1 Corinthians 9

Sidamo

← Chapter 8 Jump to: Chapter 10 →

1Ani borojjimmatenni fuloommoha di"ikkoommo? Ani Maganu soqqamaasincho di"ikkoommo? Mooticha Yesuusi Kiristoosa ille'yanni diafoommo? Ki'neno Mootichunni loosi'ya guma di"ikkitinoonni?

2Anera ki'ne Mootichunni soqqamaasinchimma'ya gumaati. Soqqamaasinchimma'ya wolootuno adha hoogguro, ani kayinni ki'nera soqqamaasinchoho.

3Bushiishshannoerira dawareemmoti tenneeti:

4Itanna aga ninkera dihasiissannote?

5Wolootu Mootichu soqqamaasine gede, Mootichu roduuwinna Pheexiroosiuu gede, galtenke anga adhine ha'ra didandineemmo?

6Woy loosi'ra hasiissannonkeri aneetinna Barinabaasiitillani?

7Umisi woxinni olanto ikke soqqamannohu nooni? Woy laalanno haqqa kaasi're laalosi itannokkihu ayeti? Woy saada ce"e ado qaamannokkihu ayeti?

8Konne coye mannu egennino daafira calla yaanni noommo? Seeruno hatto diyaanno?

9Muse Seerira, «Gide gananno hando afoo usurtooti!» yine borreessinoonni. Hatto yinanni woyite, Maganu handoho qarrame coyi'rino yaateni?

10Konne coye yiinohu dininkeraati? Loosannohu hagiidhanni loosanno gede, gide ganannohuno hagiidhanni gananno gede, konne coye addinta ninkera borreessinoonni.

11Ninke ki'ne giddo ayyaanu wixa wixi'ne, ki'newiinni uullate laalcho adha loworeetini?

12Wolu ki'newiinni konne coye agadhannoha ikkiro, ninke hiitto ikkine hakkiinni roore adha hoongeemmo? Ninke kayinni Kiristoosihu Danchu Duduwira guficho ikkineemmokki gede qorophine, baalanta cincine sa'noommo ikkinnina, hasiisinonkere mittoreno diadhinoommo.

13Qullaawa Mine soqqantannori ittannore hakkiinni adhitannotanna kakkalote darga soqqantannori, ittannore hakkiinni beeqqitannota diaffinoonni?

14Dancha Duduwo kultannorino sagalensa kunni loosinni afidhannota Mootichu Yesuusi kulino.

15Ani kayinni konne malinoere baala diadhoommo. «Kuni coyi mayira gatie?» yee borreessoommoha di"ikkino. Tenne ku'la'ya haafare asse kiirannohu hee'riro reya woyyitannoe.

16Dancha Duduwo kula gidde'ya ikkitinohura, naaxxeemmori dino. Dancha Duduwo kula hoogummoro anera bayisibao!

17Dancha Duduwo gadadinsiekkinni kulummoro, ba'raa'ra agadheemmo. Gadadinseennae kuleemmoha ikkiro kayinni, yinoonni wogalla wonshanni noommo yaate.

18Hatto ikkiro daafuri'ya gumi maatiyya? Dancha Duduwo kuleemmo woyite, hasiisannoere adhummokkinni calla kulate.

19Ani ayerano borojjicho di"ikkoommo; ikkollana danduummo deerrinni lowo manna gatisatenna kaa'late yee lowo manni borojjicho ikkoommo.

20Ayihudootu ledo hee'rummoro, insa gatisate yee insa gede ikkeemmo. Muse Seerira woroonni galoommoha ikka hoogummorono, Muse Seerira woroonni galtinore gatisate insa gedeeha ikkoommo.

21Maganu Seerinni galoommohanna Kiristoosi Seerira woroonni noommoha ikkummorono, Seeru nookki daga gatisammora yee insa gedeeha ikkoommo.

22Ammana shaqqitinore gatisammora yee insa gedeeha ikkoommo. Danduummo deerrinni mito mito gatisammora yee, baalunku mannira baalankare ikkoommo.

23Konne baala assoommohu, Danchu Duduwi maasso beeqqate, Danchu Duduwi daafira yeeti.

24Qolchanshote worroonnihu baalunku dodannota, hakkuri giddonni kayinni mittu callu ba'raa'ra adhannota diegentinoonni? Ki'neno adhitinanni gede ikkitine dodde!

25Qolchamannohu baalu balaxe mannimmasi daafurse qajeelanno. Insa daafurtannohu, ba'anno ba'latto adhateeti; ninke kayinni ba'annokkita hegere ba'latto adhateeti.

26Kunnira, hedo nookkihu gede ikke mulla haafa didodeemmo. Diilallo gananno manchi gede mulla haafa disharrameemmo.

27Wolu mannira kule kae, ani fundule gateemmokki gede, manninate'ya gadadisanni miirannoe gede asseemmo.

← Chapter 8 Jump to: Chapter 10 →