Zechariah 10

Sidamo

← Chapter 9 Jump to: Chapter 11 →

1Gomicho soye xeena dirrisatenni mannaho baatto shaqqishannohu isootina, Kaaliiqi yannasira xeena aanno'ne gede huuccidhe.

2Mannu magannansanna kiilaanonsa xa'mi'ranno; afidhanno dawaro kayinni kaphohonna haafaho. Mitu mitu kaphu haaqee tirtanno; ikkollana kayinni so'risiisannonsa; mulla haafa sheshifachishshannonsa; kunnira mannu baino ge'reewi gede ikke raataawanno; allaalaanchu hooginonsahura qarramanno.

3Kaaliiqi, «Hanqi'ya allaalaasinete aana buwino; anino hakkore bushuulle roorroota qorichisheemmo; olantote Mooticha ikkoommohu ani Kaaliiqi umi'ya hoshsha Yihudu manna seekke agareemmo; insano jawaatu olu faradi gedeere assi'reemmonsa.

4Insa giddonni fulannohu mitu, dhaawate kinchi gedeeha, mitu minu mokkollichi gedeehanna mitu qole olu bagadi gedeeha ikkanno.

5Yihudu manni diinnasi kade doogote sabbi ledo karsiisannoha wolqaataamo bagadaancho ikkanno; Kaaliiqi ledonsa noohura, jawaate olame faradaasine nafa gattukkinni qeele saalfachishanno.

6«Ani Yihudu manna jawaata asseemmo; Israeelete mannano gatiseemmo; marareemmonsa daafira galagalche gobbansa qoleemmonsa. Ani Kaaliiqi Maganinsa huuccattonsa macciishsheemmo daafira, kunni albaanni horonta agure egennoommonsakkiri gedeere ikkitanno.

7Israeelete manni jawaata olanto ikkanno; woyinete xajje aganni noo manni gede hisatanno. Oosonsano tenne qeelle qaagganni hagiidhitanno; Kaaliiqi assinore heddanna tashshi yaannonsa.

8Manna'ya fiiqattotenni woshshe gamba asseemmo; gatise fushshe, kiironsa albinte gede batiseemmo.

9Dagate mereero billaallisummonsarono, hakko fafo gobbara heedhe qaaggannoe. Insanna oosonsa gattanno; mitteenni gobbansa higganno.

10Gibitsete gobbanni qoleemmonsa; Asoorinni gamba asseemmonsa. Gobbansara mannu bati'ranno daafira, Geleaadinna Libaanoosi gobbara heedhanno gede asseemmonsa.

11Qarru baari giddoonni sa'anno woyite, ani Kaaliiqi dambala heeshshi asseemmo. Diime ikkinohu Abbayi Wayi moolanno; boonaaleeyye Asoori gosa shollitanno; Gibitseno wolqa hoogganno.

12Ani manna'ya dhaabbachisheemmo; insano qaali'yara hajajantanni su'ma'ya ayirrissanno. Konne coyi'roommohu ani Kaaliiqaati» yaanno.

← Chapter 9 Jump to: Chapter 11 →