1 Corinthians 6

Sidamo

← Chapter 5 Jump to: Chapter 7 →

1Ki'ne giddo wolu ammanaasinchi ledo giwaminohu, coyesi ammanaasinete ku'la agure, Magano afinokki manniwa mayira ha'ranno?

2Maganu manni tenne gobba aana yoo yaannoha ikkinota diaffinoonni? Tenne gobba aana yoo yitinannire ikkitinina, konne shiima coye hoogginanniyya?

3Sokkaasinete aana yoo yineemmore ikkinoommota diaffinoonni? Tenne gobba aani coyira hiitto roorsine yoo yaa hoongeemmo?

4Hattoo coyi hee'ranno woyite, ammana jawaatinokki manna yoote wodhessiyya!

5Konne coye coyi'ranni noommohu saalfachishammo'nera yeeti. Halaalinta ki'ne mereero giwantino roduuwa araarsa dandaanno hayyichi mittuno dinoni?

6Mittu ammanaanchi wolu ammanaanchi ledo giwame yoote ammantinokkiri albira maranno?

7Mimmiti'ne ledo giwantine coyi'rama umise giddo'ne noo xe'o leellishshanno. Hatteentenni ki'ne shollitiniro diwoyyanno? Ki'ne xagarantiniro diwoyyanno?

8Roorenka ki'ne ammantino roduuwa'ne xagartinanni; insa aana sao assitinanni.

9Haxawarrootu Maganu Gashshoote e'annokkita diaffinoonni? Sodhinoonte! Saalimalootu woy kaphu maganna magansidhannori woy foortannori woy labbaahu ledo akkimaltannori woy

10mooraano woy hafuuraammu woy dimbaasine woy mannu su'ma huntannori woy mulqidhannori Maganu Gashshoote diragidhanno.

11Kunni albaanni ki'ne giddonni mitu mitu hattooreeti. Ikkollana, Mootichinke Yesuusi Kiristoosi su'minni Anninke Maganu Ayyaaninni hayishshidhinoonni; qullaawoota ikkitinoonni; keeraa'mitinoonni.

12Baalankare fajjinoonnie; baalunkuri kayinni kaa'lannoha di"ikkino. Baalankare fajjinoonnie; ikkirono, ani mitturirano borojjicho di"ikkeemmo.

13Sagale godowunnite; godowuno sagalenniho. Maganu kayinni sagaleno godowano hunanno. Mannimma Mootichunnite ikkinnina, foorrennita di"ikkitino; Mootichuno mannimmanniho.

14Maganu wolqasinni Mooticha reyotenni kayisinte gede, ninkeno kayisannonke.

15Mannimma'ne Kiristoosi biso ikkitinota diaffinoonni? Kiristoosi biso masse foorrenniha assoyya? Di"ikkanno.

16Woy foorate ledo namoominohu ise ledo mittu bisiha ikkannota diaffinoonni? «Lamunku mitto biso ikkitanno» yine borreessinoonni.

17Mootichu ledo mittimma afi'rinohu kayinni Ayyaanunni isi ledo mitto ikkanno.

18Foorretewiinni xooqqe! Mannu loosannohu wolu cubbi mannimmasi dikisanno. Foorannohu kayinni, cubbo manninatisi giddo loosanno.

19Mannimma'ne giddo'ne hee'rannohunnita Qullaawu Ayyaanita ikkitinota diaffinoonni? Konne Ayyaanano Maganuwiinni adhitinoonni. Ki'ne umi'nere di"ikkitinoonni.

20Waagunni hidhinoonni'nereeti; kunnira mannimma'nenni Magano ayirrisse.

← Chapter 5 Jump to: Chapter 7 →