1 Corinthians 3

Sidamo

← Chapter 2 Jump to: Chapter 4 →

1Roduuwa'ya, Kiristoosi coyira qaaqqimma amaddino'nehura, maalu mannira kullannire ikkinnina, ayyaanaamu mannira kullannire kulammo'nera didandoommo.

2Kaajjado sagale ittine affinannikkihura, ado haqaaqoommo'ne ikkinnina kaajjado sagale dioommo'ne. Xaano kaajjado sagale ita didandiitinoonni.

3Xaa geeshsha ki'ne maalu mannaati. Mimmito'ne hinaassinannihunna mimmiti'ne ledo moromantinannihu, dimaalu manna ikkitinoonnihuraati? Ikkito'ne mullichu mannita di"ikkitino?

4Mitu mitu, «Ani Phaawuloosiho», wolootu qoltine, «Ani Aphiloosiho» yitinanni. Hatto yaa'ne, ki'ne mullicho maalu manna diassitanno'ne?

5Ikkina, Aphiloosi maati? Phaawuloosino maati? Insa ki'ne ammantinanni gede assitino soqqamaanootilla. Mittu mittunku Maganu uyinonsa garinnilla soqqantanno.

6Ani kaasummo; Aphiloosi waa hayikkisi. Lossinohu kayinni Maganoho.

7Kunnira, loosoho umo ikkinohu, kaansoonnire lossi Maganooti ikkinnina, kaasihuno waa hayikkisihuno ku'lannori dino.

8Kaasihunna waa hayikkisihu lamunku mittoholla. Mittu mittunku loosisi garinni daafurisi guma adhanno.

9Ninke Maganu ledo loonseemmoreeti; ki'neno Maganu ho'richootinna Maganu mineeti.

10Maganu uyinoe elto garinni anino ogeessu manchi gede safo safummo. Wolu ani safoommo safo aana minanno. Mittu mittunku hiitto asse minannoro xunse afo!

11Sanfoonniha agurranna ayino wole safo safa didandaanno. Hatti safono Yesuusa Kiristoosaati.

12Hatte safo aana ayino culkunni woy birrunni woy dilqu kinchinni woy haqqetenni woy hayissotenni woy agadunni miniro,

13mittu mittunku loosi yoote barra xawo fulanno. Hakko barra giira fonqoltanno daafira, mittu mittunku loosi reqecci yaanno.

14Ayerano safote aana assi'rinori giiramisikkinni saisiro, daafurisi guma adhanno.

15Giiramisiro kayinni mulla anganni gatanno; isi umisi gatanno; gatasi kayinni giirate giddonni xooqe fulino manchi gedeete.

16Ki'ne Maganunniha Qullaawa Mine ikkitinoonnitanna Maganu Ayyaani giddo'ne galannota diegentinoonni?

17Maganu mine diigannoha, Maganu diiganno. Maganu Mini Qullaawaho; hakku Qullaawu Minino ki'neeti.

18Ayino umosi dogoonke. Ayino tenne gobbara egennaamo ikkinoha lawisiro, egennaamo ikkate gowwa ikko.

19Tenne gobba egenno Maganu albaanni gowwimmate. Hakkuno, «Maganu hayyoole, xagarronsanni amadanno» yine borreessinoonni gedeeti.

20Qoleno, «Mootichu egennaamu hedo, kapho ikkitinota afino» yine borreessinoonni.

21Kunnira, ayino manna adawadhoonke. Baalunkuri ki'neho.

22Phaawuloosino, Aphiloosino, Pheexiroosino, tenne gobba heeshshono, reyono, xa noohuno, kunni ka'a daara noohano ikkiro, baalunku ki'neho.

23Ki'ne Kiristoosireeti; Kiristoosino Maganunniho.

← Chapter 2 Jump to: Chapter 4 →