Song of Solomon 1

Sidamo

Jump to: Chapter 2 →

1Faarso wo'manta roortannoti Selemooni faarso tenneeti.

2Baxillikki woyinete xajjenni roore coommannoha ikkino daafira, suumekkinni sunqie.

3Buudhatto shitto tanni yite su'niitanno; su'mikkino shitto baalantenni roore su'naannoho. Seennu baxannohehuno kunniraati.

4Anga'ya amadde goshooshie; mitteenni dondo! Moote'ya holgikkira eessie; hakko mitteenni hagiidhineemmo. Baxillekki woyinete xajjenni roore naandeemmo; kunnira, seennu baalu lowo geeshsha baxannohe.

5Ki'ne Yerusaalamete seenni macciishshe! Ani kolishshote; ikkollana kayinni xumate. Ane kolishshimma Qeedaari dukkana labbanno; xumme'ya Selemooni gashshooti mini dukko gedeete.

6Dana'ya kolishshiishshinoti arrishshotena, kolishshimma'ya daafira arrassitinoonte"e. Ama'ya ooso roduuwi'ya, ane ledo giwantino daafira, woyinete kaashshi agaraancho assitinoe; kunnira umo'ya agadhate yanna diafi'roomma.

7Baxillaancho'ya, hanni ge'reewokki hosiisi'rattohu mamaatiro kulie! Barru taalootira caa'lanno gede assattohu hiikkooti? Ate hasi'ranni, alba diphitino mancho gede ikke mayira raataaweemma?

8Ati seennu baalunkunni roore xuma, darga afoottakkiha ikkiro, ge'reewu ha'ruma la'anni ha'ri. Meu wilii'lekki, allaalaasinete dukkanna mule allaa'li.

9Baxillaancho'ya, Feriooni faradi gaare giddo noota, xuma ganya lawatta.

10Kiccakki maccate butichinni biiffinote; goowikkino irrunni gaamaarinoho.

11Ninke lende birru shura afi'rinoha, culku irra seekkisiinseemmohe.

12Moote haranchu daallasi aana gaffi asse hee'reenna, shitto'ya su'niilli mine wo'mi.

13Baxillaanchi'ya, guntuti'ya qarrira noohu, gujuujjete su'nari gedeeho.

14Baxillaanchi'ya, Ayini-Gaadi woyinete kaashshi darga, fulino arfaasi gedeeho.

15Baxillaancho'ya, ati xumate! Hiitto biifoottate! Illekki luulakkote.

16Baxillaancho'ya ati xumaho. Addintanni banxanniho; daallasinke shaqqado hayissooti.

17Mininke tuuqqa daguwunnite; qalchuno hoommetenni gannoonniho.

Jump to: Chapter 2 →