1 Corinthians 1

Sidamo

Jump to: Chapter 2 →

1Maganu yiino garinni Yesuusi Kiristoosi soqqamaasincho ikkara woshshaminohu Phaawuloosinna rodiinke Sostenisi:

2Qorontoosi Katamira nootera Maganu Beetekiristaanera, Yesuusi Kiristoosinni qullaawootahonna qullaawoota ikkate woshshantinorira, qoleno darga baalaho insanna ninke Mooticha ikkinohunniha Yesuusi Kiristoosi su'ma woshshidhannorira baalaho,

3Anninke Maganunna Mootichinke Yesuusi Kiristoosi eltonna keeri ki'ne ledo hee'ro.

4Yesuusi Kiristoosi widoonni qole uyino'ne elto daafira, wo'manka woyite Magano galaxxeemmo.

5Baalunku coyinni hasaawunnino ikko egennotenni Kiristoosinni duroo'mitinoonni.

6Kiristoosi daafira farci'noommo coyi ki'ne giddo darga assi'rino.

7Kunnira, Mootichinke Yesuusi Kiristoosita layinkimeeshshi daa agadhitinanna, ayyaanaamu afanshi mittuno dixea"anno'ne.

8Mootichinke Yesuusi Kiristoosi daanno barra xe'o nookkire ikkitinanni gede, isi goofimarchu geeshsha kaajjitine heedhinannire assanno'ne.

9Beettisi Mootichinke Yesuusi Kiristoosi mittimmawa woshshino'nehu Maganu ammanammoho.

10Roduuwa'ya, mereero'ne babbadooshshu nookkiha, mimmiti'ne ledo sumuu yitine hee'ratenni mittu wodanirenna mitte hedore ikkitinanni gede Mootichinke Yesuusi Kiristoosi su'minni huucci'reemmo'ne.

11Roduuwa'ya, mereero'ne babbadooshshu noota Qeloe mini manni kulinoe.

12Hattino ki'ne giddonni mitu mitu, «Ani Phaawuloosiho», «Ani Aphiloosiho», «Ani Keefaho», «Ani Kiristoosiho» yaa'neeti.

13Ikkina, Kiristoosi beehaminoni? Phaawuloosi ki'nera sutaminoni? Woy Phaawuloosi su'minni cuuantinoonnini?

14Qerisiphoosinna Gayiyoosi agurranna wole cuua hooga'yara Magano galaxxeemmo.

15Kunnira, «Phaawuloosi su'minni cuuamoommo» yaannohu mittuno dino.

16(Isxifaanoosi mini mannano cuuoommo; wolu cuuoommohu nooro diafoommo.)

17Kiristoosi, Dancha Duduwo lallawammora ikkinnina, cuuammora disoyinoe. Kiristoosi masiqali mullare ikkannokki gede, Dancha Duduwo mannu hayyonni coommishe dicoyi'reemmo.

18«Yesuusi masiqalu aana sutame reyino» yine kullanni qaali ba'annorira gowwimmate. Ninke ganteemmorira kayinni Maganu wolqaati.

19«Egennaammu egenno huneemmo; hayyoolete hayyo diigeemmo» yine borreessinoonni.

20Hatto ikkiro, egennaamu hiikko no? Hayyichu hiikko no? Xiinxallu hiikko no? Maganu tenne gobba egenno gowwimma ikkitanno gede diassino?

21Tenne gobba manni Magano uminsa egennonni afa hoogino daafira, ninke kulleemmoha gowwimma lawannoha Dancha Duduwo ammantannori gattanno gede Maganu fajjino.

22Ayihude malaate hasidhanno; Giriike egenno halchitanno.

23Ninke kayinni sutaminonkeha Kiristoosa kulleemmo. Kuni coyi, Ayihudete gufichoho; Giriikete qole gowwimmate.

24Woshshantinorira kayinni, Ayihude ikkito Giriikete mannira, Kiristoosi Maganu wolqaatinna Maganu egennooti.

25Gowwimma lawannohu Maganu coyi mannu egenno rooranno. Maganu wolqiweelle lawanno coyi mannu jawaante rooranno.

26Roduuwa'ya, woshshantini waro ki'ne hiittooreetiro qaagge. Mannu hedanno garinni, ki'ne giddohu rooru manni, egennaamo woy wolqaataamo woy ayirrado di"ikkino.

27Maganu egennaamma saalfachishara yee, tenne gobbara gowwoota labbannore doorino; jawaatoota saalfachishara yee, tenne gobbara wolqiweeloota labbannore doorino.

28Maganu tenne gobba mannira ayirrado lawino coye hunara hasi're, tenne gobbara shollinoha, mishaminohanna haafa coye doorino.

29Hatto assinohuno, ayino Maganu albaanni naaxxannokki gede hasi'reeti.

30Maganu kayinni ki'nera Yesuusi Kiristoosi ledo mittimma heedhanno'ne gede assino. Kunnira, Maganu Yesuusi Kiristoosi ninkera egennonke, keeraanchimmanke, qullaambenkenna wodonke ikkanno gede assino.

31«Adawadhannohu Magano adawadho!» yine borreessinoonnihu kunniraati.

Jump to: Chapter 2 →