Song of Solomon 8

Sidamo

← Chapter 7 Jump to:

1Ati, ama'ya unuuna qane lophinohu, rodii'ya gedeeha ikkattoehu baino! Hatto ikkoommero, doogote afi're sunqeennahe, ayino dimishannoe.

2Ama'ya minira massi'reennahe, baxillu gara rosiisattoehu baino. Roomaanete laalonni coomminshoonnita, fila woyinete xajje hayikkisi'reemmahehu gatino.

3Guracho angasi barkisannoe; qiniitichotenni hanqafannoe.

4Ki'ne Yerusaalamete seenne! Baxillu umisi hasi'ra geeshsha, kayissinannikki gedenna, baqqi assitinannikki gede eegameemma'ne.

5Baxillaanchose irkidhe, halallinni daggannoti tini ayeti? Bi're amakki gamaa'mite iltuhewa, laalanno haqqichi hunda goxxe noottoha, baqqi asse kayisoommahe.

6Hegere baxillinni wodanikki giddo qa'misie; angakkira maatamu gede ane calla amadie. Baxillu reyote gedee jawaataati; hinaasuno waammate gedee kaajjadooti; baxillu giirate gede buwanno; baxillu Kaaliiqi buwanooti.

7Wayi batinyi baxillu giira xoyissa didandaanno; lolahuno fee haa're ha'ra didandaanno. Noosi jiro baalantenni baxille hidhara hasi'rannohu hee'riro, baxille woxunni anfannikki daafira, hakkonne mancho mannu arrassannosi.

8Unuunu leellinokkiti shiima rodoo noonke; adhannohu xa'mi'riro, rodoonke hiissineemmo?

9Ise huxxa ikkitoommero, birru shae seekkineemmosehu baino. Huxxu waalcho ikkitoommero, Libaanoosi haqqenni cufana seekkineemmosehu baino.

10Kuneeti ani huxxaho; guntuti'yano huxxu shae gedeeho. Baxillaanchi'ya ledo hee'rummaro, hagiirrenna keere afi'reemma.

11Selemoonira Ba"aali-Hamooni yinanniwa, woyinete dargi noosi; woyinete dargano loossannorira kiraho uyino; mittu mittunku 1,000 kinchu birra abbitannosi.

12Woyinete dargi ane umi'yaho; Selemooni'ya, ati 1,000 kinchu birra gatisidhe, loosaasinete 200 kinchu birra uyi.

13Baxillaancho'ya, kaashshu giddo heedheenna, jaalla'ya huurokki macciishsha hasidhinona, hanni anerano huurokki leellishie.

14Baxillaancho'ya, rakke anewa amo; su'niitanno haqqe fultanno ilaalla aana, kukkubbanno geedimo woy aja gaarraancho lawi.

← Chapter 7 Jump to: