Song of Solomon 5

Sidamo

← Chapter 4 Jump to: Chapter 6 →

1Ayirrado rodoo'ya, idayicho'ya, kuneeti kaashshi'ya dargira eoommo; kaarbe'yanna shitto'ya daraaro xinqi'roommo; malawi'ya leo qasonte ledo itoommo; woyinete xajje'yanna ado'ya agoommo. Ki'ne baxillaasine, baxillunni kassi yitina geeshsha itte, agge.

2Ani goxoomma; wodani'ya kayinni baqqi yee no. Baxillaanchi'ya haaqeete, «Ayirrado rodoo'ya, idayicho'ya, kullannire afi'roottakkiti lemboolcho'ya, eeggatena waalcho fanie. Umi'yara loju eelino; danancho'ya hashshi kifiifo shanshitino» yee, waalcho gangananna macciishshoomma.

3Uddano'ya fushshiroomma; galagale hiitto uddi'reemma? Lekka'yano hayishshi'roomma; galagale hiitto xursiisi'reemma?

4Baxillaanchi'ya cufanu xullo widoonni qole angasi diriirsi; isi daafira giddo hellee'ya shafantu.

5Kunnira, baxillaanchi'yara cufana fanammara kaoomma; cufanu waawancho amadummata, anga'yanni kaarbe lolakku; qubbe'yanni kaarbe cocco'u.

6Baxillaanchi'yara cufana fanoommasi; isi kayinni ha're kaino. Huurosi macciishshate lowo geeshsha quqquxamoomma; diinaggaawe hasi'roommasi; afi'rammasira kayinni didandoomma. Woshshi'roommasi; isi kayinni yee diyiinoe.

7Ha'rantanni katama agartannori affinoe; ganteno madiissitinoe; hakkuri katama agartannori, uddano'ya mulqite adhitino.

8Ki'ne Yerusaalamete seenni, baxillaancho'ya affinoonniha ikkiro, ani baxillisinni kainohunni xiwamoommata, kultinannisi gede, eegameemma'ne.

9Ati meentu baalunku mereero biifoottati, halaalinta baxillaanchikki wolootuwiinni baxxinohoni? Kageeshshi geeshsha eegamattankehu, isi wolootuwiinni mayinni baxxeennaati?

10Baxillaanchi'ya addinta xumahonna jawaataho; tonnu kumi labballi giddo iso lawannohu dino.

11Albisi filu culki gede xawanno; dananchisino shaqalahonna kolishsho kuulaati.

12Illuwasi xashshu mule anfannihunna, adotenni hayishshinoonni lembooli gede biiffanote.

13Kiccasi su'naanno haqqi fulanno darga labbanno; suummasi tanni yee su'naannoha, kaarbete foole coccoanno daraarchi gedeete.

14Anguwasi dilqu migira afi'rinoha culku daabba labbanno; manninatisi bulu dilqinni seesiinsoonni ilki gedeeho.

15Lekkuwasi culku aana kaasantinota, cala yaanno kinchi tuuqqa labbanno. Danisi daguwunni biifinoha, Libaanoosi Ilaala lawanno.

16Afiisi malawimma coommanno; suudisi baalu baxisannoho. Yerusaalamete seenne, baxillaanchi'yanna jaali'ya togooho!

← Chapter 4 Jump to: Chapter 6 →