Zechariah 3

Sidamo

← Chapter 2 Jump to: Chapter 4 →

1Hakkunni gedensaanni Kaaliiqi, Qeesootu Qara Iyyaasu Kaaliiqi sokkaasinchira albaanni uurre nooha ajuujatenni leellishie. Sheexaanu Iyyaasu yekkeerara qiniitesiinni uurre no.

2Kaaliiqi sokkaasinchino Sheexaane, «Ate Sheexaane, Kaaliiqi rufohe! Yerusaalame baxannohu Maganu rufohe! Kuni manchi, Kaaliiqi boosaasinchu gede giirate giddonni haa're fushshinohowe!» yiisi.

3Iyyaasuno xurtino uddano uddi're sokkaasinchu albaanni uurre no.

4Sokkaasinchuno soqqamaanosi, «Tenne xurtino uddano fushshesi!» yee hajajinsa. Falaqqi yee Iyyaasuwa hige, «Kuneeti saokki atewiinni hooloommo; faayya qeesimmate uddanono uddisiiseemmohe» yiisi.

5Anino, «Xurinokkiha xaaxi'nanni koffiya umisi aana wora habbinoonte» yuummo. Insano Kaaliiqi sokkaasinchi hakkiicho uurre hee'reenna, Iyyaasura umoho xurinokkiha xaanxoonni koffiya worte, faayya qeesimmate uddanono uddisiissusi.

6Hakkunni gedensaanni sokkaasinchu Iyyaasu qorophisiisanni,

7«Olantote Mootichi Kaaliiqi, ‹Doogo'ya aana ha'rittoronna looso'ya baala guutittoro, qullaawa mine'yanna gudumaali'yara mookke hee'ratto; alba'yaanni uurrite noo sokkaasine huuccatto macciishsheemmonte gede, ate huuccattono macciishsheemmo.

8Qeesootu qara Iyyaasu, Macciishshi! Ki'neno ledosi soqqantinannirinna albillittete ikkannorira, danchu coyi malaate ikkitinoonniri konne coye wodanche; kuneeti, «Sina» yine woshshinanniha soqqamaancho'ya leellisheemmo.

9Kuneeti Iyyaasu albaanni 7 suude afi'rinoha mitto kincho woreemmo; isi aanano borrote xawishsha borreesseemmo; tenne gobba cubbono mittu barrinni haa're hooleemmo.

10Hakku barri iillanno woyite, umi'ne woyinenna balase'ne hunda ofoltine ollaa'ne jilaho woshshitinanni qawaaxxidhine heedhinanni› yaanno» yii.

← Chapter 2 Jump to: Chapter 4 →