Song of Solomon 7

Sidamo

← Chapter 6 Jump to: Chapter 8 →

1Mootete ila lawattati, lekkakki fano koatte giddoonni la'niro, hiitto biiffinote! Giwoodikki qaru ogeessi seekkinoha, dilqu irra lawanno.

2Mudukkikki qadhitinota woyinete xajje wonshinoonni birille lawanno; hallikki, daraaro gaangeessine usurroonnita, qamadete nadala lawanno.

3Lamunku guntutikki, lakko qalaminore bulaate wilii'le lawanno.

4Goowikki, ilkunni seesiinsoonni shae lawanno; illuwakki, lowiidihu Hasebooni Katami, huxxi waalchi mule noo kofamma labbanno. Sanokki, alba Demaasiqo widira higginota, Libaanoosi shae labbanno.

5Umikki qoonchi Qermeloosi Ilaali gedeeho; dananchikki shuri mootete haarre lawanno; shurikki xumme mootete wodana moortanno.

6Baxillaancho'ya, ati hiitto biifootta! Hiitto xu'mootta! Baxillikki hiitto tashshi assanno!

7Uurrinshakki, saattichu haqqa labbanno; guntutikkino saattichu hunduruurro lawanno.

8Saattichu haqqicho gidde, laalose hanqifi'ra baxeemmo. Guntutikki woyinete hunduruurro gegeeho; foolikki su'niitanno haqqicho gedeeho.

9Afiikki su'niilli, fila woyinete xajje gedeeho. Hatto ikkiro, woyinete xajje, baxillaanchi'ya suumenna, hinko mereero daaddanni dirrito.

10Ani baxillaanchi'yate; isino ane halchanno.

11Baxillaancho'ya, amo fulle xawo ha'nona; qacha e'ne hakko gallona.

12Gunteno woyinete kaashshi giddora ha'no; woyine daraartino gedeenninna, roomaaneno dartino gedeenni la'no. Hakkiicho baxille'ya leellisheemmahe.

13Inkoyete laalo su'niillinna, baxissannoti addi addi laalo qaenkera wo'mite no. Baxillaancho'ya, hatte laalo giddonni, le'inotanna mule xinqinoonnita atera wodhoommahe.

← Chapter 6 Jump to: Chapter 8 →