1 Corinthians 7

Sidamo

← Chapter 6 Jump to: Chapter 8 →

1Adhamate daafira borreessitine xa'mitinoonnie xa'mo garinni, woleteemmero meyata adha hooga danchate.

2Ikkollana adhama hooga foorre abbitannota ikkitinohura, mittu mittunkura umisi galte heedhusiro danchaho. Mitte mittenterano umise minaanni hee'risero danchaho.

3Minaanni galtesira hasiisannore baala wonshose; iseno minaannisera hasiisannore baala wonshito.

4Minaama manninati minaannisera gutoho ikkinnina, iseha calla di"ikkino. Minaanni manninatino minaamasira gutoho ikkinnina, isiha calla di"ikkino.

5Huuccatto assi'rate yitine ma'litinoonni yannara agurranna, wole woyite mimmiti'nera qakkinoonte. Tenne yortonni umo'ne qee'la hooggineenna Sheexaanu jifanno'nekki gede galagaltine mitteenni heedhe.

6Konne coye malu gede asse kulanni noommo'ne ikkinnina hajajo di"ikkitino.

7Mannu baalu galte adha agure ane gede ikke hee'roommero baxeemmo; ikkollana Maganu mittu mittunkura addi addi elto uyino; mitoho mittu gariti, woleho wolu gari elto noosi.

8Adhitinokkiriranna galte shiidhinorira kuleemmona, insano anente gede adhitukkinni heedhoommero danchaho.

9Ikkollana yortotenni giiramantenni adha woyyitanno. Umonsa qee'la hoogguro, adhitona.

10«Minaama minaanniwiinni baxxitoonke. Baxxituro kayinni, mine assidhukkinni ofolto;

11woy minaannise ledo araaranto. Minaannino minaamasi fushshe ha'risoonke» yee galte afi'rino manna hajajeemmo. Tini hajajo Mootichunnite ikkinnina, aneta di"ikkitino.

12Wolootaho yeemmoti, (Ane ikkummokkinni Mootichu): Mittu ammanaanchira ammantinokki galte heedhusiro, iseno ledosi hee'ra baxxuro, fushshe ha'risoonkese.

13Ammanaanchote ammaninokki minaanni hee'risero, isi ledose hee'ra baxiro, iseno iso agurtoonke.

14Ammaninokki minaanni ammantino minaamanni keeraa'manno. Ammantinokki minaamano ammanino minaanninni keeraa'mitanno. Hakkunni ka'a ooso'ne battaabbinoreeti; xa kayinni keeraa'mitanno.

15Ammaninokkihu, baxxa hasi'riro kayinni baxxona. Ammantinori labbaahano ikko meyati, kunni coyinni diusurantanno. Maganu woshshinonkehu keere hee'nammoraati.

16Ati ammanoottati, ammaninokkiha minaannakki gatisattata mayinni afatta? Ati ammanoottohu, ammantinokkita minaamakki gatisattota mayinni afatto?

17Mittu mittunku Maganu yiinosi garinninna woshshinosi garinni hee'rona. Beetekiristaanna baalate kuleemmo wodho tenneeti.

18Ayino barcime hee're ammaninoha ikkiro, barciminokkihu gede ikkoonke. Barcimikkinni ammaninohu, barcimate qarramoonke.

19Barcimano barcima hoogano leddannori dino. Qaru coyi Maganu hajajo wonshate.

20Kunnira, mittu mittunku ammani yannara noo garinni hee'ro.

21Borojjimmatenni heedhe ammanoottoro, hattennera qarrantooti. Borojjimmatenni fula dandaattoha ikkiro fuli.

22Borojjimmatenni hee're Mooticha ammaninohu, Mootichunni wodaminoho; borojjimma galinokkihu hee'rirono, hakku Kiristoosi borojjichooti.

23Ki'ne waagunni hirroonnireeti; kunnira, mannu borojje ikkitinoonte.

24Roduuwa'ya, mittu mittunku Maganu ledo, woshshamino garinni hee'ro.

25Adhantinokkiri daafira Mootichuwiinni adhoommo hajajo dinoe. Ikkirono, Mootichu maaronni addaxxinanniha ikkoommo daafira, hedoommore coyi'reemmo.

26Xa noo qarrinni kainohunni, mannu noo garinni hee'riro woyya lawannoe.

27Galte adhoottoha ikkiro, fushshite ha'rissooti. Adhoottokkiha ikkittoro, adhattora hasidhooti.

28Adhittoro kayinni cubbo di"ikkino. Seemo beetto mine assi'ra cubbo di"ikkitino. Ikkollana, adhantannore lowo qarri amadannonsa; ane halchono kunni qarrinni gattinanni gedeeti.

29Roduuwa'ya, hatto yeemmo woyite, xa gatte noo yanna haranchote. Kunni ka'a, adhite noori adhitinokkiri gede ikkite heedho.

30Wi'litannori wi'litannokkiri gede, hagiidhitannori hagiidhitannokkiri gede ikkite heedho.

31Tenne gobba qiniite afidhinori, noonsari nookkihu gede assite kiirtona; xa noohu tenne gobba dani sa"annoho.

32Ani baxeemmohu dadillitinikkinni heedhinaraati. Adhinokkihu Mooticha hagiirsiisate, Mootichu coye hedanno.

33Adhinohu kayinni wodanisi lamewa beehamino daafira, galtesi hagiirsiisate tenne gobba coye hedanno.

34Kunni garinni wodanisi lamewa beehamino; adhantinokkitinna seemo beetto maalasenna lubbose keereensidhe Mootichu coyira diinaggaabbanno. Adhantinoti kayinni galtese hagiirsiisate yite tenne gobba coye heddanno.

35Tenne yeemmohu, Qarrisammo'nera ikkikkinni, ki'nera injaa'nera yeeti. Hedo'ne billaallitukkinni wo'mu wodaninni Mootichaho aamanantinara yee ikkinnina, millo ho'lammo'nera di"ikkino.

36Mittu manchi huucci'rino seemo amanyootunni amada hoogironna iseno yanna xiibbanni noo daafira adhara hasi'riro, hedinore assona; cubbo di"ikkannona adhanto.

37Wodanisi daaqikkinni kaajje, isonoo geisi're, seemo beetto adha hoogate hedo heedhusiro kayinni, danchaho.

38Kunnira seemo beetto adhannohu dancha coye assino; adha hooginohuno roore dancha assino.

39Meyati minaannise lubbotenni noo geeshsha usurantinote. Minaannise reyiro kayinni ammaninohalla ikkiro, baxxinohura assi'ra dandiitanno.

40Ane hedo gede ikkiro, adhantukkinni heedhoommero roore hagiirraame ikkitanno. Anerano Maganu Ayyaani ledo'ya nooha lawannoe.

← Chapter 6 Jump to: Chapter 8 →