Zechariah 7

Sidamo

← Chapter 6 Jump to: Chapter 8 →

1Daariyoosi moohihunni shoolki diro, Kisilewu yinannihu honsikki agani eihunni shoolki barra, Kaaliiqi anera kulinoe sokka aante noote:

2Beetelira hee'ranno manni, Sharetserinna Regemeleeki ledonsa noo manni ledo, Kaaliiqi maasso dirritanno gede huuccitona Qullaawu Minira soyinsa.

3Qolteno qeesootanna himanaano, «Lowo dirinni kayinse xaa geeshsha assinummonte gede, diru eihunni ontikki ontikki aganira itanna aga agurre Qullaawu Mini daafira wi'linollani?» yite xa'mitona.

4Hakkunni gedensaanni, anewa dagginoti Olantote Mootichi Kaaliiqi sokka,

5«Saihu 70 diri giddo diru eihunni ontikkinna lamalki aganira ittukkinni galte hossanni wi'litinohu ane ayirrasate ikkinokkita mannahonna qeesootaho kulinsa;

6ittanninna agganni heedhinohuno uminsaraati» yitannote.

7Yerusaalame duroo'mitenna manna wonshidhe noo yannara, katamu gaangaawira noo qachira calla ikkikkinni, Wodiidi ragiranna Galchimi gaarra lekkaalloonni lowo manni hee'ranno yannara, Kaaliiqi albi himanaano widoonni coyi'rino qaali konneeti.

8Kaaliiqi Zakkaariyaasira,

9«Ani Olantote Mootichi Kaaliiqi manni'yara albaanni oommo hajajo, ‹Taashshitine coyidhe; ki'ne ki'nenee mararre; mimmiti'nera shooshaqqe.

10Mereero'ne hee'rannore galte shii'rino meento, annanna ama afidhinokkire, wole gobba mannanna qarraataamma baala gadadissinoonte. Mimmiti'nera busha heddinoonte.›

11«Manni'ya kayinni, mokkookke badhe wodhe yoommota macciishsha giwino;

12wodana jaamu kinchi gede kaajjishino; ani Olantote Mootichi Kaaliiqi, albi himanaano widoonni qole Ayyaani'yanni oommonsa Seeranna qaale'ya baalanka macciishsha giwinohura, lowo geeshsha hanqoommo.

13Ani coyi'reenna, macciishsha gibbunte gede, anino huuccidheenna dimacciishsheemmonsa.

14Hombobolattete gede fee haa're ha're affinokkitera allaggu gobbara heedhanno gede assoommonsa. Tini dancha gobba kayinni, ayino hee'rannokkita ona ikkite gattu» yaanno Olantote Mootichi Kaaliiqi.

← Chapter 6 Jump to: Chapter 8 →