Song of Solomon 4

Sidamo

← Chapter 3 Jump to: Chapter 5 →

1Baxillaancho'ya, ati hiittoo xumaati! Hiitto biifootta! Guggu'laanchikki giddoonni la'niro, illekki luulakkote. Umikki dananchi, Geleaadi Ilaalinni dirrannoha, koliddaanna me"e lawanno.

2Hinkokki giddonsa mitte maseena heedhukkinni, lakkuwa qalannohu, ordansa hanxe hayishshinoonnihu, waajjuullu ge'reewi gede baxissannote.

3Suummakki gujuujjete gede biiffinote; hasaawatta woyiteno lowo geeshsha baxissanno; lamenti kiccakki guggu'laanchikki giddoonni la'niro, lamewa balka yitinota roomaanete laalo labbanno.

4Goowikki, Daawiti shae gedee seedaati; goowikki irrino, Daawiti shae aana suntoonnita kume wonquwanna, olu bagado lawanno.

5Lamunku guntutikki, lakko qalame, dubbu daraaro giddo hosannoha bulaate wilii'le lawanno.

6Hashshinohu sooda geeshsha, tunsichuno sa"a geeshsha, kaarbete ilaaliwa, hixaanu gaariwa mare fooliishshi'reemmo.

7Baxillaancho'ya, manninatikki xumaho; kullannireno diafi'rootta.

8Idayicho'ya, amo ane ledo Libaanoosi Ilaalinni dirri; Libaanoosi Ilaalinni amo; Amaana Ilaali guunxonni dirri; doobbichunna dagunchu hee'rannowiinni, Seniirinna Hermooni ilaallanni dirrite amo.

9Ayirrado rodoo'ya, idayicho'ya, la"atta garinna goowikki irri wodana'ya moorino.

10Ayirrado rodoo'ya, idayicho'ya, baxillikki hiitto hagiirsiisannoho! Baxillikki woyinete xajjenni roore tashshi assanno; su'niillikkino shitto baalanta rooranno.

11Baxillaancho'ya, suummakkinni malawu leo lolakkanno; arrawikkinnino malawunna ado burqitanno; uddanokki foolino, Libaanoosi dubbi fooli gedeeho.

12Ayirrado rodoo'ya, idayicho'ya, ati, kinchu huxxinni qoqqomboonni gati gedeete; wolu eannokki gede cunfe agurroonni buicho lawatta.

13Ati, doorroonniti roomaanete laalo, ha'nashshunna naardoosi shitto noo gate lawatta.

14Naardoosi, su'niitanno irde hixichi, duuwanchu, hixaanu gede su'naannohu addi addi haqqi noose. Qolteno giddose kaarbe, daraaranno argiisinna, su'niitannoti addi addi haqqe fultanno.

15Ati gate lolakkanno buichootinna, xoannokki waati; Libaanoosi ilaalla hundinni, burqanno xashshi gedeete.

16Ati aliyye bubbe kai! Ati wodiidi bubbeno kawa amo. Dagge haqqe'ya giddo bubbisi; diilallono, danchu fooli giddo wo'minota ikkito. Baxillaachi'ya haqqe giddora dayona; doorroonni laalono itona.

← Chapter 3 Jump to: Chapter 5 →