Song of Solomon 5

Shan

← Chapter 4 Jump to: Chapter 6 →

1ၼွင်ႉယိင်းၵဝ်ၸဝ်ႈဢိူၺ်း၊ မေးဢၼ်ၵဝ်ၸဝ်ႈမၢႆဝႆႉဢိူၺ်း၊ ၵဝ်ၸဝ်ႈၶဝ်ႈၵႃႈၼႂ်းသူၼ်ဢူးယဵၼ်ႇၵဝ်ၸဝ်ႈယဝ်ႉ။ ၵဝ်ၸဝ်ႈသိမ်းဢဝ်မဵဝ်း မူႉရၼ်ႇ ၵဝ်ၸဝ်ႈ ဢိၵ်ႇတင်းမဵဝ်းၼၢမ်ႇသႃႇၵဝ်ၸဝ်ႈယဝ်ႉ။ ၵဝ်ၸဝ်ႈလႆႈၵိၼ် ႁူဝ်ၼမ်ႉႁူင်းၽိုင်ႈၵဝ်ၸဝ်ႈ လူၺ်ႈၵၼ်တင်းၼမ်ႉၽိုင်ႈၵဝ်ၸဝ်ႈယဝ်ႉ။ ၵဝ်ၸဝ်ႈလႆႈသူတ်ႉလႆႈၵိၼ် ၼမ်ႉၸပိတ်ႈၵဝ်ၸဝ်ႈလူၺ်ႈၵၼ်တင်း ၼမ်ႉၼူမ်းၵဝ်ၸဝ်ႈယဝ်ႉ။ ၵေႃႉသေႈၵဝ်တင်းလၢႆၶဝ်ဢိူၺ်း၊ ဢွၼ်ၵၼ်ၵိၼ်တႃႉ။ ၵေႃႉဢၼ်ႁူမ်ႈပွင်းၵၼ်တင်းၵဝ်ၶဝ်ဢိူၺ်း၊ ဢွၼ်ၵၼ်သူတ်ႉၵိၼ်တႃႉ။ ဢွၼ်ၵၼ်သူတ်ႉၵိၼ်ဢိမ်ႇဢိမ်ႇတဵမ်တဵမ်တႃႉ။

2ပိၵ်ႉသမ်ႉၵဝ်ၼွၼ်းလပ်းယူႇသေၵေႃႈ၊ ႁူဝ်ၸႂ်ၵဝ်တိုၼ်ႇယူႇဢေႃႈ။ ပဵၼ်သဵင်ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ တွႆႇယူႇသေလႄႈဝႃႈ၊ ၼွင်ႉယိင်းၵဝ်ၸဝ်ႈဢိူၺ်း၊ ၼၢင်းဢၼ်ၵဝ်ၸဝ်ႈႁၵ်ႉၼႃႇဢိူၺ်း၊ ၼူၵ်ႉတူႈၵဝ်ၸဝ်ႈဢိူၺ်း၊ ၵေႃႉဢၼ်ၸေးၸုမ်ႇၵဝ်ၸဝ်ႈဢိူၺ်း၊ ၽုၺ်ႇပၼ်တီႈၵဝ်ၸဝ်ႈသေၵမ်း။ ၵွၵ်းႁူဝ်ၵဝ်ၸဝ်ႈၼႆႉ ယမ်းၼမ်ႉၼၢႆးလႄႈၶူၼ်ႁူဝ်ၵဝ်ၸဝ်ႈၼႆႉ ယမ်းမဵတ်ႉၼမ်ႉၼၢႆး ဢၼ်ၸၢင်ႈယွတ်ႇတူၵ်းၶိင်ႇ ၵၢင်ၶိုၼ်းၼၼ်ႉဢေႃႈ။

3ၶႃႈၼၢင်းၸဝ်ႈႁဝ်း ထွတ်ႇသိူဝ်ႈတေႃႇသိူဝ်ႈပုတ်းယဝ်ႉတီႈၶႃႈယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၵ်းလႆႈၶိုၼ်းၼုင်ႈၼင်ႇႁိုဝ်တီႈၶႃႈ၊ တိၼ်ၶႃႈၼၢင်းၸဝ်ႈႁဝ်းၵေႃႈ သုၵ်ႈယဝ်ႉတီႈၶႃႈယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၵ်းလႆႈႁႂ်ႈသမ်ႉၶိုၼ်းၵူဝ်ႈၵိူၵ်ႇၼင်ႇႁိုဝ်တီႈၶႃႈ၊-

4ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ ဢဝ်မိုဝ်းမၼ်းၸဝ်ႈ ၸူၵ်းၶဝ်ႈၵႃႈၼႂ်းႁူးၽၵ်းတူလႄႈ ၵဝ်မီးၸႂ်ဢၼ်ႁၵ်ႉပႅင်းမၼ်းၸဝ်ႈၼႃႇလူင်လၢင်သေလႄႈ၊-

5ၵဝ်လုၵ်ႉႁႂ်ႈလႆႈၽုၺ်ႇၽၵ်းတူပၼ်တီႈၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉလႄႈ ၼမ်ႉမၼ်း မူႉရၼ်ႇ တူၵ်းသေၵႃႈတီႈမိုဝ်းၵဝ်၊ ၼမ်ႉမၼ်း မူႉရၼ်ႇ ၸႅတ်ႈၸႅတ်ႈ တူၵ်းသေၵႃႈတီႈၼိဝ်ႉမိုဝ်းၵဝ်တင်းလၢႆသႂ်ႇၵႃႈၼိူဝ်သဝ်ၵိူၼ်ႇၽၵ်းတူယူႇ ၸိၵ်းၸိၵ်းဢေႃႈ။-

6မိူဝ်ႈဢၼ်ၵဝ်ၽုၺ်ႇပၼ် တီႈဢၼ်ၵဝ်ႁၵ်ႉပႅင်းၼႃႇၼၼ်ႉၸိုင်၊ ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ သမ်ႉဝၢႆႇၶိုၼ်းလႄႈဢွၵ်ႇၵႂႃႇယဝ်ႉယဝ်ႉ။ ႁူဝ်ၸႂ်ၵဝ်ဢူၼ်ႈၵႂႃႇ ၵွပ်ႈပိူဝ်ႈၵႂၢမ်းမၼ်းၸဝ်ႈလႄႈ ၵဝ်ႁႃမၼ်းၸဝ်ႈသေၵေႃႈဢမ်ႇထူပ်း။ ၵဝ်ႁွင်ႉသေၵေႃႈ မၼ်းၸဝ်ႈဢမ်ႇဢိူဝ်။-

7ၶဝ်ၸိူဝ်းဢၼ်ပႂ်ႉၵၢင် ဢၼ်လႄႇၵႃႈၼႂ်းဝဵင်းၼၼ်ႉထူပ်းၵဝ်သေယဝ်ႉ၊ ဢွၼ်ၵၼ်ပေႃႉယႅၼ်ႉၵဝ် ႁႂ်ႈၵဝ်ၸဵပ်းသႅပ်ႇၼႃႇလူင်လၢင်လႄႈ ၶဝ်ၸိူဝ်းဢၼ်ပႂ်ႉလမ်းဝဵင်းၼၼ်ႉ ဢွၼ်ၵၼ်ႁိမ်ဢဝ်ၽႃႈႁူမ်ႇၼႃႈၵဝ်ဢေႃႈ။-

8လုၵ်ႈယိင်းဝဵင်း ယေႇရူႉသလႅမ်ႇ ၶဝ်ဢိူၺ်း၊ ၵဝ်တိူင်ႇဝႃႈၵိၼ်ႇဝႃႈတီႈသူ၊ ပေႃးသူထူပ်းႁၼ် ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉၸိုင်၊ သူတၵ်းလႆႈဢွၼ်ၵၼ်မွၵ်ႇလၢတ်ႈ လွင်ႈဢၼ်ၵဝ်မီးတၢင်းဢၼ်ၸႂ်ၸဵပ်းၸႂ်ၶိုၼ်ႈလူၺ်ႈတၢင်းႁၵ်ႉမႅတ်ႈတႃႇၼၼ်ႉ တီႈမၼ်းၸဝ်ႈဢေႃႈ။

9မႄႈယိင်းဢၼ်ႁၢင်ႈလီလိူဝ်တွၼ်းၼႃႇသေမႄႈယိင်းတင်းလၢႆၼႆႉဢိူၺ်း၊ ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉ ယဵင်ႈၶႅၼ်းလိူဝ်တွၼ်းၼႃႇသေၸဝ်ႈဢၼ်ပိူၼ်ႈတၢင်ႇၵေႃႉႁၵ်ႉပႅင်းၼႃႇၼၼ်ႉ ၸိူဝ်ႉၼင်ႇႁိုဝ်။ လွင်ႈၼင်ႇႁိုဝ်မႂ်းတၵ်းလႆႈတိူင်ႇဝႃႈၵိၼ်ႇဝႃႈတီႈႁဝ်းၸိူဝ်ႉၼင်ႇၼၼ်ၸိုင်၊ ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉ ယဵင်ႈၶႅၼ်းလိူဝ်တွၼ်းၼႃႇသေၸဝ်ႈဢၼ်ပိူၼ်ႈတၢင်ႇၵေႃႉႁၵ်ႉပႅင်းၼႃႇၼၼ်ႉ ၸိူဝ်ႉၼင်ႇႁိုဝ်။

10ၸဝ်ႈဢၼ်ႁၵ်ႉပႅင်းၼႃႇၼၼ်ႉ ပျေႉၸုမ်ႇဝႆႉတင်းႁၢင်ႈၽၢင်ဢၼ်ၶၢဝ်၊ ႁၢင်ႈၽၢင်ဢၼ်လႅင်လႄႈ ပဵၼ်ဢၼ်ထွတ်ႈဢၼ်မျၢတ်ႈ ပဵၼ်ၸိၵ်းပဵၼ်ၸွမ် ၵႃႈၼႂ်းၵူၼ်းမိုၼ်ႇၼိုင်ႈဢေႃႈ။-

11ၵွၵ်းႁူဝ်မၼ်းၸဝ်ႈၼၼ်ႉ မိူၼ်ၸိူဝ်ႉၼင်ႇၶမ်းလွတ်ႈငၢၼ်ႇဢေႃႈ။ ၶူၼ်ႁူဝ်မၼ်းၸဝ်ႈၼၼ်ႉ ၼႃတၼ်လႄႈ လမ်မိူၼ်ၸိူဝ်ႉၼင်ႇႁၢင်ႈၽၢင် ၵႃလူင်ၼၼ်ႉဢေႃႈ။-

12မၢၵ်ႇတႃမၼ်းၸဝ်ႈၼၼ်ႉ မိူၼ်ၸိူဝ်ႉၼင်ႇၼူၵ်ႉတူႈ ၵႃႈတီႈႁိမ်းၼမ်ႉႁွင်ႈၼမ်ႉၵႄး ဢၼ်ဢၢပ်ႇၼမ်ႉၼူမ်းသေလႄႈ မူပ်ႇယူႇသူတ်ႇသူတ်ႇ ၵွင်ၵွင် ၵႃႈတီႈႁိမ်းၼမ်ႉႁွင်ႈၼမ်ႉၵႄး ဢၼ်တဵမ်ဝႆႉၼၼ်ႉဢေႃႈ။-

13ၵႅမ်ႈမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇ ပႃႇၼၢမ်ႇသႃႇ၊ ပႃႇမွၵ်ႇဢၼ်ႁွမ်ဢၼ်ႁူၺ်းၼၼ်ႉလႄႈ သီႇသူပ်းမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇ မွၵ်ႇႁဵဝ်းငိုၼ်း ဢၼ်ယွတ်ႇႁူဝ်ႈၼမ်ႉမၼ်း မူႉရၼ်ႇ ၸႅတ်ႈၸႅတ်ႈယူႇၼၼ်ႉဢေႃႈ။-

14မိုဝ်းမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇ လၢၵ်ႈၸွပ်ႈၶမ်းဢၼ်ၵႂၢင်းသႂ်ႇသႅင် ၶရူႉသူႉလိတ်ႉ ၼၼ်ႉလႄႈ တွင်ႉမၼ်းၸဝ်ႈ ပဵၼ်ၸိူဝ်ႉၼင်ႇငႃးၸၢင်ႉဢၼ်ၶၢဝ်ဢၼ်ၸီႇ ႁၢင်ႈၶိူင်ႈသႂ်ႇသႅင်ၼီႇလႃႇၼၼ်ႉဢေႃႈ။-

15တိၼ်မၼ်းၸဝ်ႈၼၼ်ႉ မိူၼ်ၸိူဝ်ႉၼင်ႇ သဝ်ႁိၼ်ၽိူၵ်ႇႁိၼ်ၶၢဝ် ဢၼ်တၢင်ႇသႂ်ႇဝႆႉၵႃႈၼိူဝ်တီႈၶၢမ်ႇတိၼ်သဝ်ၶမ်းလွတ်ႈငၢၼ်ႇၼၼ်ႉလႄႈ၊ ၼႃႈမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇ လွႆ လေႇပၼုၼ်ႇ လႄႈ မျၢတ်ႈလီၸိူဝ်ႉၼင်ႇ တူၼ်ႈ ဢႃႇရိတ်ႉ ၸိူဝ်းၼၼ်ႉဢေႃႈ။-

16သူပ်းမၼ်းၸဝ်ႈၼၼ်ႉ ဝၢၼ်ၼႃႇလူင်လၢင်လႄႈ၊ မၼ်းၸဝ်ႈပျေႉၸုမ်ႇဝႆႉတင်းမုၼ်ၵုင်ႇ ၵႃႈဢၼ်လီႁၵ်ႉလီပႅင်းၼႃႇလူင်လၢင်ၼၼ်ႉဢေႃႈ။ လုၵ်ႈယိင်းဝဵင်း ယေႇရူႉသလႅမ်ႇ ၶဝ်ဢိူၺ်း၊ ၵေႃႉဢၼ်ဝႃႈၼႆၸမ်ႉ၊ ပဵၼ်ၸဝ်ႈဢၼ်ၵဝ်ႁၵ်ႉပႅင်းၼႃႇ၊ ပဵၼ်ၵေႃႉပဵၼ်သေႈၵဝ်ဢေႃႈ။

← Chapter 4 Jump to: Chapter 6 →