Song of Solomon 6

Shan

← Chapter 5 Jump to: Chapter 7 →

1မႄႈယိင်းဢၼ်ႁၢင်ႈလီလိူဝ်တွၼ်းၼႃႇသေမႄႈယိင်းတင်းလၢႆၼႆႉဢိူၺ်း၊ ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉ ၵႂႃႇၵႃႈတီႈလႂ်။ လွင်ႈၼင်ႇႁိုဝ် ႁဝ်းတၵ်းလႆႈႁႃဢဝ်မၼ်း ႁူမ်ႈလူၺ်ႈၵၼ်တင်းမႂ်းၸိုင်၊ ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉ ငိူင်ႉဝႄႈၵႂႃႇၸူးၵႃႈတီႈလႂ်။

2ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ လူင်းၵႂႃႇၸူးၵႃႈတီႈပႃႇၼၢမ်ႇသႃႇ ၵႃႈၼႂ်းသူၼ်ဢူးယဵၼ်ႇမၼ်းၸဝ်ႈၼၼ်ႉ ႁႂ်ႈလႆႈၵိၼ်လႆႈၶူပ်းၵႃႈၼႂ်းသူၼ်ဢူးယဵၼ်ႇမၼ်းၸဝ်ႈလႄႈ ဝိတ်းဢဝ်မွၵ်ႇႁဵဝ်းငိုၼ်းတင်းလၢႆဢေႃႈ။-

3ၵဝ်ပဵၼ်တီႈဢၼ် ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉပိူင်ႇဢေႃႈ။ ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉၵေႃႈ ပဵၼ်တီႈဢၼ်ၵဝ်ပိူင်ႇဢေႃႈ။ မၼ်းၸဝ်ႈၵိၼ်ယူႇၵႃႈၼႂ်းပႃႇမွၵ်ႇႁဵဝ်းငိုၼ်းၼၼ်ႉဢေႃႈ။

4ၼၢင်းဢၼ်ၵဝ်ၸဝ်ႈႁၵ်ႉၼႆႉဢိူၺ်း၊ မႂ်းၼၢင်းၼႆႉႁၢင်ႈလီၽၢင်လီမိူၼ်ၸိူဝ်ႉၼင်ႇ ဝဵင်း တီႉရၸႃႉ လႄႈ သေႇၶျႃႇလီငၢမ်း မိူၼ်ၸိူဝ်ႉၼင်ႇဝဵင်း ယေႇရူႉသလႅမ်ႇ ဢေႃႈ။ ပဵၼ်တီႈဢၼ်လီၵူဝ်လီႁႄ မိူၼ်ၸိူဝ်ႉၼင်ႇတပ်ႉသိုၵ်းဢၼ်ပူၵ်းလၢမ်ႇဝႆႉၼၼ်ႉဢေႃႈ။-

5ဢဝ်မၢၵ်ႇတႃမႂ်းၼၢင်း ငိူင်ႉဝႄႈၵဝ်ၸဝ်ႈသေၵမ်း။ ၶဝ်ပႄႉၼႅင်ႇၵဝ်ၸဝ်ႈယဝ်ႉ။ ၶူၼ်ႁူဝ်မႂ်းၼၢင်းၵေႃႈ မိူၼ်ၸိူဝ်ႉၼင်ႇၽုင်ပႄႉဢၼ်ၼွၼ်းယူႇၵႃႈၼိူဝ်ပဵမ်ႉလွႆ ၵီႉလတ်ႉ ၼၼ်ႉဢေႃႈ။-

6ၶဵဝ်ႈမႂ်းၼၢင်းၸိူဝ်းၼၼ်ႉၵေႃႈ ပဵၼ်ၸိူဝ်ႉၼင်ႇၽုင်သူဝ်းဢၼ်ၵႅတ်းႁႆးၶူၼ်ယဝ်ႉလႄႈ လုၵ်ႉသေၵႃႈတီႈဢၼ်ဢၢပ်ႇၼမ်ႉၼၼ်ႉ ၶိုၼ်ႈမႃးၼၼ်ႉလႄႈ ယင်းဢမ်ႇလုတ်ႈဢမ်ႇယွမ်းသေတူဝ်လႄႈ ၸၢင်ႈၵိူတ်ႇလဵင်ႉလုၵ်ႈဢၼ်ၽႃၽႄၵူၺ်းၵူၺ်းမႃးၼၼ်ႉဢေႃႈ။-

7ၵႅမ်ႈမႂ်းၼၢင်း ဢၼ်မီးယူႇၵႃႈတီႈၽၢႆႇပုၼ်ႉ ၽႃႈႁူမ်ႇၼႃႈၼၼ်ႉၵေႃႈ မိူၼ်ၸိူဝ်ႉၼင်ႇၶႅပ်းမၢၵ်ႇၸင်ႈဝႆႉဢေႃႈ။-

8မီးၼၢင်းႁေႃၶမ်းႁူၵ်းသိပ်း၊ ၼၢင်းဢွၼ်ႇပႅတ်ႇသိပ်း၊ ၵၼ်ႇၺႃႇလုၵ်ႈယိင်းသၢဝ်ၸိူင်ႉၼၢင်း ဢမ်ႇႁူႉၼမ်လႂ်ဢေႃႈ။-

9ၼူၵ်ႉတူႈၵဝ်ၸဝ်ႈ၊ ၵေႃႉဢၼ်ၸေးၸုမ်ႇၵဝ်ၸဝ်ႈၼၼ်ႉ မီးယူႇၵႃႈတီႈၵဝ်ၸဝ်ႈၼၢင်းလဵဝ်ၵူၺ်းဢေႃႈ။ ပဵၼ်လုၵ်ႈယိင်းလဵဝ်ၵူၺ်း တီႈမႄႈမၼ်းဢေႃႈ။ ပဵၼ်လုၵ်ႈယိင်းဢၼ်ႁၵ်ႉၼႃႇသေပိူၼ်ႈ တီႈၵေႃႉဢၼ်ၵိူတ်ႇလဵင်ႉမၼ်းမႃးၼၼ်ႉဢေႃႈ။ လုၵ်ႈယိင်းၵူၼ်းတင်းလၢႆ ႁၼ်မၼ်းလႄႈ ဢွၼ်ၵၼ်ပၼ်တၢင်းလီတီႈမၼ်းဢေႃႈ။ ၼၢင်းႁေႃၶမ်းတင်းလၢႆ ဢိၵ်ႇတင်းၼၢင်းဢွၼ်ႇၸိူဝ်းၼၼ်ႉ ဢွၼ်ၵၼ် ယွင်ႈယေႃးမၼ်းဢေႃႈ။-

10မႄႈယိင်းဢၼ်ႁၢင်ႈလီၽၢင်လီ မိူၼ်ၸိူဝ်ႉၼင်ႇလိူၼ်၊ ႁိူဝ်ႈလႅင်းမိူၼ်ၸိူဝ်ႉၼင်ႇၵၢင်ဝၼ်း၊ ပဵၼ်တီႈဢၼ်လီၵူဝ်လီႁႄ မိူၼ်ၸိူဝ်ႉၼင်ႇတပ်ႉသိုၵ်း ဢၼ်ပူၵ်းလၢမ်ႇဝႆႉလႄႈ ငွၵ်ႈတူၺ်းမုင်ႈတူၺ်း မိူၼ်ၸိူဝ်ႉၼင်ႇၵၢင်ၼႂ်ၼၼ်ႉၸမ်ႉ၊ ပဵၼ်ၽူႈလႂ်။-

11ၵဝ်လူင်းၵႂႃႇၸူးၵႃႈတီႈသူၼ်ဢူးယဵၼ်ႇမၢၵ်ႇမႆႉမၢၵ်ႇတွၵ်ႇ ႁႂ်ႈလႆႈလူတူၺ်း တူၼ်ႈဢၼ်လိပ်းဢၼ်ၶဵဝ်ၵႃႈၼႂ်းၶူင်ႈၼႂ်းႁူၺ်ႈလႄႈ ႁူႉလွင်ႈဢၼ်တူၼ်ႈၶိူဝ်းမၢၵ်ႇၸပိတ်ႈ ၽူၵ်ႈလီႁႅင်းလီႁိုဝ်။ ဢမ်ႇၽူၵ်ႈလီႁႅင်းလီႁိုဝ် ဢိၵ်ႇတင်းလွင်ႈဢၼ်တူၼ်ႈမၢၵ်ႇၸင်ႈမွၵ်ႇမွၵ်ႇယဝ်ႉႁိုဝ်။ ဢမ်ႇပႆႇမွၵ်ႇႁိုဝ်ၼၼ်ႉဢေႃႈ။-

12ၸူဝ်ႈဢၼ်ၵဝ်ဢမ်ႇပႆႇလႆႈသတီႉၼၼ်ႉၸိုင်၊ ဝီႉၺိၺ်ႇၵဝ်ႁႂ်ႈၵဝ်ပဵၼ်ၸိူဝ်ႉၼင်ႇဢၼ်ၶီႇလေႃႉရထႃး ဢမီႉၼတပ်ႉ ဢေႃႈ။

13သူႉလမိတ်ႉ ဢိူၺ်း၊ ၶိုၼ်းမႃးသေၵမ်း။ ၶိုၼ်းမႃးသေၵမ်း။ ၼင်ႇႁိုဝ်ႁဝ်းတၵ်းလႆႈႁၼ်မႂ်းၸိုင်၊ ၶိုၼ်းမႃးသေၵမ်း။ ၶိုၼ်းမႃးသေၵမ်း။ တၵ်းလႆႈထူပ်းႁၼ်လွင်ႈတၢင်းဢၼ်လႂ်တီႈ သူႉလမိတ်ႉ ၼၼ်ႉ။ တၵ်းလႆႈထူပ်းႁၼ်မိူၼ်ၸိူဝ်ႉၼင်ႇ တပ်ႉသိုၵ်းသွင်တပ်ႉၼၼ်ႉဢေႃႈ။

← Chapter 5 Jump to: Chapter 7 →