1 Corinthians 11

Sidamo

← Chapter 10 Jump to: Chapter 12 →

1Ani Kiristoosi laweemmonte gede, ki'neno ane labbe.

2Baalunku coyinni qaagginanniehuranna rosiisoommo'ne coye seekkitine amaddinoonnihura, lowo geeshsha galateemmo'ne.

3Ikkollana, mitto coye affinara hasi'reemmo: Labballo baalaho Kiristoosi umoho; meyate umi labbaaho; Maganu qole Kiristoosira umoho.

4Umo guggu'le hee're huucci'rannohu woy Maganu sokka coyi'ranno manchi umosi shollishanno.

5Umo guggu'litukkinni huuccatto assidhannoti, woy Maganu qaale kultanno meyati, umose shollishshanno. Umo guggu'litannokki meyati, umo meexxitinote ledo mittete.

6Meyati umose guggu'la hoogguro, dananchose mudhitona. Danancho mudha woy meexxa saala ikkitusero umo guggu'litona.

7Labbaahu, Maganu daninna Maganu ayirrinyi aanasi leellannoha ikkinohura, umo guggu'loonke. Meyati kayinni labbaahu ayirrinyeeti.

8Meyati kalaqantinohu labbaahuwiinniiti ikkinnina, labbaahu meyatenni dikalaqamino.

9Meyati labbaahura kalaqantino ikkinnina, labbaahu meyatera dikalaqamino.

10Kunniranna sokkaasinete daafira, meyati ayiddaannise roorre leellishate umose guggu'lito.

11Mootichunniwa kayinni meyati labbaahu nookkiha, labbaahuno meyati nookkiha diheedhanno.

12Meyati labbaahuwiinni kalaqantinonte gede, labbaahuno meyatenni ilamanno. Baalanka kalaqinohu kayinni Maganoho.

13Hanni ki'nenni yiiyye; meyati umo guggu'litukkinni Magano huucci'ra garahoni?

14Labbaahu umo lossi'ra saala ikkitinota, mannu kalaqamunni nafa diafanno?

15Meyatera kayinni dananchu ayirrinyeseeti. Seeda danancho uyinoonnisehu, umo diphitanno gedeeti.

16Konne coye adha giwannohu hee'riro, ninkerano ikko wole Maganu beetekiristaanera kawiinni baxxino seeri dinonke.

17Xaaddinanni woyite assitinanni coyi miicannoha ikkinnina kaa'lannoha ikkinokki daafira, xa eemmo'ne hajajonni naadammo'nera dihasi'reemmo.

18Umo asse, xaaddinanni woyite mereero'ne babbadooshshu noota macciishshoommo. Macciishshoommo coyi giddonni gamu halaale ikkinota ammanoommo.

19Halaalaano ayeootiro bade afate, mereero'ne babbadooshshu hee'ra digattannote.

20Xaaddinanni woyite ittinannihu Mootichu hurbaate di"ikkino.

21Ittinanni woyite mimmito agartinikkinni abbidhinoonni sagale umu umunni saantinanni. Kunni garinni, mitu hudi're hee'reenna mitu dimbanno.

22Maaho, ittinannihunna agginanni mini dino'neni? Woy kayinni Maganu beetekiristaane mishshineetini? Woy qoltine afidhinori nookkire saalfachishshinaraati? Hanni xa ma yoo'ne? Kunni coyira naado'neni? Horonta dinaadeemmo'ne.

23Mootichu Yesuusiwiinni adhe ki'nera oommo'ne coyi konneeti: Mootichu Yesuusi reyote sayinse uyinisi hashsha tima haa're,

24Magano galatihu gedensaanni tima hiiqqe, «Kuni ki'nera eemmohu maala'yaati; kunninni ane qaagge» yii.

25Hurbaatu gedensaanni finiincho haa're, «Kuni finiinchi mundee'yanni haaro gondoorooti; agginanni yanna baalate, kunninni ane qaagge» yii.

26Konne tima ittinanninna kunni finiinchinni agginanni yanna baalate, Mootichu daa geeshsha reyosire kultinanni.

27Adha hasiissinosikkiha konne tima itannohunna kunni finiinchinni agannohu baalu, Mootichu maalanna mundee shotisanno daafira xa'mamanno.

28Kunnira, ayino konne tima itaranna kunni finiinchinni agara albaanni umosi towaxxo.

29Mootichu maala bade afikkinni, tima itannohunna kunni finiinchinni agannohu baalu, umisi aana yoo abbi'ranno.

30Ki'ne giddonni lowo manni dhiwaminohunna wolqiweelinohu, qoleno gamu manni reyinohu kunniraati.

31Umonke balanxe towaxxinoommoro, aananke yoo didagganno.

32Ikkollana, gedensaanni yoo tenne gobba ledo mitteenni daggannonkekki gede, Mootichu xa yoo yee seejjannonke.

33Kunnira roduuwa'ya, Mootichu hurbaate ittinanni woyite, mimmito'ne agarre.

34Xaaddinanni woyite yoo aana'ne dagganno'nekki gede, hudi'rinohu hee'riro mare minesi itona. Gatino coye dayemmo woyite kuleemmo'nena.

← Chapter 10 Jump to: Chapter 12 →