Hosea 6

Shan

← Chapter 5 Jump to: Chapter 7 →

1မႃးမႃးဢိူၺ်း၊ ဢွၼ်ၵၼ်ၶိုၼ်းမိူဝ်းၸူး တီႈထႃႇဝရႃႉၽြႃးတႃႉႁဝ်း။ ပိၵ်ႉသမ်ႉ မၼ်းၸဝ်ႈၶူပ်းၶၢတ်ႇသေၵေႃႈ မၼ်းၸဝ်ႈတၵ်းႁႂ်ႈၶိုၼ်း ပဵၼ်ၸိူဝ်ႉၼင်ႇပၵ်းၵဝ်ႇ ပိူင်ၵဝ်ႇၼၼ်ႉ ယူႇဢေႃႈ။ ပိၵ်ႉသမ်ႉ မၼ်းၸဝ်ႈပၼ်တၢမ်ႇသေၵေႃႈ၊ မၼ်းၸဝ်ႈ တၵ်းမတ်ႉၵွပ်ႈ မတ်ႉၶဵၼ်းပၼ် တၢင်းၸဵပ်း တၢင်းသႅပ်ႇႁဝ်းယူႇဢေႃႈ။-

2ပူၼ်ႉသွင်ဝၼ်းသေယဝ်ႉ၊ မၼ်းၸဝ်ႈတၵ်းႁႂ်ႈႁဝ်း ဢသၢၵ်ႈလိပ်းယူႇလႄႈ ႁႂ်ႈႁဝ်းလုၵ်ႉၶိုၼ်း ၼႂ်းဝၼ်းဢၼ် ထူၼ်ႈထိုင်သၢမ်ဝၼ်းၼၼ်ႉသေလႄႈ ႁဝ်းတၵ်းလႆႈ ဢသၢၵ်ႈလိပ်းယူႇ ၵႃႈတီႈၽၢႆႇၼႃႈမၼ်းၸဝ်ႈဢေႃႈ။-

3ႁဝ်းတၵ်းႁူႉ တၵ်းၸႅင်ႈလႄႈ ၸွမ်းႁႃႁႂ်ႈလႆႈႁူႉၸႅင်ႈ ထႃႇဝရႃႉၽြႃးဢေႃႈ။ ၶိင်ႇမိူဝ်ႈဢၼ် မၼ်းၸဝ်ႈဢွၵ်ႇၼၼ်ႉ တၵ်းပဵၼ်ၸိူဝ်ႉၼင်ႇ ဢႃႇရူင်ႇဢၼ်ၶိုၼ်ႈမႃး ၶိင်ႇၵၢင်ၼႂ်ၼၼ်ႉ ဢမၢၼ်ႇၶၼ်ပဵၼ်ဢေႃႈ။ မၼ်းၸဝ်ႈတၵ်းတူၵ်းသႂ်ႇ ၵႃႈၼိူဝ်ႁဝ်း မိူၼ်ၸိူဝ်ႉၼင်ႇ ဢၼ်ၽူၼ်တူၵ်း၊ ၸိူဝ်ႉၼင်ႇဢၼ် ၽူၼ်ႁၢင်ပီႊတူၵ်းယမ်းသႂ်ႇ ၵႃႈၼိူဝ်ၼႃႈလိၼ် ၼၼ်ႉဢေႃႈ။-

4ဢေႇၽရိမ်ႇ ဢိူၺ်း၊ ၵဝ်တၵ်းလႆႈႁဵတ်း ၸိူဝ်ႉၼင်ႇႁိုဝ်တီႈမႂ်း။ ယူႉတႃႉ ဢိူၺ်း၊ ၵဝ်တၵ်းလႆႈႁဵတ်း ၸိူဝ်ႉၼင်ႇႁိုဝ်တီႈမႂ်း။ ၸႂ်ၸေႇတၼႃႇသူၼၼ်ႉ ပဵၼ်ၸိူဝ်ႉၼင်ႇ မွၵ်ႇၵုမ်ႈၶိင်ႇၵၢင်ၼႂ် ဢိၵ်ႇတင်း ၼမ်ႉၼၢႆးဢၼ်ၸၢင်ႈႁၢႆၵႂႃႇၸဝ်ႉၸဝ်ႉ ၼၼ်ႉဢေႃႈ။-

5ပိူဝ်ႈၼႆလႄႈ ၵဝ်လႆႈဢဝ်ပရေႃးၽႅတ်ႈတင်းလၢႆ ၽၼ်းၶဝ်ၼၼ်ႉ ၶၢတ်ႇပဵၼ်ပွတ်း ပဵၼ်တွၼ်ႈ ပႅတ်ႈယဝ်ႉ။ ၵဝ်လႆႈဢဝ် ၵႂၢမ်းဢၼ်ဢွၵ်ႇသူပ်းၵဝ်ၼၼ်ႉ ဢဝ်ၶဝ်တၢႆပႅတ်ႈယဝ်ႉ။ လွင်ႈတၢင်းဢၼ် ၵဝ်ၸီႇယၢင်ႇမႂ်းၸိူဝ်းၼၼ်ႉ ပဵၼ်ၸိူဝ်ႉၼင်ႇ ၽႃႉမႅပ်ႈ ႁိူဝ်ႈဢွၵ်ႇ လႅင်းဢွၵ်ႇၼၼ်ႉဢေႃႈ။-

6ၵဝ်ၵျိူၵ်ႈ တၢင်းႁၵ်ႉၵရူႉၼႃႇ လိူဝ်တွၼ်းၼႃႇသေ တၢင်းဢၼ် ပုၵ်ႈၸေႃႇယိတ်ႈလႄႈ တၢင်းဢၼ် မိုတ်ႈၵိုဝ်းႁူႉၸၵ်းၽြႃးပဵၼ်ၸဝ်ႈ လိူဝ်တွၼ်းၼႃႇသေ တၢင်းဢၼ်ပုၵ်ႈၸေႃႇယိတ်ႈ ဢၼ်တုတ်ႇၽႆးၼၼ်ႉဢေႃႈ။-

7ၶဝ်ၼၼ်ႉ ပူၼ်ႉလိူဝ် ပတီႉၺိၺ်ႇ မိူၼ်ၸိူဝ်ႉၼင်ႇ ဢႃႇတၢမ်ႇ ၼၼ်ႉယဝ်ႉ။ ၶဝ်ႁဵတ်းပရီႉယႄႇသေလႄႈ ယႃႉသဵတ်ႈၸႃႇၵဝ်ပႅတ်ႈ ၵႃႈၼႂ်းတီႈၼၼ်ႈ ၼၼ်ႉယဝ်ႉ။-

8ဝဵင်း ၵီႉလတ်ႉ ၼၼ်ႉ ပဵၼ်တီႈဢၼ် ၶဝ်ၸိူဝ်းဢၼ်ႁဵတ်း ဢႃႉထမ်ႇမႃႉၼၼ်ႉ ယူႇလႄႈ မီးႁွႆးတိၼ်ဢၼ်ၵူဝ်ႈလိူတ်ႈၵူၼ်း ၼၼ်ႉ ၼမ်ၼႃႇဢေႃႈ။-

9ၸိူဝ်ႉၼင်ႇဢၼ်မုၵ်ႉၸူၼ် ၸိူဝ်းၸူၼ် လွမ်တူၺ်းၵူၼ်း ယူႇၼၼ်ႉ၊ ၶဝ်ၸိူဝ်းဢၼ် ၶဝ်ႈပႃးၼႂ်းမုၵ်ႉၼႂ်းၸိူဝ်း ယိတ်ႈပရေႃးႁဵၵ်ႈ တင်းလၢႆ ၼၼ်ႉ၊ ၸၢင်ႈဢဝ် ဢသၢၵ်ႈၵူၼ်းတၢႆ ၵႃႈတီႈသဵၼ်ႈတၢင်းဢၼ်ၵႂႃႇၸူး ၵႃႈတီႈဝဵင်း သေႇၶိမ်ႇ ၼၼ်ႉဢေႃႈ။ ၶဝ်ၸၢင်ႈႁဵတ်းဢမူႉ ဢႃႉထမ်ႇမႃႉ ဢမၢၼ်ႇၶၼ်ပဵၼ်ဢေႃႈ။-

10ၵဝ်လႆႈႁၼ်လွင်ႈတၢင်းဢၼ် လီၵူဝ်လီႁႄၼၼ်ႉ ၵႃႈၼႂ်းမဵဝ်း ဢီႉသရေႇလႃႉ ယဝ်ႉ။ ၵႃႈတီႈမဵဝ်းၼၼ်ႉ၊ ဢေႇၽရိမ်ႇ ၸၢင်ႈႁဵတ်း မေႇထုင်ႇဢၼ်ဢမ်ႇတြႃးဢေႃႈ။ ဢီႉသရေႇလႃႉ ၼၼ်ႉ မီးတၢင်းဢၼ် ၵူဝ်ႈၵိူၵ်ႇဢေႃႈ။-

11ၼွၵ်ႈသေၼၼ်ႉ မဵဝ်း ယူႉတႃႉ ဢိူၺ်း၊ မိူဝ်ႈဢၼ်ၵဝ် ဢဝ်ၵူၼ်းၵဝ် ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉ ၶိုၼ်းမႃးၼၼ်ႉၸိုင် ၶိင်ႇဢၼ်ပၢတ်ႇၶဝ်ႈ လႆႈၶၢၼ်းဝႆႉပုၼ်ႈမႂ်းၼၼ်ႉ ယူႇဢေႃႈ။

← Chapter 5 Jump to: Chapter 7 →