Proverbs 23

Sinhala Bile - Revised Old Version (SROV)

← Chapter 22 Jump to: Chapter 24 →

1ඔබ ආණ්ඩුකාරයෙකු සමඟ කෑමට හිඳින කල, ඔබ ඉදිරිපිට තිබෙන දේ හොඳට කල්පනාකර,

2ඔබ ගිජු කෙනෙක් නම්, ඔබේ උගුරට පිහියක් තබාගන්න.

3ඔහුගේ රසවත් කෑමවලට ආශා නොවෙන්න, ඒවා රැවටිලි කෑමය.

4පොහොසත් වෙන්ට නොවෙහෙසෙන්න; ඒ අදහස අත්අරින්න.

5නැතිවීයන දේට ඔබේ ඇස් යොමු කරන්නෙහිද? වස්තුව පියාපත් සාදාගෙන රාජාලියෙකු මෙන් අහස දෙසට ඉගිලී යන්නේමය.

6අප්‍රසන්න බැල්මක් ඇත්තාගේ කෑම නොකන්න, ඔහුගේ රස කෑමවලට ආශා නොවන්න.

7මක්නිසාද තමාගේ සිතෙන් ගණන්ගන්නා ලෙසම ඔහු වන්නේය. කන්න බොන්නැයි ඔහු ඔබට කියයි; නුමුත් ඔහුගේ සිත ඔබ සමඟ නැත.

8ඔබ කෑ දෙය ඔබ වමාරන්නෙහිය, ඔබේ ප්‍රසන්න වචනද නැතිවන්නේය.

9අඥානයා ඉදිරියේ කථා නොකරන්න; මක්නිසාද ඔහු ඔබේ වචනවල සාරකම සුළුකරන්නේය.

10පුරාණ මායිම වෙනස් නොකරන්න; පියා නැත්තන්ගේ බිම්වලට ඇතුල්නොවන්න.

11මක්නිසාද ඔවුන්ගේ මිදුම්කාරයා බලවත්ය; උන්වහන්සේ ඔබට විරුද්ධව ඔවුන්ගේ විත්තිය කියනවා ඇත.

12ඔබේ සිත ඉගැන්වීමටද ඔබේ කන් දැනගැනීමේ වචනවලටද යොමුකරන්න

13දරුවාගෙන් දඬුවම නොවලක්වන්න; ඉපලෙන් ඔබ ඔහුට තළන්නෙහි නම් ඔහු නගින්නේ නැත.

14ඉපලෙන් ඔහුට තළන්න; එයින් ඔබ ඔහුගේ ප්‍රාණය ෂෙයෝලෙන් ගළවන්නෙහිය.

15මාගේ පුත්‍රය, ඔබේ සිත ප්‍රඥාවන්ත නම් මාගේ සිතත් ප්‍රීතිමත් වන්නේය.

16එසේය, ඔබේ තොල් හරි දේවල් පවසන විට මාගේ හෘදය පිනායන්නේය.

17ඔබේ සිත පව්කාරයන්ට ඊර්ෂ්‍යා නොකොට, හැම කල්හිම ස්වාමීන්වහන්සේ කෙරෙහි භය ඇතුව තිබේවා.

18මක්නිසාද සැබවින් විපාකයක් ලැබෙන්ට තිබේ; ඔබේ බලාපොරොත්තුවද සිඳදමනු නොලැබේ.

19මාගේ පුත්‍රය, අසා ප්‍රඥාවන්ත වී, ඔබේ සිත හරි මාර්ගයෙහි ගෙනයන්න.

20මුද්‍රිකපානයෙහි ලොල්වූවන්ටවත් මස් කෑමෙහි ගිජුවූවන්ටවත් එක් නොවන්න.

21මක්නිසාද බේබද්දාත් කෑදරයාත් දිළිඳුවන්නේය; නිදිමතද වැරහැලි ඇදීමට පමුණුවන්නේය.

22ඔබ ජනිතකළ ඔබේ පියාගේ බස් අසන්න; ඔබේ මෑණියන් මහලුවූ කල ඈ සුළු නොකරන්න.

23සත්‍යයද ප්‍රඥාවද ඉගනගැන්මද නුවණද මිලේට ගන්න, ඒවා නොවිකුණා තබාගන්න.

24ධර්මිෂ්ඨයාගේ පියා ඉතා ප්‍රීතිමත්වන්නේය; බුද්ධිමත් දරුවෙකු ජනිතකරන්නාද ඔහු නිසා ප්‍රීතිවන්නේය.

25ඔබේ පියාද මවුද සතුටුවෙත්වා, එසේය, ඔබ වැදූ තැනැත්තී ප්‍රීතිමත්වේවා.

26මාගේ පුත්‍රය, ඔබේ සිත මට දෙන්න, ඔබේ ඇස් මාගේ මාර්ග ගැන ප්‍රීතිවේවා.

27මක්නිසාද වේශ්‍යාවක් වනාහි ගැඹුරු අගළක්ය; අන් ස්ත්‍රියද පටු වළක්ය.

28එසේය, ඈ කොල්ලකාරයෙකු මෙන් රැකසිට, මනුෂ්‍යයන් අතරේ අවිශ්වාසයන් වැඩිකරන්නීය.

29දුක ඇත්තේ කාටද? කාලකණ්ණිකම කාටද? තරඟ කාටද? මැසිවිලි කාටද? නිෂ්කාරණ තුවාළ කාටද? රතු ඇස් ඇත්තේ කාටද?

30මුද්‍රිකපානය ළඟ පමාවෙන්නන්ටය; මිශ්‍රකළ මිදියුස සොයා යන්නන්ටය.

31මුද්‍රිකපානය රතුව පෙනෙන විටත්, පාත්‍රයෙහි දිලිහෙන විටත්, සිනිදුලෙස වැක්කෙරෙන විටත්, ඒ දෙස නොබලන්න.

32අන්තිමේදී එය සර්පයෙකු මෙන් හපාකා, පොළඟෙකු මෙන් දෂ්ටකරයි.

33ඔබේ ඇසට අද්භූත දේවල් පෙනෙන්නේය, ඔබේ සිත හිතුවක්කාර දේවල් කථාකරන්නේය.

34ඔබ මුහුද මැද නිදාගන්නෙකු මෙන්ද කුඹගසක මුදුනේ නිදන කෙනෙකු මෙන්ද වන්නෙහිය.

35ඔව්හු මට පහරදුන්නෝය, නුමුත් මට රිදුණේ නැත; ඔව්හු මට ගැසුවෝය, නුමුත් ඒක මට දැනුණේ නැත; මට කොයි වේලේ ඇහැ ඇරේද? නැවත එය තවත් සොයන්නෙමියි ඔබ කියන්නෙහිය.

← Chapter 22 Jump to: Chapter 24 →