Zechariah 4

Sidamo

← Chapter 3 Jump to: Chapter 5 →

1Ledo'ya hasaawanni noo sokkaasinchi galagale daye, goxino mancho kayinsannihu gede asse shafe,

2«Maricho la'anni nootto?» yee xa'mie. Anino, «Lamala caabbiyye nooha mitto culkunni seekkinoonniha caabbicho worranni uduunnicho la"anni noommo. Aanasi zayitete gambayichi no; lamalunku caabbichira heqichu noonsa.

3Hakkunni uduunnichi mule guraanninna qiniiteenni 2 ejedhete haqqe no» yuummosi.

4Hasaawisanni nooe sokkaasincho, «Mooticha'ya ballo, kuri maati?» yee xa'mummo.

5Isino, «Kuri maatiro diafootto?» yiie. Anino, «Mooticha'ya ballo, diafoommo» yuummosi.

6Hakkunni gedensaanni sokkaasinchu, «Tini Kaaliiqi Zerubaabeelira soyino sokkaati: Olantote Mootichi Kaaliiqi, ‹Qinaannohehu, Ayyaani'yanniiti ikkinnina, wolqakkinninna jawaantekkinni di"ikkino› yaanno.

7Zerubaabeeli! Kuni albakkiinni noo ilaali maati? Taalo xawo ikke gatanno; atino Qullaawa Mine galagalchite minatto; Mine tantanatto woyite mannu, ‹Hiittoo xumaati!› yaanni cancanno» yiie.

8Ledeno Kaaliiqi,

9«Qullaawa Mine Zerubaabeeli safino; mine gudannohuno isooti. Kuni ikkanno woyite, mannu ate soommohu ane ikkoommota afanno.

10Xa loonsoonniri shiima ikkino daafira mannu dihagiidhino; ikkirono, Zerubaabeeli mina uurrisannokkita affuro hagiidhitanno» yiie. Sokkaasinchuno, «Lamala caabbiyye gobba baala la'annoti Kaaliiqi illeeti» yii.

11Qoleno sokkaasincho, «Tini caabbiyyete uduunnichira guraanna qiniiteenni nooti lamenti ejersu haqqe mayinnite?

12Qoleno, ejersu zayite giddoonni higge lolakkanno boombiicho 2 culkunnitera qoteho nooti 2 ejersu sinna mayinnite?» yee xa'mummo.

13Isino, «Kuri maatiro diafootto?» yiie. Anino, «Mooticha'ya, diafoommo» yoommo.

14Isino, «Kuni lamunku manni, baatto baalate Mootichi Kaaliiqi soqqantasira buurinoreeti» yii.

← Chapter 3 Jump to: Chapter 5 →