Song of Solomon 2

Shan

← Chapter 1 Jump to: Chapter 3 →

1ၶႃႈၼၢင်းၸဝ်ႈႁဝ်းၼႆႉ ပဵၼ်မွၵ်ႇၼိင်းသီႇၵႃႈတီႈ သႃႇရုၼ်ႇ ၊ မွၵ်ႇႁဵဝ်းငိုၼ်းဢၼ်ဢွၵ်ႇတီႈၶူင်ႈတီႈႁူၺ်ႈ တီႈၶႃႈဢေႃႈ။

2မိူၼ်ၸိူဝ်ႉၼင်ႇဢၼ် မွၵ်ႇႁဵဝ်းငိုၼ်းပဵၼ်ၵႃႈၼႂ်းပႃႇတူၼ်ႈၼၢမ်ၼၼ်ႉ ၼၢင်းဢၼ်ၵဝ်ၸဝ်ႈႁၵ်ႉၼႃႇၼၼ်ႉ ပဵၼ်ၵႃႈၼႂ်းမုၵ်ႉၼႂ်းၸိူဝ်းလုၵ်ႈယိင်းၵူၼ်းတင်းလၢႆဢေႃႈ။

3မိူၼ်ၸိူဝ်ႉၼင်ႇတူၼ်ႈမၢၵ်ႇဢိုၼ်ႈဝၢၼ် ၵႃႈၼႂ်းပႃႇမႆႉပႃႇၸိင်ၼၼ်ႉ၊ ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ ပဵၼ်ၵႃႈၼႂ်းမုၵ်ႉၼႂ်းၸိူဝ်း လုၵ်ႈၸၢႆးၵူၼ်းတင်းလၢႆဢေႃႈ။ ၵဝ်မူၼ်ႈပျေႃႇယူႇသေလႄႈ ၼင်ႈယူႇၵႃႈတႂ်ႈႁူမ်ႈမၼ်းလႄႈ မၢၵ်ႇမၼ်းပဵၼ်ဢၼ်ဝၢၼ်ဢၼ်ၸဵမ်းၼႃႇလူင်လၢင်တီႈၵဝ်ဢေႃႈ။-

4မၼ်းၸဝ်ႈပႃးဢဝ်ၵဝ်ၶဝ်ႈၵႃႈတီႈႁိူၼ်းတီႈဢၼ်ၶၢမ်ႇပွႆးၼၼ်ႉလႄႈ ဢဝ်လၢမ်ႇမႅတ်ႈတႃႇၸဝ်ႈမုင်းႁူမ်ႇၵႃႈၼိူဝ်ၵဝ်ဝႆႉယဝ်ႉ။-

5ၵွပ်ႈပိူဝ်ႈဢၼ်ၵဝ်မီးတၢင်းဢၼ်ၸႂ်ၸဵပ်းၸႂ်ၶိုၼ်ႈ လူၺ်ႈတၢင်းႁၵ်ႉမႅတ်ႈတႃႇၼၼ်ႉလႄႈ ဢွၼ်ၵၼ်ဢဝ်တင်းၶႅပ်းမၢၵ်ႇၸပိတ်ႈ ၸွႆႈႁႅင်းထႅမ်ႁႅင်းတီႈၵဝ်သေၵမ်း။ ဢွၼ်ၵၼ်ဢဝ်မၢၵ်ႇဢိုၼ်ႈဝၢၼ်လဵင်ႉလူ ႁႂ်ႈၶဝ်ၸိုၼ်ႈမႃးၶႅၼ်းမႃးသေၵမ်း။-

6မိုဝ်းၶွၼ်သၢႆႉမၼ်းၸဝ်ႈၼၼ်ႉ ႁွင်းဢဝ်ၵွၵ်းႁူဝ်ၵဝ်ယူႇလႄႈ မိုဝ်းၶွၼ်ၶႂႃမၼ်းၸဝ်ႈၼၼ်ႉ ၵွတ်ႇၵဝ်ယူႇဢေႃႈ။-

7လုၵ်ႈယိင်းဝဵင်း ယေႇရူႉသလႅမ်ႇ ၶဝ်ဢိူၺ်း၊ ၵဝ်ဢဝ်တိုင်ဢဝ်ယီးတင်းလၢႆ ဢၼ်ယူႇၵႃႈၼႂ်းထိူၼ်ႇၼႂ်းၶိူဝ်းၸိူဝ်းၼၼ်ႉ တိူင်ႇဝႃႈၵိၼ်ႇဝႃႈတီႈသူ ႁႂ်ႈသူဢမ်ႇယႃႉဢမ်ႇပူၵ်းၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ တေႃႇထိုင်ႁွတ်ႈမၼ်းၸဝ်ႈထၼ်ႈပေႃးတိုၼ်ႇဢဝ်ၵူၺ်းမၼ်းၸဝ်ႈၼၼ်ႉဢေႃႈ။

8ပဵၼ်သဵင်ၵႂၢမ်းၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉလူင်ပႄႇ၊ တူၺ်းလူး၊ မၼ်းၸၢင်ႈဝႅၼ်ၶၢမ်ႈ လွႆလူင်တင်းလၢႆ၊ ၵျွၵ်းၶၢမ်ႈလွႆဢွၼ်ႇတင်းလၢႆသေလႄႈမႃးဢေႃႈ။-

9ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ မိူၼ်ၵၼ်တင်းတိုင်တင်းယီးဢေႃႈ။ တူၺ်းလူး၊ မၼ်းၸဝ်ႈၸုၵ်းယူႇၵႃႈၼွၵ်ႈ လမ်းဢုတ်ႇႁဝ်းဢေႃႈ။ မၼ်းၸဝ်ႈတူၺ်းၶဝ်ႈၵႃႈၼႂ်းႁူးလၢင်းတဵၼ်ယူႇလႄႈ ၼႄပျႃးတူဝ်မၼ်းၸဝ်ႈ ၸူးသိုဝ်ႈၵႄႈမႂ်ႁူးလၢင်းတဵၼ်ဢေႃႈ။-

10ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ ႁွင်ႉလႄႈလၢတ်ႈတီႈၵဝ်လႄႈဝႃႈၸမ်ႉ၊ ၼၢင်းဢၼ်ၵဝ်ၸဝ်ႈႁၵ်ႉဢိူၺ်း၊ ၼၢင်းဢၼ်ႁၢင်ႈလီၵဝ်ၸဝ်ႈၼႆႉဢိူၺ်း၊ လုၵ်ႉသေလႄႈမႃးသေၵမ်း။

11ပူၼ်ႉၶိင်ႇၵတ်းယဝ်ႉ။ ၽႃႈၽူၼ်ၵေႃႈသဵင်ႈမူတ်းလႄႈ ပၢင်ႇၸိုၼ်ႈယဝ်ႉ။-

12မွၵ်ႇတင်းလၢႆဢွၼ်ၵၼ်ၵီႈၵႃႈၼိူဝ်လိၼ်မိူင်းယဝ်ႉ။ ႁွတ်ႈထိုင်ၶိင်ႇဢၼ် တၵ်းလႆႈလၢၼ်းၵိင်ႇလၢၼ်းၽိူဝ်ယဝ်ႉ။ လႆႈငိၼ်းသဵင်ၼူၵ်ႉတူႈႁွင်ႉယူႇၵႃႈၼႂ်း ၼမ်ႉႁဝ်းလိၼ်ႁဝ်းဢေႃႈ။-

13တူၼ်ႈမၢၵ်ႇလိူဝ်ႇသၢင်းၽေႃး ႁႂ်ႈမၢၵ်ႇမၼ်းဢၼ်လိပ်းဢၼ်ၶဵဝ်သုၵ်းဢေႃႈ။ တူၼ်ႈၶိူဝ်းမၢၵ်ႇၸပိတ်ႈမွၵ်ႇမွၵ်ႇလႄႈ ဢၢႆႁွမ်မၼ်းမိုတ်းၵႂႃႇမိူဝ်ၵႂႃႇဢေႃႈ။ ၼၢင်းဢၼ်ၵဝ်ၸဝ်ႈႁၵ်ႉၼႃႇၼႆႉဢိူၺ်း၊ ၼၢင်းဢၼ်ႁၢင်ႈလီၵဝ်ၸဝ်ႈၼႆႉဢိူၺ်း၊ လုၵ်ႉသေလႄႈမႃးသေၵမ်း။-

14ၼူၵ်ႉတူႈၶႃႈၼၢင်း ဢၼ်မီးၵႃႈၼႂ်းငိူပ်ႇမၢၵ်ႇႁိၼ်မၢၵ်ႇၽႃ တီႈဢၼ်သွၼ်ႈပိုင်ႈယူႇၵႃႈၼိူဝ် တီႈဢၼ်သုင်ဢၼ်ၸၼ်းလွႆၼၼ်ႉတီႈၶႃႈဢိူၺ်း၊ ႁႂ်ႈၶႃႈၼၢင်းလႆႈႁၼ်ၼႃႈၸဝ်ႈႁဝ်းသေၵမ်းတီႈၶႃႈ၊ ႁႂ်ႈၶႃႈၼၢင်းလႆႈငိၼ်းသဵင်ၸဝ်ႈႁဝ်းသေၵမ်းတီႈၶႃႈ၊ သဵင်ၵႂၢမ်းၸဝ်ႈႁဝ်းၼၼ်ႉ ဝၢၼ်လႄႈ ၼႃႈၸဝ်ႈႁဝ်းၵေႃႈ ႁၢင်ႈလီတီႈၶႃႈဢေႃႈ။-

15ဢွၼ်ၵၼ်တီႉၵမ်ဢဝ်မႃလိၼ်တင်းလၢႆ ဢိၵ်ႇတင်းမႃလိၼ်ဢွၼ်ႇ ဢၼ်တၵ်းယႃႉတူၼ်ႈၶိူဝ်းမၢၵ်ႇၸပိတ်ႈၸိူဝ်းၼၼ်ႉ ပုၼ်ႈႁဝ်းတႃႉ။ တူၼ်ႈၶိူဝ်းမၢၵ်ႇၸပိတ်ႈႁဝ်းၸိူဝ်းၼၼ်ႉ မီးတၢင်းဢၼ်မွၵ်ႇမွၵ်ႇယူႇဢေႃႈ။-

16ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ ပဵၼ်တီႈဢၼ်ၵဝ်ပိူင်ႇဢေႃႈ။ ၵဝ်ၵေႃႈပဵၼ်တီႈဢၼ်မၼ်းၸဝ်ႈပိူင်ႇဢေႃႈ။ မၼ်းၸဝ်ႈၵိၼ်ယူႇၵႃႈၼႂ်းပႃႇမွၵ်ႇႁဵဝ်းငိုၼ်းၼၼ်ႉဢေႃႈ။-

17ၸူဝ်ႈဢၼ်မိူင်းဢမ်ႇပႆႇလႅင်း၊ ငဝ်းလပ်းသိင်ႇဢမ်ႇပႆႇပၢႆႈၵႂႃႇၼၼ်ႉၸိုင်၊ ၸဝ်ႈဢၼ်ၶႃႈၼၢင်းႁၵ်ႉပႅင်းၼႃႇတီႈၶႃႈဢိူၺ်း၊ သမ်ႉၶိုၼ်းလႄႈ ႁဵတ်းၸိူဝ်ႉၼင်ႇတိုင်ၼင်ႇယီးၵႃႈၼိူဝ်လွႆ ပေႇသႃႇ ၼၼ်ႉထႅင်ႈသေၵမ်းတီႈၶႃႈ၊

← Chapter 1 Jump to: Chapter 3 →