1 Corinthians 10

Sidamo

← Chapter 9 Jump to: Chapter 11 →

1Roduuwa'ya, akaakkanke baala gomichu woroonni nootanna baara tayisse fulte hadhinota qaagginara baxeemmo.

2Baalunku Muse ledo karsante gomichunna baaru giddo cuuantino.

3Baalunku hattenne ayyaanaame sagale ittino.

4Baalunku hakkonne ayyaanaamo ago aggino. Agginohuno hakkunni dukkisannonsahu ayyaanaamu kinchinni fulino agooti. Hakku kinchino Kiristoosaati.

5Ikkollana Maganu insa giddonni lowo mannira dihagiidhino. Kunni daafira hakko manni reeshshi halallitte gobbara uwe gatino.

6Insa busha coye halchitino gede, ninkeno hattoore halchineemmokki gede insa ikkitonni jiilleemmo.

7«Mannu itaranna agara ofolli; sirbahono kai» yine borreessinoonninte gede, insa giddonni gamisu kaphu maganna magansidhino; ki'neno insa gede ikkitinoonte.

8Insa giddonni gamisu ikkitunte gede, ninkeno foorrete cubbo loonsoonke. Kunni coyinni insa giddonni mitto barra lemiina sasu kumi reyino.

9Insa giddonni mitu mitu Magano fonqolteenna hamashshu idde gudinona; ninkeno hatto assine Magano fonqolloonke.

10Insa giddonni gamisu Maganoho gungunteenna hunanno sokkaasinchi gudinonsana; ninkeno Maganoho gungummoonke.

11Kuni coyi insa aana ikkinohu, ninke jiilleemmo gedeeti. Borreessinoonnihuno diru goofimarchira hee'noommorira ninkera seejjo ikkankeraati.

12Kunnira, uurre nooha lawannosihu, uwannokki gede qoropho!

13Mannaho iillitinokki jifama di"iillitino'ne. Maganu ammanaminoho; wolqa'nera aleenni ikkitino jifama iillita'nera wore dila"anno. Jifantinanni woyite cincitine sa"a dandiitinanni gede, fultinanni doogo qixxeessanno'ne.

14Xa kayinni roduuwa'ya, kaphu maganna magansi'ratewiinni xooqqe!

15Konne coye coyi'roommohuno wodanchitinannire ikkitinoonnihuraati. Kunnira hanni ani coyi'reemmore ki'ne umi'ne farcidhe!

16Magano galante ka'ne huumbeemmohu maassote finiinchi, Kiristoosi mundee ledo mittimma afi'rinoho. Inteemmo sagaleno Kiristoosi maali ledo mittimma afidhinote.

17Sagale mitte ikkitinohura, ninkeno tenne mitte sagale inteemmo daafira, haammantummorono baalunku mitto bisooti.

18Hanni Israeelete manna la'e. Kakkalote shiqinshoonniha ittannori kakkalote ledo xaado diafidhino?

19Hatto yaa'ya, kaphu maganna woy insara shiqinshanni kakkalo kaa'litannori noote yaateni?

20Dee'ni! Dagate kakkalo darga kakka'litannori, Maganoho ikkikkinni durriisaho kakkaltanno. Kunnira, ki'nera durriisu ledo mittimma heedha'nera dihasi'reemmo.

21Mootichu finiinchira agginanni, qoltine durriisu finiinchira aga didandiitinanni. Mootichu sagale ittinanni heedhine, qoltine durriisu sagale ita didandiitinanni.

22Hatto assine Mooticha hinaasiinsoni? Ninke isinni roore jawaanteemmoreetini?

23Baalankare fajjinoonni; baalunkuri kayinni kaa'lannoha di"ikkino. Baalankare fajjinoonni; baalunkuri kayinni dhaawannoha di"ikkino.

24Ayino wolu qiniite ikkinnina umisi qiniite hasi'roonke.

25Dikkote hirranni maala, huluullantinikkinni sammi yitine itte.

26Maganu qaali yaannonte gede, «Baattonna baattote aana noori baalu Maganunniho.»

27Ammaninokki manchi jilaho woshsheenna martiniro, shiqishanno'ne sagale wodanunni huluullantinikkinni itte.

28Ikkollana mittu manchi, «Kuni maali kaphu magannara kakkalate gorrinoonniho» yee kuli'nero, kuli'ne manchinna wodanu huluullo daafira yitine ittinoonte.

29Hatto yoommohu, ki'ne wodani huluullo daafira ikkikkinni, kuli'ne manchi wodani huluullama daafira yeeti. Wolu manchi wodani huluullo daafira yee aneneete mayira gadadiseemmo?

30Magano galaxxe iteemmo sagale daafira, Magano galaxxoommo coyira mayira arrassameemmo?

31Ittinanniha woy agginanniha ikkiro woy aye coyeno assitinanniha ikkiro baalankare Maganu ayirrinyira asse.

32Ayihudeno woy dagano ikkito woy Maganu beetekiristaaneno ikkituro, ayeno gufisiissinoonte.

33Ani baalunku gatanno gede, umi'yare agure woleho ikkannore hedeemmo. Ani baalanka manna duuchunku coyinni hagiirsiiseemmonte gede, ki'neno hatto asse.

← Chapter 9 Jump to: Chapter 11 →