Song of Solomon 3

Shan

← Chapter 2 Jump to: Chapter 4 →

1ၵဝ်ႁႃၵေႃႉဢၼ်ဝီႉၺိၺ်ႇၵဝ်ႁၵ်ႉပႅင်းၼၼ်ႉ ၵႃႈၼိူဝ်တီႈၼွၼ်းၵဝ် ၶိင်ႇၵၢင်ၶိုၼ်းဢေႃႈ။ ႁႃသေၵေႃႈဢမ်ႇထူပ်း။-

2ၵဝ်ဝႃႈ၊ ၵဝ်တၵ်းလုၵ်ႉလႄႈၵႂႃႇၵႃႈၼႂ်းဝဵင်း ၵႃႈၼႂ်းသဵၼ်ႈတၢင်းသၢႆတႃႈတင်းလၢႆဢေႃႈ။ ၵဝ်တၵ်းႁႃ ၵေႃႉဢၼ်ဝီႉၺိၺ်ႇၵဝ်ႁၵ်ႉပႅင်းၼၼ်ႉဢေႃႈ၊ ဝႃႈၼင်ႇၼႆယူႇသေလႄႈ ႁႃသေၵေႃႈဢမ်ႇထူပ်း။-

3ၵူၼ်းဢၼ်ပႂ်ႉၵၢင် ဢၼ်လႄႇၵႃႈၼႂ်းဝဵင်းၸိူဝ်းၼၼ်ႉထူပ်းႁၼ်ၵဝ်လႄႈ ၵဝ်ထၢမ်တီႈၶဝ်လႄႈဝႃႈ၊ သူႁၼ်ၵေႃႉဢၼ် ဝီႉၺိၺ်ႇၵဝ်ႁၵ်ႉၼၼ်ႉႁိုဝ် ဝႃႈၼင်ႇၼႆဢေႃႈ။-

4သမ်ႉပူၼ်ႉသေၵႃႈတီႈၶဝ်ၼၼ်ႉၵႂႃႇဢိတ်းဢွၼ်ႇၼိုင်ႈသေယဝ်ႉ၊ ၵဝ်ထူပ်းၵေႃႉဢၼ်ဝီႉၺိၺ်ႇၵဝ်ႁၵ်ႉၼၼ်ႉဢေႃႈ။ ၵဝ်ယိပ်းၵမ်ဢဝ်မၼ်းၸဝ်ႈမၼ်ႈမၼ်ႈၶိူင်ႇၶိူင်ႇသေလႄႈ ဢမ်ႇပွႆႇဢမ်ႇၽႃႈမၼ်းၸဝ်ႈယူႇ တေႃႇထိုင်ႁွတ်ႈထၼ်ႈပေႃးဢဝ်မၼ်းၸဝ်ႈမႃး ႁွတ်ႈထိုင်ၵႃႈၼႂ်းႁိူၼ်းမႄႈၵဝ် ၵႃႈၼႂ်းလုၵ်းတီႈၼွၼ်း ၵေႃႉဢၼ်ၵိူတ်ႇလဵင်ႉၵဝ်မႃးၼၼ်ႉဢေႃႈ။-

5လုၵ်ႈယိင်းဝဵင်း ယေႇရူႉသလႅမ်ႇ ၶဝ်ဢိူၺ်း၊ ၵဝ်ဢဝ်တိုင်ဢဝ်ယီးတင်းလၢႆ ဢၼ်ယူႇၵႃႈၼႂ်းထိူၼ်ႇၼႂ်းၶိူဝ်းၸိူဝ်းၼၼ်ႉ တိူင်ႇဝႃႈၵိၼ်ႇဝႃႈတီႈသူ ႁႂ်ႈသူဢမ်ႇယႃႉဢမ်ႇပူၵ်း ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ တေႃႇထိုင်ႁွတ်ႈမၼ်းၸဝ်ႈထၼ်ႈပေႃးတိုၼ်ႇဢဝ်ၵူၺ်းမၼ်းၸဝ်ႈၼၼ်ႉဢေႃႈ။

6ၵေႃႉဢၼ်လုၵ်ႉသေၵႃႈၼႂ်းထိူၼ်ႇၼႂ်းၶိူဝ်းမႃးလႄႈ မီးႁၢင်ႈမီးၽၢင်သဝ်ၵႂၼ်းၽႆးဝႆႉလႄႈ ႁွမ်ႁူၺ်းလူၺ်ႈ မူႉရၼ်ႇ ၊ လေႃႇပၢၼ်ႇ တင်းမဵဝ်းမုၼ်ႈၼၢမ်ႇသႃႇ ဢၼ်ၸဝ်ႈၵုၼ်ႇၸဝ်ႈသိၼ်ၶဝ် ၸၢင်ႈၶၢႆၼၼ်ႉၸမ်ႉ၊ ပဵၼ်ၽူႈလႂ်။-

7ဢွၼ်ၵၼ်တူၺ်းပွင်တူၺ်းဝေႃး ၶုၼ် သေႃးလမုၼ်ႇ ၼၼ်ႉတႃႉ။ ၵူၼ်းသိုၵ်းႁူၵ်းသိပ်း၊ ၵူၼ်းမဵဝ်း ဢီႉသရေႇလႃႉ ဢၼ်ႁႅင်းယႂ်ႇၼႃႇၼၼ်ႉ ဢွၼ်ၵၼ်လွမ်ႉလဵပ်ႈႁွပ်ႈမၼ်းယူႇဢေႃႈ။-

8ၶဝ်တင်းသဵင်ႈတင်းလူင်ၼၼ်ႉ၊ ဢွၼ်ၵၼ်ယိပ်းၵမ်လၢပ်ႇၵမ်လႅဝ်းသေလႄႈ ၸၢင်ႈမေႃလူၺ်ႈဢမူႉတၢင်းဢၼ်တိုၵ်းသိုၵ်းဢေႃႈ။ ၶဝ်ဢွၼ်ၵၼ်ဢဝ်လၢပ်ႇဢဝ်လႅဝ်းၶဝ် မတ်ႉၵွပ်ႈဝႆႉၵႃႈတီႈၶႃၶဝ်ၵူႈၵေႃႉၵူႈၵူၼ်း ၵွပ်ႈပိူဝ်ႈဢၼ်မီးတီႈဢၼ်လီၵူဝ်လီႁႄ ၶိင်ႇၵၢင်ၶိုၼ်းၼၼ်ႉဢေႃႈ။-

9ၶုၼ်လူင် သေႃးလမုၼ်ႇ ဢဝ်မႆႉၸိင် လေႇပၼုၼ်ႇ ႁဵတ်းပွင်ႁဵတ်းဝေႃးၸဝ်ႈဢေႃႈ။-

10မၼ်းၸဝ်ႈႁႂ်ႈသဝ်ၵွၼ်းၸၢင်ႇတင်းလၢႆ ယဝ်ႉတူဝ်ႈလူၺ်ႈငိုၼ်း၊ ပွတ်းတႂ်ႈမၼ်း ယဝ်ႉတူဝ်ႈလူၺ်ႈၶမ်း၊ ၵွပ်းၼင်ႈၸဝ်ႈၼၼ်ႉ ယဝ်ႉတူဝ်ႈလူၺ်ႈ ၵမ်ႉပလႃႇ ၽႃႈဢၼ်လႅင်ၵမ်ႇၼၼ်ႉဢေႃႈ။ ၵႃႈၼႂ်းမၼ်းၸမ်ႉ၊ ဢဝ်တင်းမႅတ်ႈတႃႇတၢင်းဢၼ် လုၵ်ႈယိင်း ဝဵင်း ယေႇရူႉသလႅမ်ႇ တင်းလၢႆႁၵ်ႉပႅင်းၼၼ်ႉ ၸီႇတၢမ်းၵၼ်ႁၢင်ႈၶိူင်ႈဝႆႉဢေႃႈ။-

11လုၵ်ႈယိင်း ၸီႉဢုၼ်ႇ ၶဝ်ဢိူၺ်း၊ ဢွၼ်ၵၼ်ဢွၵ်ႇလႄႈတူၺ်း ၶုၼ်လူင် သေႃးလမုၼ်ႇ ဢၼ်တိုဝ်းမွၵ်ႇႁူဝ်သရၽူႇ ဢၼ်မႄႈမၼ်းၸဝ်ႈ ဢဝ်တၢင်ႇသႂ်ႇပၼ် ၼႂ်းမိုဝ်ႉဝၼ်းဢၼ်သွင်ႇမင်ႇၵလႃႇ၊ ဝၼ်းဢၼ်ႁူဝ်ၸႂ်မၼ်းၸဝ်ႈ သႂၢင်ႇသိူဝ်းၼၼ်ႉတႃႉ။

← Chapter 2 Jump to: Chapter 4 →