။ ၶဝ်ၸပ်းၸွႆးလူၺ်ႈၸႂ်သၽေႃး ဢၼ်ႁဵတ်းမေႇထုင်ႇ ဢၼ်ဢမ်ႇတြႃးၼၼ်ႉယူႇလႄႈ ဢမ်ႇႁူႉၸၵ်းထႃႇဝရႃႉၽြႃး။-

5မႃႇၼႃႉၸႂ်သုင်မဵဝ်း ဢီႉသရေႇလႃႉ ၶၢမ်ႇသၢၵ်ႈသေႇသိုဝ်ႈၼႃႈတႂ်ႈတႃမၼ်းဢေႃႈ။ ပိူဝ်ႈၼႆလႄႈ ဢီႉသရေႇလႃႉ ဢိၵ်ႇတင်း ဢေႇၽရိမ်ႇ တၵ်းလူမ်ႉတူၵ်း ၵႃႈၼႂ်းဢပႅတ်ႈၶဝ်လႄႈ မဵဝ်း ယူႉတႃႉ ၵေႃႈ တၵ်းလူမ်ႉတူၵ်း လူၺ်ႈၵၼ်တင်းၶဝ်ၼၼ်ႉဢေႃႈ။-

6ပိၵ်ႉသမ်ႉၶဝ်ပႃးဢဝ်ၽုင်သူဝ်း ၽုင်ဝူဝ်းၶဝ်သေလႄႈ ၵႂႃႇႁႂ်ႈလႆႈႁႃဢဝ် ထႃႇဝရႃႉၽြႃးသေၵေႃႈ၊ ဢမ်ႇလႆႈထူပ်းလႆႈ ႁၼ်မၼ်းၸဝ်ႈ။ မၼ်းၸဝ်ႈၽၢတ်ႇၵၼ် ပႅတ်ႈၵၼ်တင်းၶဝ်ယဝ်ႉ။-

7ၶဝ်ယႃႉသဵတ်ႈၸႃႇ ဢၼ်ၶၢမ်ႇဢဝ်တီႈထႃႇဝရႃႉၽြႃးၼၼ်ႉ ပႅတ်ႈယဝ်ႉ။ လွင်ႈမၼ်းၸမ်ႉ ၶဝ်ၵိူတ်ႇလဵင်ႉ ၵူၼ်းတၢင်ႇၸိူဝ်ႉတၢင်ႇၶိူဝ်း မႃးယဝ်ႉ။ ဢဝ်မိူဝ်ႈလဵဝ်ၼႆႉ ၵႂႃႇလိူၼ်ၼိုင်ႈ တၵ်းၵိၼ်ၶဝ် ဢိၵ်ႇတင်းဢုၵ်ႉၸႃႇၶဝ်ပႅတ်ႈဢေႃႈ။

8ဢွၼ်ၵၼ်ပဝ်ႇၼႄး ၵႃႈၼႂ်းဝဵင်း ၵီႉပႃႉ ဢိၵ်ႇတင်းၶရႃႇ ၵႃႈၼႂ်းဝဵင်း ရႃႇမႃႉ လႄႈ ဢွၼ်ၵၼ်သႅၼ်ႇႁွင်ႉ ၵႃႈၼႂ်းဝဵင်း ပေႇသဝႅၼ်ႇ တႃႉ။ မဵဝ်း ပိၼ်ႇယႃႇမိၼ်ႇ ဢိူၺ်း၊ တူၺ်းၶိုၼ်းၽၢႆႇတၢင်းလင်မႂ်းတႃႉ။-

9ၼႂ်းၶိင်ႇမိုဝ်ႉဝၼ်းဢၼ်သင်ႇသွၼ်သုင်းမႃႉပၼ်သတီႉၼၼ်ႉ ဢေႇၽရိမ်ႇ တၵ်းလႆႈလူႉလႅဝ်ဢေႃႈ။ ၵဝ်ဢဝ်လွင်ႈတၢင်းဢၼ် တၵ်းပဵၼ်မႃးဢမၢၼ်ႇၶၼ်ပဵၼ်ၼၼ်ႉ ၽုၺ်ႇဢွၵ်ႇၼႄပျႃးၵႃႈၼႂ်းမဵဝ်း ဢီႉသရေႇလႃႉ တင်းလၢႆဢေႃႈ။-

10ၶုၼ် ယူႉတႃႉ တင်းလၢႆ ပဵၼ်ၸိူဝ်ႉၼင်ႇၵေႃႉဢၼ် ၶၢႆႉသဝ်ၶၢႆႉလၵ်းဢၼ်မၢတ်ႈမၢႆလိၼ်ဝႆႉၼၼ်ႉဢေႃႈ။ ၵဝ်တၵ်းဢဝ် တၢင်းၸႂ်မႆႈၶႆႈၸႃႉၵဝ် သွၼ်းလေႃႇၵႃႈၼိူဝ်ၶဝ် မိူၼ်ၸိူဝ်ႉၼင်ႇ ၼမ်ႉၼၼ်ႉဢေႃႈ။-

11ဢေႇၽရိမ်ႇ ၼၼ်ႉ လႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသႄးလႄႈ လႆႈထူပ်းတၢင်းဢၼ် ၸီႇယၢင်ႇတြႃးသေလႄႈ သုမ်းၸွမ်းဢေႃႈ။ လွင်ႈမၼ်းၸမ်ႉ မၼ်းမီးဢလူဝ်ႇၶႂ်ႈၵမ်ၵျၢင်ႉၸွမ်းၵႃႈၼင်ႇဢၼ် ဢမိင်ႉမီးၼၼ်ႉယဝ်ႉ။-

12ပိူဝ်ႈၼႆလႄႈ ၵဝ်တၵ်းပဵၼ်ၸိူဝ်ႉၼင်ႇ တူဝ်မူင်ႈဢၼ်ၸၢင်ႈၶူပ်းၼၼ်ႉ တီႈ ဢေႇၽရိမ်ႇ ဢိၵ်ႇတင်း ၸိူဝ်ႉၼင်ႇတၢင်းဢၼ်တူႇ ဢၼ်ၼဝ်ႈၼၼ်ႉ တီႈမဵဝ်း ယူႉတႃႉ ဢေႃႈ။-

13မိူဝ်ႈဢၼ် ဢေႇၽရိမ်ႇ ႁၼ်တၢင်းၶႆႈတၢင်းပဵၼ်မၼ်း၊ မိူဝ်ႈဢၼ် ယူႉတႃႉ ႁၼ်တၢင်းၸဵပ်း တၢင်းသႅပ်ႇမၼ်း ၼၼ်ႉၸိုင်၊ ပိၵ်ႉသမ်ႉ ဢေႇၽရိမ်ႇ ၵႂႃႇၵႃႈတီႈၶုၼ် ဢႃႇသူႉရီႉ လႄႈ ပွႆႇၸႂ်ႉၵႂႃႇၵႃႈတီႈ ၶုၼ်ႁေႃၶမ်း ဢၼ်ၸၢင်ႈတွပ်ႇၸၢင်ႈထဵင် ၼၼ်ႉသေၵေႃႈ ၶုၼ်ၼၼ်ႉ ဢမ်ႇႁႂ်ႈတၢင်းၶႆႈ တၢင်းပဵၼ်သူ ၶႅၼ်းမႃးလႆႈ။ တၢင်းၸဵပ်းတၢင်းသႅပ်ႇသူၵေႃႈ ဢမ်ႇႁႂ်ႈႁၢႆလႆႈ။-

14လွင်ႈမၼ်းၸမ်ႉ ၵဝ်တၵ်းပဵၼ်ၸိူဝ်ႉၼင်ႇ သၢင်ႇသီႈၼၼ်ႉ တီႈ ဢေႇၽရိမ်ႇ ဢိၵ်ႇတင်းၸိူဝ်ႉၼင်ႇ သၢင်ႇသီႈၼုမ်ႇၼၼ်ႉ တီႈမဵဝ်း ယူႉတႃႉ ဢေႃႈ။ ၵဝ်ၼႆႉယဝ်ႉ ၵဝ်ၼႆႉယဝ်ႉ တၵ်းၶူပ်းၶၢတ်ႇသေလႄႈ ဢွၵ်ႇၵႂႃႇဢေႃႈ။ ၵဝ်တၵ်းၵၢပ်ႈဢဝ်ၵႂႃႇလႄႈ ၽူႈလႂ်ဢမ်ႇၼုၵ်ႈဢမ်ႇထွၼ်ဢဝ်လႆႈ။-

15ၵဝ်တၵ်းၵႂႃႇလႄႈ ၶိုၼ်းမိူဝ်းၸူး ၵႃႈတီႈဢၼ်ၵဝ်ယူႇၼၼ်ႉ တေႃႇထိုင်ႁွတ်ႈၶဝ်လႆႈၶၢမ်ႇတၢမ်ႇဢပႅတ်ႈၶဝ်သေလႄႈ ႁႃဢဝ်ၼႃႈၵဝ်ၼၼ်ႉဢေႃႈ။ မိူဝ်ႈဢၼ်ၶဝ်ထူပ်းၽေးၼၼ်ႉၸိုင်၊ ၶဝ်တၵ်းႁိပ်ႈၼႅတ်ႈႁႃဢဝ်ၵဝ်ဢေႃႈ။

← Chapter 4 Jump to: Chapter 6 →