Hosea 13

Shan

← Chapter 12 Jump to: Chapter 14 →

1မိူဝ်ႈဢၼ် ဢေႇၽရိမ်ႇ ဢွၵ်ႇသူပ်းဝႃႈ ၼၼ်ႉၸိုင်၊ ပိူၼ်ႈၸၢင်ႈတူၵ်းၸႂ် ၵူဝ်ႁႄလႄႈ မၼ်းၼၼ်ႉ ပဵၼ်ဢၼ်ယႂ်ႇသုင်ၼႃႇ ၵႃႈၼႂ်းမဵဝ်း ဢီႉသရေႇလႃႉ ဢေႃႈ။ လိုၼ်းၼၼ်ႉ မၼ်းၽိတ်းပိူင်ႈလူၺ်ႈၽြႃး ပႃႇလႃႉ သေလႄႈ တၢႆဢေႃႈ။-

2တေႃႈလဵဝ်ၼႆႉၸိုင်၊ ၶဝ်ၽိတ်းပိူင်ႈယူႇ ၶိူဝ်းၶိူဝ်းယႂ်းယႂ်းလႄႈ ဢဝ်ငိုၼ်းၶဝ်ႁဵတ်း ရုၵ်ႈထူႉဢၼ်သွၼ်းလေႃႇ၊ ဢၼ်ဝႃႈ ၵႃႈပဵၼ်ရုၵ်ႈထူႉသၢင်းထူႉ ဢၼ်ႁဵတ်းၸွမ်း ၺၢၼ်ႇပိင်ႇၺႃႇၶဝ်လႄႈ ပဵၼ်လွင်ႈတၢင်းဢၼ် သြႃႇသမႃး ၸၢင်ႈႁဵတ်းၼၼ်ႉ ပုၼ်ႈၶဝ်ဢေႃႈ။ ၶဝ်ၸိူဝ်းဢၼ် ပုၵ်ႈၸေႃႇယိတ်ႈၼၼ်ႉ ၸၢင်ႈလၢတ်ႈ လူၺ်ႈလွင်ႈၼၼ်ႉလႄႈဝႃႈ၊ ႁႂ်ႈၼူမ်ဝူဝ်းဢွၼ်ႇ ၸိူဝ်းၼၼ်ႉသေ၊ ဝႃႈၼင်ႇၼႆဢေႃႈ။-

3ပိူဝ်ႈၼႆလႄႈ ၶဝ်ၼၼ်ႉ တၵ်းလႆႈပဵၼ်မိူၼ်ၸိူဝ်ႉၼင်ႇ မွၵ်ႇၵုမ်ႈၶိင်ႇၵၢင်ၼႂ်ၼၼ်ႉ ဢိၵ်ႇတင်း ၸိူဝ်ႉၼင်ႇၼမ်ႉၼၢႆး ဢၼ်ၸၢင်ႈလပ်ႉႁၢႆၵႂႃႇၸဝ်ႉၸဝ်ႉၼၼ်ႉ တင်းၸိူဝ်ႉၼင်ႇၵႅပ်ႇ ဢၼ်လူမ်းၽိဝ်ႇႁုင် ပတ်ႉထူဝ်းဢွၵ်ႇသေ ၵႃႈတီႈ တလၢင်းယဵပ်ႇၶဝ်ႈၼၼ်ႉ တင်းၸိူဝ်ႉၼင်ႇ ၵႂၼ်းၽႆး ဢၼ်ဢွၵ်ႇသေၵႃႈၼႂ်း မုၵ်ႉၽႆးၼၼ်ႉဢေႃႈ။-

4ၼႂ်းဝႃႈၼၼ်သေၵေႃႈ ၵဝ်ထႃႇဝရႃႉၽြႃးၼႆႉ ပဵၼ်ၽြႃးပဵၼ်ၸဝ်ႈမႂ်း ဢၼ်ၼုၵ်ႈဢဝ်မႂ်း ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉဢေႃႈ။ ၼွၵ်ႈသေၵဝ်ၼႆႉ၊ မႂ်းဢမ်ႇႁူႉၽြႃး တၢင်ႇသူႇတၢင်ႇပႃးယဝ်ႉ။ ၼွၵ်ႈသေၵဝ်ၼႆႉ ဢမ်ႇမီးၸဝ်ႈဢၼ် ၵႄႇသႄႇၶျွတ်ႈဢဝ်လႆႈ။-

5ၵဝ်ႁူႉမႂ်းၵႃႈၼႂ်းထိူၼ်ႇ ဢၼ်ဝႃႈ တီႈဢၼ်ႁႅင်ႈႁွင် ၼႃႇလူင်လၢင်ၼၼ်ႉယဝ်ႉ။-

6ၸွမ်းၵႃႈၼင်ႇဢၼ် ၵဝ်လဵင်ႉပၼ် တၢင်းၵိၼ်တၢင်းၶူပ်းၼၼ်ႉ သေလႄႈ ၶဝ်လႆႈၵိၼ်ဢိမ်ႇၵိၼ်တဵမ် ဢေႃႈ။ မိူဝ်ႈဢၼ်ၶဝ်ဢိမ်ႇတဵမ်ယဝ်ႉ ၼၼ်ႉၸိုင် ၶဝ်မီးၸႂ်ဢၼ်ဢုပ်ႇဢၢတ်ႇလႄႈ လူင်လိုမ်းၵဝ်ဢေႃႈ။-

7ပိူဝ်ႈၼႆလႄႈ ၵဝ်ပဵၼ်ၸိူဝ်ႉၼင်ႇ သၢင်ႇသီႈၼၼ်ႉ တီႈၶဝ်ဢေႃႈ။ ၵဝ်လွမ်လူ လွမ်တူၺ်းၶဝ်ယူႇ ၵႃႈတီႈႁိမ်းတၢင်း မိူၼ်ၸိူဝ်ႉၼင်ႇ သိူဝ်ၸုမ်ႈၼၼ်ႉဢေႃႈ။-

8ၵဝ်ႁႄႉႁပ်ႉဢဝ်ၶဝ် မိူၼ်ၸိူဝ်ႉၼင်ႇမီမႄႈ ဢၼ်လုၵ်ႈလၢင်းမၼ်းႁၢႆၵႂႃႇၼၼ်ႉလႄႈ သိၵ်ႇယႃႉၽၢင်ႉၽၢပ်ႇ ဢၼ်ႁူမ်ႇသုမ်ႇႁူဝ်ၸႂ်ၶဝ်ၼၼ်ႉပႅတ်ႈဢေႃႈ။ ၵဝ်ၶူပ်းၵိၼ်ၶဝ်ၵႃႈတီႈၼၼ်ႈ မိူၼ်ၸိူဝ်ႉၼင်ႇသၢင်ႇသီႈမႄႈၼၼ်ႉလႄႈ တူဝ်ထိူၼ်ႇႁၢႆႉၶူပ်းယႃႉၶဝ်ၶၢတ်ႇပႅတ်ႈဢေႃႈ။-

9ဢီႉသရေႇလႃႉ ဢိူၺ်း၊ မႂ်းယႃႉတူဝ်မႂ်းပႅတ်ႈယဝ်ႉ။ ၵူၺ်းၵႃႈ တၢင်းဢၼ်ၸွႆႈထႅမ်မႃႉၸႃႉမႂ်း မီးၵႃႈတီႈၵဝ် ဢမၢၼ်ႇၶၼ်ပဵၼ်ဢေႃႈ။-

10ၶုၼ်ႁေႃၶမ်းမႂ်းၼၼ်ႉ မီးၵႃႈလႂ်။ ႁႂ်ႈမၼ်းၵႄႇသႄႇၶျွတ်ႈဢဝ်မႂ်း ၵႃႈတီႈဝဵင်းတီႈယူႇမႂ်း ၵႃႈမီးၼၼ်ႉသေၵမ်းလူၺ်ႈ။ ၵူၼ်းဢၼ်ၸီႇယၢင်ႇတြႃးမႂ်း ဢၼ်မႂ်းဢဝ်လွင်ႈၶဝ်ယွၼ်းဢဝ်လႄႈဝႃႈ၊ ၶႅၼ်းတေႃႈပၼ်ၶုၼ်ႁေႃၶမ်း ဢိၵ်ႇတင်းၶုၼ်တင်းလၢႆ တီႈၶႃႈၸဝ်ႈသေၵမ်းၶႃႈ၊ ဝႃႈၼင်ႇၼႆၼၼ်ႉၸိူဝ်းၼၼ်ႉ မီးၵႃႈလႂ်။-

11ၵဝ်ၸႂ်မႆႈၶႆႈၸႃႉသေလႄႈ ပၼ်ၶုၼ်ႁေႃၶမ်းယဝ်ႉ။ ၵမ်းလိုၼ်းၵဝ်ၸႂ်မႆႈၶႆႈၸႃႉၼႃႇလူင်လၢင်သေလႄႈ ပႄႇမၼ်းၼၼ်ႉပႅတ်ႈယဝ်ႉ။-

12တူႉၸရိူၵ်ႈဢၼ် ဢေႇၽရိမ်ႇ ႁဵတ်းၼၼ်ႉ မီးတၢင်းဢၼ်ပူၵ်ႉႁေႃႇဝႆႉလႄႈ ဢပႅတ်ႈမၼ်းၼၼ်ႉ မီးတၢင်းဢၼ်သိမ်းသိူင်ႇဝႆႉယဝ်ႉ။-

13ဝူၺ်ႇတၼႃႇတၢင်းဢၼ်မႄႈယိင်းၵိူတ်ႇလဵင်ႉလုၵ်ႈၼၼ်ႉ တၵ်းႁွတ်ႈထိုင်ၵႃႈၼိူဝ်မၼ်းလႄႈ မၼ်းပဵၼ်လုၵ်ႈၸၢႆးဢၼ်မိူၵ်ႈလပ်းသိင်ႇဢေႃႈ။ ပဵၼ်ၶိင်ႇမိူဝ်ႈဢၼ် မၼ်းဢမ်ႇလီယူႇၵႃႈၼႂ်းပၢၵ်ႇတွင်ႉဢၼ် ၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉ ယူႇႁိုင်ၼႃႇလူင်လၢင်လူင်ပႄႇ။

14ၵဝ်တၵ်းၵႄႇသႄႇဢဝ်ၶဝ်လွတ်ႈသေၵႃႈၼႂ်းတၼ်းၶူဝ်းမိူင်းမရၼႃႉလႄႈ ထုတ်ႇဢဝ်ၶဝ်ဢွၵ်ႇသေၵႃႈၼႂ်းမိုဝ်းၶုၼ်တၢႆဢေႃႈ။ ၶုၼ်တၢႆဢိူၺ်း၊ ၽေးရၢၼ်ႇမႂ်းၼၼ်ႉ မီးၵႃႈလႂ်။ မိူင်းမရၼႃႉဢိူၺ်း၊ တၢင်းဢၼ်မႂ်းယႃႉပႅတ်ႈၼၼ်ႉ မီးၵႃႈလႂ်။ တၢင်းဢၼ်ၶုၵ်းၸႂ်လႆႈမႆႈၸႂ်လူၺ်ႈၼၼ်ႉ တၵ်းလပ်ႉႁၢႆၵႂႃႇသေၵႃႈတီႈမၢၵ်ႇတႃၵဝ်ဢေႃႈ။-

15ပိၵ်ႉသမ်ႉမၼ်းမၢၵ်ႇ မၢၵ်ႇဢၼ်ၼမ်ၼႃႇ ၼႂ်းပီႈၼႂ်းၼွင်ႉမၼ်းၸိူဝ်းၼၼ်ႉသေၵေႃႈ၊ လူမ်းတၢင်းဢွၵ်ႇတၵ်းမႃးဢေႃႈ။ လူမ်းထႃႇဝရႃႉၽြႃး တၵ်းလုၵ်ႉသေၵႃႈတီႈထိူၼ်ႇမႃးလႄႈ ႁႂ်ႈၼမ်ႉဢွၵ်ႇႁူးမၼ်းယူတ်းႁႅင်ႈၵႂႃႇသေလႄႈ ၼမ်ႉဢၼ်ၸိုမ်းဢွၵ်ႇမၼ်း ထၢတ်ႇၵႂႃႇဢေႃႈ။ ရၢၼ်ႇသူႇတၵ်းႁိမ်ႁူင်ႇဢဝ် ၶိူင်ႈပိူင်ဢၼ်လီဢၼ်မျၢတ်ႈ ၵႃႈဢၼ်မီးၵႃႈတီႈတိူၵ်ႈၽၼ်ႇတႃႇၸိူဝ်းၼၼ်ႉဢေႃႈ။-

16ဝဵင်း သမႃႇရီႉ ၼၼ်ႉ တၵ်းလူႉလႅဝ် ၵွပ်ႈပိူဝ်ႈဢၼ်မၼ်းပုင်ႇၵၢၼ်ႇၽြႃးပဵၼ်ၸဝ်ႈၶဝ်ၼၼ်ႉဢေႃႈ။ ၵူၼ်းၵႃႈ ၼႂ်းမၼ်းၸိူဝ်းၼၼ်ႉ တၵ်းလူမ်ႉတၢႆလူၺ်ႈလၢပ်ႇလူၺ်ႈလႅဝ်းလႄႈ လုၵ်ႈလႅင်ဢွၼ်ႇၶဝ်ၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်သွင်ႉဢဝ်ၽတ်ႉသေလႄႈ မႄႈယိင်းဢၼ်ပႃးတွင်ႉပႃးမၢၼ်းၶဝ်ၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ၽႃႇတွင်ႉၽႃႇပုမ်ပႅတ်ႈဢေႃႈ။

← Chapter 12 Jump to: Chapter 14 →