Song of Solomon 4

Shan

← Chapter 3 Jump to: Chapter 5 →

1မႂ်းၼၢင်းၼႆႉ ႁၢင်ႈလီဢေႃႈ။ ၼၢင်းဢၼ်ၵဝ်ၸဝ်ႈႁၵ်ႉၼႃႇၼႆႉဢိူၺ်း၊ မႂ်းၼၢင်းႁၢင်ႈလီၼႃႇလူင်လၢင်ဢေႃႈ။ မႂ်းၼၢင်းပျေႉၸုမ်ႇဝႆႉတင်းမၢၵ်ႇတႃၼူၵ်ႉတူႈယူႇ ၵႃႈတီႈၽၢႆႇပုၼ်ႉၽႃႈႁူမ်ႇၼႃႈၼၼ်ႉလႄႈ ၶူၼ်ႁူဝ်မႂ်းၼၢင်းၵေႃႈ မိူၼ်ၸိူဝ်ႉၼင်ႇၽုင်ပႄႉ ဢၼ်ၼွၼ်းယူႇၵႃႈၼိူဝ်ပဵမ်ႉလွႆ ၵီႉလတ်ႉ ၼၼ်ႉဢေႃႈ။-

2ၶဵဝ်ႈမႂ်းၼၢင်းၸိူဝ်းၼၼ်ႉၵေႃႈ ပဵၼ်ၸိူဝ်ႉၼင်ႇၽုင်သူဝ်းဢၼ်ၵႅတ်းႁႆးၶူၼ်ယဝ်ႉလႄႈ လုၵ်ႉသေၵႃႈတီႈဢၼ်ဢၢပ်ႇၼမ်ႉၼၼ်ႉ ၶိုၼ်ႈမႃးၼၼ်ႉလႄႈ ယင်းဢမ်ႇလုတ်ႈဢမ်ႇယွမ်းသေတူဝ်လႄႈ ၸၢင်ႈၵိူတ်ႇလဵင်ႉလုၵ်ႈ ဢၼ်ၽႃၽႄၵူၺ်းၵူၺ်းမႃးၼၼ်ႉဢေႃႈ။-

3သီႇသူပ်းမႂ်းၼၢင်းၵေႃႈ မိူၼ်ၸိူဝ်ႉၼင်ႇ ၸိူၵ်ႈသၢႆဢၼ်လႅင်ၸွင်းႁွင်းဝႆႉၼၼ်ႉလႄႈ သဵင်ၵႂၢမ်းမႂ်းၼၢင်းပဵၼ်ဢၼ်သႃႇယႃႇဝၢၼ်ႁူဢေႃႈ။ ၵႅမ်ႈမႂ်းၼၢင်းဢၼ်မီးယူႇၵႃႈတီႈၽၢႆႇပုၼ်ႉၽႃႈႁူမ်ႇၼႃႈၼၼ်ႉၵေႃႈ မိူၼ်ၸိူဝ်ႉၼင်ႇၶႅပ်းမၢၵ်ႇၸင်ႈဝႆႉဢေႃႈ။-

4ၶေႃးမႂ်းၼၢင်းၵေႃႈ မိူၼ်ၸိူဝ်ႉၼင်ႇတိူၵ်ႈတီႈတိုၵ်းသိုၵ်း ၶုၼ် တႃႇဝိတ်ႈ ဢၼ်ဝႃႈတိူၵ်ႈၽၼ်ႇတႃႇလၢၵ်ႈၼၢၵ်ႈၸုမ်ႇ၊ တီႈဢၼ်ဢဝ်ၶိူင်ႈႁႄႉလၢၵ်ႈၼၢၵ်ႈႁဵင်ၼိုင်ႈ ဢၼ်ပဵၼ်ၶိူင်ႈဢၼ်ႁႄႉဢၼ်ၵင်ႈၵူၺ်းၵူၺ်း ဢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇသုင်းသွင်ႇၼၼ်ႉ ႁွႆႈဝႆႉၼၼ်ႉဢေႃႈ။-

5တဝ်ႈၼူမ်းမႂ်းၼၢင်းသွင်လုၵ်ႈၼၼ်ႉ မိူၼ်ၸိူဝ်ႉၼင်ႇ တိုင်ဢွၼ်ႇၽႃၽႄဢၼ်ၵိၼ်ယူႇ ၵႃႈၼႂ်းပႃႇမွၵ်ႇႁဵဝ်းငိုၼ်းၼၼ်ႉဢေႃႈ။-

6ၸူဝ်ႈဢၼ်မိူင်းဢမ်ႇပႆႇလႅင်း၊ ငဝ်းလပ်းသိင်ႇဢမ်ႇပႆႇပၢႆႈၵႂႃႇၼၼ်ႉၸိုင် ၵဝ်တၵ်းၵႂႃႇၵႃႈတီႈလွႆ မူႉရၼ်ႇ ဢိၵ်ႇတင်းၵုင်း လေႃႇပၢၼ်ႇ ဢေႃႈ။-

7ၼၢင်းဢၼ်ၵဝ်ၸဝ်ႈႁၵ်ႉၼႃႇၼႆႉဢိူၺ်း၊ မႂ်းၼၢင်းၼႆႉႁၢင်ႈလီၽၢင်လီတင်းတူဝ်တင်းၶိင်းဢေႃႈ။ ဢမ်ႇမီးဢပႅတ်ႈသေၸိူဝ်ႉသေပိူင်။-

8လုၵ်ႉသေၵႃႈတီႈလွႆ လေႇပၼုၼ်ႇ မႃးလူၺ်ႈၵၼ်တင်းၵဝ်ၸဝ်ႈသေၵမ်း။ မေးဢၼ်ၵဝ်ၸဝ်ႈမၢႆဝႆႉၼႆႉဢိူၺ်း၊ လုၵ်ႉသေၵႃႈတီႈလွႆ လေႇပၼုၼ်ႇ ၊ မႃးလူၺ်ႈၵၼ်တင်းၵဝ်ၸဝ်ႈသေၵမ်း၊ ယူႇၵႃႈၼိူဝ်ပၢႆၸိၵ်းလွႆ ဢႃႇမၼႃႉ ၊ ပၢႆၸိၵ်းလွႆ သၼီႉရႃႉ ၊ လွႆ ႁေႇရမုၼ်ႇ ၊ ႁူးထမ်ႈတီႈဢၼ်သၢင်ႇသီႈယူႇ၊ လွႆတီႈဢၼ်တူဝ်သိူဝ်ၸုမ်ႈယူႇ ၸိူဝ်းၼၼ်ႉသေလႄႈ လူတူၺ်းသေၵမ်း။-

9ၼွင်ႉယိင်းၵဝ်ၸဝ်ႈဢိူၺ်း၊ မေးဢၼ်ၵဝ်ၸဝ်ႈမၢႆဝႆႉဢိူၺ်း၊ မႂ်းၼၢင်းၼႆႉႁိမ်ႁူင်ႇဢဝ်ႁူဝ်ၸႂ်ၵဝ်ၸဝ်ႈၵႂႃႇယဝ်ႉ။ မႂ်းၼၢင်းဢဝ်တင်း မၢၵ်ႇတႃတူၺ်းပွၵ်ႈၼိုင်ႈ၊ ႁွႆႈၶေႃးႁွပ်ႈၼိုင်ႈၼၼ်ႉ ႁိမ်ႁူင်ႇဢဝ်ႁူဝ်ၸႂ်ၵဝ်ၸဝ်ႈၵႂႃႇယဝ်ႉ။-

10ၼွင်ႉယိင်းၵဝ်ၸဝ်ႈဢိူၺ်း၊ မေးဢၼ်ၵဝ်ၸဝ်ႈမၢႆဝႆႉဢိူၺ်း၊ မႅတ်ႈတႃႇမႂ်းၼၢင်းၼၼ်ႉ ဝၢၼ်ၼႃႇလူင်လၢင်ဢေႃႈ။ မႅတ်ႈတႃႇမႂ်းၼၢင်းၼၼ်ႉ ယဵင်ႈၶႅၼ်းလီတွၼ်းၼႃႇသေၼမ်ႉၸပိတ်ႈဢေႃႈ။ တၢင်းဢၼ်ႁွမ်ဢၼ်ႁူၺ်းၼမ်ႉမၼ်းၼၢမ်ႇသႃႇတီႈမႂ်းၼၢင်းၼၼ်ႉ ယဵင်ႈၶႅၼ်းလီၼႃႇသေ မဵဝ်းၼၢမ်ႇသႃႇတင်းသဵင်ႈတင်းလူင်ဢေႃႈ။-

11မေးဢၼ်ၵဝ်ၸဝ်ႈမၢႆဝႆႉဢိူၺ်း၊ သီႇသူပ်းမႂ်းၼၢင်းၼၼ်ႉ ၸၢင်ႈယွတ်ႇႁူဝ်ႈယူႇၸိူဝ်ႉၼင်ႇ ႁူဝ်ၼမ်ႉႁူင်းၽိုင်ႈလႄႈ ၵႃႈတီႈတႂ်ႈလိၼ်ႉမႂ်းၼၢင်းၼၼ်ႉ မီးၼမ်ႉၼူမ်း ဢိၵ်ႇတင်းၼမ်ႉၽိုင်ႈဢေႃႈ။ တၢင်းဢၼ်ႁွမ်ဢၼ်ႁူၺ်း ၶူဝ်းၼုင်ႈတၢင်းမႆမႂ်းၼၢင်းၵေႃႈ မိူၼ်ၸိူဝ်ႉၼင်ႇ တၢင်းဢၼ်ႁွမ်ဢၼ်ႁူၺ်း လေႇပၼုၼ်ႇ ၼၼ်ႉဢေႃႈ။-

12ၼွင်ႉယိင်းၵဝ်ၸဝ်ႈ မေးဢၼ်ၵဝ်ၸဝ်ႈမၢႆဝႆႉၼၼ်ႉ ပဵၼ်သူၼ်ဢူးယဵၼ်ႇ ဢၼ်လွမ်ႉႁူဝ်ႉဝႆႉ၊ ၼမ်ႉၼွင်ဢၼ်ဢုတ်းဝႆႉႁပ်းဝႆႉ၊ ၼမ်ႉဢွၵ်ႇႁူးဢၼ်တွၵ်ႇတၼ်းသိၵ်ႈဝႆႉဢေႃႈ။-

13တူၼ်ႈၵႃႈဢွၼ်ႇမႂ်းၼၢင်းၸိူဝ်းၼၼ်ႉ ပႃးပႃႇမၢၵ်ႇၸင်ႈ ဢၼ်ၸၢင်ႈမၢၵ်ႇမၢၵ်ႇဢၼ်ဝၢၼ်၊ ပႃႇ ႁိၼ်ႇၼႃႇ ဢၼ်လေႃးၵၼ်တင်း တူၼ်ႈ ၼႃႇတူႉ ၊-

14မဵဝ်းတူၼ်ႈ ၼႃႇတူႉ ၊ တူၼ်ႈ ၵူႉရႃႉၵူႉမႃႉ ၊ တူၼ်ႈဢွႆႈ၊ တူၼ်ႈၵႅင်းႁွမ်၊ မဵဝ်းတူၼ်ႈ လေႃႇပၢၼ်ႇ ၊ တူၼ်ႈ မူႉရၼ်ႇ ၊ တူၼ်ႈ ဢၵျေုႇ ဢိၵ်ႇတင်း မဵဝ်းတူၼ်ႈၼၢမ်ႇသႃႇ ဢၼ်မျၢတ်ႈၼႃႇသေပိူၼ်ႈၵႃႈမီးဢေႃႈ။-

15မႂ်းၼၢင်းပဵၼ်ၼမ်ႉၼွင် ၵႃႈၼႂ်းသူၼ်ဢူးယဵၼ်ႇ၊ ၼမ်ႉဢွၵ်ႇႁူးဢၼ်လႆယူႇ၊ ၼမ်ႉႁွင်ႈၼမ်ႉၵႄးဢၼ်လႆဢွၵ်ႇသေ ၵႃႈၼႂ်းလွႆ လေႇပၼုၼ်ႇ မႃးၼၼ်ႉဢေႃႈ။-

16လူမ်းတၢင်းႁွင်ႇဢိူၺ်း၊ တိုၼ်ႇသေၵမ်း။ လူမ်းတၢင်းၸၢၼ်းဢိူၺ်း၊ မႃးသေၵမ်း။ ဢွၼ်ၵၼ်ထူဝ်းမႃးၵႃႈၼိူဝ်သူၼ်ဢူးယဵၼ်ႇၵဝ်ၸဝ်ႈ ႁႂ်ႈဢၢႆဢၼ်ႁွမ်ဢၼ်ႁူၺ်းမၼ်း မိုတ်းမိူဝ်ၵႂႃႇသေၵမ်း။ ႁႂ်ႈၸဝ်ႈဢၼ်ၵဝ်ႁၵ်ႉပႅင်းၼၼ်ႉ ၶဝ်ႈၵႃႈၼႂ်းသူၼ်ဢူးယဵၼ်ႇမၼ်းၸဝ်ႈလႄႈၵိၼ်မၢၵ်ႇမၼ်း ဢၼ်ဝၢၼ်ဢၼ်ၸဵမ်းၼၼ်ႉသေၵမ်းလူၺ်ႈ။

← Chapter 3 Jump to: Chapter 5 →