Song of Solomon 1

Shan

Jump to: Chapter 2 →

1တၢင်းဢၼ်ႁဵတ်းၵႂၢမ်း သေႃးလမုၼ်ႇ ဢၼ်ပဵၼ်ၸိၵ်းပဵၼ်ၸွမ်ၼႂ်းတၢင်းဢၼ်ႁဵတ်းၵႂၢမ်းၵူႈၸိူဝ်ႉၵူႈပိူင်ၼၼ်ႉ။

2ႁႂ်ႈမၼ်းၸဝ်ႈႁဵတ်းတၢင်းၸုပ်ႇတၢင်းၼူမ် ဢၼ်ပဵၼ်ၵႃႈတီႈသူပ်းမၼ်းၸဝ်ႈၼၼ်ႉ ၸုပ်ႇၼူမ်ၶႃႈၼၢင်းသေၵမ်းလူၺ်ႈ။ မႅတ်ႈတႃႇၸဝ်ႈႁဝ်းၼၼ်ႉ ယဵင်ႈၶႅၼ်းလီလိူဝ်တွၼ်းၼႃႇသေၼမ်ႉၸပိတ်ႈတီႈၶႃႈဢေႃႈ။-

3ၼမ်ႉမၼ်းၼၢမ်ႇသႃႇတီႈၸဝ်ႈႁဝ်းၼၼ်ႉ မီးတၢင်းဢၼ်ႁွမ်ဢၼ်ႁူၺ်းဢၼ်လီၼႃႇလူင်လၢင်လႄႈ၊ ၼႃႇမႃႉၸိုဝ်ႈသဵင်ၸဝ်ႈႁဝ်းၼၼ်ႉ ပဵၼ်ၼမ်ႉမၼ်းၼၢမ်ႇသႃႇဢၼ်သွၼ်းလေႃႇတီႈၶႃႈဢေႃႈ။ ပိူဝ်ႈၼႆလႄႈ ၵၼ်ႇၺႃႇလုၵ်ႈယိင်းသၢဝ်တင်းလၢႆ ဢွၼ်ၵၼ်ႁၵ်ႉပႅင်းၸဝ်ႈႁဝ်းတီႈၶႃႈဢေႃႈ။-

4ၸူဝ်းဢဝ်ၶႃႈၼၢင်းၸဝ်ႈႁဝ်းသေၵမ်းတီႈၶႃႈ၊ ၶႃႈၼၢင်းၸဝ်ႈႁဝ်း တၵ်းဢွၼ်ၵၼ်လႅၼ်ႈၸွမ်းလင်ၸဝ်ႈႁဝ်းတီႈၶႃႈဢေႃႈ။ ၸဝ်ႈၶုၼ်လူင်ၼၼ်ႉ ဢဝ်ၶႃႈၼၢင်းၸဝ်ႈ ၶဝ်ႈၵႃႈၼႂ်းလုၵ်းၼႂ်းႁိူၼ်းမၼ်းၸဝ်ႈယဝ်ႉ။ ၶႃႈၼၢင်းၸဝ်ႈႁဝ်းၶဝ် တၵ်းဢွၼ်ၵၼ်ၸူမ်းသိူဝ်းသႂၢင်ႇၸႂ်ယူႇ ၼႂ်းၸဝ်ႈႁဝ်းလႄႈ တၵ်းဢွၼ်ၵၼ်ယွင်ႈယေႃးမႅတ်ႈတႃႇၸဝ်ႈႁဝ်းလိူဝ်တွၼ်းၼႃႇသေ ၼမ်ႉၸပိတ်ႈတီႈၶႃႈဢေႃႈ။ ၶဝ်ဢွၼ်ၵၼ်ႁၵ်ႉပႅင်းၸဝ်ႈႁဝ်းဢမၢၼ်ႇၶၼ်ပဵၼ်တီႈၶႃႈဢေႃႈ။-

5လုၵ်ႈယိင်းဝဵင်း ယေႇရူႉသလႅမ်ႇ ၶဝ်ဢိူၺ်း၊ ၵဝ်ၼႆႉပိၵ်ႉသမ်ႉမီးႁၢင်ႈမီးၽၢင် ဢၼ်လမ်မိူၼ်ၸိူဝ်ႉၼင်ႇသုမ်ႉထဵင် ၵေႇတႃႇ ၸိူဝ်းၼၼ်ႉသေၵေႃႈ ယင်းပဵၼ်ဢၼ်ထုၵ်ႇဢၼ်လီ မိူၼ်ၸိူဝ်ႉၼင်ႇၽႃႈၵင်ႈၶုၼ် သေႃးလမုၼ်ႇ ၼၼ်ႉယူႇဢေႃႈ။-

6ယႃႇပေဢွၼ်ၵၼ်လူတူၺ်းၵဝ် ၵွပ်ႈပိူဝ်ႈဢၼ်ၵဝ်လႆႈၶၢမ်ႇတၢင်းဢၼ်တၢၵ်ႇလႅတ်ႇလႄႈ မီးႁၢင်ႈမီးၽၢင်ဢၼ်လမ်ၼၼ်ႉသေၵမ်း။ လုၵ်ႈၸၢႆးမႄႈၵဝ်ၸိူဝ်းၼၼ်ႉ ဢွၼ်ၵၼ်ၸႂ်မႆႈၶႆႈၸႃႉတီႈၵဝ်လႄႈ ႁႂ်ႈၵဝ်ပႂ်ႉထိင်းသူၼ်ဢူးယဵၼ်ႇၸပိတ်ႈတင်းလၢႆယူႇဢေႃႈ။ သူၼ်ဢူးယဵၼ်ႇၸပိတ်ႈတူဝ်ၸဝ်ႈၵဝ်ႇၸိုင် ၵဝ်ဢမ်ႇလႆႈပႂ်ႉလႆႈထိင်း။-

7ၸဝ်ႈဢၼ်ၶႃႈၼၢင်းၸဝ်ႈ ထုၵ်ႇၸႂ်ၵျိူၵ်ႈၸႂ်တီႈၶႃႈဢိူၺ်း၊ မွၵ်ႇလၢတ်ႈလွင်ႈဢၼ်ၸဝ်ႈႁဝ်း လဵင်ႉထိင်းၽုင်သူဝ်းၸဝ်ႈယူႇၵႃႈတီႈလႂ် ဢိၵ်ႇတင်းလွင်ႈဢၼ်ၸဝ်ႈႁဝ်းႁႂ်ႈၶဝ်ႈသွၼ်ႈပိုင်ႈယူႇၵႃႈတီႈႁူမ်ႈဢၼ်လႂ် ၼႂ်းၶိင်ႇမိူဝ်ႈဢၼ်ၵၢင်ဝၼ်းတဵင်ႈၼၼ်ႉ တီႈၶႃႈၼၢင်းၸဝ်ႈသေၵမ်းတီႈၶႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶႃႈၼၢင်းၸဝ်ႈႁဝ်းၼႆႉ တၵ်းလႆႈပဵၼ်ၸိူဝ်ႉၼင်ႇၵေႃႉဢၼ်ႁူမ်ႇသုမ်ႇၼႃႈၼၼ်ႉယူႇၵႃႈတီႈႁိမ်းၽုင်သူဝ်းၵေႃႉသေႈၸဝ်ႈႁဝ်းတင်းလၢႆၼၼ်ႉ ယူႇၼင်ႇႁိုဝ်တီႈၶႃႈ၊

8ၼၢင်းဢၼ်ႁၢင်ႈလီၽၢင်လီလိူဝ်တွၼ်းၼႃႇသေမႄႈယိင်းတင်းလၢႆၼႆႉဢိူၺ်း၊ ပေႃးမႂ်းၼၢင်းဢမ်ႇႁူႉၸိုင်၊ ၸွမ်းႁွႆးတိၼ်ၽုင်သူဝ်းၵႂႃႇလႄႈ လဵင်ႉလူသူဝ်းဢွၼ်ႇမႂ်းၼၢင်းတင်းလၢႆယူႇ ၵႃႈတီႈႁိမ်းသုမ်ႉထဵင်ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၸိူဝ်းၼၼ်ႉတႃႉ။-

9ၼၢင်းဢၼ်ၵဝ်ၸဝ်ႈႁၵ်ႉၼႃႇၼႆႉဢိူၺ်း၊ ၵဝ်ၸဝ်ႈတၵ်းဢဝ်တင်းမႃႉ ဢၼ်ႁၢင်ႈသႂ်ႇဝႆႉၵႃႈတီႈလေႃႉရထႃးၶုၼ် ၽႃႇရေႃး ၼၼ်ႉ ႁဵတ်းဢပုမ်ႇတႅၵ်ႈမႂ်းၼၢင်းဢေႃႈ။-

10ၵႅမ်ႈမႂ်းၼၢင်းၼၼ်ႉ ထုၵ်ႇၵၼ်ၵိုင်ႇၵၼ်တင်းမၢၵ်ႇပူးတီး ဢၼ်ပဵၼ်လၢႆးမုၵ်ႉဝႆႉၼၼ်ႉ ဢိၵ်ႇတင်းၶေႃးမႂ်းၼၢင်းၼၼ်ႉ ထုၵ်ႇၵၼ်ၵိုင်ႇၵၼ်တင်းမၢၵ်ႇပူးလႄး ဢၼ်ႁွႆႈဝႆႉလႄႈ ပဵၼ်ၶိူဝ်းပဵၼ်ၶိူဝ်းဝႆႉၼၼ်ႉဢေႃႈ။-

11ႁဝ်းတၵ်းႁဵတ်းပႃးၶေႃၶမ်း ဢၼ်ဢဝ်တင်းငိုၼ်းႁဵတ်းလႆႈႁၢင်ႈၶိူင်ႈသႂ်ႇ ၸိူဝ်းၼၼ်ႉပၼ်ဢေႃႈ။

12ၼႂ်းမိူဝ်ႈဢၼ်ၸဝ်ႈၶုၼ်လူင် ယင်းတိုၵ်ႉၼင်ႈယူႇၵႃႈတီႈႁိမ်းၶူင်ႇတီႈၵိၼ်ၸဝ်ႈၼၼ်ႉၸိုင်၊ ဢၢႆၼမ်ႉမၼ်းႁွမ် ၼႃႇတူႉ ၵဝ်ၼႆႉ မိုတ်းၵႂႃႇမိူဝ်ၵႂႃႇဢေႃႈ။-

13ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ ပဵၼ်ၵွင် ၼၢမ်ႇသႃႇ၊ မူႉရၼ်ႇ တီႈၵဝ်လႄႈ မၼ်းၸဝ်ႈတၵ်းလႆႈၼွၼ်းၵႃႈၼႂ်းဝၢင်ႈႁူဝ်ဢူၵ်းၵဝ်ဢေႃႈ။-

14ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ ပဵၼ်ၸိူဝ်ႉၼင်ႇ မတ်ႉမႂ် ႁိၼ်ႇၼႃႇ မတ်ႉၵိင်ႇ ႁိၼ်ႇၼႃႇ ဢၼ်ပဵၼ်မႃး ၵႃႈတီႈသူၼ်ဢူးယဵၼ်ႇ ဢႅၼ်ႇၵေးတီႉ ၼၼ်ႉဢေႃႈ။

15ၼၢင်းဢၼ်ၵဝ်ၸဝ်ႈႁၵ်ႉၼႃႇၼႆႉဢိူၺ်း၊ မႂ်းၼၢင်းၼႆႉ ႁၢင်ႈလီၽၢင်လီဢေႃႈ။ မႂ်းၼၢင်းၼႆႉ ႁၢင်ႈလီၽၢင်လီဢေႃႈ။ မႂ်းၼၢင်းၼႆႉ ပျေႉၸုမ်ႇဝႆႉတင်း မၢၵ်ႇတႃၼူၵ်ႉတူႈဢေႃႈ။-

16ၸဝ်ႈဢၼ်ၶႃႈၼၢင်းႁၵ်ႉပႅင်းၼႃႇၼႆႉဢိူၺ်း၊ ၸဝ်ႈႁဝ်းႁၢင်ႈလီၽၢင်လီလႄႈ မီးတၢင်းဢၼ်လီႁၵ်ႉလီပႅင်းတီႈၶႃႈဢေႃႈ။ တီႈၼွၼ်းႁဝ်းၼၼ်ႉ ပျေႉၸုမ်ႇဝႆႉတင်းႁၢင်ႈၽၢင်ဢၼ်ၶဵဝ်ဢေႃႈ။-

17ၶိုဝ်ႇပိၵ်ႈမၢၼ်ႇႁဝ်းၸိူဝ်းၼၼ်ႉ ယဝ်ႉတူဝ်ႈတင်းတူၼ်ႈ ဢႃႇရိတ်ႉ လႄႈ ၵွၼ်မၼ်းၸိူဝ်းၼၼ်ႉယဝ်ႉတူဝ်ႈတင်းမႆႉ ပႅၵ်ႇ ဢေႃႈ။

Jump to: Chapter 2 →