Song of Solomon 8

Shan

← Chapter 7 Jump to:

1ၶႂ်ႈႁႂ်ႈၸဝ်ႈႁဝ်းပဵၼ်ၸိူဝ်ႉၼင်ႇပီႈၸၢႆးဢွၵ်ႇၶႃႈၼၢင်းၸဝ်ႈ ဢၼ်ၵိၼ်ၼူမ်းမႄႈၶႃႈၼၢင်းၸဝ်ႈၼၼ်ႉတီႈၶႃႈဢေႃႈ။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ မိူဝ်ႈဢၼ်ၶႃႈၼၢင်းၸဝ်ႈ ထူပ်းႁၼ်ၸဝ်ႈႁဝ်း ၵႃႈတီႈၼွၵ်ႈၼၼ်ႉ တၵ်းၸုပ်ႇတၵ်းၼူမ်လႄႈ ဢမ်ႇမီးတၢင်းဢၼ် ပိူၼ်ႈတၵ်းသႄႉသွမ်းတီႈၶႃႈ၊-

2ၶႃႈၼၢင်းၸဝ်ႈ တၵ်းၸုင်ဢဝ်မိုဝ်းၸဝ်ႈႁဝ်းလႄႈ ဢဝ်ၵႂႃႇၵႃႈၼႂ်းလုၵ်းတီႈၼွၼ်းမႄႈၶႃႈၼၢင်းၸဝ်ႈ ဢၼ်တၵ်းသင်ႇသွၼ် ပၼ်ၶႃႈၼၢင်းၸဝ်ႈၼၼ်ႉလႄႈ၊ ၶႃႈၼၢင်းၸဝ်ႈတၵ်းဢဝ်ၼမ်ႉၸပိတ်ႈ ဢၼ်လေႃးလူၺ်ႈၵၼ်တင်း ယႃဢၼ်ႁွမ်ဢၼ်ႁူၺ်းဢိၵ်ႇတင်း ၼမ်ႉမၢၵ်ႇၸင်ႈၶႃႈၼၢင်းၸဝ်ႈၼၼ်ႉ ႁႂ်ႈၸဝ်ႈႁဝ်းသူတ်ႉၵိၼ် တီႈၶႃႈဢေႃႈ။-

3မိုဝ်းၶွၼ်သၢႆႉမၼ်းၸဝ်ႈၼၼ်ႉ ႁွင်းဢဝ်ၵွၵ်းႁူဝ်ၵဝ်ယူႇလႄႈ၊ မိုဝ်းၶွၼ်ၶႂႃမၼ်းၸဝ်ႈၼၼ်ႉ ၵွတ်ႇၵဝ်ယူႇဢေႃႈ။-

4လုၵ်ႈယိင်းဝဵင်း ယေႇရူႉသလႅမ်ႇ ၶဝ်ဢိူၺ်း၊ ၵဝ်တိူင်ႇဝႃႈၵိၼ်ႇဝႃႈတီႈသူ ႁႂ်ႈသူဢမ်ႇယႃႉဢမ်ႇပူၵ်းၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ တေႃႇထိုင်ႁွတ်ႈမၼ်းၸဝ်ႈထၼ်ႈပေႃးတိုၼ်ႇဢဝ်ၵူၺ်းမၼ်းၸဝ်ႈၼၼ်ႉဢေႃႈ။

5ၵေႃႉဢၼ်ဢိင်ဢွႆႇၽႃႁွမ်းၸဝ်ႈဢၼ်မၼ်းႁၵ်ႉၼၼ်ႉယူႇလႄႈ လုၵ်ႉသေၵႃႈၼႂ်းထိူၼ်ႇၼႂ်းၶိူဝ်းမႃးၼၼ်ႉၸမ်ႉ ပဵၼ်ၽူႈလႂ်။ ၵဝ်ၸဝ်ႈလႆႈယႃႉလႆႈပူၵ်းမႂ်း ၵႃႈတီႈတႂ်ႈတူၼ်ႈမၢၵ်ႇဢိုၼ်ႈဝၢၼ်ၼၼ်ႉမႃးယဝ်ႉ။ မႄႈမႂ်းၼၢင်းၼၼ်ႉ ၵိူတ်ႇလဵင်ႉမႂ်းၼၢင်းမႃးၵႃႈတီႈၼၼ်ႈယဝ်ႉ။ ၵေႃႉဢၼ်ၵိူတ်ႇလဵင်ႉမႂ်းၼၢင်းၼၼ်ႉ လႆႈႁၼ်ၼႃႈမႂ်းၼၢင်းၵႃႈတီႈၼၼ်ႈယဝ်ႉ။-

6ဢဝ်ၶႃႈၼၢင်းၸဝ်ႈၼႆႉ တွၵ်ႇတၼ်းသိၵ်ႈဝႆႉၵႃႈၼိူဝ်ႁူဝ်ၸႂ်ၸဝ်ႈႁဝ်းသေၵမ်းတီႈၶႃႈ၊ ဢဝ်တွၵ်ႇတၼ်းသိၵ်ႈဝႆႉၵႃႈၼိူဝ်ၶႅၼ်ၸဝ်ႈႁဝ်းသေၵမ်းတီႈၶႃႈ၊ လွင်ႈမၼ်းၸမ်ႉ မႅတ်ႈတႃႇမီးတၼ်းၶူဝ်းယႂ်ႇၼႃႇလူင်လၢင် ပဵင်းတၢၼ်ႇတၢင်းတၢႆတီႈၶႃႈဢေႃႈ။ သၽေႃးဢၼ်ဢမ်ႇယုမ်ႇၽူဝ်ယုမ်ႇမေးၼၼ်ႉႁၢဝ်ႈၵျၢမ်းၼႃႇလူင်လၢင် ပဵင်းတၢၼ်ႇမိူင်းမရၼႃႉတီႈၶႃႈဢေႃႈ။ ဢၢႆႁႅင်းမၼ်းၼၼ်ႉ ပဵၼ်ဢၢႆႁႅင်းၽႆး၊ ဢၢႆႁႅင်းၽႃႉမႅပ်ႈတီႈၶႃႈဢေႃႈ။-

7ၼမ်ႉဢၼ်ၼမ်ၼႃႇၼၼ်ႉ ဢမ်ႇဢဝ်မႅတ်ႈတႃႇတၢႆလႆႈ။ ၼမ်ႉႁွင်ႈၼမ်ႉၵႄးတင်းလၢႆၼၼ်ႉ ဢမ်ႇထူမ်ႈႁူမ်ႇမၼ်းလႆႈ။ ပေႃးသေၵေႃႉသေၵူၼ်းၶႂ်ႈဢဝ်ဢုၵ်ႉၸႃႇၶူဝ်းလဵင်း ၵႃႈဢၼ်မီးၵႃႈၼႂ်းႁိူၼ်းမၼ်းၼၼ်ႉ ပၼ်ပုၼ်ႈဢၼ် တၵ်းလႆႈမႅတ်ႈတႃႇၸိုင်၊ မၼ်းတၵ်းလႆႈၶၢမ်ႇတၢင်းဢၼ်ႁဵတ်းဢမ်ႇပေႃးၼင်ႇႁိုဝ်ၼႃႇလူင်လၢင်ဢေႃႈ။

8ႁဝ်းမီးၼွင်ႉယိင်းဢွၼ်ႇၵေႃႉၼိုင်ႈဢေႃႈ။ မၼ်းၼၼ်ႉဢမ်ႇပႆႇမီးတဝ်ႈၼူမ်းၸွၼ်ၼူမ်း။ ၼႂ်းမိုဝ်ႉဝၼ်းဢၼ်ပိူၼ်ႈယွၼ်းဢဝ် ၼွင်ႉယိင်းႁဝ်းၼၼ်ႉ၊ ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်ပုၼ်ႈမၼ်း။-

9ပေႃးမၼ်းပဵၼ်လမ်းဝဵင်းၸိုင်၊ ႁဝ်းတၵ်းႁဵတ်းႁေႃငိုၼ်းသႂ်ႇၵႃႈၼိူဝ်မၼ်းလႄႈ ပေႃးမၼ်းပဵၼ်ၽၵ်းတူၸိုင် ႁဝ်းတၵ်းဢဝ်ပႅၼ်ႈမႆႉ ဢႃႇရိတ်ႉ ႁၢင်ႈၶိူင်ႈသႂ်ႇဢေႃႈ။

10ၵဝ်ပဵၼ်လမ်းဝဵင်းလႄႈ တဝ်ႈၼူမ်းၵဝ်ပဵၼ်ၸိူဝ်ႉၼင်ႇထဵင်လၢင်း ၵႃႈၼိူဝ်မၼ်းဢေႃႈ။ ပိူဝ်ႈၼႆလႄႈ ၵဝ်လႆႈမီးယူႇသိုဝ်ႈၼႃႈတႂ်ႈတႃမၼ်းၸဝ်ႈ မိူၼ်ၸိူဝ်ႉၼင်ႇၵေႃႉဢၼ်လႆႈထူပ်းတၢင်းၼိမ်ယဝ်ႉၼၼ်ႉဢေႃႈ။

11ၶုၼ် သေႃးလမုၼ်ႇ မီးသူၼ်ဢူးယဵၼ်ႇၸပိတ်ႈ ၵႃႈတီႈမိူင်း ပႃႇလႁႃႇမုၼ်ႇ ၼၼ်ႉ သူႇၼိုင်ႈဢေႃႈ။ မၼ်းၸဝ်ႈဢဝ်ၸၢင်ႈငႃ ပၼ်ဝႆႉတီႈၵူၼ်းပႂ်ႉသူၼ်ဢူးယဵၼ်ႇ တင်းလၢႆလႄႈ ၶဝ်ၼၼ်ႉလႆႈဢွၼ်ၵၼ်သၢၵ်ႈငိုၼ်း ယေႈၵေႃႉယေႈႁဵင်၊ ပုၼ်ႈဢၼ်ၶဝ်လႆႈၵိၼ်မၢၵ်ႇမၼ်းၼၼ်ႉဢေႃႈ။-

12သူၼ်ဢူးယဵၼ်ႇၸပိတ်ႈဢၼ်ၵဝ်ပိူင်ႇၸမ်ႉ၊ မီးယူႇၵႃႈတီႈၽၢႆႇၼႃႈၵဝ်ဢေႃႈ။ ၸဝ်ႈၶုၼ် သေႃးလမုၼ်ႇ တီႈၶႃႈဢိူၺ်း၊ ၸဝ်ႈႁဝ်းတၵ်းလႆႈငိုၼ်းႁဵင်ၼိုင်ႈလႄႈ ၶဝ်ၸိူဝ်းဢၼ်ပႂ်ႉမၢၵ်ႇမၼ်းၸိူဝ်းၼၼ်ႉ လႆႈသွင်ပၢၵ်ႇတီႈၶႃႈဢေႃႈ။-

13ၸဝ်ႈဢၼ်ယူႇၵႃႈၼႂ်းသူၼ်ဢူးယဵၼ်ႇတီႈၶႃႈဢိူၺ်း၊ သဵင်ၵႂၢမ်းမႂ်းၸိုင် ၶဝ်ၸိူဝ်းဢၼ်ႁူမ်ႈဢၼ်ပွင်းၵၼ်တင်းၸဝ်ႈႁဝ်းၼၼ်ႉၸၢင်ႈဢွၼ်ၵၼ် ထွမ်ႇငိၼ်းသဵင်ၸဝ်ႈႁဝ်းတီႈၶႃႈဢေႃႈ။ ၶႃႈၼၢင်းၸဝ်ႈၵေႃႈ ႁႂ်ႈငိၼ်းသေၵမ်းလူၺ်ႈ။

14မႃးၶၼ်ၶၼ်ၽႂ်းၽႂ်းသေၵမ်းတီႈၶႃႈ၊ ၸဝ်ႈဢၼ်ၶႃႈၼၢင်းႁၵ်ႉပႅင်းၼႃႇတီႈၶႃႈဢိူၺ်း၊ ၶႅၼ်းတေႃႈပဵၼ်ၸိူဝ်ႉၼင်ႇ တိုင်ဢွၼ်ႇယီးဢွၼ်ႇ ၵႃႈၼိူဝ်လွႆၼၢမ်ႇသႃႇၼၼ်ႉ သေၵမ်းတီႈၶႃႈ၊ လိၵ်ႈႁဵတ်းၵႂၢမ်းသေႃးလမုၼ်ႇယဝ်ႉယဝ်ႉဢေႃႈ။

← Chapter 7 Jump to: