Song of Solomon 3

Sidamo

← Chapter 2 Jump to: Chapter 4 →

1Hashsha wo'ma daallasi'ya aana hee're, lubbo'ya baxxannoha afi'rate hasi'roomma; diinaggaawe hasi'roomma; afi'ra kayinni didandoomma.

2Katamu giddo noota, ruukkadonna hala'lado doogga baala ha'ramoomma; lubbo'ya baxxannoha afi'rate hasi'roomma; afi'ra kayinni didandoomma.

3Ha'rantanni katama agartannori affinoe; anino, «Lubbo'ya baxxannoha affinini?» yee xa'moomma.

4Insawiinni shiima geeshsha sa"anni hee'renni, lubbo'ya baxxannoha afi'roomma. Fulannokki gede seekke cu'mi'roomma; ama'ya minira adhe ha're, ani ilamoomma holgira eessi'roomma.

5Ki'ne Yerusaalamete seenne! Baxillu umisi hasi'ra geeshsha, kayissinannikki gedenna baqqi assitinannikki gede, gaarraanchunna bulaate su'minni eegameemma'ne.

6Wiliilete gede hossi yiinohu, su'narunna kaarbete foole afi'rinohu, kuni halallinni daannohu maati?

7Kuneeti Selemoonihu ayirradu barcimi daanni no; Israeelete wolqaataammi giddonni doorroonniri, 60 ayirradda agaraasine dukkisse no.

8Baalunku bagado amandanni gara egentinoreetinna, olunni fullakkinoreeti. Hashsha dagganno dano gargarate, mittu mittunku bagado qodhitino gedeenni galtanno.

9Moote Selemooni ofollannohu, ayirradu barcimisi, Libaanoosi daguwinni seekkinoonniho.

10Ayirrado barcimasi dukkino tuuqqa, aanaho birra xallinoonnireeti. Irki'rannorichi culkunni seesiinsoonniho; ofollannowa xiillicha hocco aanaho dimboonni; giddoyidosi Yerusaalamete seenni baxillinsanni goode seesiisino.

11Ki'ne Tsiyooni seenne, moote Selemooni la"ate amme! Isi, amasi wortinosita ayirrinyu ba'latto umoho wodhe no; tenne ba'latto, hagiirrunnihu adhamasi jili barra wodhanno.

← Chapter 2 Jump to: Chapter 4 →