Zechariah 5

Sidamo

← Chapter 4 Jump to: Chapter 6 →

1Galagale laeemmo woyite, borreessinoonnihu 1 xaaxo gogi iima buuwanna afummo.

2Sokkaasinchuno, «Maa la'anni nootto?» yee xa'mie. Anino, «Hojja 20 cigile, godowa 10 cigile ikkitinoti 1 borreessinoonniti gogu xaaxo iima buubbanna la"anni noommo» yoommo.

3Sokkaasinchuno qole, «Xaaxamino gogira giddoonni gobba baalante aana dagganno rumo borreessinoonni; mitto widoonni, mooraano baala baattote aaninni ba'annota, wole widoonni qolle, kaphunni xaartannori baalu ba'annota borreessinoonni.

4Olantote Mootichi Kaaliiqi, ‹Tini soyemmo rumo, mittu mittunku mooraanchi miniranna kaphunni xaarannohu minira e'anno; e'anno woyiteno, hakkiicho keeshshite minensa co'o assite diigganno yaanno› » yii.

5Sokkaasinchuno galagale anewa daye, «Kune lai, wolu coyino daanni no!» yiie.

6Anino, «Hakku daannohu maati?» yee xa'mummo. Isino, «Safarranni gimboolaati; kunino baatto baalate aana loonsanni hee'noonni cubbo leellishannoho» yiie.

7Gimboolu siwiilunni seekkinoonni tuana afi'rinoho; la"anni hee'reenna tuanu fa'nami; gimboolu giddono mitte mancho ofolte no.

8Sokkaasinchuno, «Tini mancho bunshete lawishshaati» yiiehu gedensaanni, mancho woro qole xiiwe tuana daware tui.

9Gotti yee la"anni hee'reenna, 2 meenti lowo qoola afi'rino bajji gede buuwanni anewa hige daye, gimboola uullanni kayise haa're buuwi.

10Anino, «Gimboola hiikka haa're ha'ranni no?» yee sokkaasincho xa'mummo.

11Isino, «Baabiloonira haa're masse gimboolaho mine minaraati; minu miname goofihu gedensaanni, magansi'nanni gede gimboola masse mine woranno» yiie.

← Chapter 4 Jump to: Chapter 6 →