Song of Solomon 7

Shan

← Chapter 6 Jump to: Chapter 8 →

1လုၵ်ႈယိင်းၶုၼ်ဢိူၺ်း၊ တိၼ်မႂ်းၼၢင်းၼၼ်ႉ တိုဝ်းၶႅပ်းတိၼ်ယူႇသေလႄႈ ပဵၼ်ဢၼ်ႁၢင်ႈလီႁၢင်ႈငၢမ်းၼႃႇလူင်လၢင်ဢေႃႈ။ ပွတ်းဢႅဝ်မႂ်းၼၢင်းၼၼ်ႉ ပဵၼ်ၸိူဝ်ႉၼင်ႇ ရတ်ႈတၼႃႇသႅင်လီ ဢၼ်ၵေႃႉဢၼ်လၵ်းလႅမ်ၸၢင်ႈမေႃမႄးႁဵတ်းဝႆႉၼၼ်ႉၶႃႈဢေႃႈ။-

2တွင်ႉၼွႆႉမႂ်းၼၢင်းၼၼ်ႉ ပဵၼ်ၵွၵ်းဢၼ်တဵမ်ဝႆႉတင်းၼမ်ႉၸပိတ်ႈ ဢၼ်လေႃးလူၺ်ႈၵၼ်တင်းယႃဢၼ်ႁွမ်ဢၼ်ႁူၺ်းၼၼ်ႉလႄႈ တွင်ႉမႂ်းၼၢင်းၼၼ်ႉ ပဵၼ်ၵွင်ၶဝ်ႈပိူၵ်ႇ ဢၼ်ဢဝ်မွၵ်ႇႁဵဝ်းငိုၼ်း ၸီႇႁၢင်ႈၶိူင်ႈဝႆႉၼၼ်ႉဢေႃႈ။-

3တဝ်ႈၼူမ်းမႂ်းၼၢင်းသွင်လုၵ်ႈၼၼ်ႉ မိူၼ်ၸိူဝ်ႉၼင်ႇတိုင်ဢွၼ်ႇ ဢၼ်ၽႃၽႄၼၼ်ႉဢေႃႈ။-

4ၶေႃးမႂ်းၼၢင်းၼၼ်ႉ ပဵၼ်ၸိူဝ်ႉၼင်ႇထဵင်လၢင်းငႃးၸၢင်ႉၼၼ်ႉဢေႃႈ။ မၢၵ်ႇတႃမႂ်းၼၢင်းၼၼ်ႉ ပဵၼ်ၸိူဝ်ႉၼင်ႇၼမ်ႉၼွင် ၵႃႈတီႈဝဵင်း ႁေႇသၽုၼ်ႇ ၵႃႈႁိမ်းၽၵ်းတူ ပႃႇသရပ်ႉပိမ်း ၼၼ်ႉ ၸိူဝ်းၼၼ်ႉလႄႈ၊ ၶူႈလင်မႂ်းၼၢင်းၼၼ်ႉပဵၼ်ၸိူဝ်ႉၼင်ႇထဵင်လၢင်း လေႇပၼုၼ်ႇ ဢၼ်ဝၢႆႇၼႃႈတေႃႇဝဵင်း ထမ်ႇမသႅတ်ႉ ၼၼ်ႉဢေႃႈ။-

5ၵွၵ်းႁူဝ်မႂ်းၼၢင်းၼၼ်ႉ မိူၼ်ၵၼ်တင်းလွႆ ၵရမေႇလႃႉ လႄႈ ၶူၼ်ႁူဝ်မႂ်းၼၢင်းၼၼ်ႉ ႁၢင်ႈၶိူင်ႈဢၼ်လႅင်ၵမ်ႇဝႆႉၼၼ်ႉဢေႃႈ။ ၶုၼ်လူင်မီးတၢင်းဢၼ် လႆႈၶၢမ်ႇတၢင်းဢၼ်မတ်ႉၽုၵ်ႇဝႆႉလူၺ်ႈ ၶူၼ်ႁူဝ်ဢၼ်ၽၼ်ႈဢၼ်ၽိူဝ်ၼၼ်ႉယဝ်ႉ။-

6ၼၢင်းဢၼ်ၵဝ်ၸဝ်ႈႁၵ်ႉၼႆႉဢိူၺ်း၊ မႂ်းၼၢင်းပဵၼ်ဢၼ်ႁၢင်ႈလီၼႃႇလူင်လၢင် ပုၼ်ႈဢၼ်ၵဝ်ၸဝ်ႈတၵ်းလႆႈမူၼ်ႈပျေႃႇလႄႈ ပျေႉၸုမ်ႇဝႆႉတင်းလၢၵ်ႈၶၼႃႇဢၼ်လီႁၵ်ႉလီပႅင်းဢေႃႈ။-

7တၢင်းဢၼ်သုင်မႂ်းၼၢင်းၼၼ်ႉ မိူၼ်ၸိူဝ်ႉၼင်ႇတူၼ်ႈထၢၼ်လႄႈ တဝ်ႈၼူမ်းမႂ်းၼၢင်းၼၼ်ႉမိူၼ်ၸိူဝ်ႉၼင်ႇပုၵ်ႉမၢၵ်ႇၸပိတ်ႈဢေႃႈ။-

8ၵဝ်ၸဝ်ႈလႆႈလၢတ်ႈလႄႈဝႃႈ၊ ၵဝ်တၵ်းၶိုၼ်ႈတူၼ်ႈထၢၼ်ၼၼ်ႉလႄႈ ယိပ်းၵမ်ၵၢၼ်ႈတွင်ထၢၼ်ဢေႃႈ၊ ဝႃႈၼင်ႇၼႆလႄႈလႆႈသမ်ႉ တဝ်ႈၼူမ်းမႂ်းၼၢင်းၼၼ်ႉ ပဵၼ်ၸိူဝ်ႉၼင်ႇပုၵ်ႉမၢၵ်ႇၸပိတ်ႈဝႆႉလႄႈ ဢၢႆဢၼ်မႂ်းၼၢင်းထူၺ်ႈၸႂ်ၼၼ်ႉ ပဵၼ်ၸိူဝ်ႉၼင်ႇဢၢႆမၢၵ်ႇဢိုၼ်ႈဝၢၼ်ၼၼ်ႉဢေႃႈ။-

9သူပ်းမႂ်းၼၢင်းၵေႃႈ ပဵၼ်ၸိူဝ်ႉၼင်ႇၼမ်ႉၸပိတ်ႈဢၼ်လီၼႃႇသေပိူၼ်ႈ ဢၼ်ၸၢင်ႈလႆၶဝ်ႈၵႂႃႇယူႇသိုဝ်ႈသိုဝ်ႈပုၼ်ႈၼၢင်းဢၼ်ၵဝ်ၸဝ်ႈႁၵ်ႉၼႃႇၼၼ်ႉလႄႈ ၸၢင်ႈလႆၶဝ်ႈၵႂႃႇၵႃႈၼႂ်းသူပ်းၶဝ်ၸိူဝ်းဢၼ်ၼွၼ်းလပ်းၼၼ်ႉ ၼိမ်ၼိမ်လီလီဢေႃႈ။

10ၵဝ်ပဵၼ်တီႈဢၼ်ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉပိူင်ႇလႄႈ မၼ်းၸဝ်ႈၸၢင်ႈၸွမ်းဢလူဝ်ႇၵဝ်ဢေႃႈ။-

11မႃးသေၵမ်းတီႈၶႃႈ၊ ၸဝ်ႈဢၼ်ၶႃႈၼၢင်းႁၵ်ႉပႅင်းၼႃႇတီႈၶႃႈဢိူၺ်း၊ ဢွၼ်ၵၼ်ဢွၵ်ႇၵႂႃႇၵႃႈတီႈထိူၼ်ႇလႄႈ ႁႂ်ႈပူၼ်ႉၶိုၼ်းၵႃႈၼႂ်းဝၢၼ်ႈၸိူဝ်းၼၼ်ႉတီႈၶႃႈႁဝ်း။-

12ဢွၼ်ၵၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ၵႂႃႇၵႃႈတီႈသူၼ်ဢူးယဵၼ်ႇၸပိတ်ႈတီႈၶႃႈႁဝ်း။ ဢွၼ်ၵၼ်လူတူၺ်းလွင်ႈဢၼ်တူၼ်ႈၶိူဝ်းမၢၵ်ႇၸပိတ်ႈၽူၵ်ႈလီႁႅင်းလီႁိုဝ်။ ဢမ်ႇၽူၵ်ႈလီႁႅင်းလီႁိုဝ်။ လွင်ႈဢၼ်မွၵ်ႇမၼ်းၵီႈယဝ်ႉႁိုဝ် ဢမ်ႇပႆႇၵီႈႁိုဝ်။ လွင်ႈဢၼ်တူၼ်ႈမၢၵ်ႇၸၢင်ႈမွၵ်ႇယဝ်ႉႁိုဝ်။ ဢမ်ႇပႆႇမွၵ်ႇႁိုဝ်ၼၼ်ႉတီႈၶႃႈႁဝ်း။ ၵႃႈတီႈၼၼ်ႈၶႃႈၼၢင်းၸဝ်ႈ တၵ်းဢဝ်မႅတ်ႈတႃႇၶႃႈၼၢင်းၸဝ်ႈဢၢပ်ႈပၼ် တီႈၸဝ်ႈႁဝ်းတီႈၶႃႈဢေႃႈ။-

13တူၼ်ႈယႃဢၶျူဝ်ႇတင်းလၢႆ ႁွမ်ႁူၺ်းလႄႈ ၵႃႈတီႈႁိမ်းၽၵ်းတူႁဝ်းၶႃႈၼၼ်ႉ မီးမဵဝ်းမၢၵ်ႇဢၼ်ဝၢၼ် ဢၼ်ၵဝ်ႇဢၼ်မႂ်ႇ ၵူႈၸိူဝ်ႉၵူႈမဵဝ်း ဢၼ်ၶႃႈၼၢင်းၸဝ်ႈလႆႈသိမ်းဝႆႉ ပုၼ်ႈၸဝ်ႈႁဝ်းၼၼ်ႉတီႈၶႃႈယဝ်ႉ။ ၸဝ်ႈဢၼ်ၵဝ်ႁၵ်ႉပႅင်းၼႃႇဢိူၺ်း၊

← Chapter 6 Jump to: Chapter 8 →