Zechariah 13

Sidamo

← Chapter 12 Jump to: Chapter 14 →

1Olantote Mootichi Kaaliiqi, «Hatte yannara, Daawiti sirchonna Yerusaalamete manni cubbo, qoleno kaphu maganna magansi'ratenni battaawansanni keereensitanno buicho fa'nantanno.

2Hakka waro, magannansa su'ma gobbate aaninni huneemmo; layinkimeeshsho qaagannonsahu dihee'ranno; battete ayyaaninni coyidhannore kaphu himanaano baattote aaninni hooleemmo.

3Kaphu himana coyi'rinohura annisinna amasi, ‹Kaaliiqi su'minni kaphu himana coyi'rootto daafira reyatto› yite kultannosi. Hakkiinnino sae himana coyi'rate wo'naaliro, annisinna amasi urdetenni qasse shitannosi.

4«Hatte yannara, kaphu himanaano himana coyi'ranna ajuujansa kula saalfattanno; halaalu himanaano uddidhannota saadate orda afidhino uddano uddidhe, manna diso'risiissanno.

5Hattenne agurte mittu mittunku, ‹Ani hee'rummo diri baalunkunni baatto loosi'rella galoommo ikkinnina, himanaancho di"ikkoommo› yitanno.

6‹Himanaancho ikka hoogittona, kuni qotikkira noo bassi mayinnihoyya?› yine xa'minannisi woyite, ‹Jaali'ya mine mannu ledo ganamanni madi'roommowaati› yee dawaranno» yaanno.

7Olantote Mootichi Kaaliiqi, «Bise! Baqqi yite, ledo'ya nooha allaalaasincho'ya gani! Hakkawoyite, ge'reewu billaallanno; manna'ya ani umi'ya gawajjeemmo.

8Gobbate aana noo manni giddonni sasunni lame anga reyiteenna, sasunni mitte anga gattanno.

9Gatinoha mitte anga ikkanno manna haa're giiranniwa masse, birru gede daashshe, culku gede fonqole xalaltanno gede asseemmonsa. Hakkunni gedensaanni anewa higge huuccidhanno; anino dawareemmonsa. Anino, ‹Ki'ne manna'yaati› yeemmonsa; insano, ‹Kaaliiqi Maganonkeeti› yitannoe» yaanno.

← Chapter 12 Jump to: Chapter 14 →